Sofoniya
1 Moolumo a Yehova aasuwelihiwe awe Sofoniya* mwaana a Kuxi, mwaana a Gedaliya, mwaana a Amariya, mwaana a Ezekiya, mahiku a Yosiya,+ mwaana a Amoni,+ mwene a oYuda, taala:
2 Yehova onihimya wiira:+ “Kinoopwetexa itthu sootheene siri mulaponi”.
3 “Kinompwetexa mutthu ni inama.
Kinimwaapwetexa axipalame a musulu ni ihopa sa mphareya.+
Nave kinoomala-maliha itthu sootheene sinaahapuxa atthu*+ vamosa ni atakhali.
Kinimwaamala-maliha apinaatamu mulaponi”. Yehova tonihimya.
4 “Kinimookola ntata naka kaavirikanyaka atthu a oYuda,
Nave kinimwaavirikanya atthu ootheene anikhala oYerusalemu.
Kinoomala-maliha opuro ola itthu sootheene sa Bayaali sinrowa ohala.+
Kinoomala-maliha masina aanamukuttho a amuluku aamalapo vamosa ni anamukuttho akina.+
5 Kinimwaamala-maliha ale ankokhorela itheneeri sa wiirimu ari ene vasulu va empa,+
Ni ale ammukokhorela ni anileiherya okhala oororomeleya wa Yehova,+
Okathi omosa-ru yoowo aleiheryaka okhala oororomeleya wa Malikomi.+
6 Nave kinimwaamala-maliha ale anihiya omutthara Yehova,+
Ni ale ahinimphavela Yehova nnakhala ahimmukohererya”.+
7 Mmaaleke ohoolo wa Pwiya Muulupalexa Yehova, okhala wiira nihiku na Yehova niri vakhiviru.+
Yehova oolokiherya mukuttho. Owo ohaareeriha ale aalattunle awe.
8 “Nihiku na mukuttho wa Yehova, makhulupale,
Anamwane a mwene+ vamosa ni ootheene ale aniwara ikuwo sa elapo ekina, animwaakhula ohoolo waka.
9 Nihiku nno, ale aniwela vasulu* ni ale anisariha otakhala ni wootha etthoko ya pwiya aya,
Animwaakhula ohoolo waka”.
10 “Nihiku nlo,
Onimwiiwanyeya wunla okhumaka Mukhora wa Ihopa,+
Ni wiikhupanyerya okhumaka Epooma Esya,*+
Nave onimwiiwanyeya onyakula vanceene okhumaka omiyaakoni”. Yehova tonihimya.
11 “Mwiikhupanyeryeke, nyuwo atthu munkhala oMakitexi,*
Okhala wiira alipa a nakoso ootheene aapwetexiwa.
Ootheene ale yaaphima eparatha aapwetexiwa.
12 Okathi owo kinoomwaleya oratteene oYerusalemu ni muthuko,
Wiira kaaphwanye ni yaakhule ohoolo waka ale ahakalanle ni okumi aya, yaawo anihimya wiira:
‘Yehova khonrowa opaka etthu yooreera, nnakhala khonrowa opaka etthu yootakhala’.+
13 Mihakhu saya animwaakhiwa, ipa saya sinoopwexakasiwa.+
Anooteka ipa saya, masi khanrowa okhalaka,
Animwaala miri sa ewuuva, masi khanrowa owuryaka eviinyu ene.+
14 Nihiku nuulupale na Yehova niri vakhiviru!+
Niri vakhiviru, nave ninnaattamela moowaakuveya!+
Onyakula wa nihiku na Yehova onlikana ni etthu yoowaawa.+
Nihiku nno hata nakhotto onookhuwela.+
15 Nihiku nno ninrowa okhala nihiku na oviruwa,+
Nihiku na oxanka ni oriipiwa murima,+
Nihiku na epheyo yuulupale ni opwetexiwa,
Nihiku na epiphi ni ewiriphi,+
Nihiku na meeku ni meeku ooriipela.+
16 Ninrowa okhala nihiku noowoopa nlope ni okhuweliwa ekhotto,+
Sivirikanyiwaka ipooma soolipihiwa ni mapuro oorakamela osulu yahaakhaliwa.+
17 Kinoowiiriha apinaatamu oxanka,
Awo animweettaka ntoko alipa-oohoona,+
Okhala wiira aamutthekela Yehova.+
18 Eparatha aya nnakhala eweero aya khenrowa owoopola nihiku na oviruwa wa Yehova.+