MURUU WA NAMULOKO NEEXEXE
Yehova Oneettiha Sai Mulokiheryo Awe?
1. Soohimmwa xeeni sa mulokiheryo wa Yehova sinuupulula Biibiliya, ni nthowa xeeni siry’aya sootthuneya wa hiyo?
NIIREKE wira Muluku ookhalana mulokiheryo? Soolepa sowuupuxeriwa sinnileela wira owo ookhalana. Mu Nuulumo nawe, ninnooniheriwa soohimmwa sikina sa mulokiheryo awe oovuwa ni oohooneya a wirimu. (Ezekiyeli 1:1, 4-14; Daniyeli 7:9, 10, 13, 14) Nnaamwi olelo va nihiweryaka oweha mpantta wa mulokiheryo ola ohinooneya, mulokiheryo ola onnaahapuwela vanceene anamakokhorela eekeekhai. (2 Mamwene 6:15-17) Nave-tho mulokiheryo wa Yehova wookhalana mpantta mukina onooneya, yoowo ori valaponi. Biibiliya onninikhaliherya osuwela mulokiheryo owo ni woona moota Yehova sineettiha awe.
Osuwanyeihiwa wa Mulokiheryo Onooneya
2. Muloko xeeni musyaa waapakiwe ni Muluku?
2 Nloko na anaIsarayeli naari muloko wa Muluku mu iyaakha soophiyeryaka 1.545. (Miteko s’Arummwa 7:38) Masi anaIsarayeli yaahihiya weettela malamulo a Muluku ni yaahimukhootta Mwanawe. Ntoko yookhumelela aya, Yehova aahikhootta muloko ole ni aahinyanyala. Tivonto, Yesu aahaaleela aYuda wira: “Tivó emp’anyu enokhala milepé”. (Matheyo 23:38) Nto Muluku aahipaka muloko musyaa, yoowo waapakanne awe wataana wa niinano. Atthu yaarowa wiirelaka mpantta muloko ola yaarowa okhala 144.000, yaawo athanliwe ni Muluku wira yakhaleke ni Mwanawe wirimu.—Wisupulula 14:1-4.
3. Etthu xeeni yiiranen’ye mPentekoositi 33 E.C. ntoko yowooniherya yoowi vano Muluku aarumeela muloko musyaa?
3 Oopacerya wiirela mpantta muloko owo musyaa yaari atthu oowoottihiwa ni munepa wootteela wa Yehova mPentekoositi 33 E.C. Voohimya sa yowiiraneya ela yoohiliyaleya ninsoma so: “Nihiku na Pentekósiti, atthu òwamini othene yira ethukumanne nipuro nimosá. Nananoru, wahìwanyeya oruma okhumaka wirimu, walikana n’ipheyo yòpaka n’ikuru, wasanrye mpa mothene mwaryaya-mo. Vano yahakhumelela ntoko malumi a moro, yakawanyeya emmorelaka khula mmosá. Othene aya yahisareya Eroho Yowarya [“munepa wootteela”, NM], khupajerya olavula ilavulelo sikina, ntoko Eroho Yowarya [“munepa wootteela”, NM] yàvahaya olavula”. (Miteko s’Arummwa 2:1-4) Tthiri munepa wa Muluku waahooniherya saana wira vano nna naari nikhuuru na atthu nenno Muluku naarowa awe orumeela wira aakhwaniherye yoolakela awe nihooleliwaka ni Yesu Kristu wirimu.
4. Tanii olelo va aniirela mpantta wa mulokiheryo wowooneya wa Yehova?
4 Olelo va, paahi oohalela a 144.000 arii valaponi. Masi yaakhwaniheriwaka eprofecia ya Biibiliya, atthu imilyau sene, a “muttitthi mulupalexa” wa “ipwittipwitthi sikina” sihaataanihiwa ni oohalela oowoottihiwa. Yesu, ori Makampusi Ooloka, ohiiraaniha ipwittipwitthi iya sikina ni ale oohalela wira akhalee nikoto nimosaa nenno ninhoolela awe ntoko Makampusi aya. (Wisupulula 7:9; Yohani 10:11, 16) Otheene aya annikhala muloko mmosaa paahi, mulokiheryo wowooneya wa Yehova.
Mulokiheryo Oneettihiwa ni Muluku
5. Tanii oneettiha mulokiheryo wa Muluku, ni moota xeeni?
5 Nuulumo na mBiibiliya noowi “ekereja [muloko] ya Muluku mukumi”, nimmooniherya ole oneettiha muloko owo. Muluku toneettiha mulokiheryo ola. Yehova onnaavaha atthu awe malakiheryo orweela mwa Yesu, yoowo omuthanlale awe wira okhalee Muhooleli oohooneya a muloko, ni orweela mwa Nuulumo Nawe nowuupuxeriwa, ori Biibiliya.—1 Timótheyo 3:14, 15; aÉfeso 1:22, 23; 2 Timótheyo 3:16, 17.
6. (a) Mu eseekulu yoopacerya, woonen’ye sai wira weettihiwa wa muloko onikhuma wirimu? (b) Exeeni enooniherya wira Yesu nlelo tokhanle Muruu a muloko?
6 Malakiheryo awo yaahooneya oratteene mPentekoositi. (Miteko s’Arummwa 2:14-18, 32, 33) Malakiheryo awo yaahooneya vaavo nlaikha na Yehova naahoolenle aya omwarya-mwariwa wa ihapari sooreera wÁfrica, okathi nsuu na Yesu naahoolenle aya orukunuwa murima wa Saulo ooTarso, ni okathi Pedru vaapacenrya awe olaleerya eriyari ya Amalapo. (Miteko s’Arummwa 8:26, 27; 9:3-7; 10:9-16, 19-22) Masi, moovira wa okathi, khuuvo iiwa masuu ookhuma wirimu, hataa woona malaikha, nnakhala waakhela owerya wa munepa woopaka miriira. Mwa sotheene, Yesu aahileiherya oriki: “Vano miyo kinokhala ni nyuwo mahiku othene, mpakha elapo omala”. (Matheyo 28:20; 1 aKorinto 13:8) Olelo va, Anamoona a Yehova annikupali ohoolela wa Yesu. Vahaakhanle ohoolela iwo, olaleya mihupi sa Omwene khivaaweryaneya mwaha wa olupatthiwa wuulupale.
7. (a) Tanii aniirela mpantta wa “murumeyi òroromeleya ni ànkhili”, ni nthowa xeeni? (b) Muteko xeeni ovahiwe “murumeyi”?
7 Okathi vakhaani ohinatthi okhwa, Yesu aahaaleela awiixutti awe voohimya sa “murumeyi òroromeleya ni ànkhili”, yoowo Yesu ntoko Pwiya aarowa awe onvaha muritti muulupale. “Murumeyi” owo aarowa okhala okathi yoowo Pwiya vaarowa awe wirimu ni aarowa ovikanihaka ovara muteko woolipa mpakha orwa woohooneya wa Kristu mu owerya wa Omwene. Moota sinitthokihiwa aya, vannooneya wira murumeyi owo, khahiyo mutthu mmosaa paahi, masi muloko wa atthu oowoottihiwa a Kristu. Mwaha wa othuma muloko ola ni ephomee awe, Yesu onnihimya muloko ola okhala “murumeyi” awe. Atthu aniirela mpantta ekrupu ela ya murumeyi aavahiwa muteko wa waapaka awiixutti ni ovikaniha waalyiha, yaavahaka “yolya [yomunepani] okathi aya”.—Matheyo 24:45-47; 28:19; Yesaya 43:10; Luka 12:42; 1 Pedru 4:10.
8. (a) Miritti xeeni sirina aya ekrupu ya murumeyi vano? (b) Nthowa xeeni ory’aya wootthuneya otthara soolakiherya Muluku sinivaha awe orumeelaka ephiro ela?
8 Okathi wa orwa wawe woohooneya mwaakha wa 1914, ekrupu ya murumeyi yaari yoororomeleya evaraka muteko wa Pwiya. Nto mwaha wa ororomeleya wa ekrupu eyo, vaakhala ethoonyeryo yoowi murumeyi owo ohincereriwa miritti mwaakha wa 1919. Okhuma mwaakha ole mpakha vano onnilaleeriwa Omwene elapo yotheene, ni muttitthi muulupalexa wa anamakokhorela a Yehova onnithukumanyiwa wira woopowe mmaxakha maalupale. (Matheyo 24:14, 21, 22; Wisupulula 7:9, 10) Nto muttitthi ola onniphavela-tho yoolya yomunepani, ni onnivahiwa yoolya eyo ni ekrupu ya murumeyi. Nto, wira nimuhakalalihe Yehova, nohaana weemererya soolakiherya sinivaha awe orumeelaka ephiro ela ni otthara soolakiherya iyo.
9, 10. (a) Mu eseekulu yoopacerya, etthu xeeni yaapakiwe wira siphukiweke miyaha voohimya sa mwiixuttiho ni ovaha malakiheryo a olaleerya ihapari sooreera? (b) Murehereryo xeeni wa ohoolela miteko sa nloko na Yehova okhanle olelo va?
9 Okathi mukina, annikhumelela makoho voohimya sa mwiixuttiho ni moota woweettiherya itthu. Nto nipakeke exeeni mmiyaha iyo? Eliivuru ya Miteko sa Arummwa muruu wa 15 enninleela moota saaphukiwa awe mwaha mmosaa wa Amalapo yaawo yaakenle eKristau. Mwaha owo waaroihiwe wa arummwa ni axitokweene a oYerusalemu, yaawo yaarumeela ntoko nikhuuru noolamulela. Alopwana awo khahiyo wira yaari atthu oomalela, masi Muluku aahaavarihela muteko. Awo yaahithokorerya ele soolepa enihimya aya mmwaha owo, vamosaa ni sowooniherya sa ovara muteko wa munepa wa Muluku mmittetthe sa Amalapo. Nto yaahipaka yoothanla. Muluku aahireeliha yoothanla eyo. (Miteko s’Arummwa 15:1-29; 16:4, 5) Orweela mwa nikhuuru nna noolamulela, yaahithanliwa atthu khurumihiwa wira yakhaliherye muteko woolaleerya Omwene.
10 Olelo va, Nikhuuru Noolamulela na mulokiheryo onooneya wa Yehova, nniireliwa mpantta ni axinna yoottihiwe ni munepa wootteela yaawo anikhuma ilapo soovirikana, ni anikhala oseedi wa elapo yotheene wa Anamoona a Yehova. Neettihiwaka ni Yesu Kristu, Nikhuuru Noolamulela ninninnuuherya okokhorela wooloka khuta elapo, nihoolelaka muteko woolaleerya wa Anamoona a Yehova mmiloko soophiyeryaka miloko ikonto sinceene. Anna awo a Nikhuuru Noolamulela aakhalana muupuwelo mmosaru wa murummwa Paulo, yoowo aalepenle maKristau akhw’awe wira: “Khahiyó wira kimphavela okhala mwanene wamini wanyu, mana nyuwo molipiherya wamini. Emphavelaka t’ila: ovara muteko vamosá ni nyuwo wira mutteliweke murima”.—2 aKorinto 1:24.
11. (a) Axitokweene ni arummwa oorumeela anithanliwa sai? (b) Nthowa xeeni vanitthuneya ahu waakhaliheryaka atthu awo athanliwe?
11 Mu elapo yotheene Anamoona a Yehova anlipelela Nikhuuru Noolamulela wira naathanle anna oophwanelela, yaawo aneemereriwa waathanla axitokweene ni arummwa oorumeela wira akhapeleleke miloko. Soovekela siniphaveliwa wa ale anithanliwa sirii mBiibiliyani ni vannisuweliwa wira alopwana awo atthu oohimalela ni annivonya. Axitokweene yaale aneemererya ni ale anaathanla akina wira akhalane miritti mmulokiheryoni, aakhalana muritti muulupalexa ohoolo wa Yehova. (1 Timótheyo 3:1-10, 12, 13; Tito 1:5-9) Tivonto, awo annivekela wira akhaliheriwe ni munepa wa Muluku ni anniphavela malakiheryo anikhuma mu Nuulumo nawe nowuupuxeriwa. (Miteko s’Arummwa 6:2-4, 6; 14:23) Nto, nrowee nooniherye waaxukhurela wahu “atthu [ari ntoko] sovaha sawe”, yaawo annikhaliherya otheene ahu wira nikhalane “wamini omosaru”.—aÉfeso 4:8, 11-16.
12. Yehova onaavarihela sai muteko athiyana mmurehereryo awe?
12 Soolepa sinilakiherya wira muloko ohooleliweke ni alopwana. Ela khenaaramusa athiyana, okhala wira athiyana akina anrowa olamulelaka Momweneni wa wirimu, ni awo annikhaliherya vanceene muteko wa olaleerya. (Esalimo 68:12) Nave-tho, mwaha wa okhapelelaka miritti saya vatthokoni, athiyana awo annikhaliherya wira muloko wooniweke saana. (Tito 2:3-5) Masi muteko wa wiixuttiha mmulokoni onivariwa ni alopwana athanliwe wira avareke muteko owo.—1 Timótheyo 2:12, 13.
13. (a) Muupuwelelo xeeni Biibiliya onaatumererya awe axitokweene wira akhalane voohimya sa muritti aya? (b) Eparakha xeeni otheene ahu evahiwa ahu opaka?
13 Mulaponi, mutthu yoole okhanle xeefi onnooniwa okhala muulupale, masi muhina mwa mulokiheryo wa Muluku mweettelo tuula: ‘Ole ori mwamukhanixa mwa nyuwo othene, yowo t’uri mulupale’. (Luka 9:46-48; 22:24-26) Soolepa sinnaavaha miruku axitokweene wira ahikhaleke mapwiya wa ale Muluku aavanha awe wira yaasukeke, masi, akhaleke ntakiheryo wa ipwittipwitthi. (1 Pedru 5:2, 3) Okhala oorummwa ni Mukhulupale a olumwenku, eparakha enivahiwa Anamoona a Yehova otheene, ohiya atthu vakhaani athanliwe. Moowiiyeveiha, otheene aya, alopwana ni athiyana, annilavula sa nsina nawe ni waalaleerya atthu khuta opuro voohimya sa Omwene awe.
14. Murumeelaka soolepa siromoliwe, muthokorerye makoho ari wanikisa wa ettima ela.
14 Ti vooloka wiikoha so: ‘Tthiri kinniiwexexa ni oxukhurela moota Yehova sineettiha awe mulokiheryo awe oowooneya? Muupuwelo aka, moota onilavula aka, ni sowiira saka sinnooniherya oxukhurela iwo?’ Wuupuwelela iponto sinttharelana sinoowerya omukhaliherya khuta mmosaa a hiyo wiitokosa mmwaha owo.
Akhala wira kinnimwiiwelela tthiri Kristu ntoko Muruu a muloko, nto moovarihana ni soolepa iya sinttharelana, kinitthuneya opaka exeeni? (Matheyo 24:14; 28:19, 20; Yohani 13:34, 35)
Tanii kinimuttittimiha aka, vaavo vaneemererya aka yoolya yomunepani enivahiwa ni ekrupu ya murumeyi ni Nikhuuru nawe Noolamulela? (Luka 10:16)
Moota xeeni khuta mutthu mmulokoni, mwa vameekh’aya axitokweene, anitthuneya aya waathokoreryaka atthu akina? (aRoma 12:10)
15. (a) Muupuwelo ahu voohimya sa mulokiheryo oowooneya wa Yehova, onooniherya exeeni? (b) Okathi xeeni orina ahu wira nooniherye wi Diabo nawoothe ni ohakalaliha murima wa Yehova?
15 Yehova onninihoolela olelo va orumeelaka mulokiheryo awe oowooneya yoowo oneettihiwa ni Kristu. Muupuwelo ahu voohimya sa murehereryo ola onnooniherya moota sinoonela ahu mwaha wa olamulelo muulupale. (aHéberi 13:17) Satana onihimya wira yoophavela ahu yuulupale wiihakalaliha mmensihu paahi. Masi akhala wira ninnimurumeela Muluku mmukhalelo wootthuneya ni osyaka itthu sinooniherya wiivaha ephoole moohiphwanelela, ninnooniherya wira Diabo nawoothe. Nnoomuhakalaliha Yehova, akhala wira ninnaaphenta ni waattittimiha ale aneettiha muloko eriyari ahu, masi khiyakhootta ‘owepesa atthu awo wira niphwanye sorera’. (Yuda 16; aHéberi 13:7) Mwaha wookhala oororomeleya wa mulokiheryo a Yehova, ninnooniherya wira Yehova ti Muluku ahu ni wira nrii oowiiraana nimukokhorelaka owo.—1 aKorinto 15:58.
Makoho Oowuuluula
• Olelo va, exeeni ekhanle mulokiheryo oowooneya wa Yehova? Nto yoolakela aya exeeni?
• Tanii othanliwe okhala Muruu a muloko, ni onirumeela marehereryo xeeni oowooneya wira onivahe malakiheryo anooniherya oniphenta?
• Muupuwelo xeeni wooloka onitthuneya ahu okhalana voohimya sa ale ari mmulokiheryoni mwa Yehova?
[Ilatarato siri epaaxina 133]
Yehova onninihoolela olelo va orweela mwa mulokiheryo awe wowooneya yoowo oneettihiwa ni Kristu