HOSEYA
1 Ala ti moolumo Yehova aamulenle awe Hoseya* mwaana a Beyeri mahiku a Oziya,+ Yotami,+ Akhazi+ ni Ezekiya,+ mamwene a oYuda,+ ni mahiku a Yerobowamu+ mwaana a Yowaxi,+ mwene a wIsarayeli. 2 Okathi Yehova aapacenrye awe olavula ni atthu omurumeelaka Hoseya, Yehova aahimuleela Hoseya wiira: “Murowe, mwamuthele muthiyana namararuwa* ni mwaayare anamwane ooraruuwa, okhala wiira atthu a elapo aahiya omutthara Yehova+ mwaha wa oraruwa”.*
3 Nto owo aahimuthela Goomeri mwaana a Dibilayimi, nto Goomeri owo aahirupala ni aahimuyarela Hoseya mwaana mwaamulopwana.
4 Vano Yehova aahimuleela Hoseya wiira: “Munvahe mwaana owo nsina noowi Yezireyeli,* okhala wiira voohipisa etthoko ya Yehu+ enimwaakhula ohoolo waka, mwaha wa owiiva atthu oYezireyeli. Nave-tho kinoomaliha olamulela wa nloko na Isarayeli.+ 5 Nihiku nlo, kinimunta muura wa Isarayeli, oxepani* wa oYezireyeli”.
6 Goomeri aahirupala-tho, nave aahimuyara mwaana mwaamuthiyana. Vano Muluku aahimuleela Hoseya wiira: “Munvahe nsina noowi Lo-Ruhama,* okhala wiira nkinrowa-tho waamorela ikharari+ atthu a nloko na Isarayeli. Tthiri kinoowoomolela ottaiwene.+ 7 Masi kinimwaamorela ikharari atthu a nihimo na Yuda,+ nave miyo Yehova Muluku aya, kinoowoopola.+ Nkinrowa owoopola kirumeelaka muura, nnakhala espaata, wala ekhotto, nnakhala ikhavalo, aahiiso anakhavalo”.+
8 Nuumala Goomeri omuhiiha Lo-Ruhama waamwa, aahirupala ni aahimuyara mwaana mwaamulopwana. 9 Vano Muluku aahihimya wiira: “Munvahe nsina noowi Lo-Ami,* okhala wiira nyuwo khamuhiyo atthu aka, nave miyo nkinrowa okhala Muluku anyu.
10 “Nave mwaattelo wa atthu a Isarayeli onrowa olikanaka ni mihaava sa ophareya, seiyo sihiniweryaneya ophimmwa aahiiso okontariwa.+ Nto ohiya owiirelaka: ‘Nyuwo khamuhiyo atthu aka’,+ kinrowa owiirelaka: ‘Anamwane a Muluku mukumi’.+ 11 Nave atthu a oYuda ni a wIsarayeli anrowa othukumanyiwa opuro omosa,+ nto anoomuthanla mutthu mmosa wiira aahooleleke ni anookhuma elapo ele, okhala wiira ninrowa okhala nihiku nuulupale na Yezireyeli.+
2 “Mwaaleele axinninyu wiira: ‘Atthu aka!’+
Nave mwaaleele axirokorinyu wiira: ‘Nyuwo muthiyana mmoreliwe ikharari!’+
2 Mwaakumiherye mulattu amaminyu, mwaakumiherye mulattu,
Okhala wiira awo khahiyo amwaaraka+ ni miyo nkihiyo aiyaya.
Awo yaahaana ohiya oraruwa*
Nave yaahaana okumiha mmapeleni mwaya ithoonyeryo sa oraruwa.
3 Mwaahiire siiso, kinimwaarula ikuwo ni kinimwaahiya ehiwanre etthu ntoko nihiku yaayariwa aya,
Kinoowiiriha okhala ntoko woothakoni,*
Kinoowiiriha okhala ntoko etthaya yoowuuma,
Nave kinoowiiriha okhwa mwaha woovoliwa ntthona.
4 Nave anaaya nkinrowa waamorela ikharari,
Okhala wiira awo anamwane a mararuwo.
5 Tthiri maama anyu ooraruwa.*+
Muthiyana ooyanreni oopaka itthu soowuuliha muru,+ maana oohimya wiira:
‘Kinimwaatthara axihawala aka,+
Yaawo anikivaha ephaawu ni maasi,
Ekuwo ni eliinyu, makhura ni eviinyu’.
6 Tivo, kinoottiyela ephiro aya ni miiwa,
Nave kinimwaatekelela exiri ya maluku,
Wiira ehiphwanye-tho iphiro saya.
7 Owo onimwaatthimakela axihawala awe, masi khonrowa waaphwanya.+
Onimwaaphavela axihawala awe, masi khonrowa waaphwanya.
Nto onoohimya wiira: ‘Kinoomutthikela iyaka oopacerya,+
Okhala wiira khalai itthu saanikeettela saana ovikana vano’.+
8 Owo khaasuwela wiira ti miyo kanvaha ipyo,+ eviinyu ya niinaano ni makhura,
Nave ti miyo kanvaha eparatha yinceene,
Vamosa ni eweero, seiyo aarumeela awe wiira omukokhorele Bayaali.+
9 ‘Tivonto, miyo kinootthika ni kinoowaakha ipyo saka okathi woohepha,+
Ni eviinyu aka ya niinaano, okathi aya.
Nave-tho kinoowaakha ekuwo aka ni eliinyu aka, seiyo yaawara aya.
10 Kinoomurula ikuwo ohoolo wa axihawala awe,
Nave khuuvo mulopwana onrowa omoopola mmatatani mwaka.+
11 Kinoomala-maliha itthu sootheene simmutteeliha murima,
Ifesta sawe,+ miyeeri sawe isya, isaabadu sawe ni okathi awe wootheene wa ifesta.
12 Nave kinoohonona miri sawe sa ewuuva ni sa efiiku, seiyo aahimmye awe wiira:
“Miri iya kiliviwale ni axihawala aka”.
Kinimwiiriha miri iyo okhala etakhwa,
Nave inama sa mutakhwani sinookhuura miri iyo.
13 Miyo kinoophuka mulattu aka nuuwo mwaha wa mahiku aavaha awe mikuttho ilatarato sa Bayaali,+
Okathi aireeriha awe ni ipirinku ni itthu soowiiphwaneliha, onaatthara axihawala awe,
Okiliyalaka miyo’.+ Yehova tonihimya.
14 ‘Vano, miyo kinoomweepesa,
Kinoomuroiha woothakoni,
Nave kinoomuleela moolumo aninvara murima.
15 Okhuma nihiku nlo orowa ohoolo, kinoomutthikiherya imatta sawe sa ewuuva,+
Nave nxepa* na wAkori+ kinimwiiriha okhala mukhora wa nlipelelo.
Owo onookaakhula ntoko iira awe mahiku a omiravo awe,
Ntoko nihiku aakhuma awe elapo ya wExiitu.+
16 Nto nihiku nlo,
Nyuwo munrowa okiirelaka aiyaka, nave-tho khamunrowa okiirelaka apwiyaka’.* Yehova tonihimya.
17 ‘Kinookumiha mwaano mwawe+ masina a ilatarato sa Bayaali,
Nave masina a ilatarato iyo khanrowa-tho wuupuweliwa.+
18 Nihiku nlo, kinimwaaphwanyiha mureerelo kipakaka nivarihano ni inama sa mutakhwani,+
Ni axipalame anivava osulu ni inama siniipurula.+
Nave kinimwaakiherya elapo ela mwaha wa muura, espaata ni ekhotto,+
Nto kinoowiiriha atthu okhalaka ni murettele.+
19 Miyo kinimoonoivarini para mahiku ootheene.
Nave kinimoonoivarini kittharaka exariya,
Ophenta woororomeleya ni omoriwa ikharari.+
20 Miyo kinimoonoivarini ni ororomeleya,
Nto mweekeekhai nyuwo munoomusuwela Yehova’.+
21 Yehova onihimya wiira: ‘Nihiku nlo,
Miyo kinoovaha itthu sinivekeliwa ni erimu,
Nave erimu enoovaha itthu sinivekeliwa ni elapo,+
22 Nto elapo enookumiherya ipyo, eviinyu ya niinaano ni makhura.
Vano itthu iyo sinoovahiwa Yezireyeli*+ ntoko itthu sinivekela awe.
23 Kinoomwaala Yezireyeli vatthayani+ ntoko epyo aka,
Kinommorela ikharari ole ahaakimorenle ikharari.*
Nave kinoowiirela ale ahikhanle atthu aka* wiira: “Nyuwo mwa atthu aka”.+
Nto awo anookiirela wiira: “Nyuwo mwa Muluku aka”’”.+
3 Vano, Yehova aahikileela wiira: “Murowe-tho, mwamphente muthiyana yoole oniphentiwa ni mulopwana mukina ni oniraruwa,+ ntoko siisaale Yehova onaaphenta awe atthu a wIsarayeli+ okathi anaatthara aya amuluku akina+ ni sinaasivela aya ipoolu sa ifiiku soonyakattiwa”.*
2 Siiso-tho, koomuthuma muthiyana owo wiira okhale awaka ni musurukhu 15 wa eparatha ni ehoomeri* emosa nnimeya ya esevaata. 3 Nuumala-vo, kaahimuleela wiira: “Nyuwo munrowa okhalaka awaka mahiku manceene. Nto muhiraruwe* ni muhirupe ni mulopwana mukina, nave miyo nkinrowa orupa ni nyuwo”.
4 Tthiri atthu a wIsarayeli anookhala okathi munceene* ahirina mwene,+ nnakhala mukhulupale, ahivahaka mikuttho, ahirina ipilaari sinikokhoreliwa, ahirina eefodi*+ ni ahirina ilatarato sinirumeeliwa vatthokoni.+ 5 Ohoolo waya, atthu a wIsarayeli anootthika ni anomphavelasa Yehova, Muluku aya,+ ni anomphavelasa Davidi, mwene aya.+ Vano, mahiku ookiserya, awo anootthikela wa Yehova mwaha wa omoova ni mwaha wa oreera wawe murima.+
4 Nyuwo atthu a Isarayeli, nwiriyane moolumo a Yehova,
Maana atthu a elapo ela aakhalana mulattu ni Yehova,+
Okhala wiira elapo ela kekhanle ekeekhai, nnakhala ophenta woororomeleya, aahiiso osuwela wa Muluku.+
Nave-tho wiivanana onnincerereya.+
3 Tivo, elapo ela enrowa aya wunla,+
Nave atthu ootheene a elapo ela anrowa aya omala-mala.
Inama sa mutakhwani, axipalame anivava osulu,
Ni ihopa sa mphareya sinimookhwa.
4 “Masi, ohikhale mutthu onivaha miruku nnakhala onittaruxa,+
Okhala wiira atthu anyu anlikana ni atthu aninyakulihana ni namukuttho.+
5 Tivo, nyuwo munoomora othana,
Nave profeta onookwattuliwa vamosa ni nyuwo ntoko mutthu onikwattuliwa awe ohiyu.
Nave miyo kinimwaapwetexa amaminyu.
6 Atthu aka anoopwetexiwa, mwaha woowi kharina osuwela.
Okhala wiira mookhootta osuwela,+
Ni miyo kinimookhoottani, wiira muhiye ovara muteko ntoko namukuttho aka.
Nave, okhala wiira mooliyala nlamulo na Muluku anyu,+
Ni miyo-tho kinimwaaliyala aniinyu.
7 Okathi yaatepa aya wuncerereya, awo yaamutepa okitthekela.+
Nto kinootatuxa ovuwa waya, wiira okhale ohittittimihiwa.*
8 Awo annoolya mwaha wa itampi sa atthu aka,
Nave anniphavela wiira atthu apakeke itampi sinceene.
9 Atthu ni namukuttho enoowiiraneela etthu emosa-ru.
Awo animwaakhula ohoolo waka mwaha wa iphiro saya,
Nave kinoowiiriha ohaawa mwaha wa miteko saya.+
10 Awo animoolya masi khanrowa ovona.+
Anooraruwaka masi khanrowaka wuncerereya,+
Okhala wiira khanwiriyanne Yehova.
12 Atthu aka annikoha ilatarato sipatthiwe ni matera,
Nave annipaka ele ekopo ya ehako ya ilatarato iyo enaaleela aya.
Mwaha woophavela orupihana woohiloka awo aahiya iphiro saya,
Nave mwaha wa orupihana woohiloka, annikhootta omwiiwelela Muluku aya.
13 Awo annivaha mikuttho vasulu va miyaako,+
Nave annivaha mwiixi wa mukuttho woopahiwa mapuro oorakamela osulu,
Vathi va mwiri oniihaniwa karvaalyo,* mwiri oniihaniwa estorakisi* ni miri sootheene suulupale,+
Okhala wiira muuttutthi aya ti wooreera.
Tivo anaaya axithiyana aniraruwa aya,
Nave athiyana atheliwe ni anaaya aniraruwa aya.
14 Miyo nkinrowa waaphukela aniinyu axithiyana mwaha wooraruwa,
Nnakhala nkinrowa waaphukela axithiyana atheliwe ni aniinyu mwaha wooraruwa,
Okhala wiira alopwana annaathara anamararuwa,
Nave annivaha mikuttho vamosa ni anamararuwa mutemplo.
Atthu siiso, ahirina osuwela,+ anoopwetexiwa.
Muhirowe oXiligali+ nnakhala oBethi-Aveni,+
Nave muhilaphe muhimyaka wiira: ‘Ntoko siisaale Yehova onikhala awe!’+
16 Tthiri atthu a Isarayeli ahuumiha mirima saya ntoko epooyi yoothiyana yoothipelela.+
Niireke vano Yehova onimwaakhapelela ntoko epwittipwitthi yaamukhaani enilyihiwa opuro akhanle malaxi manceene?
17 Atthu a Efrayimi annivarexexa ilatarato.+
Mwaahiye mekhaya!
18 Okathi serevexa aya onimala awe,
Awo annikhala anamararuwa.
Anamalamulela aya onnaasivela vanceene ohittittimihiwa.+
19 Epheyo enoomurukurerya ni enoomukuxa,
Nave awo animuuliwa muru mwaha wa mikuttho saya”.
5 “Nyuwo anamukuttho,+ nwiriyane,
Nyuwo atthu a nloko na Isarayeli, nvahe ephoole,
Nyuwo atthu a etthoko ya mwene, mwiiwe.
2 Anamavirikanya anniwiiva ale ammorela mulittini moowiixa,
Nave miyo kinrowa waattaruxa ootheene aya.
3 Kinnimusuwela Efrayimi,
Nave nkinimutikhina Isarayeli.
Vano nyuwo Efrayimi munnirupihana voohiloka,
Nave Isarayeli ohiinanariha.+
4 Miteko saya sinnaakhoottiherya omutthikela Muluku aya,
Awo khammuupuwela Yehova.
5 Wiixinnuwiha wa atthu a Isarayeli onnaakhalela onamoona,+
Isarayeli ni Efrayimi aamora mwaha wa soottheka saya,
Nave Yuda oomora vamosa naawo.+
6 Awo yaahirowa omwaavya Yehova akunxe ene ipwittipwitthi saya ni ipooyi wiira anvahe mukuttho.
Masi awo khiyaawenrye omphwanya,
Okhala wiira owo aahaanyanyala.+
7 Awo tapacenrye omunyanyala Yehova,+
Okhala wiira ahaayara anamwane ni athiyana anamurwa.
Vano, muhina mwa mweeri mmosa awo anoopwetexiwa ni itthu saya sootheene.
8 Moope nlope+ oXibeya ni oRama!+
Mpacerihe ekhotto oBethi-Aveni. Nyuwo Beniyamini,+ hiyo ninrowa ni nyuwo!
9 Nyuwo Efrayimi, nihiku na ehukhumu munrowa wooviwaka vanceene.+
Koolaleya etthu enrowa wiiraneya eriyari ya maloko ootheene a wIsarayeli.
10 Makhulupale a oYuda anlikana ni ale anincererya mikano saya mpakha muttetthe wa atthu yaattamanne aya.+
Kinimwaamwarexela oviruwa waka ntoko maasi.
11 Efrayimi onoohaaxiwa, onoonyakattiwa ni exariya,
Okhala wiira aahilakela waatthara awanani awe.+
12 Kinimwaakhuura atthu a wEfrayimi ntoko mwaamukokho onikhuura mwiri,
Nave kinoowiiriha atthu oYuda wuntta ntoko anintta aya matera.
13 Okathi Efrayimi oonale awe eretta awe ni Yuda oonale awe makhwatta awe,
Efrayimi aahirowa wAsiiria,+ nave aahaaruma anamuhupi orowa wa mwene muulupale.
Masi owo khaawenrye woopenuxani,
Nave khaawerya ovoliha makhwatta anyu.
14 Kinrowa okhala ntoko kharamu mwaamukhaani para Efrayimi,
Nave kinrowa okhala ntoko kharamu ootupa para nihimo na Yuda.
15 Kinootthikela opuro aka mpakha awo ohaawa mwaha wa itthu soohiloka apanke aya,
Nuumala-vo, anookiphavela wiira kaareerele murima.+
Okathi anrowa aya oriipiwa murima, anookaavya”.+
6 “Murwe, nimutthikele Yehova,
Okhala wiira nnaamwi oninyaanyanle ene, owo onoonipenuxa.+
Nnaamwi onivulalinhe ene, owo onookhapelela makhwatta ahu.
2 Nuuvira mahiku manli, owo onoonilipiha.
Nihiku na neeraru, onoonivenxa,
Nto nnookhalaka ohoolo wawe.
3 Nnoomusuwela Yehova, tthiri nnoophavelexa omusuwela.
Moohaanyiherya owo onoonirweela ntoko waarya wa nsuwa voosiisu;
Owo onimoorwa varya ahu ntoko epula,
Ntoko epula ya okathi wa ephovo* ennaaniha etthaya”.
4 “Kiwiireleni exeeni nyuwo Efrayimi?
Kiwiireleni exeeni nyuwo Yuda?
Ophenta wanyu woororomeleya onlikana ni etthapwe ya voosiisu,
Ntoko okame onlakaseya moowaakuveya.
Nave woophukelani waka onrowa waaryaka ntoko muthuko.+
6 Tthiri miyo okisivela ophenta woororomeleya* ohiya mikuttho,
Nave okisivela osuwela wa Muluku, ovikana soovaha para opahiwa.+
7 Masi atthu aka, anlikana ni atthu pure, aahonona nivarihano.+
9 Anamukuttho anlikana ni alavilavi yaawo aniwiipithela atthu.
Awo anniwiiva atthu mustaraatani ya oSikhemi,+
Okhala wiira mweettelo aya ti woowuuliha muru.
10 Kooweha etthu yoohiirya nloko na Isarayeli.
11 Vano nyuwo atthu a oYuda, woothanliwa okathi wiira muthukumanyiwe siisaale oniphiya aya okathi wa ohepha,
Okathi kinrowa aka waattikiha atthu aka weepotthani”.+
7 “Okathi kimmananihaaka waapenuxa atthu a Isarayeli,
Atthu ootheene anniwerya oweha itampi sa atthu a Efrayimi,+
Vamosa ni otakhala wa oSamariya.+
Okhala wiira awo annipaka itthu voohiroromeleya;+
Alatarau annikela mpaani, nave ekurupu ya alavilavi ennaatuphela atthu mustaraatani.+
2 Masi, vamurimani vaya khanisuwela wiira kinimuupuwela sootakhala saya sootheene.+
Vano, aamorela vamuraakhoni mwaha wa otakhala waya;
Miyo kinnoona otakhala waya iwo.
3 Awo annimutteeliha murima mwene mwaha wa otakhala waya;
Nave annaatteeliha murima makhulupale ni wootha waya.
4 Ootheene aya anamararuwa,
Annipatta ntoko efornu yeeyo mulipa-oowooxa iphaawu onipattiha awe;
Owo onnihiya otetheerya mooro nuumala ommasari tiriku mpakha tiriku owo opuhuwa.
5 Nihiku na mwene ahu, makhulupale anoowereiwa;
Anoonanariwa mwaha wa eviinyu.+
Mwene oohaavaha ntata alipa-ooveeha.
6 Mirima saya sinniviha ntoko efornu.
Mulipa-oowooxa iphaawu onnirupa ohiyu wootheene,
Voosiisu efornu ennipaha ntoko mooro onipatta.
7 Ootheene aya anniviha ntoko efornu,
Nave annaapwetexa anamalamulela* aya.
8 Efrayimi ootakaahereya ni maloko.+
Efrayimi onlikana ni ephaawu yoovilikeya yoohirukunuxiwa.
9 Anamurwa aamwaakha owerya wawe,+ masi owo khonisuwela eyo.
Nave ikharari sawe sootteela, masi owo khoniweha eyo.
10 Wiixinnuwiha wa atthu a Isarayeli onnooniherya wiira awo tootakhala,+
Masi awo khantthikela wa Yehova Muluku aya,+
Nnakhala khanimphavela nnaamwi siwiiranelaka itthu iyo sootheene.
11 Atthu a Efrayimi ari ntoko epompa yoowaakuva owokeya, yeeyo ehinuupuwela saana.+
Awo yaahivekela okhaliheriwa wExiitu,+ nave yaahirowa wAsiiria aphavelaka okhaliheriwa.+
12 “Khula opuro anirowa aya, kinimwaarihela ntthavi naka.
Kinimwaamoroxa ntoko axipalame a musulu.
Kinimwaattaruxa ntoko kaaloponle aka atthu a muloko aya.+
13 Aatakhaliwa, okhala wiira aakihiya!
Apwetexiwe, okhala wiira aakitthekela!
Kaaniphavela owoopola, masi awo aakihimyana itthu soowoothiwa.+
14 Khiyaakivekela ni murima aya wootheene wiira kaakhaliherye,+
Nnaamwi yaikhupanyerya vakhaamani vaya.
Yaaniithikilasa mwaha wa ipyo saya ni eviinyu aya ya niinaano.
Awo aakirukunuwela.
15 Nnaamwi kaattarunxe ene ni kaalipinhe ene,
Awo aakirukunuwela aphavelaka opaka itthu sootakhala.
16 Awo aahiya ephiro aya, masi khatthikenle okokhorela weekeekhai,
Yaari oohiroromeleya, ntoko muura woohikokheya.+
Makhulupale aya animwiiviwa ni espaata mwaha wa moolumo aya oohiloka.
Tivo, anootheiwa mulaponi mwa wExiitu”.+
8 “Murumihe nlope!+
Ookhala mutthu onirwa empa ya Yehova ntoko murumaasi,+
Okhala wiira aisarayeli aahonona nivarihano naka+ ni aatthekela nlamulo naka.+
2 Awo annikinlela ariki: ‘Khoo Muluku ahu, hiyo atthu a Isarayeli ninnoosuwelani!’+
3 Atthu a Isarayeli aakhootta opaka itthu sooloka,+
Tivo awanani aya animwaaxintta.
4 Awo ahaathanla mamwene, miyo kihaathanlale aka.
Ahaathanla makhulupale, miyo kihinaasuwela aka.
5 Nyuwo atthu a oSamariya,+ miyo kookhootta epooyi anyu yaamukhaani.
Koonanariwa vanceene ni nyuwo.+
Mpakha liini muhinrowa anyu oweryaka wiireeriha?
6 Tthiri, elatarato eyo ya epooyi yaamukhaani epakiwe ni atthu a Isarayeli.
Elatarato eyo epakiwe ni mulipa onivara muteko ni matera, khahiyo Muluku.
Epooyi yaamukhaani ya oSamariya enoophwatakasiwa yootheene.
7 Awo annaala epheyo,
Nto anrowa omuhepha munamukhaya.+
Khanikhanle nikala ninkumiherya ipyo soottokottha;+
Ipyo siniima khasinikhuma ephepa.
Hata yiimaka, anamurwa tanrowa ovurula.+
8 Nloko na atthu a Isarayeli ninrowa opwetexiwa.+
Vano, anrowa otakaahereya ni maloko makina,+
Ntoko mwaapu ohinrumeeliwa.
9 Awo yaahirowa wAsiiria,+ ntoko puuru a mutakhwani oneetta mekhawe.
Efrayimi ohaaliva axihawala awe.+
10 Nnaamwi yaalinve ene axihawala aya eriyari ya maloko,
Vano kinrowa waathukumanya;
Awo anoopacerya ohaawa+ mwaha wa muritti ateexihiwe aya ni mwene ni makhulupale.
11 Atthu a Efrayimi aawuncererya altaari wiira attheke.+
Awo annaarumeela altaari awo wiira apakeke itampi.+
13 Awo annikivaha mikuttho ni annikhuura enama,
Masi Yehova khonisiveliwa naawo.+
Vano, owo onrowa wuupuwelela itampi saya ni onimwaahukhumu mwaha wa itthu soohiloka apanke aya.+
14 Atthu a Isarayeli aamuliyala Ole aapanke+ ni aateka itemplo,+
Nave Yuda ohincererya ipooma soolipihiwa.+
Masi, miyo kinooroiha mooro ipooma saya,
Nto mooro owo onoopaha ipa soorakamela osulu sa khula epooma”.+
9 “Nyuwo atthu a Isarayeli, muhitteeliweke murima.+
Muhitthapeke ntoko atthu akina.
Mwaha wa oraruwa,* nyuwo moomurakamela Muluku anyu.+
Vaanoosivelani oraruwa wiira muliviwe musurukhu mapuro ootheene aneepetthiwa ipyo.+
2 Masi opuro oneepetthiwa ipyo ni opuro oninyakattiwa ewuuva khonrowa waavaha yoolya,
Nave atthu a Isarayeli khanrowa ophwanya eviinyu ya niinaano.+
3 Awo khanrowa otthikela okhala elapo ya Yehova.+
Ohiya-vo, Efrayimi onootthikela wExiitu,
Nave animoolya itthu soohiloka elapo ya wAsiiria.+
Iyo sinlikana ni ephaawu enivahiwa okathi wooriipiwa murima;
Atthu ootheene anikhuura ephaawu eyo, animwiinanariha,
Okhala wiira ephaawu aya, enrowa okhala yawaya paahi,
Kheniroihiwa mpaani mwa Yehova.
5 Munrowa opaka exeeni nihiku munrowa anyu othukumana,
Nihiku na efesta ya Yehova?
6 Mwiiwe! Awo anrowa otthyawaka mwaha wa opwetexiwa.+
Exiitu tonrowa waathukumanya,+ nave Menfi tonrowa waavitha.+
Mireerelo saya sooreera sa eparatha sinrowa okhuneeliwa ni makukhu ooneena,
Nave mutentani* mwaya sinoomela miiwa.
7 Anoophiya mahiku oowaakhula mulattu,+
Nave anoophiya mahiku ooliva mulattu.
Atthu a Isarayeli anoosuwela eyo.
Profeta aya onimooniherya wiira mulolo, nave mulopwana onisuwela otaphulela itthu onooniheriwa awe ni Muluku onoovahuwa,
Okhala wiira itampi sanyu ti soowaatta, nave mixankiho sinrowa wookhumelelani ti soowaatta”.
8 Mulipa-oowehaweha+ a wEfrayimi aari ni Muluku aka.+
Vano, iphiro sootheene sa maprofeta awe+ sinlikana ni muraakho wa mulipa-onaavara axipalame.
Tthiri, empa ya Muluku awe sookhala itthu soohiloka.
9 Aisarayeli annitepa opaka itthu soohiloka seiyo sinrowa owiiriha opwetexiwa, ntoko atthu a oXibeya yiirale aya.+
Owo onimuupuwelela yoottheka aya ni onimwaahukhumu mwaha wa itampi saya.+
10 “Okathi kaaphwanyale aka aisarayeli,+ waalikana ni ophwanya ewuuva woothakoni.
Okathi kaawenhe aka amuhavinre anyu, waalikana ni oweha mihokorokho soopacerya sa ifiiku vamwirini vaya.
Masi, awo yaahimurowela Bayaali a oPeyori.+
Awo yaahiivahererya wiira apakeke itthu soowuuliha muru,*+
Nave yaahiikhaliha oohiloka analikana ni amuluku yaakokhorela aya.
11 Ovuwa wa Efrayimi onnivavela ottaiwene ntoko mwaapalame.
Khuuvo muthiyana onrowa orupalaka nnakhala oyaraka.+
12 Hata yaahuwaka anamwane,
Kinoowaakha, nkinaahiyerya nnakhala mmosa.+
Tthiri, okathi kinrowa aka waahiya, atthu awo anootakhaliwa!+
13 Efrayimi yoowo aaliwe opuro wooreera, kaamoona ntoko elapo ya oTiiro.+
Vano, Efrayimi onrowa waavahererya anaawe wiira yiiviwe”.
14 Yehova, mwaavaheke etthu muniphavela anyu waavaha,
Nwiirihe ohiwerya waayara anamwane ni mwaavahe mapele ahinkhuma eleeti.
15 “Otakhala waya wootheene waari oXiligali,+ ti weiwo kaapacenrye aka waanyokha.
Kinoowoomola mpaani mwaka mwaha wa itthu sootakhala anipaka aya.+
Nkintthikela-tho waaphenta,+
Makhulupale aya ootheene ahuumiha mirima saya.
16 Efrayimi onoovulalihiwa.+
Mitathaari sawe sinimuuma, ni khasinrowa wiimiha mihokorokho.
Hata aayaraka anamwane, kinimwaavahererya anaawe onaaphenta awe wiira yiiviwe”.
17 Muluku aka onimwaakhootta,
Okhala wiira khanwiriyanne.+
Nave awo anrowa otthyawelaka maloko makina.+
10 “Atthu a Isarayeli anlikana ni mwiri mwaamukhaani wa ewuuva, oniima mihokorokho.+
Okathi ontepa aya wiima mihokorokho, awo annitepa owuncererya altaari aya.+
Okathi anihepha aya itthu sooreera mulaponi mwaya, awo annitepa oreeriha ipilaari saya sinikokhoreliwa.+
2 Murima aya ti woowootha.
Vano awo aaphwanyaniwa mulattu.
Ookhala mutthu onrowa waapwexakasa altaari aya ni opwetexa ipilaari saya sinikokhoreliwa.
3 Awo anrowa ohimyaka wiira: ‘Hiyo khanrina mwene,+ okhala wiira khanimuttittiminhe Yehova.
Nto mwene aarowa oniirela exeeni?’
4 Awo annihimya moolumo eethiru, annilapha yoothaka+ ni annipaka nivarihano.
Tivo, ophukeliwa waya onlikana ni mwiri woohapala yoowo oninnuwa mmatta mulimmwale.+
5 Atthu a oSamariya anrowa woovaka mwaha wa elatarato ya epooyi ya oBethi-Aveni.+
Atthu awo animunlela elatarato eyo,
Vamosa ni anamukuttho a amuluku a amalapo, yaawo yaatteeliwa murima mwaha wa elatarato eyo ni ovuwa waya.
Nto, elatarato eyo enookuxiwa eroihiwaka ottaiwene, erakamelihiwaka naawo.
6 Elatarato eyo enooroihiwa wAsiiria wiira avahiwe mwene muulupale.+
Efrayimi onimuulihihiwa muru,
Nave atthu a Isarayeli animuuliwa muru mwaha wootthara miruku sa elatarato eyo.+
7 Atthu a oSamariya ni mwene aya, anoomala-malihiwa,+
Ntoko nlaxi nikuxiwe ni maasi.
8 Mapuro oorakamela osulu anikokhoreliwa amuluku eethiru a oBethi-Aveni,+ yaawo aniwiiriha atthu a Isarayeli ottheka,+ anoomala-malihiwa.+
Valtaari vaya sinimunnuwa miri saamukhaani ni miiwa.+
Atthu anrowa ohimeeryaka miyaako wiira: ‘Munikhuneele!’
Nave anrowa ohimeeryaka mattumuxa wiira: ‘Munimorele!’+
9 Nyuwo atthu a Isarayeli, khamuhiyale ottheka okhuma nihiku mwaatthenke anyu oXibeya.+
Nto nyuwo munnithipelela opaka etthu emosa-ru.
Anamwane ale oohixariya, khiyaamala-malihiwe ni ekhotto oXibeya.
10 Miyo kinimwaattaruxa okathi kiniphavela aka.
Nave atthu anoothukumana wiira yaavirikanye,
Okathi anrowa aya oteexa itampi saya soopiili.
11 Efrayimi aari ntoko epooyi yaamukhaani yoothiyana yoowiixuttihiwa, yeeyo yaasiveliwa oxila ipyo,
Tivo, miyo kaanikhapelela exiko awe yooreera.
Vano, kinoomuruma mutthu wiira onwele Efrayimi.+
Yuda onrowa olima. Nave Yakobe onrowa olima para mutthu mukina.
12 Mwaaleke muttharaka exariya ni muhepheke ophenta woororomeleya.
Mulimeke imatta sihilimmwale,+
Nlelo murina ene okathi womphavela Yehova,+
Mpakha yena orwa ni owiixuttihani otthara exariya.+
13 Masi, nyuwo muhaala otakhala,
Moohepha ohixariya.+
Nave muhoolya muhokorokho wa wootha,
Okhala wiira moororomela iphiro sanyu,
Nave muhaaroromela anakhotto anyu anceene ootupa.
14 Onookhumelela onyakulihana eriyari ya atthu anyu,
Nave ipooma sanyu soolipihiwa sinoopwexakasiwa sootheene,+
Ntoko siisaale Xalimani aapwexakanse awe empa ya wAribeli,
Nihiku na ekhotto, okathi aximaama yaaphwatakasiwe aya vamosa ni anaaya.
15 Nyuwo Beteli,+ ti siiso sinrowa anyu wiirihiwa, mwaha wa otakhala wanyu wuulupale.
Nuumala nsuwa okhuma, mwene a wIsarayeli onoopwetexiwa tthiri”.+
11 “Okathi Isarayeli ari awe mmiravo, miyo khanimphenta.+
Nave koomwiihana mwanaka wExiitu.+
3 Masi, ti miyo kimwiixuttinhe Efrayimi weetta,+ nave ti miyo kaamukuxa mmatatani mwaka.+
Awo khiyaaphavenle okupali wiira ti miyo kaapenunxe.
4 Nkaahiyale oweettiha ni mikhoyi sa atthu, ni mikhoyi sa niphento.+
Miyo kaanaarula muritti muxikoni mwaya,
Nave mooreerela murima kaaninvaha yoolya khula mmosa a yaawo.
5 Awo khanrowa otthikela elapo ya wExiitu, masi Asiiria tanrowa okhala mwene aya,+
Okhala wiira aakhootta otthikela wa miyo.+
6 Ipooma saya+ sinrowa orukureriwa ni espaata,*
Nave espaata eyo enoohonona itaranka saya ni opwetexa, mwaha wa itthu sootakhala anipaka aya.+
7 Atthu aka aalakela ohiroromeleya wa miyo.+
Nnaamwi yiihaneliwe ene opuro woorakamela osulu,* khuuvo onivenya.
8 Kinrowa owerya sai woohiyani, nyuwo Efrayimi?+
Kinrowa owerya sai woovahereryani atthu akina, nyuwo Isarayeli?
Kinrowa owerya sai woothokoreryani ntoko Adama?
Kinrowa owerya sai woohiyani ntoko Seboyimi?+
Miyo kooturuka murima aka.
Okathi omosa-ru, kihoomorelani ikharari vanceene.+
9 Miyo nkinrowa wooniherya onanariwa waka.
Nkintthikela-tho ompwetexa Efrayimi,+
Okhala wiira miyo ka Muluku, nkihiyo mutthu.
Miyo ka Muluku Oowaaryexa eriyari anyu,
Nto nkinrwa wa nyuwo kinanariwe ene vanceene.
10 Awo anoomutthara Yehova, nto owo onimoopa murukulu ntoko kharamu.+
Okathi onrowa awe woopa murukulu, anaawe animoorwa akhumaka mpantta onikhuma nsuwa athukumelaka.+
11 Okathi anrowa aya okhuma wExiitu, animoorwa athukumelaka ntoko axipalame.
Okathi anrowa aya okhuma elapo ya wAsiiria,+ animoorwa athukumelaka ntoko ipompa.
Nto, kinimwaapweha mpaani mwaya”. Yehova tonihimya.+
12 “Efrayimi ookirukurerya ni wootha.
Nloko na Isarayeli nookirukurerya ni moolumo oowoototha.+
Masi Yuda nlelo onneetta ni Muluku,
Onniroromeleya wa Muluku Oowaaryexa”.+
12 “Efrayimi onlya epheyo.
Nihiku nootheene, onnitthimakela epheyo ya mpantta onikhuma nsuwa.
Owo onnincererya wootha ni otakhala.
Onnipaka nivarihano ni atthu a wAsiiria+ ni onnikuxa makhura oroihaka wExiitu.+
2 Atthu a oYuda+ aakhalana mulattu ni Yehova.
Owo onoophuka mulattu ni Yakobe ottharaka iphiro sawe,
Nave onoomuliva ottharaka miteko sawe.+
3 Okathi ari awe mmirimani, owo aahivara nxitta na* munnawe,+
Nave orumeelaka ikuru sawe aahiwana ni Muluku.+
4 Owo aahiwana ni nlaikha ni aahixintta.
Aahinla ni aahixonttela wiira oreereliwe murima”.+
Muluku aahimphwanya oBeteli, nto weiwo Muluku aahilavula ni hiyo.+
6 “Mmutthikele Muluku anyu.+
Muhihiye wooniherya ophenta woororomeleya ni exariya,+
Nave okathi wootheene mmulipeleleke Muluku anyu.
7 Mulipa a nakoso onnikuxa epalansa yoowootha,
Owo omusivela wiiya.+
Miteko saka sootheene nkinrowa ophwanyaniwa etthu yoohiloka nnakhala etampi’.
9 Masi miyo ka Yehova, Muluku anyu, okhuma elapo ya wExiitu.+
Kinoowiirihani otthikela okhala mutentani,*
Ntoko mahiku a okathi wa efesta.
10 Miyo kaanilavula ni maprofeta,+
Kaanincererya itthu yooniheriwa aya,
Nave kaanaaleela malikanyiho kaarumeelaka maprofeta.
11 OXileyaadi wookhala wootha+ ni ohiroromeleya.
OXiligali sinnivahiwa mikuttho ipooyi soolopwana.+
Altaari aya anlikana ni ipilaari sa maluku yuukeliwe mmatta moolimmwa.+
12 Yakobe aahitthyawela mmuttettheni wa wArami,*+
Isarayeli+ aahivara muteko weiwo wiira omphwanye mwaarawe,+
Omphavelaka muthiyana, aahikhapelela ipwittipwitthi.+
13 Omurumeelaka profeta, Yehova aahimukumiha Isarayeli wExiitu.+
Nave omurumeelaka profeta aahimukhapelela.+
14 Efrayimi onveeha vanceene Muluku,+
Owo onookhalana mulattu mwaha wa ephome ya atthu owiivale awe.
Pwiya awe onoomuhukhumu mwaha woomuulihiha muru”.+
13 “Okathi Efrayimi aalavula awe, atthu yaanithukumela.
Owo aari oovuwa wIsarayeli.+
Masi, owo aahikhalana mulattu ni aahikhwa mwaha woomukokhorela Bayaali.+
2 Vano, awo annitepa opaka itampi,
Nave arumeelaka eparatha aya, annipaka ilatarato sa yuuma.+
Annirattela ilatarato, seiyo sinipakiwa ni alipa anivara muteko ni matera.
Nave-tho, annihimya wiira: ‘Atthu anivaha mikuttho, avaheke epeexo ilatarato sa epooyi’.+
3 Tivo, awo anrowa olikanaka ni etthapwe ya voosiisu,
Anrowa olikanaka ni okame woowaakuva olakaseya,
Anrowa olikanaka ni ikavava seiyo sinikuxiwa ni epheyo yuulupale opuro oneepetthiwa etiriku,
Nave anrowa olikanaka ni mwiixi onikhuma vasulu va empa.
4 Masi, miyo ka Yehova Muluku anyu, okhuma elapo ya wExiitu.+
Khammusuwenle Muluku mukina kihikhanle miyo,
Nave khokhanle moopoli mukina kihikhanle miyo.+
5 Miyo koosuwenleni woothakoni,+ elapo yoowuuma.
6 Awo yaahihakalala mwaha wa mapuro aya yaalyiha aya inama,+
Yaahihakalala mpakha murima aya wiixinnuwiha.
Siiso awo yaahikiliyala.+
7 Miyo kinrowa okhala ntoko kharamu mwaamukhaani para awo,+
Nave kinrowa okhala ntoko havara iipinthe mukerekhere mwa ephiro.
8 Kinimwaatuphela ntoko mwaamunama a mutakhwani oniihaniwa ursu orimeeliwe axaana awe,
Nave kinimwaapera vapeeto.
Kinimwaakhuura weiwo ntoko kharamu,
Nave mwaamunama a mutakhwani onimwaapera.
9 Nyuwo atthu a Isarayeli, munoopwetexiwa,
Okhala wiira mookirukunuwela, moomurukunuwela ole onookhaliheryani.
10 Vano, ori vai mwene anyu, wiira owoopoleni ipooma sanyu sootheene?+
Nave ari vai anamalamulela anyu,* yaawo mwaahimya anyu wiira:
‘Munivahe mwene ni makhulupale’?+
12 Yoottheka ya Efrayimi yoopwehiwa,
Nave etampi awe yoosukiwa.
13 Owo onimoona owereya ntoko muthiyana oniyara.
Masi owo mwaana ohirina ankhili,
Maana waphiya okathi wooyariwa owo khoniphavela okhuma.
14 Miyo kinoowoopola Mmahiye*
Kinoowoopola mookhwaani.
Nyuwo Okhwa, owerya wanyu ori vai?+
Nyuwo Mahiye owerya wanyu opwetexa ori vai?+
Miyo nkinimoriwa ikharari.+
15 Hata Efrayimi unnuwaka ntoko mitathi,
Enimoorwa epheyo ya mpantta onikhuma nsuwa, epheyo ya Yehova,
Epheyo eyo enrowa okhuma woothakoni wiira yuumihe ehime aya ni mapuro aya aniphattuwa maasi.
Eyo enookuxa mihakhu saya, itthu saya sootheene sa efaita.+
16 Atthu a oSamariya anoohimmwa okhalana mulattu,+ okhala wiira aamurukunuwela Muluku aya.+
Awo animwiiviwa ni espaata.+
Anaaya anoophwatakasiwa.
Nave athiyana aya oorupala anoophuliwa”.
14 “Nyuwo atthu a Isarayeli, mmutthikele Yehova, Muluku anyu,+
Okhala wiira moomora mwaha wa yoottheka anyu.
2 Mmutthikele Yehova ni moolumo ala,
Muhimyaka wiira: ‘Munilevelele yoottheka ahu,+ nave mweemererye itthu sahu sooreera,
Nto hiyo nnimoottottopelakani. Moolumo anikhuma mwaano mwahu+ anrowa olikanaka ni ipooyi saamukhaani, seiyo siniruuha ahu ntoko mukuttho.
3 Atthu a wAsiiria khanrowa onoopola.+
Hiyo khaninrowa owela ikhavalo,+
Nave khanintthikela wiirela itthu nipanke ahu ni matata ahu wiira: “Nyuwo mwa Muluku ahu!”
Tthiri ti nyuwo munaamorela ikharari anamwane ahirina apapaya’.*+
4 Miyo kinimwaapenuxa, nto awo khanrowa otthikela okhala oohiroromeleya.+
Kinimwaaphenta ni murima aka wootheene.+
Okhala wiira koohiya onanariwa ni atthu a Isarayeli.+
5 Miyo kinrowa okhala ntoko okame wa atthu a Isarayeli.
Awo animunnuwa ntoko ifilori sa mmatta,*
Nave mitathaari saya sinimwiixerya ntoko miri sa oLiibano.
6 Mitathaari saya sinrowa omwara-mwareya,
Oreera waya onrowa olikanaka ni mwiri wa olivera,
Nave wunkhela waya onrowa olikanaka ni mwiri wa oLiibano.
7 Awo anootthikela okhala vathi vamuuttutthini vaya.
Awo anooruwerya ipyo, nave animunnuwa ntoko mwiri wa evidera.+
Ovuwa waya onrowa olikanaka ni eviinyu ya oLiibano.
8 Efrayimi onoohimya wiira: ‘Exeeni erina aka ni ilatarato?’+
Miyo kinoomwaakhulani kinoomukhapelela.+
Miyo kinrowa olikanaka ntoko mwiri muulupale wa xuniiperu.
Mihokorokho sanyu sinrowa okumiheriwaka ni miyo”.
9 Ti pani orina miruku? Weeso iiwexexeke itthu iya.
Ti pani orina ankhili? Weeso osuweleke itthu iya.
Tthiri iphiro sa Yehova ti sooloka,+
Anaxariya anrowa oviraka memmo.
Masi anatampi anoomora iphiro iyo.
Mwiihaneliwo wookhuveya wa nsina noowi Hoxaya, nenlo nintaphulela “oopoliwe ni Yehova; Yehova ohoopola”.
Aahiiso, “muthiyana onirupihana voohiloka”.
Aahiiso, “orupihana voohiloka”.
Nsina nintaphulela, “Muluku onimwaala epyo”.
Aahiiso, “nipuro noowaataleya”.
Nsina nintaphulela “ohimoreliwa ikharari”.
Nsina nintaphulela “khahiyo atthu aka”.
Aahiiso, “orupihana woohiloka”.
Aahiiso, “opuro ohinikhaliwa”.
Aahiiso, “oorupihana voohiloka”.
Aahiiso, “nipuro noowaataleya”.
Aahiiso, “Bayaali aka”.
Nsina nintaphulela “Muluku onimwaala epyo”.
Nwehe enoota ya Hoseya 1:6.
Nwehe enoota ya Hoseya 1:9.
Eyo piiyo, seiyo saarumeeliwa para okokhorela wa ethiru.
Ehoomeri emosa yaakhala iliituru 220. Munwehe Apentise B14.
Aahiiso, “muhirupihane voohiloka”.
Eheeperi, “mahiku manceene”.
Nwehe Moolumo Ootthokiheriwa.
Aahiiso, woonasa wene: “Awo aaturuka ovuwa waka akhaliha ohittittimihiwa”.
Muthinto mmosa wa mwiri muulupale.
Mwiri onikumiherya ifilori soowunkhela.
Aahiiso, “orupihana woohiloka”.
Okathi wa ephovo, onihimmwa eriyari ya elimwe ni eyiita.
Aahiiso, “omoriwa ikharari”.
Eheeperi, “makhulupale”.
Aahiiso, “malakiheryo”.
Aahiiso, woonasa wene: “anootthikela”.
Aahiiso, “Mwaha wa orupihana woohiloka”.
Aahiiso, “muheemani”.
Aahiiso, “ampakeke muluku oowuuliha muru”.
Eyo piiyo, maprofeta ni atthu akina yaarummwale owiixuttiha atthu a Isarayeli.
Aahiiso, “xoowa”.
Eyo piiyo, okokhorela wa vasulu.
Aahiiso, “etthetteeri ya”.
Aahiiso, “muheemani”.
Aahiiso, “oSiiria”.
Eheeperi, “alipa-oophuka”.
Nwehe Moolumo Ootthokiheriwa.
Aahiiso, “ikwaasuni”.
Aahiiso, “iliiriyu”.