EPAPHELO YA NENLI PAULO AAMULEPENLE AWE TIMOOTHEYO

1 Miyo Paulo, kikhalihiwe murummwa a Kristu Yesu ntoko Muluku oniphavela awe, wiira kilaleye okumi oleiheriwe ahu ovahiwa mwaha wa Kristu Yesu,+ 2 kinnimulepela mwanaka oophentiwa, Timootheyo, kiiraka:+

Oreera murima wuulupale, omoriwa ikharari ni murettele wa Muluku Tiithi ihu, vamosa ni wa Pwiya ahu Kristu Yesu, okhale ni nyuwo.

3 Kinnimuxukhuru Muluku, yoowo kininvarela aka muteko ni murima wooloka, ntoko amuhavinre aka yanvarela aya muteko. Nave, okathi wootheene kinivekela aka, kinniwuupuwelani othana ni ohiyu. 4 Kuupuwelaka maithori anyu, kinniphavela woowehani, wiira kitepe otteeliwa murima. 5 Kinnuupuwela waamini wanyu woohoothererya,+ aarina awe piipi anyu Loide ni maama anyu Eunisi. Nave kinnikupali wiira ni nyuwo-tho mookhalana waamini omosa-ru.

6 Tivo, kinniwuupuxeryani wiira murumeeleke etthu evahiwe anyu ni Muluku, yeeyo mwaakhenle anyu okathi kaawiixaathenryaakani matata.+ Mukhaleleke nthiti, ntoko muniiseela mooro. 7 Mweekeekhai, ikuru soowaarya Muluku onivanhe awe khasinniiriha woova,+ masi sinninivaha owerya,+ ophenta ni wuupuwela saana. 8 Siiso, muhuuleliweke muru waalaleya Apwiya,+ aahiiso okilaleya miyo kitthukweliwe mwaha wa Apwiya yaawo. Masi, mweemereryeke ohaawa+ mwaha wa ihapari sooreera, muroromelaka owerya wa Muluku.+ 9 Owo oonoopola ni ooniihana wiira nikhale oowaarya,+ ohiya mwaha wa miteko sahu, masi mwaha wa ele oniphavela awe ni mwaha wa oreera wawe murima wuulupale.+ Okhuma khalai, Muluku oonooniherya oreera wawe murima wuulupale, mwaha wa Kristu Yesu. 10 Vano, oreera murima iwo ohooneya oratteene mwaha wa wooniheriwa Moopoli ihu Kristu Yesu,+ yoowo omalinhe okhwa+ ni onoonihenrye moota wookhalana okumi+ ni erutthu ehinintta,+ orumeelaka ihapari sooreera.+ 11 Miyo koothanliwa okhala namalaleerya, murummwa ni mulipa-oowiixuttiha.+

12 Tivonto miyo-tho kinihaawa aka mwaha wa itthu iya.+ Hata vari siiso, nkinuuliwa muru.+ Tthiri, kinnimusuwela Muluku kinimukupali aka ni kinniroromela wiira onoowerya okhapelela itthu sootheene kinvanhe aka, mpakha nihiku na ophukela.+ 13 Muhihiye otthara moolumo* ooreera*+ koolenlyaakani, mooniheryaka waamini ni ophenta murina anyu, onikhumelela mwaha wa wiiraana ni Kristu Yesu. 14 Musuke itthu iya sirina efaita yuulupale, seiyo mwaakhenle anyu ni owerya wa ikuru soowaarya, seiyo siri mwa hiyo.+

15 Nyuwo moosuwela etthu ela, wiira atthu ootheene a eprovinsia ya wAsia+ aakihiya. Akina a yaawo ti Fixelo ni Hermoxene. 16 Apwiya yaamorele ikharari atthu a etthoko ya Onesiiforo,+ okhala wiira owo aahikilipiha ikwaha sinceene, nave khuuliwe muru mwaha wa otthukweliwa waka. 17 Ohiya-vo, okathi aari awe oRoma, Onesiiforo owo aahikaavya oratteene ni aahikiphwanya. 18 Apwiya Yehova ammorele ikharari nihiku na ophukela. Nave nyuwo munnisuwela miteko sootheene okivarenle awe wEefeso.

2 Vano, nyuwo mwanaka,+ mphwanyeke owerya mwaha wa oreera murima wuulupale wa Muluku, weiwo ori mwa Kristu Yesu. 2 Nave, itthu mwiiwale anyu ni miyo, seiyo atthu anceene anikhalela aya onamoona,+ nwiixuttihe itthu iyo alopwana oororomeleya, yaawo anrowa ophwanelela owiixuttiha atthu akina. 3 Ntoko toropa eekeekhai+ a Kristu Yesu, mweemereryeke ohaawa.+ 4 Mutthu onikela etoropa, khonivara* muteko mukina,* okhala wiira oniphavela omusiveliha ole omukelinhe etoropa. 5 Hata okathi oneettiwa awe xooku, ole onimweetta xooku, khonivahiwa etthuvo* aahitthareke malakiheryo a xooku owo.+ 6 Mulipa-oolima onivara muteko ni nthiti, torina etireitu ya opacerya olya mihokorokho sa mmatta mwawe. 7 Muupuweleke saana itthu kinihimya aka. Apwiya anoowiirihani osuwela itthu sootheene.

8 Muupuweleke wiira Yesu Kristu oohihimuxiwa mookhwaani+ ni wiira owo aari osuulu wa Davidi.+ Eyo ennivarihana ni ihapari sooreera kinilaleya aka,+ 9 seiyo kinihaawela aka ni kitthukweliwe aka ntoko mutakhali.*+ Masi, nuulumo na Muluku khanitthukiwe.+ 10 Tivo, miyo kinrowa ovilelaka itthu sootheene mwaha wa ale athanliwe+ ni Muluku, wiira awo nave yoopowe mwaha wa wiiraana ni Kristu Yesu ni yaakhele ovuwa ohinimala. 11 Moolumo ala teekeekhai: Akhala wiira nihookhwa hoothe, weeso ninrowa okhala akumi hoothe.+ 12 Naahihiye ovilela, ninrowa olamulelaka hoothe ntoko mamwene.+ Masi namukhootta, nave owo onoonikhootta.+ 13 Naahiroromeleye, owo khonihiya ororomeleya, maana khokhanle oowiikhootta mmansawe.

14 Muhihiye owuupuxerya itthu iya atthu awo ni waavaha malakiheryo* ohoolo wa Muluku, wiira ehinyakulihaneke mwaha wa moolumo. Onyakulihana iwo khoniphwanyiha etthu, maana onnaahonona* ale aniiwa. 15 Mpakeke sootheene muniwerya anyu wiira mweemereriwe ni Muluku, ntoko namuteko ohirina etthu enimuuliha muru, nwiixuttihaka atthu nuulumo na Muluku* ni mwaatthokiheryaka oratteene.+ 16 Mukhootteke ovaanela wootheene oninvirikanya Muluku,+ okhala wiira ovaanela iwo onnimwiiriha mutthu otepa opaka itthu sootakhala. 17 Nave moolumo aya annimwareela ntoko nikhwatta nimmwara-mwareya mweerutthuni. Mwa atthu awo, ookhala Himeneyo ni Fileto.+ 18 Alopwana ala aahiya soowiixuttiha seekeekhai, nave anihimya wiira alipa-ookhwa aahihimuxiwa.+ Siiso, annihonona waamini wa atthu akina. 19 Masi Muluku ohaapaka alisenso oolipa, yaawo ahinttikinyeya ni anikhala mapuro aya, arina moolumo ani: “Yehova onnaasuwela atthu awe”+ ni “Ole oniromola nsina na Yehova,+ okhootteke itthu sootakhala”.

20 Nyuwo munnisuwela wiira empa yuulupale khasinkhala mihasa sa eweero ni sa eparatha paahi, masi-tho sinnikhala mihasa sa ethaapwa ni oloko. Mihasa sikina sinnirumeeliwa sivareliwaka itthu sooloka, masi sikina sinnivareliwa itthu soohiloka. 21 Nto, akhala wiira mutthu onniireeriha wiira ohilikaneke ni mihasa sinivareliwa itthu soohiloka, onookhala ntoko mihasa sinivareliwa itthu sooloka, sooreerihiwa, sinimukhaliherya mwaneene, soolokiheriwa wiira sivareliweke miteko sootheene sooreera. 22 Tivo, mutthyaweke itthu amiravo aniphavela aya. Masi mphaveleke exariya, waamini, ophenta ni murettele. Mwiireke eyo vamosa ni ale anaaroromela Apwiya ni arina murima wooloka.

23 Mukhootteke ovaanyihana wa ololo ni ohirina efaita, maana moosuwela wiira itthu iyo sinnikumiherya onyakulihana.+ 24 Tthiri murumeyi a Pwiya khonireerela onyakulihana, masi ohaana waareerela murima atthu ootheene,+ osuweleke wiixuttiha, ohaattikiheryeke itthu sootakhala ale animwiirela sootakhala.+ 25 Nave okhaleke oomaala okathi oniwiixuttiha awe ale ahineemererya itthu oniixuttiha awe.+ Woonasa wene, Muluku onoowiiriha atthu awo orukunuxa murima,* wiira akhalane osuwela weekeekhai.+ 26 Siiso, miyuupuwelo saya sinootthukuwa ni animoopowa muraakho wa Diabo, maana aavariwa nuuwo, wiira evareke itthu siniphavela awe.+

3 Musuweleke wiira mahiku ookiserya,+ makhalelo anrowa okhala ooxankiha ni oowoopiha. 2 Tthiri, atthu anrowa wiiphentaka mmansaya, anrowa ophentaka musurukhu, anrowa wiittottopaka, wiisoona, anrowa onveehaka Muluku, khanrowa owiiwelelaka apapaya ni amamaya, anrowa okhalaka oohixukhuru, oohiroromeleya, 3 khanrowa waaphentaka akhwaaya, khanrowa ophavelaka wiiwanana, anrowa owootheryaka akhwaaya, khanrowa wiihiihaka, anrowa okhala oowali, anrowa onyokhaka itthu sooreera, 4 anrowa owiirelaka itthu sootakhala akhwaaya, khanrowa ophavelaka wiiwa miruku, anrowa osareya wiixinnuwiha, anrowa ophentaka itthu sinaasivela, ohiya omphenta Muluku, 5 anrowa okhalaka ntoko annimurumeela Muluku,+ masi ahiiraka siiso. Atthu siisa, mwaasyakeke. 6 Eriyari ya atthu ntoko awo annikhumelela alopwana oowootha, yaawo anrowa ni olavilavi mmaitthokoni mwa athiyana ahirina waamini woolipa ni oosareya itampi, nave anniiya mirima saya. Athiyana awo, ipottha sa itthu siniphavela mirima saya. 7 Okathi wootheene anniixutta, masi khanikhala-khala aweryaka osuwela oratteene ekeekhai.

8 Siisaale Xaani ni Xambere yanvirikannye aya Moise, nave alopwana awo annivirikanya ekeekhai. Muupuwelo aya woohononeya ni khaneemereriwa ni Muluku, okhala wiira annikhootta waamini. 9 Masi, awo khanikelela ottaiwene, okhala wiira atthu ootheene anoosuwela saana wiira awo alolo, ntoko alopwana ale anli+ yaasuweliwe aya okhala alolo. 10 Masi nyuwo mootthara oratteene soowiixuttiha saka, mweettelo aka,+ itthu kiniphavela aka, waamini waka, opixa waka murima, ophenta waka ni ovilela waka. 11 Ohiya-vo, nyuwo moosuwela moota kaalupatthiwe aka ni ohaawa waakiphwannye wAntiyokiya,+ wIkoonio+ ni oLiistra.+ Hata vari siiso, Apwiya aakaakiherya itthu iyo sootheene.+ 12 Mweekeekhai, ootheene ale aniphavela omurumeela Muluku ntoko awiixutti a Kristu Yesu, nave anrowa olupatthiwaka.+ 13 Masi atthu ootakhala ni alipa-oowoka anrowa otepaka otakhala, yaawokaka atthu, nave awo awokiwaka ni atthu akina.+

14 Masi nyuwo muhihiye okupali itthu mwiixuttihiwe anyu, seiyo mukupalihiwe anyu.+ Nyuwo munnaasuwela ale awiixuttinheni itthu iyo. 15 Nave okhuma enamwane anyu,+ nyuwo munnisuwela soolempwa soowaarya,*+ seiyo siniwerya woovahani ankhili wiira moopowe, mwaha wa omwaamini Kristu Yesu.+ 16 Soolempwa sootheene sinikhuma wa Muluku.+ Iyo sinnivareleya muteko wiira siwiixuttiheke atthu,+ saattaruxeke atthu, silokiheryeke itthu sihilonke, saalakiheryeke atthu ephiro ya xariya.+ 17 Siiso, murumeyi a Muluku, onooweryaka ni onookhalaka oolikana ene para ovara miteko sootheene sooreera.

4 Kinnootumereryani oratteene, ohoolo wa Muluku ni wa Kristu Yesu, yoowo onrowa waaphukela+ atthu akumi ni alipa-ookhwa,+ okathi onrowa awe wooniheriwa vamosa+ ni Omwene awe,+ kiiraka: 2 Mulaleyeke nuulumo na Muluku.+ Mukhaleleke nthiti olaleya nuulumo nlo okathi wooreerela ni wooxankiha. Nwooniheryeke atthu vatthenke aya,+ mwaalopoleke oratteene, mwaatumereryeke mwaapixeryaka murima vanceene ni nwiixuttihaka saana.+ 3 Onoophiya okathi awo anrowa aya okhoottaka soowiixuttiha sooreera.*+ Anrowa ottharaka itthu aniphavela aya ni anrowa owaavyaka alipa-oowiixuttiha wiira aleeliweke itthu aniphavela aya wiiwa.+ 4 Anookhoottaka owiriyana ekeekhai, awiriyaneke itthu soowoothiwa. 5 Masi nyuwo muupuweleke saana mwa itthu sootheene, nvileleke mwaahaaxiwaka,+ muhihiyeke olaleya ihapari sooreera, nvareke muteko wa Muluku voomalela.+

6 Miyo kinniivahererya ntoko eviinyu yaayiiheriwa valtaari.+ Nave woopoliwa waka+ ori vakhiviru. 7 Miyo koowana ekhotto yooreera,+ kootthimaka mpakha ophiya oponta,+ kootthara waamini. 8 Vano Apwiya, yaawo aniphuka mwa xariya,+ aakisukerya ekhara. Ekhara eyo asukeriwe ale ari anaxariya. Apwiya anookitthuvela ekhara eyo nihiku+ noophukela.+ Khanrowa okivaha miyo paahi, masi-tho animwaavaha ale anlipelela vanceene wooniheriwa wa Apwiya.

9 Mwiimananihe wiira murwe nno voohipisa. 10 Dema+ ookihiya mwaha woowi onniphenta itthu sa olumwenku ola,* onarowa oTesaloonika. Vano Kresente oorowa oGalasia, nave Tito oronwe oDalmasia. 11 Nto Luka paahi tori ni miyo. Okathi onirwa anyu, mmuruuhe Marko, okhala wiira owo onnikikhaliherya muteko wa Muluku. 12 Koomuruma Tiikhiko+ orowa wEefeso. 13 Okathi munirwa anyu, muruuhe ekasako aka kihiyale aka oTrowade, vatthokoni va Karpo. Nave-tho, muruuhe iroolu, vanceenexa iroolu sa esapala.

14 Alexandre, mulipa-oohana ekoopiri, khoreere okihaaxa. Masi Yehova onoomuliva ottharihaka miteko sawe.+ 15 Nyuwo-tho muhaana wiikasoopa nuuwo, okhala wiira ookhootta vanceene itthu naalavula ahu.

16 Ekwaha yoopacerya kaixaakiha aka ohoolo wa makhulupale, khuuvo aakikhalihenrye, ootheene aya yaahikihiya. Nto, Muluku ohaavahe nthowa atthu awo mwaha wa etthu eyo. 17 Masi Apwiya khiyaakihiyale mekhaka, awo yaahikivaha ikuru wiira kilaleye moolumo ootheene a Muluku, wiira atthu a maloko ootheene yiiwe.+ Nave, Apwiya aakoopola mwaano mwa kharamu.+ 18 Apwiya anookaakiherya itthu sootheene sootakhala ni anookoopola wiira kikele Moomweneni mwaya wa wiirimu.+ Apwiya awo avuwihiwe mahiku ootheene. Amen.

19 Munvahe makhomaso aka Priska ni Aakila,+ vamosa ni atthu a etthoko ya Onesiiforo.+

20 Erasto+ oohala oKorinto, masi Troofimo+ kimuhiyale owereiwaka, oMileto. 21 Mwiimananihe wiira mphiye nno ehinatthi ophiya eyiita.

Eubulo, Pudenti, Lino, Klaudia, vamosa ni axinna ootheene, annookhomasani.

22 Apwiya ekhale ni nyuwo mwaha wa mukhalelo wooreera munooniherya anyu. Oreera waya murima wuulupale okhale ni nyuwo.