Moota Wookhalana Moonelo Wooloka
“Mwakhalaka vathí-va mahiku manjene, mutteliweke murima mahiku awo othene”.—MUS. 11:8.
MWAAROWA WAAKHULA SAI?
Itthu xeeni sikhanle oomwiiriha mutthu okhalana muupuwelo woohiloka?
Ninrowa omurumeela sai Biibiliya wira nikhalane moonelo wooloka?
Matakiheryo a naamukhweli oothoiwa, Eliya ni mulipa oolepa Esalimo 102, anrowa onikhaliherya sai naphavela okhalana moonelo wooloka?
1. Mareeliho xeeni anikhuma wa Yehova anniiriha okhala oohakalala?
YEHOVA oniphavela wira nikhaleke oohakalala, tivonto onninivaha mareeliho manceene anniiriha otteeliwa murima. Yehova oonivaha ekumi ntoko enamuna emosa ya mareeliho. Tivonto nihaana orumeelaka okumi ahu wira ninvuhiwe Muluku, maana owo ooniitthana wira nimukokhoreleke. (Esal. 144:15; Yoh. 6:44) Yehova onnilipiherya wira onniniphenta ni onrowa onikhaliherya wira nivileleke soweeha okathi onimurumeela ahu. (Yer. 31:3; 2 aKor. 4:16) Tthiri niri mparayiisu oomunepani, maana nokhalana yoolya yinci yomunepani ni ophenta wa anniihu a ilapo sotheene. Ohiya-vo, nihaana nlipelelo nooreera na muhoolo.
2. Arumeyi akina a Muluku aniwana ni muxankiho xeeni?
2 Nnaamwi nirineene itthu iyo sinniiriha otteeliwa murima, arumeyi akina a Muluku aniwana ni muupuwelo woohiloka voohimya sa awo aneene. Awosa pooti wuupuwelaka wira muteko oninvarela aya Yehova ni awo aneene, kharina efaita wa Muluku. Mwa atthu awo anivikaniha okhalana muupuwelo woohiloka, otteeliwa murima “mahiku manjene” anoona okhala ethiru. Okumi aya onikhala ntoko mahiku ooriipiha murima ahinimala.—Mus. 11:8.
3. Itthu xeeni sinimwiiriha mutthu okhalana muupuwelo woohiloka?
3 Anna wala arokora awo, muupuwelo woohiivaha efaita onipacerya ni itthu ntoko ohiphura etthu, owereiha, wala itthu sinooniherya wira aapacerya wuuluvala. (Esal. 71:9; Mir. 13:12; Mus. 7:7) Nihaana-tho weemya ekeekhai eni ‘murima wototha’, nto murima owo onoowerya onuulumela nnaamwi Muluku osiveliwaka ni hiyo. (Yer. 17:9; 1 Yoh. 3:20) Nave, Diabo onniwootherya arumeyi a Muluku mwa enamuna yootakhala. Ohiya-vo, ale arina muupuwelo wa Satana, pooti oniiriha okhalana muupuwelo waarina Elifazi, yoole aahimyale wira Muluku khannoonela vatthu. Wootha iwo khiwaamalenle okathi wa Yobi, onnivikaniha olelo-va.—Yobi 4:18, 19.
4. Ninrowa othokorerya exeeni mmwaha ola?
4 Yehova onnihimya saana mwa Soolempwa wira owo onrowa okhala ni ale anivira “mwepiphini yowopiha”. (Esal. 23:4) Enamuna emosa, owo onnirumeela Nuulumo nawe wira okhale ni hiyo. Biibiliya ookhalana “owerya wa Muluku, ompwanyula [itthu] soolipexa”, ohela muhina muupuwelo woohiloka voohimya sa hiyo aneene. (2 aKor. 10:4, 5) Nto nrowe nithokorerye moota okhanle ahu oomurumeela Biibiliya wira onikhaliherye okhalana moonelo wooloka. Nyuwo munoowerya ottottela mureerelo ni osuwela waakhaliherya akina.
MMURUMEELE BIIBILIYA WIRA MUKHALANE MOONELO WOOLOKA
5. Etthu xeeni ekhanle oonikhaliherya okhalana moonelo wooloka?
5 Murummwa Paulo onnihimya itthu siniwerya onikhaliherya okhalana moonelo wooloka. Owo aahitumererya muloko wa oKorinto oriki: “Mukoheke murim’anyu mòneke mwari ni wamini”. (2 aKor. 13:5) “Wamini” iwo, onihela muhina sookupali seKristau siri mBiibiliyani. Nto vannikhalela ohimya wira noolipa ni niri ni “wamini”, akhala wira moolumo ahu ni sowiira sahu sinnivarihana ni Biibiliya. Masi nihaana omananiha wira ekumi ahu yotheene evarihaneke ni sowiixuttiha sotheene sa eKristau. Nihithanleke ipantte sinnisivela paahi.—Yak. 2:10, 11.
6. Xeeni vanitthuneya ahu wiivarerya wira nisuwele ‘narina wamini’? (Nwehe elatarato yoopacerya.)
6 Woonasa wene nyuwo pooti woonaka ovila wiivarerya enamuna eyo, vanceenexa akhala wira munuupuwela wira ehaavo ehilonke. Masi, moota Yehova sinnoona awe ti etthu erina efaita ovikana moonelo ahu, nave miruku sawe ti soorakamelana ni sawihu. (Yes. 55:8, 9) Yehova onnaavarerya arumeyi awe, ohiya mwaha woophavela waahukhumu, masi mwaha woophavela itthu sooloka sinooniherya aya. Nto okathi onirumeela anyu nuulumo na Muluku wira moone “mwari ni wamini”, ele enrowa anyu woona khenlikana ni moonelo wa Muluku. Osuwela eyo onowiirihani orantteliha muupuwelo oowi khamurina efaita wa Muluku, ni muuupuwelo wa Biibiliya oni: Nyuwo muhaana efaita yuulupale wa Yehova. Nto yookhumelela aya enrowa okhala ntoko wira munihula exanela opuro woriipela wira moone okokola.
7. Ninrowa ottottela sai mureerelo matakiheryo a atthu oororomeleya ari mBiibiliyani?
7 Enamuna emosa yowiivarerya ori wuupuwelela matakiheryo a atthu oororomeleya alempwale mBiibiliyani. Mmananiheke woona moota makhalelo aya ni moonelo aya anilikana aya ni awinyu, nto nweheke etthu yaarowa anyu opaka mwari mwa nyuwo. Vano nrowe nivarerye matakiheryo mararu anooniherya moota wowiivarerya wira moone mwaarina waamini ni moonelo wooloka.
NAAMUKHWELI OOTHOIWA
8, 9. (a) Mixankiho xeeni saarina awe naamukhweli ole oothoiwa? (b) Woonasa wene muupuwelo xeeni woohiloka naamukhweli ole aarina awe?
8 Oryeene oYerusalemu mutemplo, Yesu aahimoona muthiyana oothoiwa. Ntakiheryo nawe pooti onikhaliherya okhalana moonelo wooloka hata niryeene oothoiwa. (Mmusome Luka 21:1-4.) Nrowe nithokorerye makhalelo a muthiyana ole naamukhweli. Saahikhala mixankiho miili saawanana awe; okhweliwa aiyawe ni makhalelo oohiloka a ahooleli a etiini ‘yalya mihakhu s’athiyana anamukhweli’, ohiya waakhaliherya alipa ohaawa. (Luka 20:47) Naamukhweli ole aari ootepa ohaawa, tivonto aavanhe awe musurukhu waaliviwa namuteko nuumala ovara muteko minutu vakhaani.
9 Nkahaya muupuwele etthu naamukhweli ole yuupuwela awe okathi aavolowa awe vanivateni na mutemplo, ovarenle ene inoota piili samukhaani. Niireke uupuwela moota sarya aya wootepa oyeva musurukhu aarowa awe ovaha, voovirikana ni ole aavaha awe khalai iyawe aryeene mukumi? Niireke aarowa wuuliwa muru owoona akina ari ohoolo wawe avahaka musurukhu munceene, woonasa wene khiyuupuwela wira yoovaha awe khiyaarina efaita? Hata woonasa wene uupuwela siiso, owo aahipaka etthu yaawerya awe wira okhaliherye okokhorela wekeekhai.
10. Yesu oonihenrye sai wira naamukhweli ole aahikhalana efaita wa Muluku?
10 Yesu ohooniherya wira naamukhweli ole vamosa ni soovaha sawe saahikhalana efaita wa Yehova. Owo aahimmye wira naamukhweli aahivaha waavikana athaaciri otheene. Nnaamwi musurukhu awe aarowa otakaahiwa ni ole aavahiwe ni atthu akina, Yesu aahittottopela wiimananiha wawe wira onvuwihe Yehova. Alipa oosuka musurukhu yaarowa woona inoota iye piili sooyeva, masi khiyaarowa osuwela wira inoota iye vamosa ni ole aavanhe saahikhalana efaita yuulupale wa Yehova. Tivonto moonelo wa Yehova ti waarina efaita yuulupale ovikana moonelo wa atthu akina, wala moonelo wa naamukhweli ole. Niireke yowiiraneya ela ennookhaliheryani wiivarerya wira musuwele mwaarina waamini?
11. Etthu xeeni eniixutta ahu sa naamukhweli oothoiwa?
11 Woonasa wene, owerya wanyu onvaha etthu Yehova onilipa ni makhalelo anyu wala itthu sirina anyu. Mwaha wowuuluvala wala owereiwa akina pooti woonaka wira okathi aniviriha aya alaleeryaka ti wootepexa oyeva. Niireke ahaana woonaka wira olaleerya waya khorina efaita nto khanireerela ovahererya iwoora? Hata muhirina muxankiho muulupale, nyuwo pooti woonaka wira wiimananiha wanyu khorina efaita, mwalikanyiha ni iwoora sotheene arumeyi a Muluku siniviriha aya khula mwaakha anvarelaka muteko Yehova. Hata vari siiso ninniixutta etthu sa naamukhweli oohaawa wira Yehova ahoona ni osiveliwa khula etthu yaapakale awe wira omurumeele Yehova, vanceenexa okhala wira aari oovelavela. Muupuweleke iyaakha sivinre mmurumeelaka Yehova. Niireke ohaavo okathi waaileva anyu wira mmurumeele Yehova? Akhala wira ti siiso, muhaana okupali wira Yehova onnivaha efaita muteko anvarenla anyu okathi owo. Nto akhala wira makhalelo anyu anilikana ni naamukhweli ole oothoiwa masi khiyavara itthu siniwerya anyu mmuteko wa Yehova, muhaana okupaliki wira tthiri mookhalana waamini.
KUXANI EKUMI AKA
12-14. (a) Muupuwelo woohiloka wanvanre sai Eliya? (b) Woonasa wene exeeni yaamwiirinhe okhalana muupuwelo wohiloka?
12 Profeta Eliya ahooniherya ororomeleya wa Yehova ni waamini wuulupale. Masi, ohaavo okathi ariipiwa awe murima mpakha onvekela Yehova wira okhwe, owo aahimyale so: “Apwiya! Okumi wokimalela. Kuxani eroho aka!” (1 Mam. 19:4) Ale ahitonko okumanana etthu yooriipiha murima, pooti woonaka wira moolumo a nivekelo na Eliya yaari “òlolo”. (Yobi 6:3) Masi Eliya aahimya etthu yaamwiira vamurimani vawe. Muhaana woona wira Yehova aahimukhaliherya Eliya, vohimpwapwela.
13 Exeeni yaamwiirinhe Eliya okhalana muupuwelo ole? Okathi vakhaani ohinatthi olavula moolumo ale, Eliya aahipaka mwiiriirya wIsarayeli ooniherya wira Yehova ti Muluku ekeekhai, nuumala vo, khwiiviwa maprofeta a Bayali 450. (1 Mam. 18:37-40) Woonasa wene, Eliya uupuwela wira vano atthu a Muluku nto yaamutthikela okokhorela wekeekhai; masi eyo khiyiiren’ye. Yezabeli, Pwiyamwene ootakhala aahirumiha mitthaka wa Eliya oriki ompaka palano wira Eliya aiviwe. Oovaka wiiviwa, Eliya aahitthyawela epantte yokuusini wattamela oYuda, muttetthe wootepa wuuma.—1 Mam. 19:2-4.
14 Nto oryeene ekhawe Eliya uupuwela wira muteko aavara awe ntoko profeta khiwaarina efaita. Owo aahimyale so wa Yehova: ‘nkihiyo oloka wavikana amuhavinre aka’. Owo oona wira khaarina efaita siisaale sihirina aya efaita ntthupi ni makhuva aamuhavinre awe akhwiiye. Nihimye so, aivarerya owo muneene arumeelaka muupuwelo awe paahi, nto khoonaka wira khaarina efaita, khooneliwa vatthu ni Yehova aahiiso mutthu mukina.
15. Muluku aamoonihenrye sai Eliya wira nlelo aanimoona okhala a faita?
15 Masi, Muluku Oniwerya Sotheene aanimoona Eliya mwa enamuna yoovirikana. Nlelo aahikhalana efaita vamaithoni va Muluku, nave Yehova aahipaka marehereryo wira omulipihe Eliya. Muluku aahiruma nlaikha wira namulipihe Eliya. Yehova aahikumiherya-tho yoolya ni yoowurya yaarowa omukhaliherya Eliya mukwaha awe wa mahiku 40 orowaka okuusini oMwaako Horebe. Ohiya vo, mooreerela murima Yehova aahimukhaliherya wira orukunuxe muupuwelo awe woohiloka wira wIsarayeli khuuvo-tho aari oororomeleya wa Yehova. Moone-tho wira Muluku aahinvaha Eliya muteko musya woovara, Eliya khweemya. Nto Eliya aahittottela mureerelo nikhaliheryo na Yehova, khutthikela muteko awe wa oprofeta olipihiwe ene.—1 Mam. 19:5-8, 15-19.
16. Inamuna xeeni Muluku sinirumeela awe wira oolipiheni?
16 Ntakiheryo na Eliya nihaana owiirihani wiivarerya wira moone mwaarina waamini ni owiirihani okhalana moonelo wooloka. Wanipacerya muupuweleke moota Yehova sookhalihenryaaweni. Niireke arumeyi awe akina, woonasa wene munna, murokora wala muKristau oolipa, ootoko wookhaliheryani okathi waatthuneya anyu okhaliheriwa? (aGal. 6:2) Niireke mootoko olipihiwa mwaha woosoma etthu mBiibiliyani, muliivuruni mwahu, wala orowa omuthukumanoni wa muloko? Akhala wira onikelela mahiku munoolipa mwa enamuna eyo ehimmwale, mmuupuweleke ole onikumiherya nikhaliheryo nlo nto nvekeleke mooniheryaka omuxukhurela wanyu.—Esal. 121:1, 2.
17. Etthu xeeni Yehova enivaha awe efaita wa arumeyi awe?
17 Etthu ya nenli, nyuwo muhaana osuwela wira moonelo woohiloka onoowerya opahula muupuwelo anyu. Osuwela moota Muluku sinnoonela awe teri etthu yootepa otthuneya. (Mmusome aRoma 14:4.) Yehova onnivaha efaita wiivahererya ni ororomeleya wahu wa yena; owo khoniweha mwaattelo wa muteko oninvarela ahu paahi wira onivahe efaita. Ntoko siiren’ya aya ni Eliya, pooti wira moovara miteko suulupale sa Yehova hata nyuwo muhoonale siiso. Woonasa wene ohaavo mmulokoni otonko anyu omulipiha, wala atthu ari mmuttettheni mwanyu asuwenle ekeekhai mwaha wa wiimananiha wanyu.
18. Muteko oninvarela anyu Yehova onooniherya exeeni?
18 Ntoko etthu yookiserya, nyuwo muhaana woonaka khula muteko onivahiwa anyu ni Yehova ntoko ethoonyeryo yoowi owo ori ni nyuwo. (Yer. 20:11) Ntoko Eliya, nyuwo pooti okhulumuwa mwaha wowoona wira muteko anyu khonikumiherya etthu, aahiiso opisaka ophwanya soolukama sanyu somunepani. Hata vari siiso, nyuwo nlelo mookhalana eparakha yuulupale; olaleerya ihapari sooreera ni okhala Namoona a Yehova. Mukhaleke oororomeleya. Ntoko saahimyale awe Yesu, nyuwo munoowerya ‘otteliwa murima vamosá ni pwiy’anyu’.—Math. 25:23.
NIVEKELO NA MURUMEYI OOVELAVELA
19. Muxankiho xeeni aarina awe mulipa oolepa Esalimo 102?
19 Mulipa oolepa Esalimu 102 aari ooxanka. Owo ‘ahivelavela’ anaxanka mwaha wa itthu sanwereya werutthuni wala mmupuweloni, owo-tho aahitteettheya khuhikhalana ikuru wira oxintte muxankiho awe. (Esal. 102, moolumo oopacerya) Moolumo awe anooniherya wira owo aamakela othokorerya moonelo awe paahi, wuupuwela itthu sanwereya ni saamuxankiha. (Esal. 102:4, 5, 7, 12) Owo uupuwela wira Yehova aaphavela omurihela ottaiwene.—Esal. 102:11.
20. Mavekelo anrowa omukhaliherya sai ole oniwanana muupuwelo woohiloka?
20 Masi, nasalimo ole anwerya orumeela okumi awe wira anvuwihe Yehova. (Musome Esalimo 102:20-22.) Ntoko siniweheya aya mwa Esalimo 102, hata mutthu orineene waamini onnikumana itthu soowereya nto ohinawerya wuupuwela saana. Nasalimo ole oona ntoko wira ‘alikana ni mwanuni onkhala mekhawe vapathoni’, okhalaka ntoko khaarina etthu ekina voohikhala mixankiho sawe paahi. (Esal. 102:8) Akhala wira eyo enniwiiraneelani, munvekeleke Yehova ntoko siirale awe nasalimo ole. Mavekelo a mulipa oovelavela, niire so, mavekelo anyu, anoowerya wookhaliheryani owanana muupuwelo woohiloka. Yehova onilaiherya wira onrowa ‘owiriyana mavekelo àtthu òpuheriwa, khankhotta-tho wathokorerya’. (Esal. 102:18) Muhaana okupali yolaiherya eyo.
21. Exeeni eniwerya omwiiriha mutthu otthikela okhalana muupuwelo wooloka?
21 Esalimo 102 ennooniherya-tho moota wookhalana muupuwelo wooloka. Etthu nasalimo yaapanke awe yaari otthikela ovarerya wataana wawe ni Yehova. (Esal. 102:13, 28) Owo aahilipa nuumala osuwela wira Yehova khuta okathi aarowa okhala ni atthu awe okathi wa mixankiho. Nto akhala wira mixankiho sinniwiirihani ohiweryaka opaka itthu saaphavela anyu mmuteko wa Muluku, muhaana ovekela voohimya sa mwaha owo. Munvekeleke Muluku wira owiriyane mavekelo anyu, ohiya mwaha woophavela ovukuliwa mixankiho sanyu paahi, masi wira nsina na Muluku nilaleiwe.—Esal. 102:21, 22.
22. Moota xeeni khula mmosa a hiyo okhanle awe oomuhakalaliha Yehova?
22 Aayo nihaana omurumeela Biibiliya wira nisuwele akhala wira nookhalana waamini ni okhalana efaita wa Yehova. Ekeekhai wira nlelo niryeene olumwenku ola, khanniwerya omalamaliha itthu sotheene sinniiriha okhalana muupuwelo woohiloka wala okhumuwa. Hata vari siiso, khula mmosa a hiyo onoowerya omuhakalaliha Yehova ni ophwanya woopowa akhala wira ninnimananiha ovilela mixankiho vaavo vanimurumeela ahu Yehova.—Math. 24:13.