Silempwale ni Luka
5 Nihiku nimosa, Yesu aari okerekhere wa nratta na oXenesareti.* Nto muttitthi wa atthu waanimphunya, ophavelaka owiriyana masu a Muluku.+ 2 Vano, Yesu aahoona ikalawa piili saari ookerekhere wa nratta nne, masi alipa-oototha yiira akhumme ene mukalawani-mmo, arapihaka matthavi aya.+ 3 Yesu aahikela ekalawa emosa, yeeyo yaari ya Simoni, nto aahimwiirela wiira osusiherye vakhaani mmaasini. Nuumala okilaathi mukalawani-mmo, aahipacerya wiixuttiha mittitthi iye sa atthu. 4 Vaamanle awe olavula, Yesu aahimuleela Simoni wiira: “Murowe opuro woowiixerya, mwarihele matthavi anyu wiira mutothe ihopa”. 5 Masi Simoni aahaakhula oriki: “Mwiixuttihi, noototha ohiyu wootheene khuhivara etthu,+ vano okhala wiira moohimya, kinoorihela matthavi mmaasini”. 6 Nuumala opaka ele Yesu aahimmye awe, yaahivara ihopa sinceene. Vano, matthavi aya yaahipacerya okhereya.+ 7 Nto awo yaahaavaha esinaale akhwaaya yaari ekalawa ekina, wiira arwe yaakhaliherye. Awo yaahirwa, khusariha ikalawa soopiili ni ihopa. Tivo, ikalawa iyo saahipacerya osama. 8 Nuumala oweha etthu ele, Simoni Pedru aahikokhora ohoolo wa Yesu, onahimya wiira: “Pwiya, mukhume-va, maana miyo ka natampi”. 9 Tthiri, Simoni, vamosa ni atthu ootheene aarina awe, yaahitikinihiwa vanceene mwaha wa ihopa yaavanre aya. 10 Nave-tho Yakobo ni Yohani, anamwane a Zebedeyo,+ yaawo yaavara muteko vamosa ni Simoni, yaahitikinihiwa vanceene. Masi Yesu aahimuhimeerya Simoni wiira: “Muhoove! Okhuma olelo orowa ohoolo, munrowa okhala mutothi a atthu”.+ 11 Nto awo yaahipurulela ikalawa saya ota, khuhiya itthu sootheene, anamutthara Yesu.+
12 Nihiku nikina, okathi Yesu aari awe epooma emosa, aahikhala mulopwana mmosa oosareya makokho.* Onwehaka-ru Yesu, aahikokhora, uuramela vathi, onamuxonttela oriki: “Pwiya, mwaphavela-ru, munoowerya okipenuxa”.+ 13 Nto, Yesu aahookola ntata nawe, aahimukwata, onahimya wiira: “Kinniphavela! Mpenuwe”. Niinaano-ru, makokho* yaahimmalela.+ 14 Nuumala-vo, Yesu aahimuhimeerya mulopwana ole wiira ohimuleele mutthu. Owo aahimmye so: “Masi murowe mwaixooniherye wa namukuttho. Nave, mwavahe mukuttho onivekeliwa ni nlamulo na Moise mwaha wa openuxiwa wanyu,+ wiira vasuweliwe wiira mookhalihiwa saana tthiri”.+ 15 Vano, ihapari sa Yesu saanitepa wuulaana, nto mittitthi suulupale sa atthu saanimuthukumanela wiira sinwiriyane ni aapenuxe atthu iretta saya.+ 16 Masi, ikwaha sinceene Yesu aanirowa opuro ohinivira-viriwa wiira avekele.
17 Nihiku nimosa, Yesu iira iixuttihaka. Nto yaahikilaathi opuro yoowo afarisi ni alipa-oowiixuttiha Nlamulo, yaawo yaakhuma mittetthe sootheene sa oGalileya, oYudeya ni oYerusalemu. Owerya wa Yehova* waari ni Yesu wiira aapenuxeke aretta.+ 18 Vano, yaahirwa alopwana akina emukunxe ene vanrepani,* mulopwana oorakala. Awo yaahiphavela omukeliha mpaani ni omwiixaathi ohoolo wa Yesu.+ 19 Okhala wiira khiyaawerya ompixa opuro aari awe Yesu, mwaha wa muttitthi wa atthu, awo yaahiwela vampani khuvenula nipatho. Nto yaahikuruxa nrepa nle,* eluluwanyihaka opuro waari atthu yaamwaattamenle Yesu. 20 Okathi Yesu oonale awe waamini waya, aahihimya wiira: “Mulopwana, itampi sanyu sooleveleliwa”.+ 21 Alipa-oowiixuttiha nlamulo ni afarisi, yaahipacerya olavula yaawo-ru yiiraka: “Ti pani mutthu ola oninveeha Muluku? Tani onwerya olevelela itampi, ohikhanle Muluku paahi?”+ 22 Osuwelaka itthu yuupuwela aya, Yesu aahaakoha oriki: “Exeeni munuupuwela anyu vamurimani vanyu? 23 Yookhweya tiivi? Niireke ohimya wiira: ‘Itampi sanyu sooleveleliwa’, aahiiso ohimya wiira: ‘Mweemele, mweetteke’? 24 Masi wiira musuwele wiira Mwaana a Mutthu ookhalana owerya woolevelela itampi valaponi . . .”. Yesu aahimuhimeerya mulopwana ole oorakala, wiira: “Kinooleelani wiira: Mweemele, mukuxe nrepa nanyu,* muroweke owaani”.+ 25 Siiso, owo aaheemela ohoolo waya, aahikuxa nrepa nawe, onarowa owaani onvuwihaka Muluku. 26 Atthu ootheene yaahitikinihiwa vanceene, anapacerya onvuwiha Muluku. Nave-tho, yaanoova vanceene enahimya wiira: “Olelo nooweha itthu sootikiniha!”
27 Nuumala etthu ela, Yesu aahikhuma opuro ole, khimoona mulopwana mmosa, yoowo aaliviha mpoosito, aitthaniwa Levi, okilanthi ene opuro waaliviwa mpoosito, khumwiirela: “Mukhale mwiixutti aka”.+ 28 Vano, owo aahihiya itthu sootheene, ovenya, onamutthara Yesu. 29 Nto, Levi aahipaka efesta yuulupale wiira omwaakhele Yesu vatthokoni vawe. Vano waahikhala muttitthi muulupale wa alipa-ooliviha mpoosito ni atthu akina yaalya* vamosa naawo.+ 30 Afarisi ni alipa-oowiixuttiha nlamulo voonale aya eyo, yaahipacerya waapa yaahimeeryaka awiixutti a Yesu, wiira: “Xeeni nyuwo munilya anyu ni owurya ni alipa-ooliviha mpoosito ni anatampi?”+ 31 Yesu aahiwaakhula, oriki: “Atthu akumi khanirowa wa meetiku, masi aretta tanirowa.+ 32 Miyo nkirwenle owiitthana anaxariya, masi kirwenle owiitthana anatampi, wiira arukunuxe mirima saya”.+
33 Awo yaahimuhimeerya Yesu wiira: “Awiixutti a Yohani ni a afarisi annitthukwa ikwaha sinceene ni annivekela ni nthiti. Masi awiixutti anyu annoolya ni anniwurya”.+ 34 Yesu aahaakoha wiira: “Niireke wiira munoowerya owiiriha apatthani awe mutheli ohilya, nlelo ari ene ni mutheli? 35 Masi anoophiya mahiku aniira aya yaakhiwe mutheli,+ nto mahiku yaawo tanrowa aya otthukwaka”.+
36 Nave-tho aahaahimeerya nlikanyiho nimosa, oriki: “Khuuvo onithikila esaapha ya ekuwo esya, onattotthela ekuwo ya khalai. Apaka eyo, esaapha eyo esya enookhera ekuwo ya khalai. Vano esaapha ele esya khenrowa ophiyerya nipuro na ekuwo ya khalai.+ 37 Nave-tho, khuuvo mutthu onihela eviinyu ya niinaano, mirupa sa khalai sa eviinyu.* Apaka eyo, eviinyu eyo ya niinaano enoophula mirupa iyo, eyiiheyeke, nave mirupa iyo sinoohononeya. 38 Masi eviinyu ya niinaano, eniheliwa mirupa isya. 39 Khuuvo oniphavela eviinyu ya niinaano nuumala owurya eviinyu ya khalai, maana owo onihimya so: ‘Eviinyu ya khalai ti yoosiva’”.