MURU 18
“Nyuwo Mukitthareke”
1-3. (a) Moota xeeni Yesu aahin’ye awe arummwa awe, ni nthowa xeeni olaxerya iwo wahaakhanle aya okathi wooriipiha murima? (b) Nthowa xeeni nintthuneya ahu wiixutta voohimya sa okumi wa Yesu nuumala okhuma valaponi?
ATTHU muloko ni mmosa arimweemela hoothe vamwaako. Moophenta ni moottittimiha vanceene, awo aninweha mulopwana a namuloko nenli. Nnaamwi orina ene erutthu ya opinaatamu, tthiri owo ti Yesu yoole ohihimuxiwe, nto ootthikela okhala ooweryexa eriyari ya malaikha a Yehova. Yesu ohaathukumanya arummwa awe wira akumane n’uwo Omwaako Olivera, ekwaha yookiserya.
2 Mwaako ola wa Olivera, yoowo onikhala okhopela wa Ekhato ya Keduroni, oYerusalemu, tthiri onnimuupuxerya Yesu itthu sinceene. Mukerekhere wa mwaako ole, onniphwanyaneya muttetthe wa oBethania, weiwe Yesu aamuhihimunxe awe Laazaro. Isumana vakhaani ottuli, Yesu aahikela muYerusalemu mmukhalelo woovuwa, okhumaka muttetthe wowaattamela wa oBethifage. Waaniheryasa, Mwaako wa Olivera waakhala ojardim ya oJeseemani, opuro yoole Yesu aavirinhe awe okathi wootepa oxankiha ohinatthi ovariwa. Vano, nipuro nenna-tho, Yesu onniilokiherya wira aahiye apatthani awe aaphenta awe vanceenexa, vamosa ni atthareli awe. Onnaalaxerya olavulaka moolumo ooreera. Nto onnipacerya orowa osulu! Arummwa annihala yeemenle ene vathi, anwehaka Pwiya aya yamphenta aya, vaavo vaniwela awe wiirimu. Wanikisa waya, meeku annimukhuneela Yesu, vano arummwa ale khaninweha-tho.—Miteko s’Arummwa 1:6-12.
3 Niireke wira yowiiraneya eyo eniwiirihani wuupuwelaka wira okathi ole waari wooreera, nave-tho woothananiha, aahiiso olaxerya wooriipiha murima? Nnaari. Ntoko malaikha manli aniwuupuxerya aya vano arummwa, tthiri muteko wa Yesu nlelo khomanle. (Miteko s’Arummwa 1:10, 11) Mmikhalelo sinceene, orowa wiirimu Yesu, ti wanipacerya wa muteko awe. Nuulumo na Muluku ninninleela ele moottharelana yaamwiiranenle Yesu. Ti vootthuneya wiixutta voohimya sa okumi wa Yesu nuumala okhuma valaponi. Nthowa xeeni? Muupuweleke masu Yesu aamuhimenrye awe Pedru oriki: “Nyuwo mukitthareke”. (Yohani 21:19, 22) Hiyo nohaana wiiwelela yooruma eyo, ohiya ntoko yoothanla ya okathi vakhaani paahi, masi ntoko mweettelo ahu wa okumi. Wira nipake eyo, hiyo nohaana osuwela ele Pwiya ahu onipaka awe vano, ni miteko sivahiwe awe wiirimu.
Okumi wa Yesu Nuumala Okhuma Valaponi
4. Biibiliya oonihenrye sai vahinatthi ele yaarowa wiiraneya wiirimu nuumala Yesu otthikela?
4 Biibiliya khonitthokiherya etthu voohimya sa ophiya wa Yesu wiirimu, waakheliwa wawe, ni okumana wawe wootteeliha murima ni Tiithi awe. Masi, Biibiliya aahihimya vahinatthi ele yaarowa wiiraneya moohipisa nuumala Yesu otthikela wiirimu. Mu okathi woovikana iseekulu 15, ikwaha sinceene aYuda yaaniweha niira noottittimiheya. Nihiku nimosa khuta mwaakha, mukhulupale aanamukuttho aanikela Nipuro Nowaaryexa na empa ya Muluku, wira ayiiherye ohoolo wa ekaaxa ya nivarihano, ephome ya mwaamunama onivahiwa ntoko mukuttho Nihiku na Ottipiha Soottheka. Nihiku nne, mukhulupale aanamukuttho aamuthoonyerya Mesiya. Nuumala otthikela wiirimu, Yesu ohaakhwaniherya yootaphulela ya eprofesia ya niira nna ekwaha emosa paahi. Yesu aahikela nipuro noovuwa na Yehova wiirimu, eyo piiyo, nipuro nowaaryexa na olumwenku wotheene, ni aahiroiha wa Tiithi awe esisapo ya mukuttho awe wowoopola. (aHéberi 9:11, 12, 24) Niireke wira Yehova aaheemererya?
5, 6. (a) Etthu xeeni enooniherya wira Yehova aaheemererya mukuttho wowoopola wa Kristu? (b) Tani anittottela mureerelo yowoopola eyo, ni moota xeeni?
5 Hiyo ninniphwanya waakhuliwa wa nikoho nri vasulu-vo, nathokorerya ele yiiranen’ye mahiku vakhaani nuumala Yesu orowa wiirimu. Ekrupu yaamukhaani ya maKristau oowiiraka 120, yaahithukumana oYerusalemu vasaala yaari osulu, nto mootutuxerya waahiiwanyeya onyakula waalikana ni epheyo yoopa n’ikuru, weiwo waasaren’ye esaala ele. Yaahikhumelela ntoko malumi a mooro emmorelaka khuta mmosa vamuru, nto otheene aya yaahisareya munepa wootteela, khipacerya olavula mattaava oovirikana. (Miteko s’Arummwa 2:1-4) Yowiiraneya ela yaataphulela oyariwa wa nloko nsya, Isarayeli oomunepani, nenno naari “nloko [nsya] nothanliwa” ni Muluku, ni “nloko n’anamukuttho a mwené” wira naakhwaniherye yootthuna ya Muluku valaponi. (1 Pedru 2:9) Mowooneya, Yehova Muluku, aaheemererya ni aahikupali mukuttho wowoopola wa Kristu. Oyiihiwa wa munepa wootteela, yaari mareeliho oopacerya, yaawo yaaweryanen’ye orweela mwa yowoopola.
6 Okhuma okathi ole mpakha vano, atthareli a Kristu mulaponi motheene, annittottela mureerelo yowoopola awe. Nikhale ale oowoottihiwa a “nikoto namukhani” anrowa olamulelaka vamosa ni Kristu wiirimu, aahiiso ale a “ipwittipwitthi sikina”, yaawo anrowa okhalaka valaponi alamuleliwaka ni Kristu, hiyo ninnittottela mureerelo mukuttho awe. (Luka 12:32; Yohani 10:16) Mukuttho owo ti mathipelo a nlipelelo nahu ni a oleveleliwa soottheka sahu. Vaavo vanivikaniha ahu ‘wamini’ yowoopola, nimuttharaka Yesu khuta nihiku, hiyo pooti okhalana yowuupuxerya ya vamurimani yooloka ni nlipelelo na muhoolo nootepa oreera.—Yohani 3:16.
7. Owerya xeeni Yesu ovahiwe awe nuumala otthikela wiirimu, nto nyuwo munrowa omukhaliherya sai?
7 Exeeni Yesu onipaka awe wiirimu okhuma vaavale otthikenle awe? Owo ookhalana owerya wuulupale. (Matheyo 28:18) Mwekeekhai, Yehova oomuthanla Yesu wira olamuleleke muloko wa eKristau, nto Yesu onnaakhwaniherya muteko owo moophenta ni mwa xariya. (aKolosi 1:13) Ntoko saahimmwale aya vahinatthi, Yesu ohaakumiherya alopwana oottittimiheya wira akhapeleleke sootthuneya sa nikoto nawe. (aÉfeso 4:8) Mwa ntakiheryo, owo aahimuthanla Paulo wira okhale ‘murummwa amalapo’, amurumaka olaleerya ihapari sooreera ilapo soottaiwene. (aRoma 11:13; 1 Timótheyo 2:7) Waattamela wanikisa wa eseekulu yoopacerya, Yesu aahittottopela, ovaha miruku, ni ottaruxa miloko mithanu na miili sa eprovinsia ya wAsia, oRoma. (Wisupulula, ikapiitulu 2 mpakha 3) Niireke wira nyuwo munnimweemererya Yesu ntoko Muru wa muloko wa eKristau? (aÉfeso 5:23) Wira nvikanihe omutthara, nyuwo moohaana ophavelaka okhaliha munepa wowiiwelela ni wookhaliheryana mmulokoni mwanyu.
8, 9. Owerya xeeni Yesu ovahiwe awe mwaakha wa 1914, ni eyo yohaana otaphulelaka exeeni wa soothanla sinipaka ahu?
8 Yesu oovahiwa-tho owerya wuulupale mwaakha wa 1914. Mwaakha ole, Yesu oothanliwa okhala Mwene a Omwene wa oMesiya wa Yehova. Okathi olamulelo wa Yesu waapacenrye aya, “yahikhumelela ekhotto wirimu”. Nto, exeeni yaakhumelenle? Satana ni axetwani awe yaahiriheliwa vathi, opaceryaka nto okathi wa mixankiho valaponi. Ikhotto, ikrime, woopopihana, iretta, itetere, ni etala, itthu seiyo sinaaxankiha apinaatamu, sinnuupuxerya wira Yesu onnilamulela wiirimu vano. Nlelo Satana ‘toniruma vathí-va’ mu “okathi vakhani pahi”. (Wisupulula 12:7-12; Yohani 12:31; Matheyo 24:3-7; Luka 21:11) Tivonto, Yesu onnaavaha atthu a elapo yotheene, eparakha ya weemererya olamulelo Awe.
9 Ti vootthuneya hiyo okhala mpantta wa Mwene a oMesiya. Soothanla sotheene sinipaka ahu khuta nihiku, sohaana okhala soweemereriwa ni Mwene owo, ohiya ni elapo ela yootakhala. Vaavo “Mwené [ola] a mamwene ni Pwiya a mapwiya” onaaweha-weha awe apinaatamu, murima awe wa xariya onnipatta mwaha wa onanariwa ni onnisareya otteeliwa murima. (Wisupulula 19:16) Mwaha wa xeeni?
Onanariwa ni Otteeliwa Murima wa Mwene a oMesiya
10. Tuuvi okhanle mukhalelo wa Yesu mweephattu, masi exeeni enimwiiriha Pwiya ahu onanariwa moophwanelela?
10 Ntoko Tiithi awe, mweephattu Pwiya ahu toohakalala. (1 Timótheyo 1:11) Okathi aary’awe valaponi, Yesu khaaphukela atthu hata khahiyo aari mutthu oovila omuhakalaliha. Masi, sookhala itthu sinceene siniiraneya valaponi olelo va, seiyo sinimwiiriha onanariwa moophwanelela. Tthiri, Yesu onninanariwa ni itiini seiyo mowootha sinihimya wira sinnimutthara. Owo aahihimya wira: “Wira mutthu akelé momweneni mwa Muluku, khivamphiyerya okìrela: ‘Apwiya! Apwiya!’. Ankela-mo t’ale anìra sintthunaya Atithi ari wirimu. Naphiyá nihiku nlo, atthu anjene anokìrela: ‘Apwiya! Apwiya! . . . Khino ni nsina nanyu nenlo-tho khinìnre sotikiniha sinjene?’ Vano miyo kinowakhula wira: ‘Miyo nkinosuwelani! Mukhumase va, nyuwo munìra sotakhala!’”—Matheyo 7:21-23.
11-13. Nthowa xeeni atthu akina ary’aya ooxankiheya, mwaha wa masu oolipa Yesu aaroihenle awe ale anipaka “sotikiniha sinjene” mwa nsina nawe, masi nthowa xeeni onanariwe awe? Nvahe nlikanyiho.
11 Olelo va, anceene aniihimya okhala maKristau, pooti woonaka masu ala okhala ooxankiha vanceene. Nthowa xeeni Yesu aarowa awe oromola masu ala oolipa, aaroihelaka atthu yaale yaapaka “sotikiniha sinjene” mwa nsina nawe? Ikerexa sa eKristau Yoowootha sinnikhaliherya mapuro anikhapeleliwa atthu oohaawa, sinnaakhaliherya alipa-oohaawa, sinniteka ixiripitaali ni ixikola, ni sinnipaka miteko sikina sinceene. Nrowe nthokorerye nlikanyiho nimosa, wira niwehe nthowa naya Yesu onnanariwa awe ni itiini iyo.
12 Tiithi ni maama aniphavela weetta mukwaha. Awo khaniwerya waakuxa anaaya, tivonto annimphavela muthiyana wira aakhapeleleke anaaya awo. Awo anninvaha muthiyana owo malakiheryo ookhweya ariki: “Mwaakhapeleleke aniihu. Mwaavaheke yoolya, mwaarapiheke ni mwaakattheleke ikuwo saya, ni mwaaweha-weheke wira ehiwiraneele etthu yootakhala”. Masi okathi axitiithi aya anitthika aya, awo anninyoonyiheya oweha wira anaaya aavoliwa etala. Anamwane awo ari oonanara, oowereiwa, ni oohasuwa. Anninla wira muthiyana ole aakhaliherye, masi owo khonaacikha. Ohinaacikhela-ni? Owo owenle exikatta, khiyarapiha ixanela. Axitiithi anninanariwa vanceene, ni annimukoha wira aaleele etthu aavara awe. Muthiyana ole onnaakhula oriki: “Nkawehani itthu sotheene kivanre aka! Ixanela khasirapihiwe? Nave-tho koorattela empa, sotheene kiirelaka emusi anyu!” Niireke wira axitiithi ale annitteeliwa murima? Nnaari! Awo khiyanvekenle wira ovare miteko iyo; awo yaaphavela paahi wira aakhapeleleke anaaya. Axitiithi ale yaamunanariwa vanceene mwaha woowi muthiyana ole aahikhootta wiiwelela malakiheryo aya.
13 EKristau Yoowootha ennivara itthu ntoko muthiyana ole. Yesu aahaahiyerya malakiheryo atthareli awe, wira yaavaheke atthu yoolya yomunepani, awiixuttihaka atthu ekeekhai ya Nuulumo na Muluku, ni yaakhaliheryaka wira akhale ooloka momunepani. (Yohani 21:15-17) Masi, eKristau Yoowootha ennooceela moomalela wiiwelela malakiheryo awe. Ennaahiya atthu avoliwaka etala yomunepani, yaakanyereyaka mwaha wa itthu sowootha, ni annikhootta sowiixuttiha suulupale sa Biibiliya. (Yesaya 65:13; Amosi 8:11) Hata yeereryaka olokiherya olumwenku ola, eyo khahiyo yowoothererya ya ohiiwelela waya. Tthiri, olumwenku ola wa Satana onlikana ni empa elakeliwe opwexakasiwa! Nuulumo na Muluku ninnooniherya saana wira olumwenku ola wa Satana ohanle vakhaani opwetexiwa.—1 Yohani 2:15-17.
14. Muteko xeeni onimuhakalaliha Yesu olelo va, ni nthowa xeeni?
14 Masi, Yesu oryeene wiirimu onnihakalala waaweha atthu imilyau sene yaakhwaniheryaka muteko wa waapaka awiixutti, yoowo aavanhe awe atthareli awe ohinatthi okhuma valaponi. (Matheyo 28:19, 20) Tthiri, eri eparakha yuulupale omwiiriha Mwene a oMesiya otteeliwa murima! Nto nihihiyererye omukhaliherya “murumeyi òroromeleya ni ànkhili”. (Matheyo 24:45) Moovirikana ni ahooleli a eKristau Yoowootha, nikhuuru nna na maKristau oowoottihiwa, mowiiwelela ninnihoolela muteko woolaleerya, ni olyiha ipwittipwitthi sa Kristu moororomeleya.
15, 16. (a) Yesu onoonela sai ohiphentana ohireere waatta olelo va, nto hiyo ninsuwela sai? (b) EKristau Yoowootha emwiirinhe sai Yesu onanariwa?
15 Hiyo nisuweleke wira Mwene onninanariwa tthiri, okathi oniweha awe ohiphentana onivikaniha okhala valaponi, olelo va. Hiyo pooti wuupuwelela wira aFarisi yaahinvaanyiha Yesu mwaha wa waavoniha atthu nihiku na Saabadu. Awo yaari oolipa-murima ni oolipa-muru, tivonto yaaroromela aya paahi otaphulela waya woohiloka wa Nlamulo na Moise, ni nlamulo noohimmwa vayanoni. Miiriirya sa Yesu saahikumiherya mareeliho manceene! Masi otteeliwa murima, otaphuwa, ni olipiha nroromelo waakumiheriwa ni miiriirya iyo, khisaataphulela etthu wa alopwana ale. Yesu aawoonela sai? Ekwaha emosa, owo “ahawehexexa okherekhere n’uviruwa, aripiwene murima mwaha w’olipa wa mirima saya”.—Marko 3:5.
16 Olelo va, sookhala-tho itthu sinceene sinimwiiriha Yesu ‘oripiwa murima’. Ahooleli a eKristau Yoowootha annootothiwa mwaha wa okhalela nthiti soolema ni sowiixuttiha sihinvarihana ni Biibiliya. Moowuncererya, ahooleli awo anniviruwa mwaha wa olaleeriwa ihapari sooreera sa Omwene wa Muluku. Mipantta sinceene sa mulaponi, ahooleli a itiini aakumiherya olupatthiwa maKristau yaale aneererya olaleerya ni murima wotheene muhupi yoole Yesu aalaleerya awe. (Yohani 16:2; Wisupulula 18:4, 24) Mu okathi omosaru, ahooleli awo, ikwaha sinceene annaatumererya atthareli aya wira yawaneke etthoko ni awiiveke akina, okhalaka ntoko wira opaka eyo yammuhakalaliha Yesu Kristu!
17. Atthareli eekeekhai a Yesu anihakalaliha sai murima awe?
17 Moovirikana, atthareli eekeekhai a Yesu anniimananiha wira yaaphenteke akhw’aya. Awo annaalaleerya ihapari sooreera “atthu othene”, ntoko siira awe Yesu, nnaamwi avaanyihiwaka. (1 Timótheyo 2:4) Ophentana waya ti wuulupale; ti ekanyeryo yuulupale enaasuwanyeiha. (Yohani 13:34, 35) Vaavo vanaathokorerya aya annaya eeKristau, moophenta ni moottittimiha, awo animutthara tthiri Yesu, ni ehakalalihaka murima wa Mwene a oMesiya!
18. Exeeni enimunyoonyiha Pwiya ahu, masi ninrowa omuhakalaliha sai?
18 Nave-tho nohaana wuupuwela wira Pwiya ahu, onninyoonyiheya okathi atthareli awe anooceela aya ovilela, anihiyererya aya omphenta waya Yehova ovukuwaka, ni vanihiya aya omurumeela. (Wisupulula 2:4, 5) Masi Yesu onnisiveliwa n’ale anivilela mpakha wanikisa. (Matheyo 24:13) Mwa sotheene, nrowe nuupuweleleke okathi wotheene, yooruma ya Kristu eni: “Nyuwo mukitthareke”. (Yohani 21:19) Nrowe nthokorerye mareeliho makina Mwene a oMesiya onrowa awe waavaha ale anivilela mpakha wanikisa.
Arumeyi Oororomeleya a Mwene Annivahiwa Mareeliho
19, 20. (a) Mareeliho xeeni anikhumelela vano mwaha wa omutthara Yesu? (b) Omutthara Yesu onnikhaliherya sai omaleliha yoophavela ahu ya okhalana tiithi?
19 Omutthara Yesu ti mweettelo oniphwanyiha mareeliho mookumini vano. Namweemererya Kristu okhala Pwiya ahu, nttharaka malakiheryo awe ni nihooleliwaka ni ntakiheryo nawe, hiyo nnoophwanya muhakhu yoowo atthu a mulaponi aniphavela aya, masi ahinaphwanya. Hiyo nnooreelihiwa ni muteko oniiriha okumi ahu okhalana yoophavela, nnookhalana emusi ya anna oowiiraana ni niphento, nnookhalana yowuupuxerya ya vamurimani yooloka ni ya murettele. Mookwasa, hiyo ninrowa ophwanya okumi wootteeliha murima ni woohakalaliha. Nave-tho ninrowa okhalana mareeliho makina.
20 Yehova oomukhaliha Yesu “Tithi a mahiku othene”, wa ale anlipelela okhala valaponi mu okathi wotheene. Yesu omuranttenle Adamu, tiithi oopacerya aapinaatamu, yoowo aatthekinhe anaawe. (Yesaya 9:5, 6) Mwaha wa omweemererya Yesu okhala “Tiithi [ihu] a mahiku othene”, ni omwaamini, hiyo nookhalana nlipelelo neekeekhai na okumi woohimala. Moowuncererya, hiyo ninnimwaattamelexa Yehova Muluku. Ntoko niixuntte ahu, wiilipiherya otthara ntakiheryo na Yesu khuta nihiku, ti mukhalelo wooloka wa wiiwelela yooruma ela ya Muluku eni: “Mutthareke mwettelo wa Muluku, okhala wira mw’àn’awe òphentiwa”.—aÉfeso 5:1.
21. Atthareli a Kristu animwaleela sai elapo ela eri mweepiphini?
21 Vaavo nimmutakiha ahu Yesu ni Tiithi awe, Yehova, hiyo nookhalana eparakha yuulupale. Ninnimwaleela ni muthuko woowaarya. Mu elapo ela eri mweepiphini, yeeyo atthu ibilyau sene anihapuxiwa aya ni Satana ni antakiha aya miteko sawe, hiyo nimmutthara Kristu, ninnimwaleela ni muthuko woowaarya, eyo piiyo, muthuko wa ikeekhai sa Biibiliya, wa mikhalelo sooloka sa eKristau, wa otteeliwa murima wekeekhai, murettele wekeekhai, ni niphento neekeekhai. Mu okathi omosaru, hiyo ninnimwaattamela Yehova. Eyo teri yoophavela yuulupale ya khuta yoopattuxiwa erina ankhili.
22, 23. (a) Mareeliho xeeni anrwa muhoolo, wa ale anivikaniha omutthara Yesu moororomeleya? (b) Tiivi enitthuneya okhala yoolakela ahu?
22 Nave-tho, muupuweleke ele Yehova oniphavela awe owiirelani muhoolo, orweela mwa Mwene a oMesiya. Moohipisa, Mwene owo onrowa owana ekhotto ni olumwenku ola wootakhala wa Satana, ekhotto yeeyo enrowa okhala ya xariya. Moohaaniherya, Yesu onooxintta ekhotto eyo! (Wisupulula 19:11-15) Moottharelana, Kristu onrowa opacerya Olamulelo awe wa Iyaakha Ekonto Emosa valaponi. Ekuvernu awe ya wiirimu enrowa waaruuhela mireerelo sa yowoopola apinaatamu otheene oororomeleya, ewiirihaka okhala oomalela. Nkahaya muupuwele itthu ntoko iya: okhala akumi, moohilipelela wuuluvala, okhalana ikuru, ovaraka muteko moohakalala ni emusi ya apinaatamu oowiiraana, ni wiirihaka elapo ya vathi okhala eparayiisu! Wanikisa wa Olamulelo owo wa Iyaakha Ekonto Emosa, Yesu onoomuttikiherya Tiithi awe olamulelo. (1 aKorinto 15:24) Mwavikaniha omutthara Kristu moororomeleya, nyuwo munrowa ovahiwa mareeliho vanceene, yaawo muhiniwerya anyu wuupuwelela, eyo piiyo, “otaphuwa n’uvuwa w’àna a Muluku”! (aRoma 8:21) Aayo, hiyo nnookhalana mareeliho otheene Adamu ni Eva yaarina aya ni khipweteiwa. Ninrowa okhala anamwane a Yehova anrowa okhalaka valaponi, ni khaninrowa-tho okhalana nlepa na yoottheka ya Adamu. Mwekeekhai, “khunrowa okhala-tho okhwa”.—Wisupulula 21:4.
23 Nkahaya mmuupuwelele mmiravo thaaciri aari namalamulela, yoole nimuthokorenrye ahu Muru 1. Owo aahikhootta nlattulo na Yesu noowi: ‘Murwé mukitthareke’. (Marko 10:17-22) Muhikhala-khale mwiiraka siiso! Nvarexexe nlattulo na Yesu n’utteeliwa murima. Nto yoolakela anyu ekhale ovilela, ovikaniha omutthara Makampusi Ooreera Murima khuta nihiku ni khuta mwaakha, ni okhala mukumi wira munwehe aakhwaniheryaka moomalela soolakela sotheene sa Yehova!