Yoosoma 12

Exeeni Eniiraneya Wukhwaani?

Okhwa ohikhala ni okumi. Okhwa onilikana ni orupa wa ikhove. (Yohani 11:11-14) Alipa-ookhwa khaniiwa, khaniweha, khanlavula aahiiso wuupuwela. (Musuweli 9:5, 10) Etiini yoowoka eniixuttiha wira alipa-ookhwa anrowa mapuro ahinooneya wi yakhaleke ni amuhavinre aya. Yowiixuttiha ela kahiyo ya Biibiliya.

Alipa-ookhwa khannikhaliherya, nnakhala khannihaaxa. Etthu yoowalema atthu opaka isatakha ni mikuttho akupaliki wira anaahakalaliha ale akhwiiye. Ela khemmuhakalaliha Muluku, okhala wira erii mmapuroni mwa wootha wa Satana. Nnakhala vakhaani khenaahakalaliha alipa-ookhwa, okhala wira kharina okumi. Nihiwooveke nnakhala waakokhorela alipa-ookhwa. Nimukokhoreleke Muluku paahi.—Matheyo 4:10.

Alipa-ookhwa anotthikela okhala akumi. Yehova onimwaavenxa alipa-ookhwa wira akhaleke mparayiisu elapo ya vathii. Okathi ola nlelo orii muhoolo. (Yohani 5:28, 29; Miteko 24:15) Muluku onoowerya waavenxa alipa-ookhwa mwekeekhaixa ntoko nyuwo sinweryaanyu onvenxa mutthu onrupa.—Marko 5:22, 23, 41, 42.

Mupuwelo wowira hiyo khinnikhwa wootha oruuhiwe ni Satana, Diabo. Satana ni minepa sootakhala siniwiiriha atthu wuupuwela wi minepa sa alipa-ookhwa ikumii ni sinnikumiherya iretta ni mixankiho sikina. Satana onnaawoka atthu, ikwaha ikina orweela mu oloha ni sowoonihiwa. Yehova onnaakhootta ale anihaayasa olavula ni alipa-ookhwa.—Otumererya 18:10-12.