Atesaloonika Oopacerya
5 Axinnaka, nilavulaka sa okathi othanliwe, nyuwo khamunipirisari olepeliwa. 2 Nyuwo munnisuwela oratteene wiira nihiku na Yehova,+ ninrwa ntoko latarau, ohiyu.+ 3 Okathi atthu anrowa aya ohimyaka wiira: “Nookhalana murettele ni noovareleleya!”, nto anoopwetexiwa niinaano-ru ni vootutuxerya,+ siisaale ntoko owereya onimphwanya awe muthiyana oorupala ohanle oyara. Awo khanrowa woopowa hata vakhaani. 4 Masi nyuwo axinnaka, khamukhanle mweepiphini ntoko alatarau, wiira nihiku nlo noophwanyeeni vootutuxerya. 5 Mweekeekhai, ootheene anyu mwa anamwane a muthuko ni anamwane a othana.+ Hiyo khanihiyo a ohiyu nnakhala a epiphi.+
6 Tivo, nihirupeke ntoko atthu akina aniira aya,+ masi niwehaweheke+ ni nuupuweleke saana.+ 7 Ale anrupa, anrupa ohiyu, nave ale anihapaliwa, anihapaliwa ohiyu.+ 8 Masi, hiyo niri atthu a othana, nuupuweleke saana, niware waamini ni ophenta, siisaale eniwariwa aya yoowara ya eyuuma enikhapelela epeeto.* Nave niware nlipelelo na woopowa, ntoko ekapaseeti,+ 9 okhala wiira Muluku khonithanlale wiira oniviruwele, masi onithanlale wiira noopowe,+ omurumeelaka Pwiya ahu, Yesu Kristu. 10 Yesu owo ohookhwa mwaha wa hiyo,+ wiira hata noonaka aahiiso nirupaka,* nakhale akumi vamosa nuuwo.+ 11 Tivonto, mulipihaneke* ni mukhaliheryaneke mukina ni mukhwaawe,+ ntoko muniira anyu.
12 Axinnaka, ninnoovekelani wiira mwaattittimiheke ale anivara muteko ni nthiti eriyari anyu, yaawo anoohoolelani mmutekoni mwa Apwiya ni anoolopolani. 13 Nave mwaathokoreryeke saana ni mwaaphenteke mwaha wa muteko anivara aya.+ Ootheene anyu mukhaleke ni murettele.+ 14 Masi, ninnootumereryani nyuwo axinna, wiira mwaalopoleke ale ahiniiwelela,+ mwaamaaliheke ale ariipiwe murima,* mwaakhaliheryeke ale ahilimpe, mwaapixeryeke murima atthu ootheene.+ 15 Ohikhale mutthu iireliwe etthu yootakhala onrowa omuttikiherya etthu yootakhala mukhwaawe.+ Masi okathi wootheene, mphaveleke wiirelana itthu sooreera ni nwiireleke itthu sooreera atthu ootheene.+
16 Mutteeliweke murima okathi wootheene.+ 17 Nvekeleke voohihiyererya.+ 18 Mmuxukhureleke Muluku mwaha wa itthu sootheene.+ Ela ti etthu Muluku onaaphavelela awe ale animutthara Kristu Yesu. 19 Muhikhoottiherye ikuru sa Muluku ovara muteko mookumini mwanyu.+ 20 Muhithokoreryeke iprofesia ntoko itthu sihirina efaita.+ 21 Nvareryeke itthu sootheene,+ musuweleke ele eri yooloka. Nto nvarexexeke yeeyo. 22 Mukhootteke inamuna sootheene sa otakhala.+
23 Kinvekela wiira Muluku, yoowo onivaha murettele, ookhaliheni oowaarya wiira nvare muteko awe. Nave, axinnaka, mikhalelo sootheene sooreera munooniherya anyu ni okumi* anyu ni erutthu anyu, sakhaleke soohittheka ni sooreera mwa inamuna sootheene, okathi Pwiya ahu Yesu Kristu+ onitthika awe. 24 Ole oniwiihanani toororomeleya, nave onimwiira siiso tthiri.
25 Axinnaka, muhihiyeke onivekelela.+
26 Mwaakoheke ihaali anna ootheene, mwaavahaka epeexo.*
27 Mwa nsina na Apwiya, ninnoovekelani wiira epaphelo ela esomeliwe axinna ootheene.+
28 Oreera murima wuulupale wa Pwiya ahu Yesu Kristu, okhale ni nyuwo.