Aalepenle Awe Aefeso

1 Miyo Paulo, murummwa a Kristu Yesu, ntoko Muluku oniphavela awe, kinnaalepela ale oororomeleya* anikhala wEefeso,+ ni animutthara Kristu Yesu moororomeleya:

2 Oreera murima wuulupale ni murettele wa Muluku Tiithi ihu, ni wa Yesu Kristu Pwiya ahu, okhale ni nyuwo.

3 Ottottopeliwe Muluku, Tiithi awe Pwiya ahu Yesu Kristu. Okhala wiira na awiixutti a Kristu, owo oonivaha mareeliho ootheene anikhuma wiirimu orumeelaka ikuru sawe.+ 4 Muluku oonithanla okhala oowiiraana ni Kristu, olumwenku ohinatthi opattuxiwa,* wiira nikhale oowaarya ni oohittheka+ ohoolo wawe, mwaha wa omphenta Muluku. 5 Owo aahilakela onithanla+ wiira onikhalihe anaawe+ mwa Yesu Kristu, moovarihana ni etthu yaamusivela ni aaphavela awe,+ 6 wiira atthu amuttottopele Muluku mwaha wa omurumeela Mwanawe+ onimphentexa awe, ophavelaka onooniherya oreera wawe murima wuulupale.+ 7 Omurumeelaka mwanawe, noovahiwa mukuttho onoopola, wiira noopoliwe itampi sahu. Aayo, itampi sahu sooleveleliwa+ mwaha wa ephome awe.+ Tthiri, oreera murima wa Muluku ti wuulupale!

8 Owo oonooniherya vaalupale oreera murima ni oonivaha miruku sootheene ni miyuupuwelo sootheene sooreera, 9 onisuwelihaka esiiri ya Muluku+ ya ele oniphavela awe. Eyo ennivarihana ni ele enimusivela ni elakenle awe. 10 Yoolakela awe ti okumiherya enamuna ya weettiha itthu, yeeyo enrowa wiiraneya wookiseryani wa okathi othanlale awe. Owo onoothukumanya itthu sootheene mwa Kristu: Itthu siri wiirimu ni itthu siri valaponi.+ Aayo, mwa yoowo. 11 Hiyo nihiiraana nuuwo, nave Muluku oonithanlela waakhela etthu onileihenrye awe.+ Owo oolakela onithanla moovarihana ni ele oniphavela awe, maana onnipaka itthu sootheene ntoko oniphavela awe. 12 Hiyo ti nipacenrye omuroromela Kristu, nto Muluku oolakela onithanla wiira ninvuwihe ni omuttottopela yoowo. 13 Masi nyuwo-tho mwaanimulipelela yoowo, nuumala wiiwa moolumo eekeekhai, eyo piiyo, ihapari sooreera sa woopoliwa wanyu. Nuumala omukupali, Muluku ohoohelani ekanyeryo+ orumeelaka ikuru sawe soowaarya aaleihenrye awe. Owo oopaka eyo omurumeelaka Kristu. 14 Ikuru soowaarya, siri ntoko yooleiherya+ enooniherya wiira nnimwaakhela ele Muluku onleihenrye awe.+ Muluku oopaka eyo ovahaka mukuttho onoopola, wiira owoopole atthu awe,+ wiira owo ovuwihiwe vanceene.

15 Tivonto, okhuma okathi yoole kiiwale aka wiira munnimwaamini Pwiya Yesu ni munnaaphenta ale oororomeleya,* 16 nkinahiye omuxukhuru Muluku mwaha wa nyuwo. Nkinahiye wooromolani kaavekelaka, 17 wiira Tiithi oovuwa, Muluku a Pwiya ahu Yesu Kristu, oovaheeni owerya woosuwela ni wiiwexexa itthu onooniherya awe.+ 18 Muluku oohula mirima sanyu, wiira moone ni musuwele nlipelelo onivaha awe, vamosa ni itthu sootepa oreera aaleihenrye awe ale oororomeleya.*+ 19 Nave musuwele owerya wuulupale onoonihenrye awe hiyo oowaamini.+ Owo ohooniherya owerya iwo wuulupale, orumeelaka ikuru sawe. 20 Nave oorumeela ikuru iyo wiira omuhihimuxe Kristu mookhwaani ni oomukilaathiha moono woolopwana+ wiirimu. 21 Owo onvuwiha vanceene ovikana ikuvernu sootheene, okhulupale wootheene, owerya wootheene, olamulelo wootheene ni masina ootheene,+ ohiya paahi olumwenku ola,* masi-tho ole onirwa. 22 Nave-tho, Muluku oopweha itthu sootheene vathi va inawu sa Kristu+ ni oomukhaliha muru a itthu sootheene sinivarihana ni muloko,+ 23 yoowo ori erutthu awe,+ osareyale itthu sinimuhimya yoowo. Kristu owo onnimaleliha itthu sootheene.