Silempwale ni Luka
4 Yesu aahikhuma omuro Yordani. Muluku aahinvaha ikuru soowaarya, nto ikuru iyo saahimuroiha moothakoni.+ 2 Weiwo, aahiviriha mahiku 40 eehereriwaka ni Diabo.+ Okathi owo wootheene khaalya etthu. Nto nuuvira mahiku awo, Yesu aahivoliwa etala. 3 Vano, Diabo aahimuhimeerya Yesu wiira: “Nyuwo mwaari mwaana a Muluku, murume nluku nla nithatuwe ephaawu”. 4 Masi Yesu aahimwaakhula oriki: “Voolempwa wiira: ‘Mutthu khonikhala mukumi mwaha wa ephaawu paahi’”.+
5 Vano, Diabo aahimuroiha Yesu nipuro noorakama, khimooniherya mwa okathi vakhaani omwene wootheene wa mulaponi.+ 6 Nto Diabo aahimuleela wiira: “Kinimoovahani omwene ola wootheene ni ovuwa waya, okhala wiira ti wawaka,+ nave kininvaha ole onimphavela aka. 7 Tivonto, mwakikokhorela ekwaha emosa paahi, omwene owo wootheene onookhala wawinyu”. 8 Nto Yesu aahimwaakhula oriki: “Voolempwa wiira: ‘Mmukokhoreleke Yehova* Muluku anyu ni mmurumeeleke yoowo paahi’”.+
9 Nuumala-vo, Diabo aahimuroiha oYerusalemu, aahinweliha nipuro noorakamexa na etemplo, onamwiirela: “Nyuwo mwaari mwaana a Muluku, mutuphele vathi vale,+ 10 maana voolempwa wiira: ‘Muluku onooruma malaikha awe’, nto ‘Awo animookhapelelani’. 11 Nave ‘animookaphulani mmatatani mwaya, wiira inawu sanyu sihimane nluku’”.+ 12 Yesu aahimwaakhula oriki: “Voohimmwa wiira: ‘Muhimweehererye Yehova,* Muluku anyu’”.+ 13 Diabo aamalinhe awe omweehererya Yesu, aahimuhiya khurowa, mpakha okathi mukina wooreerela.+
14 Yesu aahitthikela oGalileya+ osareyale ene ikuru soowaarya. Nto ihapari sa miteko sawe sooreera, saahimwareela mapuro ootheene a elapo ele. 15 Nave-tho, aahipacerya wiixuttiha musinagoga* mwaya, nto atthu yaanimulavula saana.
16 Yesu aahirowa oNazarethi,+ weiwo annuwale awe. Ntoko aalimalenle awe nihiku na saabadu, owo aahikela musinagoga,*+ eemela, onasoma Soolempwa. 17 Siiso, aahivahereriwa eroolu ya profeta Yesaya, aahitthukula eroolu eyo, ophwanya opuro waalempwale wiira: 18 “Ikuru sa Yehova* siri ni miyo, okhala wiira ookithanla wiira kaalaleerye ihapari sooreera alipa-oohaawa. Owo ookiruma waaleela ale ari ipottha wiira anootaphuliwa ni owiiriha ale yahoona otthikela woona ni waataphula ale anihaawa.+ 19 Nave, ookiruma waalaleerya atthu mwaakha wa oreera murima wuulupale wa Yehova”.*+ 20 Vano Yesu aahikhuna eroolu eyo, omuttikiherya murumeyi, khukilaathi. Nto atthu ootheene yaari musinagoga-mme,* yaaninwehexexa. 21 Yesu aahaaleela wiira: “Yoolepa ela emanle anyu wiiwa, ehiiraneya olelo-va”.+
22 Atthu ootheene yaanimulavula saana Yesu, enatikinihiwa vanceene mwaha wa moolumo ooreera yaakhuma mwaano mwawe.+ Nto yaanikohana ariki: “Ola khahiyo mwaana a Yosefe?”+ 23 Vano Yesu aahaahimeerya wiira: “Tthiri nyuwo munoorumeela masu ala mukihimyaka miyo, mwiiraka: ‘Nyuwo meetiku, mwiipenuxe mmansinyu. Nave-tho, mpake mmuttettheni mwanyu-mu, itthu niiwale ahu wiira moopaka oKafarnawu’”.+ 24 Yesu aahaahimeerya wiira: “Kinooleelani ekeekhai wiira, khaavo profeta onittittimihiwa mmuttettheni mwawe.+ 25 Nave-tho, kinooleelani ekeekhai wiira: Mahiku a profeta Eliya, yaahikhala athiyana anceene anaamukhweli wIsarayeli, okathi yahaarumpe aya epula mpakha iyaakha tthaaru ni miyeeri 6. Nto yaahikhumelela etala yuulupale elapo ele yootheene.+ 26 Hata vari siiso, Eliya khaarummwale waakhaliherya athiyana awo, masi aarummwale orowa wa muthiyana naamukhweli a oSarefati, elapo ya oSiidoni.+ 27 Nave-tho, mahiku a profeta Eliseyo, yaahikhala anamakokho* anceene wIsarayeli. Hata vari siiso, khuuvo a yaawo aareerihiwe,* masi Naamani a oSiiria,+ taareerihiwe* paahi”. 28 Vano ootheene ale yaiwa itthu iya musinagoga-mme,* yaahinanariwa vanceene.+ 29 Yaaheemela, anvara Yesu anamutthimakiha amuroihaka ota wa epooma. Nto yaahimuroiha oneri* wa mwaako, weiwo waari epooma, wiira amukakhele vathi. 30 Masi Yesu aahivira eriyari aya, onarowa.+
31 Nuumala-vo, Yesu aahikhuruwa onarowa oKafarnawu, epooma ya oGalileya. Nto owo aaniwiixuttiha atthu esaabadu.+ 32 Vano atthu yaahitikinihiwa vanceene ni moota aixuttiha awe,+ maana itthu aixuttiha awe saakhuma wa Muluku. 33 Musinagoga* aahikhala mulopwana mmosa, aavariwe ni nlaikha nootakhala. Mulopwana owo aahikhuwela ni nsu noorunya oriki:+ 34 “Khwaa! Exeeni erina anyu ni hiyo, nyuwo Yesu munazarethi?+ Murwenle onipwetexa? Kinnoosuwelani saana. Nyuwo murummwale ni Muluku!”+ 35 Vano Yesu aahipwapwela nlaikha nle nootakhala, oriki: “Mmaale! Mmukhume mutthu owo!” Nto nlaikha nle naahimurihela vathi mulopwana ole, eriyari ya atthu. Masi khinanvulalinhe. 36 Nuumala oweha etthu ele, atthu ootheene yaahitikihiniwa vanceene, anahimeeryana wiira: “Mmwiiweke moota onilavula awe! Onniwerya oruma malaikha ootakhala, nto awo anakhuma!” 37 Tivonto, ihapari sa Yesu saanimwareela mittetthe sootheene soowaattamela.
38 Okhumaka-ru musinagoga,* aahiphiya owannyawe Simoni. Vano amaathi awe Simoni, yiira ewereiwaka vanceene efeepere,* nto Yesu aahivekeliwa wiira aakhaliherye.+ 39 Yesu aahuurama, aapenuxa efeepere* aya. Niinaano-ru, amaathi awe Simoni yaahivenya anapacerya owaapeela yoolya.
40 Nsuwa nikelaka-ru, Yesu aahiruuheliwa atthu yaawereiwa iretta soovirikana. Owo aaniwiixaatherya matata, onaapenuxa.+ 41 Nave-tho, malaikha ootakhala yaanaakhuma atthu anceene, anakhuwela ariki: “Nyuwo mwa Mwaana a Muluku”.+ Masi Yesu aanipwapwela malaikha awo ni kheemererya wiira elavuleke,+ maana yaanimusuwela okhala Kristu.+
42 Nuumala oxa, Yesu aahirowa opuro wahaavira-viriwa.+ Masi mittitthi sa atthu saahimphavelasa,* khuphiya opuro aari awe. Awo yaaheererya omukhoottiherya okhuma opuro ole. 43 Vano Yesu aahaaleela wiira: “Kihaana olaleya ihapari sooreera sa Omwene wa Muluku ipooma sikina, maana eyo ti etthu kirummwale aka”.+ 44 Tivo, aahirowa waalaleerya atthu a isinagoga* sa oYudeya.