Yoosoma 11
Mukhoottele Etiini Yoowoka!
Satana ni minepa sootakhala khisimphavela wira nyuwo mmurumeele Muluku. Simphavela wahapuxa omutthara Muluku anceene inaaweryasaya. Moota xeeni siniphavelaya wiira yeeyo? Mukhalelo mmosaa onrweela mwa etiini yoowoka. (2 aKorinto 11:13-15) Etiini yoowoka tiile ehiniixuttiha ekeekhai ya Biibiliya. Etiini yoowoka erii ntoko musurukhu wootakiheriwa—onkhala ntoko musurukhu wooloka, masi khonafaita. Onoowerya wooruhelani mixankiho sinceene.
Owoka watiini khonkhalakhala omuhakalalihaka Yehova, Muluku eekeekhai. Okathi Yesu aaryaawe elapo ya vathii, wahikhala muloko mmosaa waanatiini waphavela omwiiva. Atthu yaari etiini yeele yaaniherya wira mukhalelo aya wookokhorela waari wookhalela. Yaahihimya wira: “Hiyo nrina tith’ihu mmosá pahi: Muluku!” Vano Yesu aahaakhulela? Nnaari! Owo aahiwiirela: “Tith’inyu ti xetwani.” (Yohani 8:41, 44) Olelo va, anceene anuupuwela wira animukokhorela Muluku, masi vekeekhai animurumeela Diabo ni minepa sawe sootakhala.—1 aKorinto 10:20.
Ntoko mwirii woohiloka onniima mihokorokho soohiloka, etiini yoowoka erina atthu aniira itthu soonanara. Olumwenku woosareya mixankiho mwaha wa atthu aniira sootakhala. Wookhala oraruwa, ikhotto, wiiya, ohaaxana, wiiva ni orupihiwa wootupeliwa. Anceene aniira iya aakhalana etiini, masi ela khiniwiiriha opaka sooloka. Khanrowa okhala apatthani a Muluku yaahihiye opaka itthu soonanara.—Matheyo 7:17, 18.
Etiini yoowoka enniwiixuttiha atthu waavekelaka amuluku a ethiru. Muluku onruma wira ahikokhoreliweke amuluku a ethiru. Ela etthu yooreerela. Mwaarowa woonela sai vaakhanle wi mutthu khonalavule ni nyuwo, masi onlavula paahi ni elatarato anyu? Mutthu owo aamukhala mpatthan’inyu eekeekhai? Nnaari, nnakhala vakhaani. Yehova omphavela wira atthu alavuleke n’uwo, ohiya elatarato aahiiso amuluku a ethiru ahirina okumi.—Okhuma 20:4, 5.
Etiini yoowoka enniixuttiha wira pooti owiiva akina okathi weekhotto. Yesu ahimmye wira apatthani a Muluku anophentanaka mukina ni mukhw’awe. Hiyo khinniwiiva ale nnaaphent’ahu. (Yohani 13:35) Waamukhala woohiloka owiiva hataa atakhali. Vaavo anyokhani a Yesu vamvanry’aya, owo kheemerenre wi awiixutti awe awane wira amwaakihe.—Matheyo 26:51, 52.
Etiini yoowoka eniixuttiha wira atakhali anrowa omooroni. Masi Biibiliya oniixuttiha wira etampi enimalela wukhwaani. (aRoma 6:23) Yehova orii Muluku a ophenta. Nireke wira Muluku a ophenta amwaahooxa atthu mahiku otheene? Nnaari! Mparayiisu enrowa okhala etiini emosaa paahi, ele eneemereriwa ni Yehova. (Wisupulula 15:4) Itiini sotheene siniixuttiha owoka wa Satana sinrowa omala.