MURUU WA NAMILOKO MIILI
Nvikaniheke Wuupuwela Oratteene Nihiku na Yehova
1. Moonenle sai vaavo mwiixuntte anyu wanipacerya wira omala-malihiwa wa itthu sooriipiha murima sa mukhalelo ola wa khalai orii vakhiviru?
ETTHU yoopacerya yeeyo yiixuntte anyu mBiibiliyani ti yoowi Yehova oniphavela wira elapo yotheene ekhalee eparayiisu. Mu elapo eyo esyaa khenrowa-tho okhala ekhotto, ecrime, osikhini, iretta, ohaawa, ni okhwa. Hataa alipa-ookhwa anookhala-tho akumi. Tthiri eyo yoolipelela yoohakalaliha! Etthu enttittimiherya wira yoolipelela eyo ehanle vakhaani waakhwanela mwaha woowi orwa woohooneya wa Kristu ntoko Mwene onilamulela opacenrye 1914, ni okhuma okathi yoole hiyo ninkhala mahiku ookiserya a elapo ela yootakhala. Wanikisa wa mahiku ala ookiserya, Yehova onrowa opwetexa mukhalelo ola wa itthu ni onrowa orantteliha ni elapo esyaa eleihenrya awe!
2. “Nihiku n’Apwiya” exeeni?
2 Biibiliya onniihana okathi owo woopwetexa onrwa okhala “nihiku n’Apwiya”. (2 Pedru 3:12) Nna “nihiku n’oviruwa w’Apwiya” wa elapo yotheene ya Satana. (Sofoniya 2:3) Nihiku nno ninrowa ophiya wanikisa waya mu “ekhotto ya nihiku nulupale na Muluku òwerya sothene . . . , nipuro aHeberi aníhanaya oHarmagedoni”, nihiku nenno “mamwene a mulaponi mothene” anrowa aya opwetexiwa. (Wisupulula 16:14, 16) Niireke wira mweettelo anyu wa okumi onnooniherya okupali wanyu wira “nihiku [nna] n’Apwiya” nrii vakhiviru?—Sofoniya 1:14-18; Yeremiya 25:33.
3. (a) Nihiku na Yehova ninrwa silini? (b) Vooniheren’ye sai okhala voottotteleya mureerelo Yehova ohinisuweliha “nihiku nlo walá okathi uwo”?
3 Biibiliya khonnileela okathi eenexa Yesu Kristu vanirwa awe ntoko Namaphukela orummwale ni Yehova wira opwetexe elapo ya Satana. Voohimya sa okathi owo, Yesu aahimmye wira: “khavo onsuwela vanrwaya nihiku nlo walá okathi uwo: nnákhala malaikha a wirimu, nnákhala Mwana: Atithi pahi t’asuwenle”. (Marko 13:32) Tthiri akhala wira mutthu khonimphenta Yehova, mutthu owo onrowa wunteehaka nihiku na Yehova mmuupuweleloni mwawe ni onrowa ophavelaka ovara miteko sawe paahi. Masi ale tthiri animphenta Yehova anrowa omurumeelaka ni murima aya wotheene, moohicikha etthu sa okathi onrowa aya omala mukhalelo ola wootakhala.—Esalimo 37:4; 1 Yohani 5:3.
4. Yoolopola xeeni yaahimmye Yesu?
4 Aalopolaka ale animphenta Yehova, Yesu aahimmye wira: “Mwipasope, nwehereryeke, mana khamunsuwela nihiku nene”. (Marko 13:33-37) Owo onintumererya wira nihihiye olya ni owurya aahiiso “sovelaveliha s’ekumi” sikuxaka ephoole ahu yotheene ni siniirihaka oliyala wira okathi ohanle orii vakhaani.—Luka 21:34-36; Matheyo 24:37-42.
5. Ntoko Pedru sitthokihenrya awe, nihiku na Yehova ninrowa oruuha exeeni?
5 Moolikanasa, Pedru onintumererya wira nivikaniheke wuupuwela oratteene ‘nihiku n’Apwiya, nakuvihaka orwa waya. Nihiku nenlo, erimu enrowa ovya n’utothowa: itthu sa vathí sinrowa ototoxiwa ni moro’. Iguvernu sotheene sa apinaatamu, eyo piiyo, “erimu”, sinrowa opwetexiwa, vamosaa ni apinaatamu otheene ootakhala, eyo piiyo, elapo ni “itthu [saya] sa vathí”, siri miyuupuwelelo ni miteko sa elapo ela yootakhala, ntoko mukhalelo aya wa ohimwiiwelela Muluku, ni mweettelo aya wa okumi woothanyeya ni woophavela mihakhu. Sotheene iyo sinrowa oranttelihiwa ni “erimu esyá [Omwene wa wirimu wa Muluku] n’ilapo esyá [mulokiheryo musyaa wa atthu anrowa okhalaka valaponi]”, elapo yeeyo “eryaya-mo exariya”. (2 Pedru 3:10-13) Itthu iya sinrowa ottikinya elapo sinrowa opacerya mootutuxerya ni nihiku ni okathi woohilipeleleya.—Matheyo 24:44.
Nvikaniheke Oweha-weha Ekanyeryo
6. (a) Niireke wira waakhula wa Yesu wa nikoho na awiixutti awe waakhwaniheren’ye paahi okathi wa aYuda? (b) Aakhulaka nikoho na awiixutti awe, Yesu aahimmye exeeni yeeyo enttittimiherya itthu siniiraneya ni muupuwelelo wa atthu okhuma 1914 mpakha olelo va?
6 Mwaha wa okathi onikhala ahu, hiyo nohaana osuwela oratteene ikanyeryo seiyo sinisuwanyeiha mahiku ookiserya, eyo piiyo, ‘omala [wa] olumwenku’. Muupuweleke wira vaavo Yesu aakhunle awe nikoho na awiixutti awe, nenno nri mMatheyo 24:3, itthu sikina seiyo aahimmye awe mu eversiikulu 4 mpakha 22, sihaakhwanela vakhaani okathi wa aYuda, okhuma mwaakha wa 33 mpakha 70 E.C. Masi eprofecia eyo yookhalana waakhwanela waya wuulupale okhuma mwaakha wa 1914, okathi wa ‘orwa [“okhala wa Kristu”, NM] ni omala [wa] olumwenku’. Matheyo 24:23-28 onninleela ele yaarowa wiiraneya okhuma mwaakha wa 70 E.C. mpakha okathi wa okhala wa Kristu. Itthu sihimmwale mMatheyo 24:29–25:46 sinniiraneya okathi ola wookiserya.
7. (a) Nthowa xeeni khuta mmosaa a hiyo onitthuneya awe othokoreryaka itthu siniiraneya seiyo sinaakhwaniherya ekanyeryo? (b) Mwaakhule makoho ari wanikisa wa ettima ela, mooniheryaka moota ekanyeryo enaakhwanela aya okhuma 1914.
7 Khuta mmosaa a hiyo ohaana ovaha ephoole sowiiraneya ni mikhalelo sinaakhwaniherya ekanyeryo eyo. Wuupuwelela moota itthu iyo sinivarihana aya ni eprofecia ya Biibiliya, onrowa onikhaliherya ovikanihaka wuupuwela oratteene nihiku na Yehova. Nave-tho, opaka eyo onrowa onikhaliherya olavulaka mookuxa murima vaavo vanaalopola ahu atthu akina voohimya sa waattamela wa nihiku nne. (Yesaya 61:1, 2) Nuupuwelaka eyo, nrowee nthokorerye makoho ala anittharelana yaawo anttittimiherya itthu sikina sa ekanyeryo eyo, ntoko silempwale aya mMatheyo 24:7 ni Luka 21:10, 11.
Okhuma 1914, mmukhalelo xeeni wootikiniha enaakhwanela aya eprofecia yoowi “maloko makina anowana ni maloko makhw’aya”? Voohimya sa ikhotto, etthu xeeni eniiraneya okhuma 1914?
Mwaakha wa 1918, eretta xeeni yaawiivale atthu anceene ovikana Ekhotto Yoopacerya ya Olumwenku Wotheene? (Nwehee ebroxura Vikanihani Okhala Ooweha-weha!, epaaxina 4, ettima 4.) Nnaamwi apinaatamu arina ene osuwela wa waaloola aretta, iretta xeeni nlelo siniwiiva atthu imilyau sinceene?
Niireke wira orowa vahoolo wa siensia mu eseekulu evinre, woomaliha othowa wa yoolya valaponi?
Exeeni enookupalihani wira 2 Timótheyo 3:1-5, 13 khahiyo onihimya sa mukhalelo wa okumi waakhanle okhuma khalai, masi wira onihimya sa moota mikhalelo iyo sintepa aya onanara vaavo vanaattamela ahu wanikisa wa mahiku ookiserya?
Ovalaanyiwa wa Atthu
8. (a) Etthu xeeni ekina, enihimmwa mMatheyo 13:24-30, 36-43, yeeyo Yesu aavaraanyinha awe ni omala wa mukhalelo ola wa itthu? (b) Nlikanyiheryo na Yesu nintaphulela exeeni?
8 Sookhala sowiiraneya sikina suulupale seiyo Yesu aavaraanyinha awe ni omala wa mukhalelo ola wa itthu. Yoowiiraneya emosaa erii ovalaanyiwa wa ‘ale anettela omwene wa wirimu’ ni ‘ale animwettela Mutakhali’. Yesu aalavunle mwaha ola mu nlikanyiheryo nawe na ematta ya etrigu yeeyo yaaliwe-tho nthakathaka ni nwanani mmosaa. Mu nlikanyiheryo na Yesu, “etrigu” enithoonyerya maKristau oowoottihiwa. Nto “nthakathaka” taale aniihimya okhala maKristau, masi anooniherya wira “animwettela Mutakhali” nthowa noowi annivarexexa elapo yeeyo enilamuleliwa ni Diabo. Awo annivalaanyiwa ni ‘ale [anamwane a Muluku] anettela omwene wa wirimu’, ni anniheliwa ekanyeryo wira apwetexiwe. (Matheyo 13:24-30, 36-43) Niireke wira ovalaanyiwa iwo onniiraneya tthiri?
9. (a) Nuumala Ekhotto Yoopacerya ya Olumwenku Wotheene, ovalaanyiwa xeeni wuulupale wiiranen’ye wa ale yaahimya okhala maKristau? (b) Moota xeeni maKristau oowoottihiwa yoonihenrye aya wira yaari arumeyi eekeekhai a Omwene?
9 Nuumala Ekhotto Yoopacerya ya Olumwenku Wotheene, waahikhala ovalaanyiwa wa ale yaahimya okhala maKristau mu ikrupu piili: (1) Ahooleli a eKristau Yoowootha ni atthareli aya, yaawo yaakhalihenrye mwa nthiti mulokiheryo wiihaniwa Wuuraana wa Maloko (olelo va onisuweliwa okhala Maloko Oowiiraana), masi nlelo khiyavikaniha okhaliherya nloko naya. (2) maKristau eekeekhai yaakhala nuumala ekhotto ele, yaawo yaakhaliherya Omwene wa Omesiya wa Muluku, ohiya okhaliherya maloko a elapo ela. (Yohani 17:16) Awo yaahooniherya okhala arumeyi eekeekhai a Omwene wa Muluku nthowa na olaleerya ‘Ehapari Yorera y’omwene’ elapo yotheene. (Matheyo 24:14) Tiivi sikhanle sookhumelela saya?
10. Tiivi yaari yookhumelela yoopacerya ya muteko wa olaleerya Omwene?
10 Wanipacerya, yaahithukumanyiwa ale oohalela oowoottihiwa ni munepa wa Muluku, yaale yaarina nlipelelo na okhala vamosaa ni Kristu Momweneni wa wirimu. Nnaamwi yaakhala ilapo soovirikana, awo yahiiraanihiwa mmulokiheryo mmosaa. Othukumanyiwa wa maKristau awo oowoottihiwa ohanle omala.—Wisupulula 7:3, 4.
11. Muteko xeeni wa othukumanya onivariwa olelo va, ni eprofecia xeeni enaakhwaniheriwa?
11 Nto, ohooleliwaka ni Kristu waahipacerya muteko wa othukumanyiwa “muttitthi mulupalexa w’atthu . . . yari a ilapo sothene ni a maloko othene ni a mahimo othene ni a malavulelo othene”. Atthu ala aniirela mpantta wa “ipwittipwitthi sikina” seiyo sinrowa woopowa mmaxakha maalupale sirowaka elapo esyaa ya Muluku. (Wisupulula 7:9, 14; Yohani 10:16) Muteko ola wa olaleerya Omwene wa Muluku, yoowo onivariwa wanikisa ohinatthi orwa, onnivikaniha mpakha olelo va. Moororomeleya, muttitthi muulupalexa wa ipwittipwitthi sikina, yoowo olelo ori imilyau sene, onnaakhaliherya ale oohalela oowoottihiwa olaleya muhupi wootthuneya wa Omwene. Atthu a ilapo sotheene anniiwa muhupi ola wa Omwene.
Exeeni Enrowa Wiiraneya Muhoolo?
12. Nihinatthi ophiya nihiku na Yehova, muteko wa olaleerya ovariweke mpakha vaavi?
12 Sowooniherya iya sotheene sintaphulela wira nihaattamela wanikisa wa mahiku ala ookiserya ni wira nihiku na Yehova nrii vakhiviru. Masi niireke wira nlelo sookhala iprofecia sikina seiyo sinrowa waakhwanela nihinatthi opacerya nihiku nno nowoopiha? Aayo, sookhala. Nthowa nimosaa, mwaha woowi ovalaanyiwa wa atthu mmwaha wa Omwene nlelo khomanle. Mmapuro makina, yaawo yaakhanle ovaanyihiwa wuulupale mu iyaakha sinceene, olelo va annincerereya awiixutti asyaa. Hataa mapuro yaawo atthu anikhootta aya ihapari sooreera, atthu awo annooniheriwa ikharari sa Yehova orweela mwa onamoona onivaha ahu. Nto nvikaniheke ovara muteko owo! Yesu onnilipiherya wira vaavo muteko wa olaleerya vanimalihiwa aya, wanikisa onimoorwa tthiri.
13. Moovarihana ni 1 aTesalonika 5:2, 3, etthu xeeni yuulupale nlelo enrowa wiiraneya, nto eyo enrowa otaphulela exeeni wa hiyo?
13 Eprofecia ekina yuulupale ya Biibiliya enihimya wira: “Vano, atthu yahimya wira: ‘Nokhalana murettele n’ikumi!’, vavo t’unìraya warwele opweteya nananoru, ntoko ohawa wa muthiyana ohanle oyara. Vano awo khanwerya otthyawa”. (1 aTesalonika 5:2, 3) Moota sinrowa aya olaleiwa “murettele n’ikumi” eyo nlelo ninrowa woona. Masi ela khentaphulela wira ahooleli a elapo anrowa olokiherya tthiri mixankiho sa apinaatamu. Yaale anivikaniha wuupuwela oratteene nihiku na Yehova, khanrowa ohapuxiwa ni yoohimmwa eyo. Awo annisuwela wira moottharelana, moohipisa ni mootutuxerya onimoorwa opwetexa.
14. Itthu xeeni sinrowa wiiraneya okathi wa maxakha maalupale, ni sinrowa ottharelana sai?
14 Wanipacerya wa maxakha maalupale, anamalamulela a elapo anrowa omurukunuwela Babilonia Muulupale, eyo piiyo, olamulelo wa itiini soowoka molumwenkuni, ni wanikisa waya anrowa ompwetexa. (Matheyo 24:21; Wisupulula 17:15, 16) Nuumala vo, maloko anrowa waarukunuwela atthu yaale anikhaliherya olamulelo muulupale wa Yehova, etthu enrowa omwiiriha Yehova waaviruwela anamalamulela a epoliitika ni anamakhaliherya aya, ni waapwetexa. Eyo enrowa wiiraneya mu Harmagedoni, wanikisa wa maxakha maalupale. Moottharelana, Satana ni axetwani awe anrowa otthukweliwa mukhatteya, wira ehaawoke-tho apinaatamu. Ela enrowa omaliherya nihiku na Yehova, vaavo nsina nawe ninrowa aya ovuwihiwa vaalupale.—Ezekiyeli 38:18, 22, 23; Wisupulula 19:11–20:3.
15. Nthowa xeeni vaarowa aya ohooniherya okhala wa miruku wuupuwelaka wira nihiku na Yehova nootepa orakamela?
15 Omala wa mukhalelo ola onrowa wiiraneya okathi Muluku olakenle awe, moovarihana ni eprograma awe. Wanikisa iwo khivaninteya. (Habakuki 2:3) Nkahaya mutthokelele ela, opwetexiwa wa Yerusalemu mu 70 E.C. wiiranen’ye mowaakuveya, okathi yoowo aYuda wahaalipelela aya, ni yuupuwela aya wira woopiha iwe waahimala. Nihimye exeeni sa Babilonia a khalai? Aari oowerya, oowiiroromela, ni oolipihiwa ni ixirii suulupale ni soorakama. Masi Babilonia aamonre ohiyu omosaa paahi. Moolikanasa, opwetexa wootutuxerya onrowa orwa wa mukhalelo ola wootakhala. Nto vaavo vanaattamela aya opwetexiwa iwo, hiyo nohaana ophwanyiwa oowiiraana mu okokhorela wekeekhai, nivikanihaka wuupuwelela oratteene nihiku na Yehova.
Makoho Oowuuluula
• Nthowa xeeni ory’aya wootthuneya ovikanihaka wuupuwelela oratteene nihiku na Yehova? Ninrowa opaka sai eyo?
• Ovalaanyiwa wa atthu weiwo onipakiwa vano, onnihapuwela sai?
• Exeeni enilipelela ahu nihinatthi opacerya nihiku na Yehova? Nto, khuta mmosaa a hiyo onitthuneya opakaka exeeni?
[Ilatarato siri epaaxina 180, 181]
Moohipisa anoomala mahiku ala ookiserya vaavo vanrowa aya opwetexiwa mukhalelo wa Satana