Mwaha 59
Nthowa Naya Davidi Vantthyaw’awe
NUUMALA Davidi omwiiva Goliyathi, Abineri muulupale aanakhotto a Isarayeli onnimuruuha wa Sawuli. Sawuli orii oohakalala vanceene ni Davidi. Owo onimpaka okhala muulupale aanakhotto awe ni onnimukuxa wira okhaleke mu empa ya mwene.
Vattuli vaya, vaavo anakhotto vanihokolowa aya waawana aya ni aFilisti, athiyana aniipa ariki: ‘Sawuli oowiiva ikonto, masi Davidi ikonto sene mulokoo.’ Ela ennimwiiriha Sawuli okhalana nrima, okhala wira Davidi oovahiwa nttittimiho noovikana nne na Sawuli. Masi Yonathani mwanawe Sawuli khorina nrima. Owo onnimphenta vanceene Davidi, ni Davidi onnimphenta-tho Yonathani. Nto oowanli aya annimanelana natiri mukina ni mukhw’awe wira mahiku otheene anrowa okhala apatthani.
Davidi onnisuwela omoopa saana xittaattha, nto Sawuli onnisiveliwa ni nsipo nniipa awe. Masi nihiku nimosaa nrima na Sawuli naahimwiiriha owo ovara etthu yootakhalexa. Okathi yoowo Davidi vaamoopa awe xittaattha, Sawuli onikuxa nivaka ni onavonya, oriki: ‘Kinrowa omukhomela vaxirini Davidi!’ Masi Davidi onnirapela, nto nivaka ninnimukusya. Vattuli vaya Sawuli aahimukusya-tho Davidi ni nivaka nawe. Siiso Davidi onnisuwela vano wira ohaana okhalana ephoole yinceene.
Nyuwo munnimuupuwela natiri yoowo Sawuli ampanka awe? Owo aahihimya wira onrowa onvaha mwanawe mwaamuthiyana wira okhalee mwaarawe mulopwana yoowo aarowa omwiiva Goliyathi. Wanikisa waya, Sawuli onimuleela Davidi wira onoowerya omukuxa mwanawe Mikali, masi wanipacerya ohaana owiiva anyokhani aFilisti 100. Nkahaya muupuwelele eyo! Sawuli mwekeekhai onilipelela wira aFilisti anrowa omwiiva Davidi. Masi awo khanwerya, siiso-nto Sawuli onnimunnya Davidi mwanawe mwaamuthiyana wira okhalee mwaarawe.
Nihiku nimosaa Sawuli onimuleela Yonathani ni arumeyi awe otheene wira omphavela omwiiva Davidi. Masi Yonathani onnihimya wa tiithi awe wira: ‘Muhinnvulalihe Davidi. Owo khonawiireleni etthu yootakhala. Mmapuroni mwaya, etthu eri yotheene epanka awe ti ya nikhaliheryo wa nyuwo. Owo aahileva ekumi awe vaavo vaamwiivalya awe Goliyathi, nto vaavo vaawenha anyu ela, nyuwo mwaahihakalala.’
Sawuli onninwiriyana mwanawe, nto onnimmana natiri wira khonrowa onvulaliha Davidi. Davidi onnihokoloxiwa, nto owo onnimurumeela Sawuli owannyawe vasyaa-tho ntoko siira awe khalai. Nave-tho, nihiku nimosaa, okathi yoowo Davidi wiipa awe nsipo, Sawuli aahitthikela-tho ovonya nivaka nawe wira omuhome Davidi. Davidi onnirapela, nto nivaka ninnihoma vaxirini. Ela ekwaha ya neeraru! Davidi onnisuwela vano wira owo ohaana otthyawa!
Ohiyu yoole Davidi onrowa owannyawe. Masi Sawuli onaaruma alopwana akina wira yamwiive. Mikali oosuwela yeele tiithi awe eniphavela awe wira. Siiso owo onimuleela iyawe wira: ‘Akhala wira nyuwo khimunrowa otthyawa ohiyu ola, meelo munrowa okhwa.’ Ohiyu yoole Mikali onimukhaliherya Davidi okhuma vaxanelani. Moophiyeryaka iyaakha thanuu ni piili Davidi ohaana wiipitha nipuro-nnipuro nikhw’aya siiso Sawuli khonwerya omphwanya.