Samuweli Oopacerya
1 Aahikhala mulopwana mmosa a oRamathayimi-Zufi,*+ muttetthe wa omiyaakoni wa wEfrayimi,+ nsina nawe aihaniwa Elikana.+ Owo aari mwaana a Yerohami, mwaana a Elihu, mwaana a Tohu, mwaana a Zufi, a nihimo na Efrayimi. 2 Owo aahikhalana axaarawe anli, mmosa aihaniwa Ana, nave mukina aihaniwa Penina. Penina aahikhalana anamwane, vano Ana khaarina mwaana. 3 Khula mwaakha, mulopwana owo aanikhuma epooma awe, onarowa oSilo+ wiira amukokhorele* ni onvaha mikuttho Yehova a anakhotto. OSilo weiwo, anamwane anli axilopwana a Eli, masina aya Hoofini ni Pineha,+ yaanimurumeela Yehova ntoko anamukuttho.+
4 Nihiku nimosa, okathi Elikana aavaha awe mukuttho, aahinvaha mwaarawe, Penina, ipetaaso sa inama, ni anaawe ootheene axilopwana ni axithiyana.+ 5 Vano aahinvaha Ana epetaaso yootepa oreerexa, okhala wiira Elikana aanimphenta Ana. Masi Yehova khanvanhe Ana mwaana. 6 Masi, Penina aaninveeha Ana, wiira omukhulumule, okhala wiira Yehova khanvanhe mwaana. 7 Penina aanipaka eyo khula mwaakha. Okathi wootheene Ana aarowa awe empa ya Yehova,+ Penina aaninveeha vanceene, nto Ana aanipacerya wunla, ohinaphavela olya. 8 Nto, iyawe,* Elikana, aahimukoha wiira: “Ana, muninlela-ni? Xeeni muhinilya anyu? Xeeni muriipiwe anyu murima? Niireke miyo nkihiyo oolokexa waavikana anamwane 10?”
9 Nuumala atthu ootheene olya ni owurya oSilo, Ana aahivenya. Nto namukuttho Eli, aakilanthi vakhaterani waattamela vamukhora wa etemplo*+ ya Yehova. 10 Ana aahiriipiwa murima vanceene, nto aahipacerya onvekela Yehova,+ ni onanla vanceene. 11 Owo aahimmana natiri ohimyaka so: “Khoo Yehova a anakhotto, nkawehani moota kinhaawa aka, mukuupuwele, muhimuliyale murumeyi anyu, nave munvahe mwaana mwaamulopwana.+ Mwaana owo, kinrowa onvahererya Yehova, mahiku ootheene a okumi awe. Mwaana owo khonrowa ometthiwaka ikharari sawe”.+
12 Nuumala Ana oviriha okathi munceene onvekelaka Yehova, Eli aaniweha iyano sa Ana. 13 Ana aavekela ni murima, nihiiwanyeyaka nsu nawe, aatannya* iyano sawe paahi. Nto Eli aanuupuwela wiira Ana aaroohapaliwa. 14 Eli aahimukoha wiira: “Munrowa ohapaliwa mpakha liini? Muttharuwe owurya eviinyu”. 15 Ana aahaakhula wiira: “Nnaari, pwiyaka! Miyo ka muthiyana ooriipiwa murima vanceene. Nkiwunrye eviinyu, nnakhala etthu ekina yoohapala. Masi kimmuleela Yehova oxanka waka.+ 16 Muhuupuwele wiira murumeyi anyu, muthiyana ohirina efaita. Etthu enkiiriha ovekela vanceene, mwaha woowi kooriipiwa murima vanceene, ni kooxanka”. 17 Nuumala-vo, Eli aahimuleela wiira: “Muroweke ni murettele, nave Muluku a Isarayeli, oovaheeni etthu munvekenle anyu”.+ 18 Siiso, Ana aahaakhula wiira: “Kooxukhurela okireerela wanyu murima”. Nto muthiyana owo aahivenya, onarowa olya. Vano khaariipiwe-tho murima.
19 Moottharelana, yaahivenya voosiisu ene, amukokhorela Yehova, nto yaahitthikela owannyeya oRama.+ Elikana, aahirupa ni mwaarawe, Ana, nto Yehova aahimuupuwela Ana.+ 20 Eyaakha ene yeele,* Ana aahirupala, ni aahimuyara mwaana mwaamulopwana, onvaha nsina+ noowi Samuweli,* maana aahihimya wiira: “Mwaana ola kinvekenle Yehova”.
21 Nuuvira okathi, Elikana aahirowa ni atthu ootheene a etthoko awe onvaha mukuttho Yehova,+ mukuttho yoowo waavahiwa vamwaakhani, ni ovaha mukuttho mwaha wa wiiraneya natiri ammanne awe. 22 Masi, Ana khaaronwe,+ nto aahimuleela iyawe wiira: “Okathi mwaana ola onrowa awe ohiya waamwa, kinoomuroiha ohoolo wa Yehova, okhala wiira onrowa okhalaka weiwo mahiku ootheene”.+ 23 Elikana, iyawe Ana, aahimuleela wiira: “Mpake ele enoona anyu oreerela.* Muhaleke vaava mpakha omuhiiha mwaana owo waamwa. Yehova omaliherye ele ehimmye anyu”. Siiso, Ana aahihala owaani, ni aahimukhapelela mwanawe mpakha omuhiiha waamwa.
24 Nuumala Ana omuhiiha mwanawe waamwa, aahimuroiha oSilo, okunxe ene epooyi yaarina iyaakha tthaaru, ni etthu yoowiiraka ikiilu 11* sa otthu,* ni murinki muulupale waarina eviinyu.+ Nave, aahiphiya empa ya Yehova, oSilo,+ ori ene ni mwanawe. 25 Moottharelana, yaahihitiwa epooyi eyo. Vano mwaana owo aahiroiheliwa Eli. 26 Ana aahihimya wiira: “Mukilevelele, pwiyaka! Miyo ka muthiyana yoole eemenle vakhiviru vanyu opuro ola, onvekelaka Yehova.+ 27 Mwaana ola ti yoola kanvekela aka, nto Yehova ookivaha etthu kanvekenle aka.+ 28 Tivonto kininvaha aka Yehova. Ola onrowa okhala aawawe Yehova, mahiku ootheene”.
Vano, owo* aahimukokhorela Yehova opuro ole.