Silempwale ni Yohani
18 Nuumala olavula itthu iya, Yesu ni awiixutti awe yaahirowa ekhopela ekina ya muro* Keduroni,+ weiwo waari exarti. Yesu ni awiixutti awe yaahikela muxarti-mmo.+ 2 Vano, Yuda, yoowo aarowa onvariha Yesu, aanisuwela opuro ole, okhala wiira ikwaha sinceene Yesu aahirowa opuro ole ni awiixutti awe. 3 Nto, Yuda owo aahaaruuha atoropa ni makwarta a makhulupale a anamukuttho ni a afarisi, akunxe ene mithuko, ispaata* ni ikopo.+ 4 Siiso, Yesu osuwelaka itthu saarowa omukhumelela, aahiwaattamela, onaakoha wiira: “Ti pani munimwaavya anyu?” 5 Awo yaahimwaakhula ariki: “Yesu munazarethi”.+ Nto Yesu aahaaleela wiira: “Ti yoomi”. Nave Yuda, yoowo aarowa onvariha, aari ni atthu awo.+
6 Masi, okathi Yesu aahimenrye awe wiira: “Ti yoomi”, awo yaaheetta niittuli, khumorela vathi.+ 7 Yesu aahaakoha-tho wiira: “Ti pani munimwaavya anyu?” Awo yaahimwaakhula ariki: “Yesu munazarethi”. 8 Yesu aahiwaakhula wiira: “Kihooleelani wiira ti yoomi. Nto mwaakiphavelaka miyo, mwaahiye alopwana ala aroweke”. 9 Eyo yaahiiraneya wiira emaliheriwe ele Yesu aahimmye awe oriki: “Khokirimenle nnakhala mmosa wa ale mukivanhe anyu”.+
10 Simoni Pedru, aahikumiha espaata aarina awe, iikittha niyaru noolopwana na murumeyi mmosa a namukuttho muulupale.+ Murumeyi owo, iihaniwa Maalikho. 11 Masi, Yesu aahimwiirela Pedru wiira: “Mpwehe espaata anyu nipuro naari aya.+ Kiireke nkikhanle oowurya ekaalisi* Atiithi akivanhe aya?”+
12 Nto, atoropa, kumantanti a atoropa ni makwarta a ayuda yaahinvara Yesu, khimutthukwa. 13 Awo yaapacenrye omuroiha wa Hanaaxi, okhala wiira aari taata awe Kaifa,+ yoowo aamuthenle mwanawe Hanaaxi. Kaifa owo aari namukuttho muulupale eyaakha yeeyo.+ 14 Tthiri, Kaifa owo ti yoole aahimenrye ayuda wiira vannireerela mulopwana mmosa okhwa, wiira aaphwanyihe mureerelo atthu.+
15 Vano Simoni Pedru ni mwiixutti mukina, yaanimutthara Yesu.+ Mwiixutti owo aanisuweliwa ni namukuttho muulupale. Nave aahirowa ni Yesu mpakha ophiya vate va namukuttho muulupale. 16 Masi Pedru, aahanle vamukhora, ota. Nto mwiixutti owo mukina, aasuweliwa ni namukuttho muulupale, aahikhuma, onarowa olavula ni murumeyi muthiyana, yoowo aalipelela mukhora, khimukeliha Pedru. 17 Murumeyi owo muthiyana aalipelela mukhora, aahimukoha Pedru wiira: “Kiira nyuwo-tho mwa mmosa a awiixutti a mulopwana ole?” Pedru aahaakhula oriki: “Nnaari, nkihiyo”.+ 18 Vano, arumeyi ni makwarta, yaahipattiha mooro, yeemela arukurenrye ene mooro owo, anoora, okhala wiira vaaniriirya. Nave Pedru aaheemela ni atthu ale, onoora.
19 Siiso, mukhulupale a anamukuttho, aahimukoha Yesu mwaha wa awiixutti awe ni mwaha wa itthu aixuttiha awe. 20 Yesu aahimwaakhula wiira: “Miyo kaanaalaleerya atthu voohiipithiha. Okathi wootheene, kaaniixuttiha musinagoga* ni mutemplo,+ mapuro yaathukumana aya ayuda ootheene. Nave khiivo etthu kaalavula aka kiipithihaka. 21 Xeeni munikikoha anyu? Mwaakoheke ale yiiwale itthu kaahimenrye aka. Awo annisuwela oratteene itthu sihimmye aka”. 22 Nuumala Yesu ohimya itthu iya, kwarta mmosa, eemenle vakhiviru vale, aahimmana owiitho,+ onahimya wiira: “Munimwaakhula siiso mukhulupale a anamukuttho?” 23 Yesu aahimwaakhula wiira: “Kaalavunle ene etthu yoohiloka, mukileele etthu ene elavunle aka. Masi kaahimmye ene ekeekhai, xeeni munikimana anyu?” 24 Vano, Yesu nlelo otthukiwe ene, Hanaaxi aahaaleela wiira amuroihe wa Kaifa, namukuttho muulupale.+
25 Nto Simoni Pedru iira eemenle ene vaavale, ooraka. Awo yaahimukoha wiira: “Kiireke nyuwo-tho khamuhiyo mmosa a awiixutti awe?” Owo aahikhootta, oriki: “Nnaari, nkihiyo”.+ 26 Murumeyi mmosa a namukuttho muulupale, yoowo aari mmusi awe mulopwana yoole Pedru aamukwanse awe niyaru,+ aahimukoha wiira: “Kiira kihoowehani oxarti muri ene nuuwo?” 27 Masi Pedru aahikhootta-tho. Nto niinaano-ru, muthupi waahiipa.+
28 Oxaka, awo yaahimukumiha Yesu owannyawe Kaifa, anamuroiha owannyawe Pilato, kuvernatoro a oYudeya.+ Masi ayuda khiyaakenle owannyawe kuvernatoro, wiira ahikhale oohiloka,+ yooceele omulya Paasikha. 29 Tivo, Pilato aahikhumela vate vaari aya, onaakoha wiira: “Mulopwana ola otthenke-ni?” 30 Awo yaahimwaakhula ariki: “Mulopwana ola ahaakhanle mutakhali,* hiyo khinaarowa wooruuhelani”. 31 Pilato aahaahimeerya wiira: “Mmukuxeke nyuwo, mwamphukeleke muttharaka nlamulo nanyu”.+ Ayuda yaahimwaakhula ariki: “Hiyo khanneemereriwa omwiiva mutthu”.+ 32 Siiso, ele Yesu aalavunle awe ohimyaka moota aarowa awe okhwa, yaamwiiraneya.+
33 Pilato aahikela-tho mpaani, khumwiihana Yesu, onamukoha wiira: “Niireke nyuwo mwa Mwene a ayuda?”+ 34 Yesu aahaakhula oriki: “Munikoha siiso mwaha woowi muniphavela osuwela tthiri, aahiiso mwaha woowi nwiiwale atthu akina akilavulaka?” 35 Pilato aahimwiirela: “Kiireke miyo ka muyuda? Atthu a nloko nanyu ni makhulupale a anamukuttho ti yoovaherenryeni wa miyo. Mwiirale-ni?” 36 Yesu aahaakhula wiira:+ “Omwene aka khahiyo wa olumwenku ola.+ Vaakhanle wiira ti wa olumwenku ola, atthu aka yaamukumiherya ekhotto wiira kihivahereriwe wa ayuda.+ Masi Omwene aka khonikhuma olumwenku yoola”. 37 Pilato aahimukoha wiira: “Nto, nyuwo mwa mwene tthiri?” Yesu aahaakhula iiraka: “Ti nyuwo munihimya wiira miyo ka mwene.+ Mweekeekhai, eyo ti etthu kiyareliwe aka ni ti etthu kirwenle aka moolumwenkuni, wiira kikhalele onamoona ekeekhai.+ Ootheene ale aneettela ekeekhai, anniiwelela moolumo aka”. 38 Pilato aahimukoha Yesu wiira: “Ekeekhai, exeeni?”
Nuumala ohimya siiso, Pilato aahirowa-tho olavula ni ayuda, aahimeeryaka wiira: “Miyo nkimphwanyanne mulattu mulopwana ola.+ 39 Ohiya-vo, nyuwo moolimalela miyo omutaphula mutthu okathi wa Paasikha.+ Nto munniphavela wiira kimutaphule Mwene a ayuda?” 40 Awo yaahikhuwela-tho yiiraka: “Muhimutaphule mulopwana ola! Mmutaphule Baraba”. Baraba owo, aari latarau.+