Silempwale ni Luka
21 Okathi Yesu aaweha awe ikaaxa saariheliwa musurukhu, owo aanaaweha athaaciri arihelaka musurukhu aya mukaaxani-mmo.+ 2 Vano aahimoona muthiyana naamukhweli, oothoiwa, orihelaka musurukhu miili waarina efaita vakhaani,*+ 3 onahimya wiira: “Kinooleelani ekeekhai wiira, muthiyana ole naamukhweli oothoiwa, oovaha vanceene waavikana atthu ootheene.+ 4 Mweekeekhai, ootheene ale aavaha musurukhu waahala, masi naamukhweli ole, ni othoiwa* wawe, oovaha itthu sootheene aalipana awe”.+
5 Okathi mukina, awiixutti akina yaanilavula attottopelaka etemplo, moota yaareerihiwe aya ni maluku ooreera ni mwaha wa itthu saavahiwa Muluku.+ 6 Vano Yesu aahihimya wiira: “Itthu iya munoona anyu, anoophiya mahiku nihinrowa aya ohala vale nluku nimosa vasulu va nluku nikhwaaya, nihimoroxeliwe vathi”.+ 7 Nto awiixutti awo yaahimukoha Yesu, yiiraka: “Mwiixuttihi, okathi xeeni sinrowa aya okhumelela itthu iya? Nave tiivi enrowa okhala ethoonyeryo yoowi itthu iya sihanle wiiraneya?”+ 8 Yesu aahiwaakhula, wiira: “Mwiikasoope wiira ohikhale onoohapuxani,+ okhala wiira atthu anceene animoorwa arumeelaka nsina naka, yiiraka: ‘Kristu ti miyo’, nave ariki: ‘Okathi waahimmwa ohaattamela’. Muhaatthare.+ 9 Vano, mwaiwa vale silavuliwaka ikhotto ni onyakulihana wa atthu, muhoove. Tthiri itthu iya sihaana okhumelela toko, masi olumwenku khonrowa omala okathi ene yoowo”.+
10 Nto Yesu aahaahimeerya wiira: “Nloko ninrowa owana ni nloko nikina,+ elapo ni elapo ekina.+ 11 Sinookhumelela itetere suulupale, nave-tho enoothowaka yoolya ni sinookhumelela ikwerere+ mapuro oovirikana. Sinookhumelela-tho wiirimu itthu soowoopiha ni ithoonyeryo suulupale.
12 “Masi sihinatthi okhumelela itthu iya sootheene, atthu animoovarani ni woolupatthani,+ yoovahereryeni musinagoga* ni yooriheleni mukhatteya. Munooroihiwa ohoolo wa mamwene ni makuvernatoro, mwaha wa nsina naka.+ 13 Nto eyo enoowiirihani okhala anamoona aka ohoolo waya. 14 Tivo, vamurimani vanyu, muhiilokiherye vahinatthi moota munrowa anyu wiixaakiha,+ 15 maana kinimoovahani ankhili ni kinimookhaliheryani osuwela etthu yoohimya. Nto awanani anyu khanrowa owerya owaakhulani etthu.+ 16 Nave-tho, apapinyu ni amaminyu ni anninyu ni amusi inyu ni apatthani inyu, anrowa woovarihani. Awo anoowiiviha akina a nyuwo.+ 17 Nyuwo munoonyokhiwa ni atthu ootheene mwaha wa nsina naka.+ 18 Nto hata ekharari emosa ya mmuru mwanyu, khenrowa orimeela.+ 19 Vakhala wiira munoovilela mpakha wookiseryani, munimoopola ikumi sanyu.+
20 “Masi, mwaweha oYerusalemu orukureriwe ene ni anakhotto,+ musuweleke wiira opwetexiwa waya ori vakhiviru.+ 21 Vano, ale anikhala oYudeya, apaceryeke otthyawela omiyaakoni,+ nave ale ari oYerusalemu, akhume. Nto ale ari ota wa epooma ele, ahikele-mo, 22 okhala wiira mahiku awo Muluku onrowa waaphukela atthu, wiira siiraneye itthu sootheene sihimmwale ni Soolempwa Soowaarya. 23 Mahiku awo, anootakhaliwa athiyana oorupala ni ale animwaamwiha mwaana!+ Onookhala ohaawa wuulupale muttetthe ola. Nave oviruwa wa Muluku onimwaamorela atthu ala. 24 Nave awo anrowa wiiviwa ni espaata* ni anookuxiwa ntoko ipottha, amwaraxeliwe ilapo sootheene.+ Yerusalemu onoonyakeliwa ni amalapo, mpakha omalela okathi wa amalapo awo.+
25 “Nave-tho, sinookhumelela ithoonyeryo vansuwani, vamweerini ni mutheneerini.+ Vathi-va, atthu a ilapo soovirikana anoohaawa, ahisuwelaka etthu yoowiira mwaha wa oruma ni ottikinyeya wa ephareya. 26 Atthu anrowa okhwa woova, alipelelaka itthu sinrowa okhumelela elapo yootheene, okhala wiira itthu siri wiirimu sinoottikinyiwa. 27 Atthu anoomoona Mwaana a mutthu+ orwaaka mmeekuni, ni owerya ni ovuwa wuulupale.+ 28 Masi okathi itthu iya sinipacerya aya okhumelela, mweemele oratteene ni mweemexe muru, okhala wiira woopoliwa wanyu ori vakhiviru”.
29 Nto Yesu aahaaleela nlikanyiho nimosa, oriki: “Muupuwele mwiri wa ifiiku ni miri sikina.+ 30 Okathi miri iyo siniphuwa aya makukhu masya, nyuwo munnisuwela wiira elimwe ennaattamela. 31 Siiso-tho, moonaka-ru sikhumelelaka itthu iya, musuweleke wiira Omwene wa Muluku ori vakhiviru. 32 Kinooleelani ekeekhai wiira atthu a mahiku ala, tthiri khanrowa omala, itthu iya sootheene sihikhumelenle.+ 33 Erimu ni elapo sinoomala, masi moolumo aka, khanimala nnakhala vakhaani.+
34 “Mwiikasoope wiira olya vanceene ni owurya vanceene+ ni oxankela itthu siniphavela anyu,+ sihihonone muupuwelo anyu, wiira nihiku nlo nihoophwanyeni mootutuxerya, 35 ntoko mwaamunama onimorela vamuraakhoni.+ Kinooleelani etthu ela, maana nihiku nno nnimwaaphwanya mootutuxerya atthu ootheene anikhala vathi-va. 36 Tivonto, muthipeleleke owehaweha.+ Okathi wootheene muxontteleke+ wiira muhiphwanyiwe ni itthu sootheene sinrowa wiiraneya, nave wiira mweemele ohoolo wa Mwaana a Mutthu”.+
37 Nto Yesu aaniwiixuttiha atthu othana wootheene mutemplo, masi ohiyu aanirowa orupa omwaako Olivera. 38 Vano, atthu ootheene yaanirowa okumana nuuwo voosiisu mutemplo, wiira anwiriyane.