Silempwale ni Luka

3 Seettaka iyaakha 15, Tibeerio Seesari olamulelaka ni Ponsio Pilato ori ene kuvernatoro a oYudeya, Herodi*+ aari namalamulela a edistritu ya oGalileya. Vano Filipe, munnawe Herodi, aari namalamulela a edistritu ya wItureya ni oTarakoniti, nto Lisaania aari namalamulela a edistritu ya Abileni, 2 mahiku a mukhulupale a anamukuttho Hanaaxi ni Kaifa.+ Mahiku awo, Muluku aahilavula ni Yohani,+ mwaana a Zakariya, moothakoni.+

3 Vano Yohani aaheetteetta mapuro ootheene yaattamenle muro Yordani, aalaleeryaka atthu wiira opatiso ti ethoonyeryo ya orukunuxa murima, wiira mutthu oleveleliwe itampi,+ 4 ntoko silempwale aya eliivuru ya profeta Yesaya, wiira: “Ninniiwanyeya nsu na mutthu onikhuwela moothakoni, ohimyaka wiira: ‘Mulokiherye ephiro ya Yehova!* Mookolole istaraata sawe.+ 5 Malitti ootheene yuuheeliwe, miyaako ni mattumuxa ootheene sipwexakasiwe. Iphiro sookottoopa sihaana wookololiwa, nave iphiro soothipakaseya, suuheeliwe.* 6 Atthu ootheene anrowa woona woopola wa Muluku’”.*+

7 Nto Yohani aahipacerya ohimeerya mittitthi sa atthu saarwa opatisiwa nuuwo, wiira: “Nyuwo nloko na ivili, muleeliwe naani wiira munoowerya otthyawa oviruwa wa Muluku, weiwo ohanle orwa?+ 8 Tivonto, nvareke miteko sinooniherya wiira moorukunuxa murima. Nyuwo muhihimyeke wiira: ‘Tiithi ihu ti Abrahamu’. Mweekeekhai, kinooleelani wiira Muluku onniwerya otatuxa maluku ala wiira ekhale anamwane a Abrahamu. 9 Tthiri, maxatto ori oolikana ene wiira iikitthe* mitathaari sa miri. Tivo, khula mwiri ohiniima mihokorokho sooreera, onrowa wiikitthiwa oriheliwe vaikho”.+

10 Mittitthi iye sa atthu saanimukoha Yohani wiira: “Nto nipakeke exeeni?” 11 Owo aahaakhula oriki: “Mulopwana orina malaya manli, onvaheke nimosa ole ohirina. Nave ole orina yoolya, onvaheke ole ohirina”.+ 12 Nave-tho, alipa-ooliviha mpoosito yaahirwa wiira apatisiwe.+ Awo yaanimukoha Yohani ariki: “Mwiixuttihi, nipakeke exeeni?” 13 Yohani aahiwaakhula wiira: “Muliviheke paahi musurukhu wa mpoosito onivekeliwa ni nlamulo, masi muhincereryeke”.+ 14 Nave-tho, atoropa yaanimukoha wiira: “Hiyo nipakeke exeeni?” Owo aahaahimeerya wiira: “Muhimwiiyerye* aahiiso omootherya mutthu,+ masi muhakalaleke ni itthu munivahiwa anyu”.*

15 Vano atthu yaanilipelela vanceene orwa wa Mesiya. Tivo ootheene aya yaanimuupuwelela Yohani vamurimani vaya ariki: “Khino ola ti Kristu?”+ 16 Yohani aahiwaakhula ootheene aya oriki: “Miyo kinoopatisani ni maasi, masi onnoorwa mutthu oowerya okivikana miyo, yoowo kihimphwanela aka otaphula isantaalya sawe.+ Owo onrowa woopatisani ni ikuru soowaarya ni mooro.+ 17 Nave ookuxa epoxolo mmatatani mwawe, wiira ovalaanye etiriku ni ikavava.* Owo onrowa okwesa saana opuro oneepetthiwa etiriku ni onoothukumanya etiriku mwaarumasiya. Masi ikavava* saya, onrowa opaha ni mooro ohinttipha”.

18 Siiso, aanaatumererya atthu ni moolumo makina manceene, nave aanithipelela waalaleerya ihapari sooreera. 19 Masi Yohani, aahimpwapwela Herodi, yoowo aari namalamulela, mwaha wa Herodiya, mwaara a muulupale awe ni mwaha wa itthu sootheene sootakhala Herodi aapanke awe. 20 Tivonto, Herodi aahipaka-tho etthu ekina yootakhala: owo aahimutthukwela Yohani mukhatteya.+

21 Vano, nuumala atthu ootheene opatisiwa, nave-tho Yesu aahipatisiwa.+ Yesu ovekelaka, erimu yaahihuleya,+ 22 nto ikuru soowaarya saahimukhuruwela sooneyaka ntoko epompa.* Nave, naahiiwanyeya nsu nikhumaka wiirimu, naahimya wiira: “Nyuwo mwa Mwanaka, kinimphentexa aka, onikihakalaliha vanceene”.+