Yoona

3 Yoona aahaakhela moolumo a Yehova ekwaha ya nenli, yaahimya wiira:+ 2 “Nvenye, murowe oNiinive+ epooma yuulupale, mwalaleye moolumo kinooleelaakani”.

3 Vano, Yoona aahivenya onarowa oNiinive,+ iiwelelaka moolumo a Yehova.+ ONiinive yaari epooma yuulupale.* Mutthu aahaana omaliha mahiku mararu wiira eettakase epooma yootheene. 4 Yoona aahikela mpooma eetta nihiku ntero olaleyaka wiira: “Muhina mwa mahiku 40, oNiinive onoopwetexiwa”.

5 Nto atthu a oNiinive, okhuma acikhaani mpakha aalupale, yaahimwaamini Muluku.+ Awo yaahaaleela atthu ootheene wiira etthukwe ni aware isaakho. 6 Okathi mwene a oNiinive aiwale awe ihapari iye, aahivenya veehiceni vawe, orula malaya awe a omwene, owara isaakho ni okilaathi vattuurwani. 7 Nave-tho aahilaleya oNiinive wootheene wiira:

“Mwene ni atthu awe oottittimiheya anniruma wiira: Ohikhale mutthu nnakhala mwaamunama onrowa olya etthu. Awo ahilyeeke etthu nnakhala ahiwuryeke maasi. 8 Atthu ni inama aware isaakho, amuxontteleke Muluku voohihiyererya, ahiyeke iphiro saya soohiloka ni itthu sootakhala anipaka aya. 9 Woonasa wene, Muluku eekeekhai onooturuka muupuwelo awe ni etthu oniphavela awe opaka, nave onoohiya onanariwa, nto hiyo khaninrowa okhwa”.

10 Okathi Muluku eekeekhai oonale awe etthu yaapanke aya, wiira yaahihiya iphiro saya sootakhala,+ owo aahituruka muupuwelo awe ni ehasara ele aahimmye awe wiira aamwaakumiherya, nto khaakumihenrye.+