MURUU WOOPACERYA
Okokhorela Wowiiraana Mmahiku Ahu Ala, Ontaphulela Exeeni?
1, 2. (a) Etthu xeeni yoohakalaliha eniiraneya okathi ahu ola? (b) Etthu xeeni yooreera yeeyo atthu a murima saana enilipelela aya?
ELAPO yotheene wookhala muteko woohakalaliha yoowo oniiriha okhala okokhorela wowiiraana. Muteko owo onniwiiriha atthu imilyau sinceene a maloko otheene, mahimo, ni ilavulelo okhala oowiiraana. Khuta mwaakha annithukumanyiwa atthu anceene. MBiibiliyani, atthu ala anisuweliwa okhala ‘anamona’ a Yehova ni aniihaniwa “muttitthi mulupalexa”. Awo annimurumeela Muluku “othana n’uhiyu”. (Yesaya 43:10-12; Wisupulula 7:9-15) Exeeni eniwiiriha omurumeelaka? Mwaha woowi aasuwela wira Yehova tokhanle Muluku mmosaa paahi eekeekhai. Eyo enniwiiriha okhalaka moovarihana ni malamulo awe a xariya. Nave-tho, awo ahiixutta wira hiyo ninkhala “okathi wokiserya” wa elapo ela yootakhala, ni wira moohipisa, Muluku onrowa opwetexa ni orantteliha ni eparayiisu mu elapo awe esyaa.—2 Timótheyo 3:1-5, 13; 2 Pedru 3:10-13.
2 Nuulumo na Muluku ninleiherya wira: “Atakhali anorimela nananoru: nyuwo munimwaphavela, muhaphwanyé. Vano atthu òmàla anoreriwa vathí-va: anokhala-mu ni murettele womalela”. (Esalimo 37:10, 11) “Anaxariya animwakhela elapo yohiyeriw’aya: anrowa okhalaka-mo mahiku othene”. (Esalimo 37:29) “Owo [Muluku] onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira”.—Wisupulula 21:4.
3. Vaniweryaneya sai wiiraana wekeekhai mu okokhorela?
3 Atthu yaawo vano ari oowiiraana mu okokhorela wekeekhai, tanrowa opacerya okhalaka elapo eyo esyaa. Atthu awo, ahiixutta yotthuna ya Muluku ni anniimananiha opaka yotthuna eyo moovarihana ni owerya waya. Ooniheryaka otthuneya waya wiixutta yotthuna ya Muluku ni ovarihela muteko, Yesu aahimmye wira: “Vano, ekumi yohimala t’ila: wosuwelani nyuwo, mukhanle Muluku mmosáru èkekhai, n’omusuwela Yesu Kristu, yowo omurummyanyu”. (Yohani 17:3) Murummwa Yohani olempe so: “Vano, makhalelo ala anomala vamosá n’itthu simphavelexaya: nto ole onettela otthuna wa Muluku onokhala mahiku othene”.—1 Yohani 2:17.
Tthiri Wiiraana Iwo Onitaphulela Exeeni?
4. (a) Othukumanyiwa wa atthu anceene mmahiku ahu ala, onitaphulela exeeni tthiri? (b) Biibiliya onitthokiherya sai othukumanyiwa iwo wa atthu anceene?
4 Onitaphulela exeeni tthiri othukumanyiwa wa atthu anceene mu okokhorela wowiiraana mmahiku ahu ala? Onitaphulela wira hiyo nihaattamela wanikisa wa elapo ela yootakhala, ni wira elapo esyaa ya Muluku erii vakhiviru. Hiyo ninnoona waakhwanela wa iprofecia sa Biibiliya, seiyo saahimmye vahinatthi sa othukumanyiwa wa atthu mmukhalelo wootikiniha. Emosaa ya iprofecia iyo, enihimya wira: “Yaphiyá mahiku aya [mahiku ala ookiserya], mwako watekiwe-vo empa ya Muluku [okokhoreliwa wawe mwekeekhai ni wa vasuluu] onrowa winnuwihiwa ovikana miyako sorekamexa [ovikana mukhalelo ori wotheene wa okokhorela]. Atthu a maloko othene anotthimakela-wo: anorowa-wo maloko òhalikeleya. Awo anohimya wira: ‘Rwani, niwelé mwako w’Apwiya, nrowé owannyawe Muluku a Isarayeli. Owo ononixuttiha iphiro sawe, wira nitthareke miphito sawe’”.—Mikeya 4:1, 2; Esalimo 37:34.
5, 6. (a) Moota xeeni ery’aya ekeekhai wira maloko annirowa wa Yehova? (b) Makoho xeeni anitthuneya ahu wiikoha?
5 Nnaamwi maloko ntero nene ahiiroihaka mu empa yomunepani ya omukokhorela Yehova, imilyau sinceene sa atthu a maloko otheene annirowa wa Yehova. Vaavo vaniixutta aya yoolakela enooniherya ophenta wa Yehova Muluku ni mukhalelo awe wooreera, atthu awo annikuxeya murima vanceenexa. Moowiiyeveiha, atthu awo anniphavela osuwela ele Muluku enaavekela awe. Nivekelo naya ninkhala ntoko nne na nasaalimo, yoowo aavekenle so: “Mukixuttihe wettela otthuna wanyu, okhala wira nyuwo mwá Muluku aka”.—Esalimo 143:10.
6 Niireke wira nyuwo murii eriyari ya muttitthi muulupale wa atthu, yaawo Yehova onaathukumanya awe vano mu okokhorela wowiiraana? Niireke wira ovarihela wanyu muteko soolakiherya munaakhela anyu orweela mwa Nuulumo nawe, onnooniherya wira munnimuxukhurela tthiri Yehova, yoowo okhanle Mwaneene malakiheryo awo? Mpakha vaavi munrowa anyu ‘otthara miphito sawe’?
Wiiraana mu Okokhorela Wekeekhai, Oniweryaneya Sai?
7. (a) Wiiraana mu okokhorela wekeekhai onrowa omalela vaavi? (b) Nthowa xeeni vano vary’aya vootthuneya ohipiserya okhala namakokhorela a Yehova, ni ninrowa waakhaliherya sai atthu akina opaka eyo?
7 Yoolakela ya Yehova ti yoowi, soopattuxiwa sotheene sirina ankhili, sikhalee sowiiraana mu okokhorela wekeekhai. Tthiri, hiyo ninnilipelela okathi yoowo itthu sotheene sirina okumi sinrowa aya omukokhorelaka Muluku mmosaa paahi eekeekhai! (Esalimo 103:19-22) Masi ohinatthi ophiya okathi owo, Yehova ohaana waamalamaliha otheene yaale anikhootta opaka yotthuna awe ya xariya. Mwaha wa omoriwa wawe ikharari, owo onnivaha yoolopola vahinatthi voohimya sa ele enrowa awe opaka, wira atthu a mapuro otheene akhalane okathi wa orukunuxa mweettelo aya wa okumi. (Yesaya 55:6, 7) Tivonto, mmahiku ahu ala “atthu a maloko othene ni a mahimo othene ni a malavulelo othene ni a ilapo sothene”, moovara murima ni moohipiserya anilopoliwa wira: “Mmoveke Muluku, munvuwiheke yowo! Mana wophiya okathi onrowawe walamula atthu othene. Mmukokhoreleke yowo opattunxe erimu n’ilapo ya vathí n’iphareya n’iphattuwelo sa màsi!” (Wisupulula 14:6, 7) Niireke wira nyuwo muheemererya olattuliwa iwo? Akhala wira muheemererya, nto nyuwo mookhalana eparakha ya waalattula atthu akina wira amusuwele ni amukokhoreleke Muluku eekeekhai.
8. Nuumala osuwela sowiixuttiha soopacerya sa Biibiliya, etthu xeeni ekina enitthuneya ahu wiimananiha opaka mwekeekhai wira nrowee vahoolo?
8 Khahiyo yotthuna ya Yehova wira orumeeliweke ni atthu yaawo anihimya wira annimuroromela, masi okathi omosaru yoowo khiyavikaniha otthara soophavela saya. Muluku oniphavela wira atthu ‘asuwele momalela otthuna wawe’, ni wira yooniheryeke osuwela iwo mookumini mwaya. (aKolosi 1:9, 10) Tivonto, atthu ooxukhuru yaawo anisuwela sowiixuttiha soopacerya sa Biibiliya, anniphavela ophwanya wunnuwa wa eKristau. Yoophavela aya orii omusuwela oratteenexa Yehova, wuncererya ni wunnuuherya vaalupalexa wiiwexexa waya Nuulumo nawe, ni ovarihela muteko moomalela mookumini mwaya. Atthu awo anniphavelasa wooniherya mikhalelo sa Tiith’ihu a wirimu ni othokorerya itthu ntoko sinithokorerya awe. Ela enniwiiriha ophwanya inamuna sa wiirela mpantta muteko wa ovuluxa okumi, yoowo Yehova onaaruma awe arumeyi awe ovara valaponi mmahiku ahu ala. Niireke wira eyo-tho yoophavela anyu?—Marko 13:10; aHéberi 5:12–6:3.
9. Mu iphiro xeeni wiiraana wekeekhai oniweryaneya aya olelo?
9 Biibiliya onooniherya wira otheene yaale animurumeela Yehova, ahaana okhala atthu oowiiraana. (aÉfeso 4:1-3) Wiiraana nno waahaana okhala olelo va, nnaamwi nikhalaka elapo yookawanyeya ni nlelo niwananaka soottheka sahu. Yesu aahivekela mooluttuweliwa wira awiixutti awe otheene akhalee mmosaa, ni wira akhalane wiiraana wekeekhai. Ela yaarowa otaphulela exeeni? Wanipacerya, eyo enitaphulela wira, awo yaahaana okhalana wataana wooloka ni Yehova vamosaa ni Mwanawe. Ya nenli, enitaphulela wira awo yaahaana okhala oowiiraana mukina ni mukhw’awe. (Yohani 17:20, 21) Wira eyo eweryaneye, muloko wa eKristau onnirumeela ntoko mulokiheryo yoowo Yehova onivarihela awe muteko wira aalakiheryeke atthu awe.
Itthu Xeeni Sinikhaliherya Wira Vakhalee Wiiraana?
10. (a) Vaavo vanimurumeela ahu Biibiliya wira nuupuwelele waakhuliwa wa makoho yaawo annivara, exeeni eninnuuherya ahu? (b) Muthokorerye itthu sinikumiherya wiiraana wa eKristau vaavo vanaakhula anyu makoho ari ettima ela.
10 Moottharelana sookhala iponto thanuu na piili sootthuneya seiyo sinikhaliherya wira vakhalee okokhorela wowiiraana. Vaavo vanaakhula anyu makoho anittharelana, muupuweleke moota khuta eponto enivara aya wataana wanyu ni Yehova vamosaa ni maKristau akhw’inyu. Wuupuwelelaka iponto iya ni oweha soolepa siromoliwe masi sihilempwale masuu aya, onrowa wookhaliheryani wira munnuuherye osuwela woomuluku, osuwela otthokiha, ni osuwela ohiyaniha. Iya mikhalelo seiyo sinitthuneya ahu okhalana otheene ahu. (Miruku 5:1, 2; aFilipi 1:9-11) Nrowee nthokorerye iponto iya khuta emosaa ekwaha aya.
(1) Ninneemererya ehakhi ya Yehova ya ovaha malakiheryo voohimya sa ele eri yooloka ni yoohiloka. “Mwaroromeleke Apwiya ni murim’anyu wothene: muhiroromelé osuwela wanyu pahi! Nwupuwele Apwiya mothene munettanyu: awo anolokiha iphiro sanyu”.—Miruku 3:5, 6.
Nthowa xeeni vanitthuneya ahu ohaayasa miruku ni yoohoolela ya Yehova vaavo vanipaka ahu soothanla? (Esalimo 146:3-5; Yesaya 48:17)
(2) Hiyo nookhalana Nuulumo na Muluku wira nnihooleleke. “Vano, khamwakhenle Ehapar’iyo ntoko molumo a mutthu, nto mwakhenlé muhanyiheryaka wira masú a Muluku. Masu awo annivara muteko aya mwa nyuwo, alipa-òwamini”.—1 aTesalonika 2:13.
Woopiha xeeni okhanle opaka paahi ele “enoona” ahu okhala yooloka? (Miruku 14:12; Yeremiya 10:23, 24; 17:9)
Akhala wira khannisuwela yoolakiherya enivaha Biibiliya mmwaha mmosaa, exeeni yaatthuneya ahu opaka? (Miruku 2:3-5; 2 Timótheyo 3:16, 17)
(3) Otheene ahu ninnittottela mureerelo eprograma emosaru ya yoolya yomunepani. “Atthu anyu othene anrowa okhala awixutti aka”. (Yesaya 54:13) “Nùpuxeryaneke mukina ni mukhw’awe, wira nakuviheryaneke ophenta n’uvara miteko sorera. Nihijompeleké orowa omuthukumanoni, nihatthariheké ale ahinrowa-tho. Ohiya vo, nlipiheryaneke, votepa-tho vavo vanònanyu wira nihiku n’Apwiya [na opwetexa] nri vakhiviru”.—aHéberi 10:24, 25.
Mireerelo xeeni siniphwanya aya otheene yaale anittottela muraarelo moomalela marehereryo a Yehova a yoolya yomunepani? (Yesaya 65:13, 14)
(4) Muhooleli ahu ti Yesu Kristu, ohiya pinaatamu. “Mukhotteke wireliwa ‘mwixuttihi’, okhala wira mwixuttihi anyu ori mmosa: nyuwo othene mw’àxinna. Ahikhalé ontthunanyu omwirela tithi vathí-va: okhala wira tith’inyu ori mmosá pahi, yowo ori wirimu. Hatá mukhotteke wireliwa muholeli, okhala wira muholeli anyu mmosá pahi: ti Kristu”.—Matheyo 23:8-10.
Niireke wira ookhala mmosaa a hiyo onireerela wuupuwelaka wira tootthuneya waavikana akina? (aRoma 3:23, 24; 12:3)
(5) Hiyo ninnikupali wira eguvernu ya Omwene wa Muluku tekhanle yoolipelela emosaa paahi wa apinaatamu. “Vano mulompeke so: ‘Tith’ihu, muri wirimu! Nsina nanyu nivuwihiwe; omwene anyu onrwele hiyo; otthuna wanyu wireye ntoko wirimu siso vathí-va’. Mpajeryeke ophavela omwene wa Muluku ni wiwelela otthuna wawe”.—Matheyo 6:9, 10, 33.
Moota xeeni ‘opajerya ophavela omwene wa Muluku’ onikhaliherya aya olipiha wiiraana wahu. (Mikeya 4:3; 1 Yohani 3:10-12)
(6) Munepa wootteela onnikumiherya wa anamakokhorela a Yehova mikhalelo sootthuneya siniiriha wiiraana wa eKristau. “Eroho [munepa] enniphwanyiha ophentana, otteliwa murima, murettele, ovilela, othunku, orera murima, ororomeleya, wiyeviha, wisumaliha”.—aGalasia 5:22, 23.
Nipakee exeeni wira munepa wa Muluku okumiherye sowiima wa hiyo? (Miteko s’Arummwa 5:32)
Moota xeeni okhalana munepa wa Muluku onikhaliherya aya wataana wahu ni maKristau akhw’ihu? (Yohani 13:35; 1 Yohani 4:8, 20, 21)
(7) Otheene yaale animukokhorela Muluku mwekeekhai, annilaleerya ihapari sooreera sa Omwene. “Nave Ehapar’ila Yorera y’omwene wa wirimu enolaleiwa mulaponi mothene, wira maloko othene esuwele, yamini. Vano-nto olumwenk’ula omaleke”.—Matheyo 24:14.
Exeeni yaatthuneya ontumereryaka ophavela olaleerya moomalela? (Matheyo 22:37-39; aRoma 10:10)
11. Exeeni enikhumelela mookumini mwahu vaavo vanivarihela ahu muteko ekeekhai eniixuttiha Biibiliya?
11 Omukokhorela Yehova mowiiraana, onniniiriha omwaattamelexa ni onninikhaliherya wataana moohakalala ni annihu eeKristau. Esalimo 133:1 enihimya wira: “Mòne: ti yorera ni ti yosivela tthiri wira amusi [anna] ekhaleke vamosá”. Moota ory’aya wooriiriha murima ovalaana ni elapo vamosaa ni itthu saya sotheene soohiloka ntoko nrima, orupihana woohiloka, ni owali, vano khiyathukumana ni atthu yaale tthiri animphenta Yehova ni wiiwelela malamulo awe!
Nsyakee Itthu Sinikumiherya Ohiiwanana
12. Nthowa xeeni vanitthuneya ahu osyaka munepa woohiiwelela?
12 Wira nihihonone wiiraana wooloka orina ahu ni annihu elapo yotheene, hiyo nohaana osyaka itthu sinikumiherya ohiiwanana. Emosaa ya itthu iyo sinikumiherya ohiiwanana ti munepa woohimwiiwelela Muluku ni malamulo awe. Yehova onninikhaliherya osyaka itthu iya onileelaka ole onikumiherya, ori Satana Diabo. (2 aKorinto 4:4; Wisupulula 12:9) Satana ti yoole aawiirinhe Adamu ni Eva ohiiwelela ele Muluku yaahimmye awe ni opaka yoothanla moovirikanya yotthuna ya Muluku. Eyo yahaakumiherya ehasara awo vamosaa ni hiyo. (Maphattuwelo 3:1-6, 17-19) Elapo ela yoosareya munepa woohimwiiwelela Muluku ni malamulo awe. Tivonto, hiyo nohaana okhoottela munepa owo.
13. Etthu xeeni enrowa wooniherya wi nihiilokiherya tthiri wira nakhale mu elapo esyaa ya Muluku yeeyo enrowa okhala exariya?
13 Mwa ntakiheryo, nkahaya mmuthokorerye natiri ooreerexa a Yehova a orantteliha olumwenku ola wootakhala ni erimu esyaa ni elapo ya vathii esyaa “eryaya-mo exariya”. (2 Pedru 3:13) Niireke wira eyo khiyaatthuneya oniirihaka opacerya wiilokiherya wira nakhale okathi yoowo exariya enrowa aya wuulaana? Ela enitaphulela wiiwelela saana miruku soowiiwanyeya sa Biibiliya soowi: “Muhiphenteké itthu sa vathí-va, sihinimphavela Muluku. Mwaphentaka itthu sene seiyo, khamunkhalana mwa nyuwo ophenta w’Atithi”. (1 Yohani 2:15) Tivonto, ninnisyaka mukhalelo woohiloka osaren’ye mulaponi, eyo piiyo, munepa woohiiwelela, wiixuupuwelaka mootepana, orupihana woohiloka ni owali. Hiyo ninniilimaleliha onwiriyana Yehova ni omwiiwelela ni murima ahu wotheene, moohicikha etthu sa mukhalelo ahu woottheka. Mweettelo ahu wotheene wa okumi onnooniherya wira muupuwelo ahu ni soophavela sahu sinihooleliwa wira nipakeke yotthuna ya Muluku.—Esalimo 40:9.
14. (a) Nthowa xeeni vary’aya vootthuneya ottottela muraarelo okathi ola wira niixutte ni otthara iphiro sa Yehova mookumini mwahu? (b) Soolepa siromoliwe muttimani sintaphulela exeeni wa khuta mmosaa a hiyo?
14 Vaavo okathi othanliwe ni Yehova vaniphiya aya wira opwetexe mukhalelo ola wootakhala wa itthu ni otheene yaale anitthara iphiro saya, owo khonrowa opisa. Yehova khonrowa wunteiha okathi owo aahiiso orukunuxa malamulo awe wira aahakalalihe ale nlelo aneererya otthara elapo, masi okathi omosaru anaphavela wiixutta yoophavela ya Muluku ni opaka yotthuna awe mohiilipiherya. Vano ola okathi woopaka yotthuna ya Muluku! (Luka 13:23, 24; 17:32; 21:34-36) Tivonto, moota vary’aya voohakalaliha oweha muttitthi muulupale ottottelaka muraarelo okathi ola wootthuneya, ni otthara mooluttuweliwa soolakiherya sinivaha Yehova orumeelaka Nuulumo nawe ni mulokiheryo awe, ni mowiiraana yeettaka mphironi mwawe arowaka elapo esyaa! Vaavo vanivikaniha ahu wiixutta voohimya sa Yehova, hiyo nnootepaka omphenta ni ophavela omurumeela.
Makoho Oowuuluula
• Mmwaha wa okokhorela, tiivi ekhanle yoolakela ya Yehova?
• Nuumala osuwela sowiixuttiha soopacerya sa Biibiliya, etthu xeeni ekina enitthuneya ahu opaka mwekeekhai wira nrowee vahoolo?
• Khuta mmosaa a hiyo opakee exeeni wira okhalee oowiiraana ni anamakokhorela akina a Yehova?
[Elatarato eri epaaxina 4]
‘Masi atthu òmàla anrowa okhalaka vathí-va: anokhala-mu ni murettele womalela’