Nsina na Muluku, Ovariheliwa Waya Muteko ni Yootaphulela Aya

ESALIMO 83:18, etaphuleliwe sai mBiibiliyani mwanyu? Tradução do Novo Mundo das Escrituras Sagradas, eversiikulu eyo etaphuleliwe so: “Wira atthu asuwele wi nyuwo, nsina nanyu ti Yehova, nyuwo paahi ti mukhanle a Vasuluxa a elapo yotheene”. Otaphuleliwa wa aBiibiliya akina, onnilikana ni masuu awo. Masi aBiibiliya anceene, nsina noowi Yehova nookumihiwa nranttelihiwa ni mwiihanelo oowi “Apwiya” aahiiso “Oohimala”. Nto masuu xeeni anireerela okhala eversiikulu ela? Niireke wira vanireerela okhala mwiihanelo oowi Apwiya aahiiso nsina noowi Yehova?

Eversiikulu ela enilavula sa nsina. Mu eversiikulu ela, aBiibiliya anceene yaawo alempwale erumeeliwaka elavulelo ya eHeeberi ya khalai, nookhala nsina nno na vameekh’aya. Elavulelo ya eHeeberi, nsina nno ninlempwa so יהוה (YHWH). Elavulelo ya Emakhuwa, nsina nno nintaphuleliwa “Yehova”. Niireke wi nsina nno nimphwanyaneya eversiikulu emosaa paahi mBiibiliya? Nnaari. Soolempwa sa khalai sa eHeeberi, nsina nno ninniphwanyaneya ikwaha sowiiraka 7.000!

Niireke wira nsina na Muluku ti nootthuneya? Nkathokoreryani nivekelo na ntakiheryo nenno Yesu Kristu aavanha awe. Nivekelo nno nimpacerya so: “Tith’ihu, muri wirimu! Nsina nanyu nivuwihiwe”. (Matheyo 6:9) Valokenle ene, Yesu aahivekela wa Muluku oriki: “Tithi, nvuwihe nsina ninyu!”. Olavulaka ori wirimu, Muluku aakhunle so: “Kovuwiha, nave kinovuwiha-tho”. (Yohani 12:28) Tthiri, nsina na Muluku ti nootthuneya vanceene. Vanonto, nthowa xeeni anamataphulela akina a Biibiliya vakuminha aya nsina nna, khirantteliha ni mwiihanelo mukina?

Vanikhala ntoko wira varii mathowa manli. Nthowa noopacerya, anamunceene anihimya wira nsina nno nihirumeeliweke okhala wira moota saaromoliwa aya khalai, khuuvo onsuwela olelo va. Elavulelo ya khalai ya eHeeberi, khiyaalempwa ni ivokaali. Tivonto, khuuvo olelo va, onsuwela oratteene moota atthu a okathi wa Biibiliya yaaromola aya nsuu YHWH. Nto, niireke wira ela yohaana onikhoottiherya orumeela nsina na Muluku? Okathi wa Biibiliya, nsina na Yesu, pooti wira naaromoliwa so: Yexuwa aahiiso Yehoxuwa, nto khuuvo onwerya osuwelexa moota saaromoliwa aya. Hataa vari siiso, atthu mulaponi motheene olelo va, annirumeela nsina na Yesu mu iromolelo soovirikana, aromolaka moovarihana ni elavulelo aya. Hataa awo ahisuwelaka moota saaromoliwa aya mu eseekulu yoopacerya, khanoovelela orumeela nsina nno. Moolikanasa, vaakhanleke wira muronwee elapo ya okhopela, erina elavulelo ekina, nyuwo mwaarowa woona wi nsina nanyu ninromoliwa ni masuu oovirikana. Tivonto, ohisuwela moota khalai saaromoliwa aya nsina na Muluku, khahiyo nthowa noohirumeelaka nsina nno.

Nthowa na nenli ikwaha sinceene ninthoonyiwa okhala mwaha wiirinhe okumihiwa nsina na Muluku mBiibiliyani, muhapo wa khalai aaYuda. Anamunceene aaYuda yaakupali wira nsina na Muluku khinaatthuneya oromoliwaka. Yookupali ela, mowooneya enikhuma mu ovariheliwa muteko moohiloka nlamulo na Biibiliya, nenno ninhimya so: “Muhiromolé nsina n’Apwiya, Muluku anyu, vethiru walá mothaka, okhala wira kinomuttaruxa ole onromola nsina naka vethiru walá ahimyaka sowotha”.—Okhuma 20:7.

Nlamulo nna naakhoottiha orumeela nsina na Muluku moohiloka. Masi, niireke wi yaakhoottihiwa yaari oromola nsina nawe mmukhalelo wooloka? Nnaari. Alipa-oomulepa Biibiliya a eHeeberi (“Watàna wa Khalai”), yaari atthu oororomeleya, yaakhala moovarihana ni Nlamulo nenno Muluku naavanha awe anaIsarayeli a khalai. Tivonto, ikwaha sinceene awo yaanirumeela nsina na Muluku. Mwa ntakiheryo, awo yaahihela nsina nno muhina mwa isalimo sinceene seiyo siipa aya moorunya eriyari ya anamakokhorela anceene. Hataa Yehova Muluku aahaaruma anamakokhorela awe wira aromoleke nsina nawe, nto ale yaari oororomeleya yaaniiwelela. (Yoweli 3:5; aRoma 10:13) Tivonto, olelo va, maKristau khanoovelela orumeela nsina na Muluku mwa nttittimiho, ntoko Yesu siiraly’awe tthiri.—Yohani 17:26.

Mwaha woowi alipa-oomutaphulela Biibiliya annirantteliha nsina na Muluku ni mwiihanelo mukina, awo annittheka vaalupale. Annimwiiriha Muluku okhala oorakamela ni ohirina mikhalelo. Moovirikana ni vo, Biibiliya onnaaleela apinaatamu wira: “Muluku onnìvahererya w’ale animphenta”. (Esalimo 25:14) Nkahaya mmuupuwele mpatthani inyuxa. Tthiri mwaarowa omulimalela sai muhisuwelaka nsina nawe? Moolikana mmo, vaavo atthu vahinsuwela aya nsina na Muluku, Yehova, tthiri awo anrowa omwaattamela sai Muluku? Ohiya vo, vaavo atthu vahinirumeela aya nsina na Muluku, awo-tho anniyeleela osuwela yootaphulela yooreera ya nsina nno. Nto nsina na Muluku nintaphulela exeeni?

Muluku mwaneene aahimuleela murumeyi awe oororomeleya Moise, yootaphulela ya nsina nawe. Vaavo Moise vaakonha awe nsina na Muluku, Yehova aamwaakhunle so: “Kinrowa ottittimiherya okhala ele enrowa aka ottittimiherya okhala”. (Okhuma 3:14, NM) Biibiliya otaphuleliwe ni Rotherham, masuu awo arii so: “Kinrowa Opakeya Okhala etthu yotheene enkihakalaliha”. Tivonto Yehova onoowerya opakeya okhala etthu yotheene enitthuneya wira aakhwaniherye soolakela sawe.

Mwaarowa opaka exeeni vaakhanleke wi nyuwo munniwerya opakeya okhala etthu enitthuneya? Mwaarowa opaka exeeni wa apatthani inyu? Akhala wira mmosaa aapatthani inyu onniwereiwa vaalupale, nyuwo mwanwerya okhala totoro wira munvonihe. Akhala wira mpatthani inyu mukina opweteiwale musurukhu, nyuwo mwanwerya opakeya thaaciri mphavelaka omukhaliherya. Masi, ekeekhai ti yoowi, nyuwo khamunwerya opaka itthu sotheene siniphavela anyu. Otheene ahu khaninwerya. Nto vaavo vanimwiixutta anyu Biibiliya, nyuwo munrowa otikinihiwa woona moota Yehova siniwerya awe opakeya okhala etthu yotheene enitthuneya wira aakhwaniherye soolakela sawe. Nto Yehova onnisiveliwa orumeela ikuruu sawe wira aakhaliherye ale animphenta. (2 Wahala a Mamwene 16:9) Ale ahinsuwela nsina nawe, anniyeleela osuwela mikhalelo iya sooreera sa Yehova.

Tthiri, nsina Yehova nohaana orumeeliwaka mBiibiliyani. Osuwela yootaphulela aya ni orumeela mohoovelela mu okokhorela wahu, sirii sookhaliherya sinnivaha ikuruu wira nimwaattameleke Tiith’ihu a wirimu, Yehova.a

[Footnote]

[Picture on page 195]

Malepeliwo a nsina na Muluku mu eHeeberi