Oroiha ohoolo

MULUKU OOWERYA SOTHEENE tokhanle Mwaneene olumwenku. Okumi ahu, wa vano ni wa muhoolo, onlipa mwa yoowo. Owo ookhalana owerya wa otthuvela ni owerya wa ohukhumu. Ookhalana owerya wa ovaha okumi ni owerya wa okumiha okumi. Nakhalana weemereriwa n’uwo, vanookhala vooloka wa hiyo; naahikhalane weemereriwa n’uwo, vanookhala voonanara wa hiyo. Moota ory’aya vootthuneya wi okokhorela wahu okhale woweemerereya wa yoowo!

Atthu annikokhorela mu inamuna sinceene. Vakhala wi etiini eri ntoko ephiro, nireke wi iphiro sa itiini sotheene sinneemereriwa ni Muluku? Nnaari, khisineemereriwa. Yesu, mprofeta a Muluku, aahooniherya wi sirii iphiro piili paahi. Owo aahimmye: “Mukhora mulupale n’iphiro yowokowa t’iye sinroiha worimelani: ale anivira seiyo kharere. Vano, mukhora onikeliha mwekumini ti wophunyeya: ephiro ene ti yorika, vano ale amphwanya ephiro yeyo ari vakhani.”—Mateyo 7:13, 14.

Sookhala mithinto miili paahi sa etiini: emosaa eniroiha wookumini ni ekina eniroiha worimeelani. Yoophavela ya ebroxura ela erii wookhaliheryani ophwanya ephiro eniroiha wookumini woohimala.

Voohikhala wira varii nthoonyeryo nikina, soromoliwa sotheene sa mBiibiliyani vasulu, siri sa Biblia—Solempwa sa Muluku, Solempwa sa eHeberi; ni Watàna wa Nanano, Solempwa sa eKriki.