Yoosoma 6
Omwene wa Muluku Exeeni?
Omwene wa Muluku otikitheriwe woowi? (1)
Tani ori Mwene a Omwene owo? (2)
Niireke wira aakhala akina anilamulela ni Mwene owo? Akhala wira aakhala tthiri, nto ari akavi? (3)
Exeeni enooniherya wira ninkhala mahiku ookiserya? (4)
Muhoolo, Omwene wa Muluku onrowa opaka exeeni wa apinaatamu? (5-7)
1. Okathi Yesu arya awe valaponi, owo aahiwiixuttiha atthareli awe ovekela Omwene wa Muluku. Omwene eri ekuvernu eneettihiwa ni mwene. Omwene wa Muluku eri ekuvernu ya vameekh’aya. Otikitheriwe wiirimu ni onrowa olamulelaka elapo ela ya vathi. Onrowa otteeliha wala wiiriha nsina na Muluku okhala noottittimiheya. Onrowa wiiriha yootthuna ya Muluku wiiraneya valaponi ntoko siniiraneya aya wiirimu.—Matheyo 6:9, 10.
2. Muluku aahileiherya wira Yesu aarowa okhala Mwene a Omwene Awe. (Luka 1:30-33) Okathi Yesu aarya awe valaponi, ahooniherya wira aarowa okhala Namalamulela ooreera murima, a xariya ni ooloka. Yesu khaakhalihiwe Mwene a Omwene wa Muluku otthikelakaru wiirimu. (aHéberi 10:12, 13) Mwaakha wa 1914, Yehova aahinvaha Yesu olamulelo aamuleihenrye awe. Okhuma okathi yoole, Yesu onnilamulela wiirimu ntoko Mwene othanliwe ni Yehova.—Daniyeli 7:13, 14.
3. Yehova ohaathanla-tho alopwana ni athiyana oororomeleya valaponi wira arowe wiirimu. Awo anrowa olamulelaka ni Yesu ntoko mamwene, anamaphuka, ni anrowa okhala alipa a mukuttho wira yaakhaliheryeke apinaatamu. (Luka 22:28-30; Wisupulula 5:9, 10) Yesu aahiwiitthana anamalamulela akhw’awe awo Momweneni mwawe, okhala “nikoto namukhani”. Awo ari 144.000.—Luka 12:32; Wisupulula 14:1-3.
4. Nuumala Yesu oheliwa Emwene, aahimoomola wiirimu xetwani ni malaikha awe ootakhala, khumurihela valaponi. Tivonto itthu valaponi vanitepa aya ohiloka okhuma mwaakha wa 1914. (Wisupulula 12:9, 12) Ikhotto, etala, iretta, wuncerereya wa ohiiweleliwa nlamulo—sotheene iyo siniirela mpantta wa “ethonyeryo” yeeyo enooniherya wira Yesu onnilamulela ni wira makhalelo a olumwenku ola wootakhala ahanle omala.—Matheyo 24:3, 7, 8, 12; Luka 21:10, 11; 2 Timótheyo 3:1-5.
5. Moohipisa, Yesu onrowa waalamula atthu, aavalaanyaka ntoko siisaale makampusi sinivalaanya awe ipwittipwitthi ni ipuri. “Ipwittipwitthi” atthu yaale anrowa wooniherya okhala atthu awe oororomeleya. Atthu awo anrowa wakhela okumi woohimala veelaponi ya vathi. ‘Ipuri’ atthu yaale anrowa okhootta Omwene wa Muluku. (Matheyo 25:31-34) Muhoolo moohipisa, Yesu onrowa waapwetexa otheene yaale anlikana ni ipuri. (2 aTesalonika 1:6-9) Mwaaphavelaka okhala mmosa a “ipwittipwitthi” sa Yesu, muhaana wiiwelela mitthaka sa Omwene ni okhala moovarihana ni ele eniixutta anyu.—Matheyo 24:14.
6. Mahiku ala elapo ya vathi yookawanyiwa khukhala ilapo sinceene. Khula elapo yookhalana ekuvernu aya. Ikwaha sinceene ilapo iyo sinniwana-wana. Masi Omwene wa Muluku onrowa orantteliha ikuvernu sotheene sa apinaatamu. Onrowa olamulelaka ntoko ekuvernu emosa paahi elapo yotheene ya vathi. (Daniyeli 2:44) Nto khivanrowa okhalaka-tho ikhotto, ikrime ni owali. Atthu otheene anrowa okhalaka vamosa mowiiraana ni murettele.—Mikeya 4:3, 4.
7. Muhina mwa Iyaakha Ekonto Emosa sa Olamulela wa Yesu, atthu oororomeleya anrowa okhala ooloka moomalela, nto elapo ya vathi yotheene enrowa okhala eparayiisu. Wanikisa wa iyaakha ekonto emosa, Yesu onrowa wiiraka opanke ene itthu sotheene Muluku aamurummya awe opaka. Nuumala vo, owo onrowa waattikiherya Atithi awe Omwene. (1 aKorinto 15:24) Xeeni ohaahimeeryaka apatthan’inyu ni ale anaaphenta anyu ele Omwene wa Muluku enrowa aya opaka?
[Efootu ya epaaxina 13]
Momweneni mwa Yesu, khivanrowa okhala-tho onyokhana wala nthalu