“Wira Nyuwo Muheehereriwee”

“Vikanihani okhala ooweha-weha ni nvekeleke moohihiyererya wira nyuwo muheehereriwee”.​—MATHEYO 26:41, NM.

MUXANKIHO waari muulupale—ovikana muxankiho otheene aatonko awe okumana. Yesu Kristu, Mwaana a Muluku, aahaattamela wanikisa wa okumi awe vathii-va. Yesu aahisuwelexa wira moohipisa aarowa otthukweliwa, wiiviwa, ni okhomeliwa vanivattani na nihaaxeryo. Owo aahisuwela wira yoothanla eri yotheene ni sowiira sawe saarowa ohapuwela nsina na Tiithi awe. Nave-tho Yesu aahisuwela wira yoolipelela ya okumi wa muhoolo w’apinaatamu yaari va yowoopiha. Okumanaka ni muxankiho ola otheene, Yesu aapanke exeeni?

² Yesu ni awiixutti awe yaahirowa ojardim wa oJeseemani. Nna naari nipuro noomusivela Yesu. Iwe owo aahirowa nipuro noorakamelana vakhaani ni awiixutti awe. Ori mekhawe, owo aahaavekela ikuruu aTithi awe a wirimu, ohimyaka mu nivekelo ele yaari vamurimani vawe—ohiya ekwaha emosaa paahi, masi ikwaha tthaaru. Nnaamwi aari oohittheka, Yesu khoonale wira aari oowerya ovilela mwa ikuruu sawe.​—Matheyo 26:36-44.

³ Olelo va, hiyo-tho nrii vathii va muxankiho. Wanipacerya wa ebroxura ela, noothokorerya itthu sinooniherya wira ninkhala wanikisa wa mukhalelo ola wootakhala. Soweeha ni soothananiha sinikumiheriwa ni elapo ya Satana sinootepa wuncerereya. Soothanla ni sowiira sahu ntoko atthu anihimya omurumeela Muluku eekeekhai, sinnihapuwela nsina na Muluku ni sookhalana yookhumelela yuulupale wa hiyo mu yoolipelela ahu ya okumi wa muhoolo mu elapo awe esyaa. Hiyo ninnimphenta Yehova. Hiyo nimphavela ‘ovilela mpakha wanikisa’—wanikisa wa okumi ahu aahiiso wanikisa wa mukhalelo ola, moovarihana ni ele enipacerya orwa. (Matheyo 24:13) Masi ninrowa owerya sai okhalana mukhalelo woowiixaakuviha ni ovikaniha okhala ooweha-weha?

⁴ Yesu osuwelaka wira awiixutti awe a eseekulu yoopacerya—ni ale a olelo va—yaarowa okumana mixankiho, aatumerenrye wira: “Vikanihani okhala ooweha-weha ni nvekeleke moohihiyererya wira nyuwo muheehereriwee”. (Matheyo 26:41, NM) Masuu awo anitaphulela exeeni wa hiyo olelo va? Yoweeha xeeni enikumana anyu? Nto moota xeeni munrowa anyu ‘ovikaniha okhala ooweha-weha’?

Weehereriwa Wira Mpake Exeeni?

⁵ Khuta nihiku, otheene ahu ninnikumana ni yoweeha wira nimorele “mirakho sa Satana”. (2 Timótheyo 2:26) Biibiliya onninlopola wira yoolukama yuulupale ya Satana t’ale animukokhorela Yehova. (1 Pedru 5:8; Wisupulula 12:12, 17) Ni yoophavela xeeni? Khahiyo oniphavela oniiva. Satana khonrowa ophwanya etthu akhala wira ninkhwa oororomeleya wa Muluku. Satana oosuwela wira Yehova, mu okathi Awe, onrowa omaliha okhwa orweela mwa ohihimuxiwa.​—Luka 20:37, 38.

⁶ Satana oniphavela ohonona etthu ya esisapo yuulupale yeeyo enivikana okumi ahu ola wa olelo—ororomeleya wahu wa Muluku. Satana oniphavela onihiiha omukokhorela Yehova. Vanonto, akhala wira nnookhala oohiroromeleya—nnahiya olaleerya ihapari sooreera aahiiso ohiya weettela malamulo a eKristau—eyo enrowa okhala oxintta wa Satana! (aÉfeso 6:11-13) Siiso ‘Mulipa-òwehererya’ onnikuha soweeha ohoolo wahu.​—Matheyo 4:3.

⁷ ‘Olavilavi’ wa Satana ti woovirikana. (aÉfeso 6:11) Owo pooti oneehererya wira niphavelaseke mihakhu, woova, ohoverya aahiiso ophavela soohakalaliha sa werutthuni. Masi ephiro emosaa yuulupale yeeyo enimwiiriha Satana okhumela saana ti ovololiheya. Ntoko mutthu onittottela muraarelo, owo oosuwela wira ovololiheya pooti ontteettheiha momunepani, onimoroxerya va yoweeha. (Miruku 24:10) Mwa vameekh’aya vaavo vanikhala ahu ‘ookhulumuwa’, owo onnineehererya wira nooceye.​—Esalimo 38:9.

⁸ Vaavo vaniphiy’ahuxa wanikisa wa mahiku ookiserya, vanooneya wira ovololiheya onootepa wuncerereya, nto hiyo-tho pooti ovololiheya. (Nwehee ekaaxa enii “Itthu Sikina Seiyo Sinikumiherya Ovololiheya”.) Moohithokorerya ele eniiriha okhala oovololiheya, ovololiheya onoowerya otteettheiha ororomeleya wahu. “Mphwanye murerelo w’okathi orinanyu”, wira mwaakhwaniherye miritti somunepani—ntoko omusoma Biibiliya, orowa omithukumanoni sa eKristau, ni olaleerya—pooti woona okhala vooxankiha akhala wira murii ookhulumuwa werutthuni, mmuupuweloni, ni mukhalelo anyu. (aÉfeso 5:15, 16) Muupuweleke wi Satana omphavela wira mooceye. Masi ola khahiyo okathi wootteettheya aahiiso oyeleela osuwela wanyu wira ninkhala okathi wookiserya! (Luka 21:34-36) Nyuwo munrowa owerya sai okhoottela yoweeha ni ovikaniha okhala ooweha-weha? Muthokorerye malakiheryo maxexee yaawo anrowa wookhaliheryani.

“Nvekeleke Moohihiyererya”

⁹ Mmuroromeleke Yehova orweela mu nivekelo. Muupuweleke ntakiheryo na Yesu mujardim ya oJeseemani. Oriipiwe ene murima vanceenexa, Yesu aapanke exeeni? Owo aahiveka moolipiherya nikhaliheryo na Yehova, nto ‘khuretthela ntoko mattonttoni èphome, animorela vathí’. (Luka 22:44) Nkahaya muupuwelele ela. Yesu aanimusuwela saana Satana. Yesu aahiweha ori wirimu soweeha sotheene sa Satana ni wiimananiha wawe wira aavare arumeyi a Muluku. Mwa sotheene, Yesu khoonale wira vaarowa okhala vookhweya onvikana Satana vaavo vaarowa awe omweehererya. Akhala wira Mwaana oohittheka a Muluku aahoona okhala vootthuneya ovekela okhaliheriwa ni Muluku, vaatepa nto hiyo, ti vootthuneyexa ovekela okhaliheriwa!​—1 Pedru 2:21.

¹⁰ Nave-tho, muupuweleke, nuumala waatumererya awiixutti awe wira ‘avekeleke moohihiyererya’, Yesu aahimmye so: “Nto munepa onniphavela, masi erutthu ti yootteettheya”. (Matheyo 26:41, NM) Yesu aahimya erutthu xeeni? Tthiri khahiyo erutthu awe; erutthu ya Yesu yoohittheka khiyaatteetthen’ye. (1 Pedru 2:22) Masi mukhalelo wa awiixutti awe waari woovirikana. Awiixutti awe yaatthuneya okhaliheriwa wira akhoottele yoweeha, mwaha wa oyariwa oottheka ene ni okhalana muupuwelo woottheka. (aRoma 7:21-25) Ti nthowa naya aatumerenrya awe awiixutti awe—ni otheene yaale yaarowa okhala maKristau eekeekhai—wira avekeleke okhaliheriwa yaakumanaka ni yoweeha. (Matheyo 6:13) Yehova onnaakhula mavekelo awo. (Esalimo 65:3) Mweephiro xeeni? Mu iphiro piili.

¹¹ Ephiro yoopacerya. Muluku onninikhaliherya osuwela soweeha. Soweeha sa Satana sinilikana ni miraakho sireiwale ephiro yeepiphi. Akhala wira nyuwo khimuniweha, nto munoowerya ohomphwa. Omurumeelaka Biibiliya ni iliivuru sa Biibiliya, Yehova onnuupulula soweeha sa Satana, wira niwerye osyaka omorela va yoweeha eyo. Moovira wa iyaakha, iliivuru ni mithukumano suulupale ni mithukumano sa muttetthe, mootthikela-tthikela sinniniwaraaliha voohimya sa sowoopiha iyo ntoko omoova mutthu, orupihana woohiloka, ophenta muhakhu, ni soweeha sikina seiyo Satana sinikuha awe ohoolo wahu. (Miruku 29:25; 1 aKorinto 10:8-11; 1 Timótheyo 6:9, 10) Nyuwo khamunimuxukhurela Yehova mwaha wa onsuweliha olavilavi wa Satana? (2 aKorinto 2:11) Soolopola iyo sotheene orii waakhuliwa wa mavekelo anyu a ophavela okhaliheriwa wira mukhoottele yoweeha.

¹² Ephiro ya nenli. Yehova onnaakhula mavekelo ahu onivahaka ikuruu wira nivilele yoweeha. Nuulumo nawe nnihimya wira: “Muluku . . . khanihiya wira mwehereriwe ovikana ikuru sanyu. Okathi onehereriwanyu, Muluku onimovahani ikuru sinweryananyu ovilela n’uxintta”. (1 aKorinto 10:13) Muluku khonkhala-khala eemereryaka wira yoweeha evikane owerya wahu nihinakhalana ikuruu somunepani wira nikhoottele—akhala wira nnoovikaniha omuroromela. Moota xeeni sinrowa awe ‘onivaha ikuru sinweryanahu ovilela’? Owo ‘onimwaavaha munepa wootteela otheene yaale aninvekela’. (Luka 11:13, NM) Munepa owo pooti onikhaliherya wuupuwelela soolepa sa Biibiliya seiyo sinwerya olipiha yoolakela ahu ya opaka eri yooloka ni onikhaliherya opaka soothanla sa miruku. (Yohani 14:26; Yakobo 1:5, 6) Munepa owo onoowerya onikhaliherya wooniherya mikhalelo sinitthuneya ahu wira niwerye oxintta muupuwelo woohiloka. (aGalasia 5:22, 23) Munepa wa Muluku pooti-tho owiiriha oororomela akhw’ihu okhala ‘oonihakalaliha vanjene’. (aKolosi 4:11) Nyuwo khamunimuxukhurela Yehova mwaha woowaakhula mavekelo anyu orumeelaka iphiro iyo sinooniherya ophenta?

Mukhalane Muupuwelo Ooloka mu Soowehererya Sanyu

¹³ Wira nivikanihe okhala ooweha-weha, hiyo nintthuneya okhalana muupuwelo ooloka mu soowehererya sahu. Mwaha wa mixankiho sa okumi, ikwaha sikina otheene ahu ninnikhulumuwa. Masi nohaana wuupuwelela wira Muluku khonalakele wira naarowa okhalana okumi woohikhala ni mixankiho mmukhalelo ola wa olelo. Hataa okathi wa mBiibiliya, arumeyi a Muluku yaahikumana ni sooxankiha, sinihela muhina olupatthiwa, ohaawa, oriipiwa murima, ni iretta.​—Miteko 8:1; 2 aKorinto 8:1, 2; 1 aTesalonika 5:14; 1 Timótheyo 5:23.

¹⁴ Olelo va, nookhalana-tho mixankiho. Hiyo pooti olupatthiwa, okhalana soothananiha sa musurukhu, owanana ni oriipiwa murima, owereiwa, ni ohaawa moota mukina. Vaakhanle wira Yehova onninaakiherya mwa mutikiniho mu sootakhala sotheene, khivaarowa onvaha Satana muraarelo wira omunyohole Yehova? (Miruku 27:11) Yehova onneemererya tthiri wira arumeyi awe yeehereriwe ni ottehattehiwa, ikwaha sikina anniphiyerya okhwa mwaha wa mwiirelo wa anyokhani.​—Yohani 16:2.

¹⁵ Nto, exeeni Yehova elakenly’awe? Ntoko soonalya ahu ottuli, Yehova onrowa onivaha ikuruu wira niwerye ovilela yoweeha eri yotheene khino enikumana ahu, akhala wira mwekeekhai ninnimuroromela owo. (Miruku 3:5, 6) Orumeelaka Nuulumo nawe, munepa awe, ni mulokiheryo awe, onninaakiherya momunepani, onikhaliheryaka okhapelela wataana wahu n’uwo. Nakhalana wataana iwo, pooti nikhw’aka, hiyo nnooxintta. Khiivo—hataa okhwa—eniwerya omukhoottiherya Muluku wira waatthuvele arumeyi awe oororomeleya. (aHéberi 11:6) Nto mu elapo esyaa yaattamenle, Yehova onrowa owaakhwaniherya anatiri awe otheene ooloka ni waareeliha yaale animphenta owo.​—Esalimo 145:16.

Muupuweleke Miyaha Iye Suulupale

¹⁶ Wira nivilele mpakha wanikisa, hiyo nohaana wuupuwelela miyaha sootthuneya seiyo sinihela muhina nthowa naya Muluku oneemererya awe otakhala. Akhala wira ikwaha sikina mixankiho sahu sinooneya okhala suulupale nto khinaneehererya otthikela ottuli, ti vooloka wuupuwelela mmensihu wira Satana oovaanyiha ophwanelela wa olamulelo wa Yehova. Satana aahivaanyiha-tho akhala wira animurumeela Muluku animooniherya wiivahererya ni ororomeleya. (Yobi 1:8-11; 2:3, 4) Miyaha iyo suulupale ni ephiro yeeyo Yehova ethanlaly’awe wira ophuke sinnivikana otthuneya wa ikumi sahu. Moota xeeni?

¹⁷ Mwaha wa Muluku weemererya mixankiho mu okathi vakhaani, ohaavaha atthu akina okathi wira yeemererye ekeekhai. Muupuwele ela: Yesu aahihaawa wira niwerye okhalana okumi. (Yohani 3:16) Hiyo khinnixukhurela nto? Niireke wira hiyo ninniphavela ovilela mixankiho okathi woopisa vakhaani wira atthu akina nlelo awerye ophwanya okumi? Wira nivilele mpakha wanikisa, hiyo nohaana osuwelexa wira miruku sa Yehova ti suulupale ovikana sawihu. (Yesaya 55:9) Owo onrowa omaliha otakhala, okathi yoowo onoona awe okhala wooreerela wira ophuke moomalela miyaha iyo suulupale ni moophavela okhala wahu saana woohimala. Nto, vaamukhala ophuka moota mukina? Muluku ta xariya!​—aRoma 9:14-24.

““Mmwattameleke Muluku”

¹⁸ Wira nivikanihe okhalana mukhalelo ahu woowiixaakuviha, hiyo nohaana omwaattamela Yehova. Nihikhala-khalee niliyalaka wira Satana onipaka wiimananiha wuulupale wira ohonone wataana wahu ni Yehova. Satana aaniphavela onikupaliha wi wanikisa khonkhala-khala orwaaka, ni wira mahala ene olaleerya ihapari sooreera ni okhalaka moovarihana ni malamulo a Biibiliya. Masi Satana “mulipa-òwotha ni tithi a wothá”. (Yohani 8:44) Hiyo nohaana okhala oolakela wira ‘nimukhottele Satana’. Nihikhala-khalee noonelaka wataana wahu ni Yehova okhala ntoko etthu ehirina efaita. Biibiliya moophenta onninleela wira: “Mmwattameleke Muluku: Muluku onowattamelani”. (Yakobo 4:7, 8) Ninrowa omwaattamela sai Yehova?

¹⁹ Wuupuwelela ni nivekelo ti wootthuneya. Vaavo mixankiho sa okumi vanooneya aya okhala suulupale, mmuhimeerye Yehova ele eri vamurimani vanyu. Ovekela wanyu wakhala wooluluwanya, vanookhweya woona waakhuliwa waya. Ikwaha sinceene waakhuliwa wanyu pooti ohirwa ntoko saapuwela anyu, masi akhala wira yoophavela anyu erii omuttittimiha ni ovikaniha okhala oororomeleya, owo onrowa wookhaliheryani wira nwerye ovilela mookhumela saana. (1 Yohani 5:14) Vaavo vanoona anyu ohoolela wawe okumi anyu, nyuwo munrowa omwaattamelaka owo. Osoma ni wuupuwelela saana mikhalelo ni iphiro sa Yehova, ntoko suupululiwa aya mBiibiliya, ti wootthuneya-tho. Wuupuwelela iwo onimookhaliheryani omusuwela saana Yehova; olipiha murima anyu ni wiixeriha omphenta wanyu. (Esalimo 19:14) Nto ophenta iwo, ovikana etthu ekina, onrowa wookhaliheryani okhoottela yoweeha ni ovikaniha okhala ooweha-weha.​—1 Yohani 5:3.

²⁰ Wira nivikanihe omwaattamela Yehova, ti wootthuneya-tho wa hiyo wira nikhalee oowaattamelana ni oororomela akhw’ihu. Mwaha ola onrowa olavuliwa mpantta wookiserya wa ebroxura ela.

MAKOHO A YOOSOMA

• Yesu aapanke exeeni okathi wa oxanka wawe wuulupale wanikisa wa okumi awe, nto aatumerenrye awiixutti awe wira apake exeeni? (Ittima 1-4)

• Nthowa xeeni arumeyi a Yehova ary’aya yoolukama yuulupale ya Satana, nto onirumeela iphiro xeeni wira oneehererye? (Ittima 5-8)

• Wira nikhoottele yoweeha, nthowa xeeni nintthuneya ahu ovekela moohihiyererya? (Ittima 9-12) Ni okhalana muupuwelelo wooloka wa soowehererya sahu? (Ittima 13-15) Ni wuupuwelela miyaha suulupale? (Ittima 16-17) Ni ‘omwaattamela Muluku’? (Ittima 18-20)

[Ekaaxa/eri epaaxina 25]

Itthu Sikina Seiyo Sinikumiherya Ovololiheya

Ekumi aahiiso wuuluvala. Naahaawaka vale ni eretta ehinimala aahiiso wuuluvala weiwo oniniiriha ohivara etthu, murima ahu pooti okhala oowiiniwa mwaha woowi khinniwerya opaka sinceene mmuteko wa Muluku.​—aHéberi 6:10.

Ovololiheya. Hiyo pooti otemwa akhala wira atthu vakhaani taniwiriyana, wiimananiha wahu olaleerya Nuulumo na Muluku.​—Miruku 13:12.

Wiixoona ohikhala etthu. Akhala wira mutthu onivira iyaakha sinceene ohaaxiwaka, mutthu owo, mulopwana aahiiso muthiyana, pooti woonaka wira khoniphentiwa, hataa ni Yehova.​—1 Yohani 3:19, 20.

Okhumuliheya. Akhala wira mutthu ookhumulihiwa ni muKristau mukhw’awe, owo pooti oxankiheya muupuwelo, otthokihaka wira munnawe owo oniphavela omuhiiha orowa omithukumanoni sa eKristau aahiiso ovara muteko woolaleerya.​—Luka 17:1.

Olupatthiwa. Ale ahikhanle anamoona pooti woonyokhani, woolupatthani, aahiiso woonyoholani.​—2 Timótheyo 3:12; 2 Pedru 3:3, 4.

[Elatarato eri epaaxina 26]

Yesu onnintumererya wira ‘nivekeleke moohihiyererya’ wira nikhaliheriwe owanana yoweeha