Epantte 8
Mukhoottele Etiini Yoowoka; Mweetteleke Etiini Yekeekhai
1. Voohimya sa okokhorela, yoothanla xeeni erin’aya atthu ohoolo waya olelo?
YESU aahimmye wira: “Ole ohikhanle ni miyo, onnikivirikanya.” (Mateyo 12:30) Nrii mpantta wa Yehova aahiiso mpantta wa Satana. Atthu anceene anupuwele wi animurumeela Muluku mmukhalelo woweemerereya, masi Biibiliya onihimya wi Satana ‘oniwototha atthu othene.’ (Wisupulula 12:9) Imilyau sinceene sa atthu sinikupali wira sinimukokhorela Muluku, masi mwekeekhai sinimurumeela Satana Diabo! Atthu olelo aakhalana ohoolo waya yoothanla emosaa: Omurumeela Yehova, “Muluku a ekeekhai,” aahiiso Satana, ‘tithi a wothá.’—Esalimo 31:5, NM; Yohani 8:44.
Mwiitaphule mu Etiini Yoowoka
2. Tiivi emosaa ya ephiro Satana onivarihela awe muteko wi ohaayase wakhoottiherya atthu omukokhorela Yehova?
2 Othanla omurumeela Yehova etthu ya miruku, yoothanla ela eniruuha weemereriwa ni Muluku. Masi Satana khonkhala oohakalala vaavo mutthu ommurumeela awe Muluku; owo onnikumiherya mixankiho wa ale aniira yeeyo. Ephiro emosaa mwa moota onipaka awe eyo erii onyoholiwa aahiiso okumiherya onyokhiwa onikumiheriwa ni atthu akina, pooti-tho mu mpantta wa apatthani ni atthu a vatthokoni. Yesu aaloponle so: “Awanani awe mutthu t’ale a ntthoko nawe.”—Mateyo 10:36.
3. Vakhala wi a etthoko anyu aahiiso apatthani inyu animoovaanyihani omukokhorela Muluku, munrowa opaka exeeni?
3 Vakhala wi eyo enoowiraneelani nyuwo, munrowa opaka exeeni? Atthu anceene annisuwela wi mukhalelo aya wa okokhorela ti wootthekeya, masi annoovelela ohiya. Anoona wi waarowa okhala ohiroromeleya wa etthoko aya. Eyonto yookhalela? Mwasuwenle wi atthu a etthoko anyu annivarihela muteko mirette sootakhala, khimwaarowa waalopola wira mirette iyo sinimwahaaxa? Nyuwo khimwaarowa otakaahana n’awo wira nvariheleke muteko mirette iyo, kahiyo siiso?
4. Aalavunle exeeni Yoxuwa wa a Isarayeli voohimya sa okokhorela mmahiku awe?
4 Yoxuwa aahaatumererya a Isarayeli wira ahiye miteko ni mihapo sa itiini sootthekeya sa amuhavinre aya. Owo aahimmye wira: “Vavo-nto, mwattittimiheke Apwiya ni wova: mwarumeleke Apwiya ni murim’anyu wothene n’ankhili anyu othene. Mwaríheke amuluku axitith’inyu yarumenlyaya ekhopela ele ya muró Eufrate ni wEjitu: mwarumeleke Apwiya pahi.” (Yoxuwa 24:14) Yoxuwa aari oororomeleya wa Muluku, nto Yehova aahimureeliha. Naroromeleya wa Yehova, owo ononreeliha-tho.—2 Samuweli 22:26.
Mwiitaphule mu Itthu Sinivariheliwa Muteko mu Okokhorela Woowoka
5. Nthowa xeeni nintthuneya ahu wiitaphula mwa itthu sa maxintta?
5 Wiitaphula mu etiini yoowoka ontaphulela-tho wi nohaana onyaanya itthu sotheene sa maxintta akhweya nrina ahu, ntoko iphiiri, ihirisi, anela ni ikhulula sa maxintta, ni itthu sinlikana ni seiyo. Ti yootthuneya opaka eyo okhala wira nthoonyeryo na wi nimmuroromela Yehova paahi.
6. Yiirin’he exeeni maKristau oopacerya iliivuru saya sa maxintta?
6 Muthokorerye yeele yaapanka aya maKristau oopacerya vaavo yaathanlalya aya weettela etiini yekeekhai. Biibiliya onihimya so: “Nave atthu akina anjene, yapaka maxitta òtakhala, yahiruha ilívuru saya, khupaha oholo w’atthu othene.”—Miteko 19:19.
7. Ninrowa wiira exeeni wakhala wi axetwani anonihaaxa?
7 Akina anipacerya omurumeela Yehova wa yaale yaari akelihiwene mookhwiri, mmwaawelo, aahiiso mmiteko sa maxintta waaniheryasa anoohaaxiwa ni axetwani. Vakhala wi eyo enimwiiraneya ni nyuwo, nvekele ni nsuu noorunya wa Yehova, muromolaka nsina nawe. Owo onimookhaliheryani.—Miruku 18:10; Yakobo 4:7.
8. MaKristau aniwoonela sai amuluku a ethiru, ni ilatarato, sa okokhorela woowoka?
8 Aniphavela omurumeela Yehova khantthuneya okhalana nnakhala waavarihela muteko amuluku a ethiru, aahiiso ilatarato, sa okokhorela woowoka. MaKristau eekeekhai ‘anetta mowamini, ohiya mwa itthu sowòneya.’ (2 aKorinto 5:7) Annittittimiha malamulo a Muluku anikhoottiha elatarato yotheene ya okokhorela.—Okhuma 20:4, 5.
Mwataaneke ni Arumeyi a Yehova
9. Yoolakiherya xeeni enivaha Biibiliya voohimya sa moota wookhala asuweli?
9 Biibiliya onihimya wira: “Onetta n’asuweli onokhala musuweli.” (Miruku 13:20) Naphavela okhala asuweli, nohaana weetta, aahiiso wataana, ni Anamoona a Yehova. Awosa arii mu ephiro eniroiha wookumini.—Mateyo 7:14.
10. Moota xeeni Anamoona a Yehova anikela aya wookhaliheryani omurumeela Muluku?
10 Anamoona annaathokorerya tthiri atthu akina. Muteko aya orii waakhaliherya anaxariya wiiwexexa ikeekhai sa Biibiliya siniroiha wookumini woohimala. Awosa anoowerya wookhaliheryani orweela mwa omusoma Biibiliya ni nyuwo, moohiliva etthu. Animwaakhula makoho anyu ni anowooniheryani moota woovarihela muteko eniixutta anyu mBiibiliyani mookumini mwanyu.—Yohani 17:3.
11. Munrowa okhaliheriwa sai mmithukumano sa eKristau?
11 Mmithukumanoni saya, moolimaleleya siniiriwa mapuro aniihaniwa Esalau y’Omwene, nyuwo munimwiixutta vanceene iphiro sa Yehova. Munrowa olipihiwa mu yoolakela anyu ya weettelaka etiini yekeekhai. Munimwaakhela-tho malakiheryo voohimya sa enamuna ya waakhaliherya akina wiixutta ikeekhai sa Biibiliya.—aHeberi 10:24, 25.
12. Moota xeeni ovekela onkela aya wookhaliheryani omurumeela Muluku?
12 Vaavo munrowa anyu ovikaniha wiixutta yotthuna ni yoolakela ya Yehova, moohaaniherya osiveliwa wanyu wa iphiro soophenteya sawe onimuncerereya. Vantthuneya-tho wuncererya yoophavela anyu ya omuhakalaliha ni osyaka ele ehimmuhakalaliha owo. Mupuweleleke wira nyuwo munoowerya omwaattamela Yehova mu nivekelo ni onvekela wi ookhaliheryeni opaka ele eri yookhalela ni osyaka ele eri yoohikhalela.—1 aKorinto 6:9, 10; aFilipi 4:6.
13. Munrowa ohakalaliha sai murima wa Yehova?
13 Moovira wa okathi, vaavo muninnuw’anyu momunepani, moohaaniherya munimoona otthuneya wa okhala Namoona oowivahererya, ni oobatiziwa a Yehova. Mwaha woowitakaaha ni arumeyi a Yehova, munoohakalaliha murima a Yehova. (Miruku 27:11) Munrowa okhala eriyari ya ale oohakalala mu yaawo Muluku onihimya awe wira: “Miyo kinokhala eríyari aya, kinimwetta ni yawo. Miyo kinokhala Muluku aya, n’awo anokhala atthu aka.”—2 aKorinto 6:16.
Sowiixuttiha sa Itiini—Sekeekhai ni Soowoka
● Oraru: Itiini sinceene siniixuttiha wira Muluku Oraru. Sinihimya wi “Tiithi orii Muluku, Mwaana [Yesu] orii Muluku, ni Munepa Wootteela orii Muluku, mwa sotheene kakhanle Amuluku araruu masi Muluku mmosaa.”
Biibiliya hataa vakhaani khonlavula nsuu na wi “Oraru,” nnakhala vakhaani khoniixuttiha wira Yehova orii atthu araruu mwa mmosaa. Yehova paahi tori Muluku. Ewarakha Yoopacerya ya aKorinto 8:6 enihimya so: “Masi wa hiyo Muluku ori mmosá pahi, Tith’ihu.” Yehova ti Mulupale. Yesu, kahiyo Muluku, masi “Mwana a Muluku.” (1 Yohani 4:15) Mmukhalelo mmosaru, munepa wootteela kahiyo Muluku. Munepa wootteela kahiyo-tho mutthu. Ikuruu soowerya sa Muluku.—Miteko 1:8; aEfeso 5:18.
● Erooho: Itiini sinceene siniixuttiha wira erooho etthu ehinikhwa eri muhina mwa mutthu. Biibiliya oniixuttiha wi erooho ti mutthu, mweephattu, mutthu onoowerya okhwa.—Maphattuwelo 2:7; Ezekiyeli 18:20.
● Omooroni: Itiini soowoka siniixuttiha wira irooho sa alipa-ootakhala sinoopopihiwa mahiku otheene omooroni. Biibiliya onihimya wi alipa-ookhwa “khansuwela-tho etthu.” (Musuweli 9:5) Biibiliya oniixuttiha-tho wira “Muluku ophentá.” (1 Yohani 4:8) Yehova, Muluku a ophenta, nnakhala vakhaani khaarowa wahaaxa atthu va mooroni.
[Makoho a Yoosoma]
Ekaaxa: Biibiliya oniixuttiha exeeni voohimya sa Oraru, erooho, ni omooroni?
Miyo Kootaphuwa mwa Axetwani
Ohiyu omosaa okathi waarupa aka vakhaamani ni iyaka, kaahiiwa nsuu nno niihanne nsina naka ikwaha tthaaru. Nuumala-vo kaahinweha namukattha othaleyaka, nto yaahikhuma etthu yaalikana ni bola a mooro, emorelaka veerukuluni vaka. Mweephattu, iyaka khaawen’he itthu iyo. Mwa sotheene, etthu eyo yaahikiwereya ekipahaka vaalupale, nto eyo yaahivikaniha miyeeri sinceene.
Miyeeri mithanu ni mmosaa vattuli vaya, nsuu nne naahikiihana-tho. Moowaakuveya, empa yotheene yaakhala ntoko yaarowa omiryeya ni maasi. Enowa yulupale yaahikhumelela vamaasini ni yaahiivitikeelela mmatatani mwaka. Keerenrye mahala otatha wira ekhumee. Kaahoopopiheya. Nuumala-vo maasi ni enowa yaahimalamala, ni miyo kaahiriheliwa vathii vootakhala-vo. Kaahikhwa nrurumuwa iwoora sinceene. Nuumala-vo nsuu nne naakilenle wira kirowe empa ya onammunepani ya mukulukhana mmawaani. Vaavo kaakon’haaka nsina na munepa ole, owo aakilenle nsina nintaphulela “namakhalana muhakhu masi ohikhalana anamwane.” Aakilipihenrye okithaaciriha orweela mwa owerya wa waavoniha atthu.
Aretta a mipantta sotheene yaarwa wa miyo. Ahinatthi ophiya owannyaka, yaanikhumelela muxipeelyuni ya vameekh’aya yaarina naka. Nuumala-vo, vaavo aaphiya awe mmosaa a yaawo, miyo kaamaniha ntata naka ni ntata nawe mutthu owo, nto mukhalelo wa eretta awe aahiiso wa muxankiho awe vamosaa ni murette moohilokela kaanleeliwa. Munepa owo waanikileela-tho esisapo ya musurukhu waarowa aya oliva atthu awo.
Miyo kaanaakhela musurukhu munceene ni soovahiwa mwaha wa ovoniha waakhumelela saana waawery’aka opaka. Kaahikhala tthiri “namakhalana muhakhu,” masi-tho kaahiiwexexa yootaphulela ya “ohikhalana anamwane.” Ekwaha yotheene yaamuyaraka mwaana, mwanaka ootthareliwa aanikhwa. Eyo yaari yoowereya vanceene. Mu iyaakha soophiyeryaka 12 kaarumeela aka munepa ole, anaaka athanu ni mmosaa ahookhwa.
Kaahipacerya onvekela Muluku wira okikhaliherye. Miyo kaanivekela mooluttuweliwa. Nihiku nimosaa Anamoona a Yehova yaahimana mukhora aka. Moolimaleleya kanwoomola, masi nihiku nne kaahilakela waawiriyana. Mu ovaanela waattharelanne, kaahiphiyerya osuwela wira miyo kaamurumeela xetwani! Kaahilakela ohiya onammunepani.
Vaavo kaahimmya aka eyo wa munepa ole, owo waahikilopola wi owo aari moovirikana ni yoothanla aka. Masi, miyo kinre: “Nkimphavela okhalana etthu ni nyuwo.”
Kaahipaha itthu sotheene saavarihela aka muteko wira kaaxerye ehako. Kimusoma Biibiliya ni Anamoona, kikhala murumeyi a Yehova, nto kaahibatiziwa mwaakha wa 1973. Vano kirina anamwane athanu a mukhalelo wooloka. Iyaka ookhala-tho Namoona a Yehova oobatiziwa.—Elavuliwe ni Josephine Ikezu.
[Makoho a Yoosoma]
Ekaaxa: Mu enamuna xeeni muthiyana mmosaa iitaphunlya awe mu axetwani?
[Ilatarato epaaxina 26]
Munrowa weettela sai okokhorela wekeekhai?