MURUU WA NEETHANU NEERARU
‘Owana Movirikanya Malaikha Òtakhala a Musulu’
1. Nthowa xeeni vanitthuneya ahu osuwela miteko sa minepa sootakhala?
ATTHU anceene anninyohola muupuwelo woowi sookhala minepa sootakhala. Masi ola khahiyo mwaha woothweeliha. Hataa atthu akupaliki aahiiso ahikupaliki, minepa sootakhala sookhala tthiri, nto iyo sinneererya omuthweeleliha khuta mutthu. Anamakokhorela a Yehova annixankihiwa-tho. Tthiri, awo arii yoolukama yoopacerya ya minepa sootakhala. Murummwa Paulo onninlopola sa mwaha owo, oriki: “Hiyo khanniwana nivirikanyaka owerya w’atthu; ekhotto ahu ti yovirikana owerya n’ikuru ni makhulupale [ahinooneya] èlapo ela, eri mwepiphini, nave-tho malaikha òtakhala a musulu”. (aÉfeso 6:12) Mahiku ahu ala minepa sootakhala sinnaaxankiha vanceene atthu ovikana khalai, okhala wira Satana ohoomoliwa wirimu ni oonanariwa vanceene, osuwelaka wira orina okathi vakhaani.—Wisupulula 12:12.
2. Nniwerya sai oxintta owana wahu ni minepa sootakhala?
2 Vanniweryaneya oxintta owana wahu ni minepa sootakhala? Aayo, masi nimuroromelaka Yehova ni murima wotheene. Hiyo nohaana onwiriyanaka ni wiiwelela Nuulumo nawe. Niira siiso, hiyo nnoowerya osyaka ihasara sa werutthuni, sa mweettelo woohiloka, ni oxankiheya muupuwelelo, itthu seiyo sinaaphwanya ale anilamuleliwa ni Satana.—Yakobo 4:7.
Anamalamulela Oohooneya Eelapo Ari Musuluu
3. Tanii Satana onaakumiherya awe ovaanyiha wootakhalexa, ni moota xeeni?
3 Oryeene wirimu mapuro anoona awe sotheene, Yehova onninleela oratteene mukhalelo wa elapo. Murummwa Yohani aahooniheriwa Satana ntoko “enowa yulupalexa [ni] yoxerya”. Vaakhanleke wira vaaniweryaneya, Satana aari oolikana opwetexa Omwene wa oMesiya wa Muluku, naananoru nuumala omwene owo opacerya olamulela wirimu mwaakha wa 1914. Nuumala wooceela opwetexa omwene owo, Satana ohaakumiherya ovaanyihiwa wootakhala ale aniirela mpantta Omwene owo ari valaponi. (Wisupulula 12:3, 4, 13, 17) Satana aarowa owaniha sai ekhotto ela? Owo aarowa owaniha aarumeelaka atthu awe animutthara ari valaponi.
4. Tanii okhanle mwaneene owerya ni otokweene orina iguvernu sa apinaatamu, nto ninsuwela sai eyo?
4 Moottharelana Yohani aahoonihiwa enamaa yowoopiha, yaarina miruu mithanuu ni miili ni manyaka muloko, yeeyo yaarina otokweene “w’oruma maloko othene n’ilapo sothene ni malavulelo othene ni mahimo othene”. Enamaa eyo yowoopiha enithoonyerya mulokiheryo wa epoliitika wa elapo yotheene. Yohani aaleeliwe wira “Enow’eyo yulupalexa [okhanle Satana Diabo] yahivaha nxeni nlo ikuru saya n’ihije aya n’uwerya waya wulupale”. (Wisupulula 13:1, 2, 7) Aayo, Satana tokhanle mwaneene owerya ni otokweene orina iguvernu sa apinaatamu. Tthiri ntoko murummwa Paulo saalempe awe, “makhulupale èlapo ela” ti “malaikha òtakhala a musulu”, yaawo aneettiha iguvernu sa apinaatamu. Nto otheene yaale aniphavela omukokhorela Yehova anitthuneya wiiwexexa oratteene yootaphulela ya masuu awo.—Luka 4:5, 6.
5. Olelo va, anamalamulela a ipoliitika anithukumanyiwa wira apake exeeni?
5 Hataa anamalamulela anceene a ipoliitika ahimyaka okhala anatiini, khinivo hataa nloko nimosaa nniiwelela olamulelo wa Yehova aahiiso wa Mwene awe oothanliwa, Yesu Kristu. Otheene aya anniwana mootakhala wira avikaniheke olamulela. Olelo va, ntoko sinooniheriwa aya mu Wisupulula, “malaikha a Satana, yawo anìra mitikiniho”, annaathukumanya mamwene a mulaponi motheene wira ‘awane ekhotto ya nihiku nulupale na Muluku òwerya sothene’ va Harmagedoni.—Wisupulula 16:13, 14, 16; 19:17-19.
6. Nthowa xeeni vanitthuneya aya okhalana ephoole wira mutthu ohithweelelihiwe wira okhaliherye mukhalelo wa osatana?
6 Khuta nihiku, ikumi sa atthu sinnixankiheya mwaha wa owana-wana wa anapoliitika, ikhalelo sa atthu, mwaha wa muhakhu, ni itiini, itthu seiyo sinikawanya emusi ya apinaatamu. Mu owana-wana nno, ti woolema atthu okhaliherya mpantta mmosaa, ni masuu aahiiso ni sowiira, akhaliheryaka nloko, nihimo, elavulelo, aahiiso ikrupu sa atthu aniirela aya mpantta. Hataa atthu ahikhaliheryaka mooluluwanya owana-wana iwo, ikwaha sinceene onnikhala mpantta onikhaliherya aya. Masi, moohicikha etthu sa mutthu aahiiso etthu enittittimiherya aya, nto tanii onimukhaliherya aya tthiri? Mwekeekhai, Biibiliya onihimya wira: “Elapo yothene enniweriwa ni Mutakhali”. (1 Yohani 5:19) Nto mutthu onrowa owerya sai osyaka othweelelihiwa vamosaa ni atthu akina? Paahi orweela mwa okhaliherya Omwene wa Muluku ni ohiirela mpantta owana-wana wa mulaponi.—Yohani 17:15, 16.
Miraakho sa Mutakhali
7. Olavilavi wa Satana onooneya sai mmoota sinirumeela awe etiini yoowoka?
7 Mu okathi wotheene wa soohimmwa sa apinaatamu, Satana onnaalupattha atthu wira ahiyee okokhorela wekeekhai, orumeelaka onyoholiwa ni omaniwa. Nave-tho, owo onnirumeela olavilavi wuulupale, eyo piiyo, owoka wuulupale ni miraakho. Orumeelaka olavilavi, owo onniwiiriha apinaatamu anceene okela mweepiphini, orweela mwa etiini yoowoka, owiirihaka wuupuwela wira animurumeela Muluku. Mwaha woohimusuwela oratteene Muluku ni ohiphenta ekeekhai, awo pooti owokeya ni miteko sa itiini sa onammunepani ni sookuxa murima aahiiso okuxeya ni miteko sootikiniha. (2 aTesalonika 2:9, 10) Masi hiyo ninlopoliwa wira hataa eriyari ya atthu yaale aneettela etiini yekeekhai, “akina anohiya wamini, yiweleleke iroho sinototha, ettharaka sowixuttiha sa Satana”. (1 Timótheyo 4:1) Eyo eniweryaneya sai?
8. Vaniweryaneya sai Satana onilamulela orumeelaka etiini yoowoka hataa nimukokhorelaka Yehova?
8 Ni olavilavi awe, Diabo onnirumeela otteettheya wahu. Niireke wira nlelo nivariwee ni omoova mutthu? Akhala wira ti siiso, hiyo pooti oweemererya amusi aahiiso anamwaattamanani, vaavo vanniirela aya opaka itthu soohiloka seiyo sinikhuma etiini yoowoka. Niireke wira n’atthu oowiixinnuuha? Akhala wira ti vaavo, hiyo pooti onyoonyiheya okathi onivahiwa ahu miruku aahiiso vaavo atthu akina vahineemererya aya miyuupuwelo sahu. (Miruku 15:10; 29:25; 1 Timótheyo 6:3, 4) Ohiya olokiherya moonelo ahu nttharaka ntakiheryo na Kristu, hiyo pooti ophavelaka ‘itthu sinnisivela wiwa’, nihimyaka wira etthu enitthuneya orii omusoma Biibiliya ni ohipaka etthu yoonanara paahi. (2 Timótheyo 4:3) Eniphavela Satana khahiyo oniweha hiyo nittharaka etiini ya atthu akina, aahiiso otthara etiini ahu yeephattu, etthu eniphavela awe oniweha nihimukokhorelaka Yehova ntoko sinihimya aya Nuulumo nawe ni mulokiheryo awe.
9. Moolavilavi moota xeeni Satana onirumeela awe yoophavela ya orupihana wira aakhwaniherye soolakela sawe?
9 Nave-tho, orumeelaka olavilavi Satana onniwoopererya atthu wira apakeke itthu seephattu masi mmukhalelo woohiloka. Onnipaka ela orumeelaka yoophavela ya orupihana. Akhoottaka mweettelo wooloka wa Biibiliya, atthu anceene mulaponi annoona orupihana wa atthu oohithelana okhala ntoko etthu yookhalela aahiiso aphavelaka wooniherya wira ahinnuwa. Nto nihimye exeeni sa ale athelanne? Anamathelana anceene anniraruwa. Hataa mmosaa a anamathelana awo ohirarunwe, anamunceene anniphavelasa omwalana aahiiso ovalaana wira yakhaleke ni mulopwana aahiiso muthiyana mukina. Yoophavela ya olavilavi wa Satana orii owiiriha atthu ophavelaka opuha wa olelo va paahi, owiirihaka ohicalela sookhumelela sa muhoolo ohiya wa awo aneene paahi ni atthu akina, masi vanceenexa wataana waya ni Yehova vamosaa ni Mwanawe.—1 aKorinto 6:9, 10; aGalasia 6:7, 8.
10. Eereryaka waakanyerya muupuwelo ahu voohimya sa orupihana woohiloka ni owali, Satana onirumeela exeeni?
10 Yoophavela ekina yeephattu ti otthekula. Otthekula wooloka, pooti omumuliha erutthu, muupuwelo, ni oriiriha murima. Masi nnoonela sai vaavo Satana moolavilavi vanirumeela awe okathi wootthekula wira eererye ovalaanyiha muupuwelo ahu ni wa Muluku? Mwa ntakiheryo, hiyo noosuwela wira Yehova onninyokha orupihana woohiloka ni owali. Vaavo ifilme, iprograma sa televisau, aahiiso sa iteatru, vanooniherya aya itthu iyo, niireke wira hiyo ninnithipelela oweha? Nave-tho, muupuweleleke wira Satana onrowa wiirihaka itthu iyo okhala sootepa otakhala, vaavo vanaattamela aya okathi awe wa otthukweliwa, mwaha woowi “atthu òtakhala murima ni òwòtha anovira etepaka: awo anowototha akhw’aya, nto awo axinene animotothiwa”. (2 Timótheyo 3:13; Wisupulula 20:1-3) Nto hiyo nnitthuneya wiikasoopa okathi wotheene wira nihihomphwe ni miraakho sa Satana.—Maphattuwelo 6:13; Esalimo 11:5; aRoma 1:24-32.
11. Hataa mutthu yoole onisuwela ekeekhai voohimya sa onammunepani, vaniweryaneya sai ohapuxiwa akhala wira khoniikasoopa?
11 Nave-tho, ninnisuwela wira otheene yaale anivara miteko sa onammunepani, eyo piiyo, waaxerya ehako, okhwiri, aahiiso weererya olavula ni alipa-ookhwa, anninyokhiwa ni Yehova. (Otumererya 18:10-12) Nuupuwelaka eyo, hiyo khaninrowa ophavela waakoha anahako, nnakhala owaakhela vatthokoni vahu wira avareke miteko saya sa osatana. Masi niireke wi nnimwaawiriyana awo akhala wira annikhumelela mutelevisau mwahu aahiiso mu Internet? Nnaamwi nihirowaka-tho weemererya olooliwa ni nahako, niireke wira nnoomutthukwelela ekhulula mwanihu, nuupuwelaka wira ela enoowerya omuxeererya yootakhala? Nisuwelaka wira Biibiliya onnikhoottiha olowa, niireke wira hiyo nammweemererya mulipa a icapa wira eettiheke muupuwelo ahu?—aGalasia 5:19-21.
12. (a) Isipo sinirumeeliwa sai wira siniiriheke wuupuwela itthu sinisuwela ahu wira ti sootthekeya? (b) Moota xeeni mawarelo a mutthu, moota wookhapelela ikharari, aahiiso malavulelo, anooniherya aya wira onnisiveliwa ni ale arina mweettelo ohiniphaveliwa ni Yehova? (c) Exeeni enitthuneya wa hiyo wira nihihomphwe ni miraakho sa Satana?
12 Biibiliya onihimya wira onamuttompe ni itthu soonanara sa mukhalelo wotheene sihiromoliwee-tho (ni muupuwelo woohiloka) eriyari ahu. (aÉfeso 5:3-5) Masi sai akhala wira itthu iyo mooratteliwa sinimpwa musiponi, mookuxa murima ni moohihiyererya? Niireke wira hiyo nnimwiipa nlattiheryaka isipo iyo sinivuwiha orupihana ohinatthi othelana, orumeela mirette sinihapala moophavela wiihakalaliha, ni sowiira sikina sootthekeya? Aahiiso nnaamwi nisuwelaka wira khinaatthuneya olattihaka mweettelo wa atthu anipaka itthu iya, niireke wira ninneererya okhala ntoko awo, nilattihaka mawarelo aya, moota wookhapelela ikharari, aahiiso malavulelo aya? Tthiri Satana onnirumeela moolavilavi iphiro soovirikana wira owiirihe apinaatamu otthara muupuwelo awe woohiloka! (2 aKorinto 4:3, 4) Wira nihihomphwe ni miraakho sawe, hiyo nohaana osyaka okuxiwa ni elapo. Hiyo nohaana waasuwelexa ale akhanle “makhulupale èlapo ela, eri mwepiphini” ni owana mowiilipiherya wira ahinihapuxe.—1 Pedru 5:8.
Oowiilokiherya Wira Axintte
13. Hataa nryeene oohimalela, nniwerya sai oxintta elapo enilamuleliwa ni Satana?
13 Ohinatthi okhwa, Yesu aahaahimeerya arummwa awe wira: “Vano mulipihe murima: miyo koxintta elapo ela ya vathí”. (Yohani 16:33) Awo-tho yanwerya oxintta. Nuumala iyaakha sowiiraka 60, murummwa Yohani aalempe so: “Vano, t’ani onxintta ikuru sa vathí? T’ule pahi onamini wira Yesu ti Mwana a Muluku”. (1 Yohani 5:5) Waamini iwo onoonihereya vaavo vaniiwelela ahu sooruma sa Yesu ni ororomela Nuulumo na Muluku, ntoko siiralya awe Yesu. Etthu xeeni ekina enivekeliwa? Etthu enivekeliwa orii ovaraana ni muloko yoowo Yesu ory’awe ntoko Muruu. Vaavo vanttheka ahu, hiyo nohaana ottharuwa ni murima wotheene, ni ophavela oleveleliwa ni Muluku orweela mwa mukuttho wa Yesu. Niira siiso, hataa nryeene oohimalela ni nivonyaka, hiyo-tho nnoowerya oxintta.—Esalimo 130:3, 4.
14. Mmusome aÉfeso 6:13-17, ni murumeele makoho vamosaa ni soolepa siri muttimani ntoko mathipelo a othokorerya mireerelo sinikumiheriwa ni khuta ekaruma yomunepani.
14 Wira nikhumele saana, hiyo nohaana owara ‘iyuma s’ekhotto ya Muluku’, nihihiyaka owara nnakhala ekaruma emosaa. Xontte mmuhule Biibiliya anyu mu aÉfeso 6:13-17, ni nwehee moota sinitthokihiwa aya ikaruma iyo. Nuumala vo, okathi onaakhula anyu makoho anittharelana, muthokorerye moota siniwerya anyu ottottela mureerelo waakiherya onivahiwa ni khuta ekaruma.
Mwiitthukwelele muyuununi ni mphitelo, eri ekeekhai
Hataa nisuwelaka ekeekhai, moota xeeni omusoma Biibiliya khuta nihiku, wuupuwelela ekeekhai ya mBiibiliya, ni ohicompela mithukumano, onnikhapelela aya? (1 aKorinto 10:12, 13; 2 aKorinto 13:5; aFilipi 4:8, 9)
“Nware yowara y’ayuma, eri exariya”
Exariya enihimmwa mu yoolepa ela ti yawani? (Wisupulula 15:3)
Mutthokiherye moota onihonona aya mukhalelo womunepani mwaha wa ohitthara iphiro sa xariya sa Yehova. (Otumererya 7:3, 4; 1 Samuweli 15:22, 23)
“Nware ixapattho, okhanle wakuvela olaleya Ehapari Yorera ya murettele”
Moota xeeni vannikhapelela aya wiiriha inawu sahu okhala soovareya nrowaka waaleela atthu akina voohimya sa yoovaha ya Muluku ya murettele? (Esalimo 73:2, 3; aRoma 10:15; 1 Timótheyo 5:13)
“Nikula no wisakihana, ori wamini”
Akhala wira nookhalana nroromelo noolipa, ninrowa opaka exeeni okathi onikumana ahu ni soweeha siniphavela oniiriha okhala oowaaniherya aahiiso oowoova? (2 Mamwene 6:15-17; 2 Timótheyo 1:12)
“Ekapaseti y’ayuma, ori ororomela wopowa”
Moota xeeni yoolipelela ya woopowa enimukhaliherya aya mutthu osyaka miraakho sa oxankiheya vanceene ni itthu sa werutthuni? (1 Timótheyo 6:7-10, 19)
“Mukuxeke nivaka n’Eroho [na munepa]”
Okathi wotheene niroromeleke exeeni vaavo vaniwana ahu moovaanyihana ni itthu siniphavela ohonona mukhalelo ahu wa omunepani aahiiso wa atthu akinaku? (Esalimo 119:98; Miruku 3:5, 6; Matheyo 4:3, 4)
Etthu xeeni ekina enitthuneya wira nikhumele saana mu ekhotto yomunepani? Okathi xeeni onitthuneya ahu ovarihelaka muteko? Niwiirelaka aani? (aÉfeso 6:18, 19)
15. Nipake exeeni wira niwane ekhotto yomunepani okathi wotheene?
15 Ntoko atoropa a Kristu, hiyo nrii muhina mwa muttitthi muulupale wa anakhotto aniwana ekhotto yomunepani. Akhala wira ninnivikaniha okhala ooweha-weha ni orumeela oratteene ikaruma sa ekhotto sinikhuma wa Muluku, khinnirowa oxinttiwa mu ekhotto ela. Ohiya vo, hiyo ninrowa waalipiha ale animurumeelana ahu Muluku. Hiyo ninrowa okhala oowiilokiherya ni oophavela owana ekhotto, nilaleyaka ihapari sooreera sa Omwene wa oMesiya wa Muluku, eguvernu ya wirimu yeeyo Satana enivaanyiha awe mootakhala.
Makoho Oowuuluula
• Nthowa xeeni anamakokhorela a Yehova ahiniirela ya mpantta owana-wana wa mulaponi?
• Miraakho xeeni sinirumeela Satana wira ohonone mukhalelo womunepani wa maKristau?
• Moota xeeni ikaruma somunepani sinivahiwa ni Muluku sinnikhaliherya aya mu ekhotto ahu yomunepani?
[Ilatarato siri epaaxina 76]
Maloko annithukumanyiwa va Harmagedoni