Setembro

Ohinatthi waahiya ottuli arumeyi yaamuhoola Abrahamu ni Isakhi, Abrahamu aahimmye so: “Muhalase vava ni bùr’ula, miyo nimwan’ak’ola ninrowa iwe olompa. Namalá, nnotthika”. (Maph. 22:5) Abrahamu aaphavela ohimya exeeni? Niireke aamootha, vaavo aahimya awe wira aamuhokolowa ni Isakhi, osuwelaka wira aarowa ompaka mukuttho? Nnaari. Biibiliya onnooniherya etthu yaamwiiriha Abrahamu olavula siiso. (aHéb. 11:19) Abrahamu ‘anamini wira Muluku anwerya hatá omuhihimuxa [Isakhi] mokhwani’. Abrahamu aanaamini ohihimuxiwa wa alipa ookhwa. Aanisuwela wira Yehova aahimukhaliherya owo ni Sara oyara, nnaamwi yuuluvanle. (aHéb. 11:11, 12, 18) Aanisuwela wira Yehova khonooceela etthu. Ti nthowa naya Abrahamu onihimmwa awe okhala “tithi aya atthu othene animwamini Muluku”!​—aRom. 4:11. w16.02 1:3, 13

Nnaamwi Yehova aamuthanlale Sawuli okhala mwene, muhoolo mwaya Sawuli aahihiya omwiiwelela Yehova, nto Muluku aahimukhootta. (1 Sam. 15:17-23) Okhala wira Yehova khaamukumihale Sawuli okathi ene yoole, nto mweettelo awe woohiloka wahaakumiherya maxakha atthu aalamulela awe. Vanaaxankiha okhala oororomeleya wa Muluku, okathi ene yoowo mwene aathanleliwe ‘okilathi vehijeni v’Apwiya’, aapaka awe itthu soohiloka. (1 Wah. 29:23) Nave, Yonathani mwaana a Sawuli aahivikaniha okhala oororomeleya wa Yehova. (1 Sam. 13:13, 14) Nave-tho, hiyo pooti wooniherya ororomeleya wa Yehova niwiiwelelaka mwa enamuna Muluku onniruma awe niwiireleke ale aneettiha elapo, hata akina akhalaka ntoko khaniphwanelela. Mwa ntakiheryo, makhulupale a mulaponi pooti okhala oohiroromeleya, masi hata vari siiso, ninnaattittimiha maana Biibiliya oniruma wira nihaana owiiwelela wa enamuna eniphwanelela. (aRom. 13:1, 2) Tthiri otheene ahu nihaana owiiwelela otheene yaale avahiwe okhulupale ni Yehova.​—1 aKor. 11:3; aHéb. 13:17. w16.02 3:5, 6, 8

Biibiliya onihimya wira arumeyi otheene a Yehova, waahela muhina amiravo, anrowa wiivahereryaka “votthuna waya”, wira amurumeeleke Yehova. Nto mutthu onuupuwelela obatiziwa, ohaana osuwela tthiri wira eyo ti etthu mwaneene eniphavela awe. Eyo enooniherya wira mutthu ohaana wiitokosa. Mwaha wa xeeni? Ntoko mmiravo, woonasa wene makhalelo anyu ta vameekhaaya, vanceenexa akhala wira muhuuwale etthoko ya Anamoona a Yehova. Nuuvira okathi, woonasa wene munnaaweha atthu anceene abatiziwaka, waahela muhina apatthani anyu wala axihima anyu aahiiso axuulupale anyu. Vakhala wira ti siiso, muhaana okhalana ephoole. Maana pooti opaceryaka wuupuwela wira okhala wira moophiyeriha iyaakha wala atthu otheene anoomala obatiziwa, ni nyuwo-tho muhaana obatiziwa. Exeeni ekhanle anyu oopaka wira mukhalane moonelo mmosaru wa Yehova voohimya sa obatizo? Okathi ti okathi, muupuweleleke nthowa naya obatizo oryaaya wootthuneya. w16.03 1:11, 12

Masi ninrowa owerya sai opaka eyo? Vanooweryaneya akhala wira ninrowa ovaraka muteko owo mowiiraana ntoko ipantte “s’erutthu sikhomanyiwe ni silutteleliwe orattene”. (aÉf. 4:16) Wira niwerye waalaleerya atthu anceene ihapari sooreera sa Omwene, nohaana wiiraana. Tivonto ninvahiwa ahu malakiheryo. Malakiheryo awo anivahiwa miloko sotheene, anninikhaliherya ovara mowiiraana. Nuumala othukumana wira nalaleerye, nto ninnirowa olaleya ihapari sooreera sa Omwene. Nave-tho ninnikawa iliivuru sinceene sinimutthokiherya Biibiliya. Niireke munniimananiha otthara malakiheryo, okathi onilattuliwa ahu wiirela mpantta ikampaanya sa vameekhaaya? Opaka eyo, ninnivara muteko mowiiraana ni annihu olumwenku wotheene, nave-tho ninnivara vamosa ni malaikha, yaawo aniromoliwa eliivuru ya Wisupulula 14:6. w16.03 3:4, 5

Biibiliya onihimya wira elapo esya iroolu sinrowa ohuliwa wira nivahiwe malakiheryo. Nto osoma iroolu iyo atthu otheene waahela muhina ale anrowa ohihimuxiwa, anrowa osuwelaka ele Muluku eniphavela awe. Iroolu iyo tthiri sinrowa wooniherya saana muupuwelo wa Yehova. Yeettihiwaka ni malakiheryo a Nuulumo na Muluku ni wiiwexexa saana iroolu sa niinano, apinaatamu anrowa okhalaka mParayiisu, anrowa ophentanaka saana, ottittimihana, mwa enamuna yookhalela. (Yes. 26:9) Nkahaya muupuwele itthu isya sinrowa ahu wiixutta ni owiixuttiha atthu akina nlakiheriwaka ni Mwene, Yesu Kristu! Okumi woohimala, onnaalipelela atthu anrowa weettelaka itthu silempwale ‘mulivuruni’. Nto ale anrowa okhala oororomeleya okathi wa weehereriwa wookiserya, Yehova onrowa olepa masina aya ‘elivuru ya ekumi’. Tthiri vanniweryaneya hiyo waakhela okumi ohinimala. w16.03 4:19, 20

Axitokweene apacenrye khalai ovara muteko owo annittittimiherya nave wira ti vootthuneya opacerya owiixuttiha anna aryeene nlelo amiravo, naavahaka miteko mmulokoni sinivarihana ni munnuwelo ni owerya waya. Opacerya owiixuttiha anna aryeene amiravo, onnaakhaliherya okhalana soolukama soomunepani sooloka ahinatthi wunnuwa vaavo vanrowa aya opaceryaka okhanyereriwa otthara itthu sa mulaponi. (Esal. 71:17) Mutokweene onoowerya omukhaliherya ole onimwiixuttiha awe ophavela orumeela vakhala wira khonimutthokiherya etthu yoopaka paahi, masi onnimuleela etthu enimwiiriha opaka eyo. Okathi onimooniherya awe mathowa aya, owo onnimutakiha Mwiixuttihi Muulupale, Yesu. Mwa ntakiheryo, ohinatthi waaruma atthareli awe orowa waapaka awiixutti, Yesu aahaahimeerya nthowa naya yaatthuneya aya wiiwelela yooruma eyo. Owo aahimmye so: “Kovahiwa owerya wothene wirimu ni vathí”. Nuumala-vo khwiira: “Vano, murowé, mwawixuttiheke atthu a maloko othene”.—Math. 28:18, 19. w15 15/4 2:5, 6.

Ole waari okathi woovila okhala muKristau oRoma. Atthareli a Kristu yaanilupatthiwa vanceene okhala wira yaanootheriwa wira yaahipaha epooma mwaakha wa 64 EC. Tthiri awo ti yaari makhalelo okathi murummwa Paulo aatthukiwe awe oRoma ekwaha ya nenli. Niireke maKristau makina yammukhaliherya? Eyo yaahimuxankiha Paulo wanipacerya, tivo okathi aamulepela awe Timootheyo aahimmye so: “Okathi wapajeryaka wisakiha, khavo okikhalihenrye, atthu othene àkinyanyala”. (2 Tim. 4:16) Hata vaari siiso, Paulo aanisuwela wira khaakhanle mekhawe. Omuroromela Yehova waahimukhaliherya Paulo oxintta mixankiho saarina awe ni iye saarowa omukhumelela muhoolo. Tivonto, moohipisa nuumala ohimya masu awo onnimaliherya so: “Apwiya anokàkiherya sotakhala sothene”. (2 Tim. 4:18) Tthiri Paulo aanisuwela wira hata ohikhaliheriwaka ni apinaatamu, aamukhaliheriwa ni Yehova ni Mwanawe, yaawo akhanle anamakhaliherya a ekeekhai! w15 15/4 4:1-3

Vaavo Yesu aayariwa awe Satana aahisuwela wira mwanamwane ole annuwa aarowa okhala Mesiya aaleiheriwe. Nyuwo munoona wira Satana aanuupuwela wira omwiiva mwanamwane yaari etthu yootepexa otakhala? Satana khorina makhalelo ooloka nnakhala vakhaani. Nto voohimya sa Yesu oryeene mwammiravo, Satana aahiphavelasa omwiiva moohipisa. Moota xeeni? Mwene Herodi, aahinanariwa vanceene mwaha wa asuweli ale yaamukonhe wira “Ori vai mwené àYuda oyariwe nanano?”, nto okhuma vaavale aaniphavelasa omwiiva. (Math. 2:1-3, 13) Voophavela osuwelexa vakhala wira aamwiiviwa tthiri Yesu, owo aahirumiha wira yiivakasiwe anamwane axilopwana otheene yaarina iyaakha piili orowa vathi yaakhala oBethelehemu ni idistritu saya. (Math. 2:13-18) Ekeekhai wira mwene ole khaawenrye omwiiva Yesu, masi eyo ennooniherya exeeni voohimya sa nwanani ahu Satana? Eyo ennooniherya wira Diabo khonivaha efaita ekumi ya apinaatamu. Tthiri owo khoniwoonela othunku hata axinamwane. Mwekeekhai Satana “kharamu ònopa murukulu”. (1 Ped. 5:8) Muhikhala-khale mumpeepheihaka nwanani owo! w15 15/5 1:10, 12, 13

Owerya wahu woona itthu sihinooneya nivahiwe ni Muluku. Eyo enninikhaliherya waapaka apalano ooloka ni owehererya itthu sooloka siri muhoolo. Yehova onniwerya woona itthu sinrowa wiiraneya muhoolo, ni omurumeelaka Biibiliya owo onninihimeerya itthu sinrowa wiiraneya muhoolo. Nto eyo enninikhaliherya woona itthu hata sihinatthi okhumelela. Tthiri owerya wahu woona itthu sihinooneya onninikhaliherya okhala oowaamini. (2 aKor. 4:18) Okathi yoole Hanna aaviriha awe wuupuwelelaka moota saarowa aya okhala okumi wa Samuweli okathi waamuroihale awe wira arumeeleke otabernaakulu, owo anoona etthu yookhalela mmuupuweleloni mwawe. Ele yaari etthu yaalakenle awe opaka, nto eyo yaahimukhaliherya owehexexa etthu yaaphavela awe. (1 Sam. 1:22) Vakhala wira hiyo ninnimananiha wuupuwelela ele Muluku eleihenrya awe opaka, nto hiyo nnuupuwelela etthu enrowa wiraneya tthiri. (2 Ped. 1:19-21) Moohaaniherya, atthu oowaamini aniromoliwa mBiibiliyani yaaniwerya woona itthu saaleiheriwe aya ni Muluku. w15 15/5 3:1-3

Etthu yowoopiha wuupuwelela wira mutthu onoothaaciri vanceene vaavo vahiniluttuweliwa awe miteko sa Muluku. Yesu aahihimya nlikanyiho nnooniherya oriipiha waya murima makhalelo a mutthu “onìthukumanyerya mihakhu, ahinaphavela okhala thajiri vamaithoni va Muluku”. (Luka 12:16-21) Yehova onnitteeliwa murima vaavo vanipaka ahu itthu sinimusivela. (Mir. 27:11) Tthiri ninnitteeliwa murima mwaha wa osuwela wira noopaka etthu enimusivela vaavo nniithukumanyerya ahu “mihakhu wirimu”! (Math. 6:20) Mwekeekhai wataana wooloka ni Yehova tokhanle muhakhu muulupalexa onireerela ahu okhalana. Moone moota naarowa ahu oxanka vaakhanle wira wimananiha wahu wotheene othukumanyerya “mihakhu vathí-va”. (Math. 6:19) Yesu aahirumeela nlikanyiho ophavelaka wooniherya wira ‘weteteyexa n’itthu sa vathí ni wototha wa muhakhu’ onoowerya ovuvurya masu a Omwene.​—Math. 13:18, 19, 22. w15 15/5 4:15, 16

Owerya wa Muluku waahimukhaliherya Yesu Kristu opaka miiriirya sinceene sookuxa murima. Owo khampenunxe namakuttula ole paahi, masi aahaapenuxa aretta anceene ni khula enamuna ya orakala. Okathi Yesu aapenunxa awe atthu ale, khaavekenle wira atthu avaheke itthu sa mwerutthuni mwaya wira aahelele ale yaavoniha awe. Owo aavoniha ipantte seiye sa mutthu owo saarina oretta! Owo aanaapenuxa atthu awo naananoru, okathi mukina aanaapenuxa aryeene ottaiwene. (Yoh. 4:46-54) Exeeni ennooniherya aya matakiheryo ala oowuumiha owanoni? Nenna-va Yesu oryaawe Mwene wiirimu, ookhalana owerya ni onnitthuna omala-maliha mixankiho sotheene sa apinaatamu. Enamuna Yesu aathokorenrye awe atthu enninikhaliherya okupali moota onrowa awe waakhwaniherya eprofesia ela ya mBiibiliyani eni: “onowòpola atthu òhawa ni òwiyeviha”. (Esal. 72:13) Tthiri, Yesu onniphavela waakhaliherya atthu otheene oohaawa ni murima awe wotheene. w15 15/6 2:6

Atthu anceene anniwerya wuupuwela ni oromola masu a Nivekelo na Tiithi Ihu Muri Wiirimu. Okathi onilaleerya ahu empa ti empa, ninniromola masu a nivekelo nla wira nimukhaliherye mutthu onimphwanya ahu osuwela wira Omwene wa Muluku eguvernu ya ekeekhai yeeyo enrowa oruuha marukunuxo oovara murima valaponi. Okathi mukina ninnirumeela yoovekela yoopacerya ya nivekelo nla wira nooniherye wira Muluku ookhalana nsina nawe, nenno nintthuneya ovuwihiwa wala ‘othokoreriwa ntoko etthu yowaarya’. (Math. 6:9) Niireke Yesu aaphavela wira masu a nivekelo nla atthikeliweke oromoliwa khula okathi atthu anivekela aya, ntoko siniira aya atthu anceene anitthara eKristau Yoowootha? Nnaari. Yesu ohinatthi wiixuttiha nivekelo nla na ntakiheryo, owo aahimmye so: “Mwalompaka, muhattiheké molumo anyu”. (Math. 6:7) Okathi mukina muhoolo mwaya, Yesu aahitthikela opaka nivekelo nla, masi orumeelaka moolumo oovirikana. (Luka 11:1-4) Tthiri vannooneya wira Yesu aaphavela onikhaliherya osuwela itthu sinitthuneya ahu ovekela ni otthuneya wa khula etthu eniveka ahu. Tivonto vanireerela aya wiireliwa nivekelo na ntakiheryo. w15 15/6 4:1, 2

Yehova onninivaha ikuru sa munepa awe wootteela, yoowo onrowa onikhaliherya oxintta soweeha. Muluku onninilopola vahinatthi orumeelaka Nuulumo nawe ni muloko voohimya sa itthu sinireerela ahu osyaka, itthu ntoko ohonona okathi, musurukhu ni ikuru sinceene mwaha wa itthu sihirina efaita. Ale yaari mapioneero, Espen ni Janne aakhalana anamwane anli anaakhapelela aya. Espen onihimya wira: “Hiyo ninninvekela Yehova ikwaha sinceene, wira nihimore neehereriwaka, vanceenexa okathi ola ohiniwerya ahu ovara miteko sinceene sa Muluku ntoko siira ahu khalai. Hiyo ninninvekela Yehova wira onikhaliherye ovikaniha okhalela nthiti miteko sawe ni olaleerya”. Yoweeha ekina ehireere wuulaana mahiku ala ti oweha epornografia. Akina aamorela yoweeha eyo mwaha wa weemererya miyuupuwelo soohiloka mmuruni mwaya. Masi hiyo nnoowerya okhootta, ntoko ikonto sinceene sa annihu yiirale aya.​—1 aKor. 10:13. w15 15/6 5:15, 16

Exeeni enrowa okhumelela nuumala opwetexiwa mitthenkeso sa etiini yoowoka? Okathi owo onrowa wooniherya ele eri vamurimani va khula mutthu. Atthu anceene anrowa ophavela opuro wootthyawela mmitthenkesoni sa apinaatamu seiyo sinilikanihiwa ni eriyari ya “miyala sa miyako”. Nilavulaka mwa nlikanyiho, atthu a Muluku anrowa otthyawela nipuro ninrowa awe okumiherya Yehova. Eseekulu yoopacerya, okathi ole wooxankiha khiwaataphulela wira aYuda anceene yaamukela eKristau. Ole waari okathi ale yaari maKristau olipiherya omwiiwelela waya Muluku. Vamosaru, hiyo khanniwehererya wira anookhumelela atthu anceene anrowa okhala anamoona okathi wa maxakha maalupale. Ohiya-vo, owo onrowa okhala okathi wa ale animwaamini mwekeekhai Yehova olipiha waamini waya ni waakhaliherya annawe Kristu.​—Math. 25:34-40. w15 15/7 2:7

Niireke nyuwo munnunwe wala mootoko wiixuttihiwa wira elapo anyu wala muttetthe oyariwe anyu ti woofayi ovikana sikina? Niireke yookhala etthu eri vamurimani vanyu nlelo eniwuupuxeryani itthu iyo? MaKristau aheemereryeke wira ovirikana elapo owiiriheke ohiwoona saana atthu akina. Masi munrowa opaka exeeni vakhala wira muhoona wira mookhalana muupuwelo woohiloka voohimya sa nloko, soolema, elavulelo wala nikhuli na mutthu? Tthiri vaamureerela wuupuwelela moota Yehova onoonela awe ovirikana wa ilapo ni othanyiwa wa atthu mwaha wa nikhuli naya. Otokosa saana mwaha ola niiye sinivarihana ni mwaha ola okathi wa omulompa Muluku vatthokoni onimookhaliheryani. Nuumala-vo mmuxontteleke Yehova wira ookhaliheryeni oxintta muxankiho owo. (aRom. 12:2) Nihaana opaka ela maana moohipisa wala muhoolo, khula mmosa a arumeyi a Yehova anoomukhumelela makhalelo anrowa otumererya yowuupuxerya ya murima awe okhala oovirikana ni atthu amwaattamenle ntoko apatthani a omutekoni, oxikola, anamwaattamanani, amusi ni atthu akina. Tthiri okathi siisa onivekela wiilipiha! w15 15/7 3:14, 15

Yehova onniniiwa naamuxonttelaka ni owo onnisuwela moota woonikhapelela hata ohikhanle mutthu oniwerya onikhaliherya. Waakhula wawe mavekelo ahu ti enamuna yuulupale enooniherya oniphenta wawe. Mavekelo alempwale mBiibiliyani anoowerya oniixuttiha etthu. Vaamureerela othokorerya mavekelo awo okathi wa omulompa Muluku vatthokoni. Wuupuwelela moota arumeyi a Yehova a khalai yaamulavulana aya amuleelaka Muluku itthu saari vamurimani vaya, onoonikhaliherya olokiherya saana mavekelo ahu. Mwa ntakiheryo, muthokorerye nivekelo noomoriha ikharari naapakiwe ni Yona oryeene mmirimani mwa ehopa yuulupalexa. (Yona 2: 1-10) Muuluule nivekelo Salomoni aapanke awe ni murima wotheene onvahereryaka Yehova etemplo aatenke awe. (1 Mam. 8:22-53) Wuupuwelela nivekelo na ntakiheryo naapanke awe Yesu nnoonikhaliherya-tho. (Math. 6:9-13) Etthu yootepexa otthuneya ti ‘omulompa Muluku okathi wothene’. Eyo enooniphwanyiha “murettele wa Muluku, onvikana osuwela wa mutthu, onosuka mirima sanyu n’iroho sanyu”.​—aFil. 4:6, 7. w15 15/8 1:11, 12

Tthiri vanrowa okhala voohakalaliha wiiwelela marehereryo a Yehova a elapo esya nivaraka muteko wira nireerihe elapo, owiixuttiha atthu anrowa ohihimuxiwa, ni waakhwaniherya yoolakela ya Yehova wa apinaatamu. Masi, mwaarowa opaka exeeni vaakhanle wira nvekeliwe ovara muteko ohinoosivelani? Niireke mwaamwiiwelela malakiheryo awo nvaraka muteko owo ni murima anyu wotheene? Anamunceene pooti waakhula ariki aayo! Masi, niireke vannikhweya wiiwelela malamulo a Muluku olelo-va? Nto vakhala wira ninnipaka eyo, tthiri noolikanela wira nakhaleke elapo esya enilamuleliwa ni Yehova. Wiilokiherya wira nakhaleke elapo esya, khonivekela wiiwelela malakiheryo a Yehova olelo-va paahi, masi onihela muhina wiimananiha okhala otteeliwa murima ni okhalana munepa wowiiwelela. Vakhala wira ninniwiiwelela ale anihoolela olelo-va, woonasa wene ninrowa okhala otteeliwa murima ni miteko isya ninrowa ahu ovahiwa, ni ovikaniha okhala owiiwelela. w15 15/8 3:6, 7

Wataana ni atthu oohiloka waahaapwetexa ankhili awe ni omwiiriha ohiya okokhorela wekeekhai. (1 Mam. 11:1-6) Tthiri eyo yoolopola yooloka wa maKristau ale animwaavya mutthu oothelana yoowo onimphenta Yehova! Ankhi vakhala wira mutthu onnipacerya omurumeela Muluku masi othelanne ene ni mutthu ohinaamini? Biibiliya onihimya so: “Vano nyuwo athiyana, nwìweleleke aiy’anyu; siso, yakhalá wira aiy’anyu khanamini masu a Muluku, ephwanyihiweke wamini ni mwettelo anyu worera”. (1 Ped. 3:1) Ekeekhai wira masu ala anaahimya axithiyana ootheliwa ari maKristau, masi masu ala annaahela muhina axilopwana animurumeela Yehova athelanne ni mutthu ohaamini. Miruku sa mBiibiliyani ti soowiiwanyeya saana: Mwiimananihe okhala mulopwana wala muthiyana ooloka, onikhala moovarihana ni malamulo a Muluku voohimya sa ekasamento. Atthu anceene oohaamini yaathelanne ni Kristau aheemererya ekeekhai mwaha wa waaweha aiyaya wala amwaaraya yaawo yeettela sooruma sa Muluku. w15 15/8 4:15, 16

Sookhala iretta sikina sihinisuweliwa murette aya. Nto nihaana okhalana ephoole yuulupale vakhala wira aakhala atthu anihimya wira anniwerya oloola khula eretta, masi yiiraka oomootha. Murummwa Paulo aahuupuxeriwa khulepa oriki: “Orera wanyu murima [ankhili anyu] osuweliweke n’atthu othene”. (aFil. 4:5) Okhalana muupuwelelo wooloka wala ankhili onoonikhaliherya osyaka oviriha okathi munceene niphavelaka inamuna sa olooliwa mpakha oliyala ovara miteko sa Yehova. Vakhala wira okhapelela ekumi ahu tenirowa okhala etthu yuulupale mweekumini mwahu, nto hiyo ninrowa okhala atthu aniphavela mureerelo aya paahi. (aFil. 2:4) Miteko sa Muluku ti sirina efaita yuulupale, ovikana oloola iretta sahu, nto nihaana okhalana ankhili okathi onithanla ahu inamuna sa olooliwa. (aFil. 1:10) Mmyaha ntoko othanla enamuna ya olooliwa, khula mutthu onitthuneya okhala ootaphuwa wira opake yoothanla awe ni weemererya wira khula etthu enikhumelela enrowa okhala muritti awe. w15 15/9 2:8, 10

Yehova ti Muluku ‘òroromeleya’. (Esal. 31:6) Owo onnaaphenta anaawe ni vannimusivela waamwaleela ni waarya wa ekeekhai awe aalakiheryaka mwa khula enamuna mweekumini mwaya, vanceenexa myaha sinivarihana ni okokhorela waya. Ekeekhai xeeni ekumihenrye awe Yehova nto eyo enooniherya sai wira owo onniniphenta? Etthu yoopacerya okhala wira Yehova onniniixuttiha ekeekhai awe. Owo onninisuweliha nsina nawe, nenno nimphwanyaneya ikwaha sinceene mBiibiliyani ovikana masina makina. Mwa enamuna eyo Yehova onninaattamela hiyo, oneemereryaka wira nimusuwele. (Yak. 4:8) Yehova onninisuweliha makhalelo awe. Nnaamwi olumwenku ola wooniheryaka owerya ni ankhili awe, Yehova onninooniherya makhalelo awe makina omurumeelaka Biibiliya ntoko exariya ni vanceenexa ophenta wawe ohinimala. (aRom. 1:20) Owo onoolikana ni tiithi ohiya paahi mwaha wookhalana ikuru ni a ankhili, masi mwaha wooreera murima ni ophenta, nto eyo enniwiiriha anaawe waakhweyerya omwaattamela. w15 15/9 4:8, 9

Atthu anceene anuupuwela wira itthu sinipakiwa ni apinaatamu khasinivarihana ni ele enipaka awe Muluku. Tthiri, akina anikupali wira Muluku khoniphavela osuwela nnakhala vakhaani ele eniwiiraneela apinaatamu. Nuumala okhumelela Munamukhaya Muulupale oniireliwa Haiyan yoowo aapwetenxe mireerelo sinceene elapo ya oFilipina mweeri wa Novembro 2013, mukhulupale a muttetthe mmosa aahimmye so: “Woonasa wene Muluku ooninyanyala”. Atthu akina annipaka itthu yuupuwelaka wira Muluku khoniwerya woona ele enipaka aya. (Yes. 26:10, 11; 3 Yoh. 11) Awo anoolikana ni ale murummwa Paulo aahimya awe oriki: “Awo àkhotta omusuwela sana Muluku”. Atthu awo “mmurimani mwaya mosareya sotakhala sothene; otakhala murima, milili, olimalela sonanara”. (aRom. 1:28, 29) Ankhi hiyo? Moovirikana ni atthu ale aromoliwe osulu iwe, hiyo ninnisuwela wira Yehova onnoona khula etthu enivara ahu. Niireke hiyo ninniwerya woona ntata na Muluku nnikhaliheryaka ni onikhapelela? w15 15/10 1:1-3

Ovara muteko woolaleerya ti enamuna yootepexa otthuneya wira nooniherye waamini wahu. Moota xeeni? Okhala wira muteko ola onivekela omwaamini Muluku ni wira omala wa makhalelo ala a itthu ori vakhiviru, nikupaliki tthiri wira “khivaninteya!” (Hab. 2:3) Enamuna emosa ya ophima waamini wahu ti oweha munnuwelo ni wiimananiha onipaka ahu mmutekoni woolaleerya. Niireke ninnipaka siniwerya ahu, woonasa wene naavyaka inamuna sa wunnuuherya muteko ahu woolaleerya? (2 aKor. 13:5) Tthiri, “mutthu onihimya wamini wawe oholo w’atthu” onnooniherya wira ookhalana waamini vamurimani vawe. (aRom. 10:10) Hiyo ninrowa wooniherya-tho wira ninnaamini okathi oniwanana ahu mixankiho sa khula nihiku. Hata niwereyasiwaka, okhulumuwa, wiiniwa murima, osikhini wala muxankiho mukina, hiyo ninnaamini wira Yehova ni Mwanawe anrowa onikhaliherya “okathi wophwanelela”. (aHéb. 4:16) Hiyo nnimooniherya ororomela iwo okathi onivekela ahu nikhaliheryo nlo ohiya paahi na omunepani. w15 15/10 2:12-14

Nnaamwi mikhalelo sikina waaniheryasa sirowaka wookhoottiherya omusoma Biibiliya, masi iyo khenrowa wookhoottiheryani wuupuwelela itthu siri mmuruni mwanyu, ntoko soolepa sowoosivelani ni masu oolempwa a isipo sa Omwene siniwerya anyu wuupuwela. (Mit. 16:25) Nave munepa wa Muluku onimookhaliheryani wuupuwelela itthu siixuntte anyu khalai. Tivonto, khula esumana nihaana othanla mahiku anrowa ahu osomaka mpantta wa Biibiliya onithokoreriwa. Nave-tho, mahiku makina pooti orumeeliwa wira nuupuwelele ele Yesu yaalavunle awe ni opaka. Nyuwo munneemererya wira Ivangelyo ti iliivuru soosuwelexiwa sa mBiibiliyani sinilavula sa ekumi ni miteko sa Yesu. (aRom. 10:17; aHéb. 12:2; 1 Ped. 2:21) Atthu a Muluku aakhalana iliivuru sinooniherya mwa enamuna yookhweya moovarihana ni okathi saakhumelenle aya sowiiraneya sa Yesu. Iliivuru iyo tthiri sinoowerya onikhaliherya vakhala wira ninnisoma ni othokorerya ipantte sikina sa Ivangelyo sinilavula mwaha yoowo.—Yoh. 14:6. w15 15/10 4:11, 12

Yesu aari mpatthani oophenta ni oororomeleya. Okathi wa Isarayeli a khalai, pwiya, khaamuleela murumeyi awe itthu suupuwela awe opaka. Masi Yesu aahiwooniherya arummwa awe okhala pwiya ni mpatthani oororomeleya. Aaniviriha okathi ni awosa, aanaaleela itthu sawe, ni aanaawiriyana okathi yaamuleela aya itthu saya. (Mar. 6:30-32) Ovaanela moota owo, waahilipiha wataana waya ni wahaalokiherya wira yaakhele miritti suulupale muhoolo, mmuteko wa Muluku. Yesu aaphavela wira awiixutti awe ni apatthani awe ahakalaleke mwaha wa ovara muteko wa Yehova ni nthiti. Tivonto, aaniphavela wira akhaleleke nthiti miteko sa Muluku. Aaphavela wira aluttuweliweke waapaka awiixutti akina! Moophenta, aahaalipiherya awiixutti awe wira aarowa waakhaliherya wira akhumele saana.​—Math. 28:19, 20. w15 15/11 2:3, 5

Ophenta ti mukhalelo wootepexa otthuneya wa Yehova Muluku. (1 Yoh. 4:16) Wanipacerya, Yehova ampattunxe Yesu, yoowo aakhala wiirimu iyaakha soohikontareya, ni iixuttale moota Yehova onipaka awe itthu moophenta. (aKol. 1:15) Okumi awe wotheene, wiirimu ni elapo ya vathi, Yesu ohooniherya wira Tiithi awe toophenta, nto Yesu onnimutakiha yena. Vano, ninnikupali wira olamulelo wa Yehova ni Yesu onrowa weettihiwaka moophenta. Nuumala okohiwa tiivi yaari yooruma yuulupalexa ya Nlamulo, Yesu aahimmye so: “‘Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene’. Ela ti yoruma yulupalexa ni yopajerya. Yoruma yanenli, enlikana ni yopajerya, t’ila: ‘Mumphenteke mukhw’inyu ntoko sinìphentanyu’”. (Math. 22:37-39) Moone wira Yesu aahimyale wira omphenta mukhwiihu ohaana okhala nipuro na nenli, nuumala omphenta Yehova. Ela ennooniherya otthuneya waya waaphenta apatthani ahu otheene. w15 15/11 4:1-3

Nuuvira wa okathi Muluku khaalavula ni apinaatamu orumeelaka eHeeberi paahi. Nuumala okhuma weepotthani oBabilonia, aIsarayeli akina yaanilavula nttaava nniitthaniwa Aramaiko. Woonasa wene, ti nthowa naya Yehova aamuupuxenrye awe Daniyeli, Yeremiya ni Ézira olepa ipantte sa Biibiliya arumeelaka nttaava na Aramaiko. Nuumala Alexandre Muulupale oxintta ilapo sinceene, nto anamunceene okathi ole yaalavula eGriki yaitthaniwa eKoine. Okhala wira aYuda anceene yaahipacerya olavula nttaava nlo, nto Soolempwa sa aHeeberi saahipacerya otaphuleliwa mwa nttaava na eGriki. Nnaamwi saataphuleliwe ni atthu 72, soolempwa iyo, saahivahiwa nsina na Septuaginta. Ela ekwaha yoopacerya Biibiliya aataphuleliwe awe. Mwaha wookhala anamataphulela anceene, nto akina yaataphulela nuulumo ti nuulumo, masi akina nnaari. Hata vari siiso, aYuda yaalavula eGriki ni maKristau, yaanimukupali Septuaginta okhala Nuulumo na Muluku. w15 15/12 1:4-6

Eliivuru ya Yakobo ennitthokiherya ntakiheryo nna eversiikulu 6, eriki: “Nlumi moró”. Nlumi nintaphulela moolumo ahu. Ntoko mooro, moolumo ahu anniwerya okumiherya ehasara yuulupale. Hata Biibiliya onnihimya wira “molumo anniwerya oruha ekumi walá okhwa”. (Mir. 18:21) Ekeekhai wira khaninrowa ohiya olavula noovaka ohimya etthu yoohiloka, ntoko sisaale vahinihiya ahu orumeela mooro noovaka wira onookumiherya ehasara. Etthu yooreerela ori wiikasoopa. Nasuwela okhapelela saana mooro, pooti orumeela wira naapeyeke yoolya, woora, ni omwaleela ohiyu. Nasuwela orumeela nlumi nahu, pooti onvuwiha Yehova ni waakumiherya mireerelo atthu akina. (Esal. 19:15) Hata nirumeelaka iyano sahu wala matata wira nilavule, owerya iwo nirina ahu wa otthokiherya muupuwelo ahu, nivahiwe ni Muluku. Yoovaha ela ehaana orumeeliwa wira yaalipihe akina, ohiya waakhulumula.—Yak. 3:9, 10. w15 15/12 3:1-3

Nto vannikhalela okupali wira Luka aahinvaha malakiheryo Paulo voohimya sa moota wooloola eretta awe ni aahimuloola owo ni apatthani awe a mukwaha. Xeeni vaatthuneya aya wira Luka opake eyo. Okhala wira Paulo nave aahiwereiwa okathi eetta awe mikwaha sa omisionaario. (aGal. 4:13) Luka aanaaloola atthu yaawereiwa moovarihana ni ele Yesu aalavunle awe oriki: “Khahiyó atthu akumi amphaveleliwa mukulukhana: aretta t’amphaveliwa”. (Luka 5:31) Biibiliya khonihimya okathi ni opuro Luka aixuntte awe muteko owo. Masi onnihimya wira Paulo aahaaroihela aKolosi makhomaso a Luka. Nto woonasa wene, Luka aasomme ixikola siniwiixuttiha mameediku oLawodiseya, waattamela oKolosi. Nave-tho, okathi Luka aalempe awe Evangelyo awe ni eliivuru ya Miteko, aahirumeela moolumo anirumeeliwa ni mameediku. Okhala wira yena aari meediku, nto owo aahilepa itthu sinceene voohimya sa miiriirya Yesu aapanke awe wira aapenuxe atthu. w15 15/12 4:11, 12

Yehova ohooniherya oniphenta wawe wuulupale, vaavo vanivahale awe Mwanawe mmoseene. (Yoh. 3:16; 1 Yoh. 4:9, 10) Murummwa Paulo onniitthana yoovaha eyo okhala ‘yovaha yotikiniha’ wala yuulupale ya Muluku. Paulo aanisuwela wira soolakela sotheene sa Muluku saarowa wiiraneya mwaha wa mukuttho wa okumi woomalela wa Yesu. (2 aKor. 1:20) Ela enooniherya wira “sovaha sotikiniha” sa Yehova khahiyo paahi mukuttho wa Yesu, masi sinihela muhina oreera murima ni ophenta Yehova onrowa awe onooniherya muhoolo. Mwekeekhai, yoovaha eyo ti yootikiniha vanceene, vahiniweryaneya awe pinaatamu otthokiherya oratteene. Nooneleke sai yoovaha eyo yuulupalexa? Nto yoovaha ela enrowa onikhaliherya sai? Niireke wira eyo enniwiirihani ovarerya sowiira sanyu nnakhala orukunuxa mweettelo anyu? Niireke enniwiirihani okhala mutthu ooreera murima, oowaareerela murima akina ni waalevelela ale yootthekenle-ni? Muupuweleke wira Yehova ohoovahani etthu yootepa otthuneya omurumeelaka Kristu.​—1 Ped. 3:18. w16.01 2:1, 2, 4, 5

Ale athanliwe ni munepa wootteela, pooti wiikohaka so: ‘Xeeni Yehova ohalaka okithanla miyo? Xeeni ohimuthanlaka mutthu mukina?’ Ikwaha sikina pooti wiikohaka akhala wira onniphwanelela ovahiwa muritti owo. Masi khonihoverya akhala wira oothanliwa wala nnaari; owo onnisuwela tthiri. Ohiya-vo, onnihakalala ni oxukhurela eparakha eyo. Awo anoonela siisaale Pedru oonela awe: “Nimuttottopele Muluku, Tithi awe Pwiy’ahu Yesu Kristu! Owo, n’umoriwa wawe ikharari wulupale, ònivaha ekumi ya nanano mwaha w’ohihimuwa wa Yesu Kristu mw’alipa-òkhwa. Siso nokhalana ororomela w’ekekhai: ninniroromela wakhela yohiyeriwa ehimpweteya, ehinvukuwa, ehinrimela. Muluku ohosukeryani yohiyeriwa ela wirimu”. (1 Ped. 1:3, 4) Vaavo ale oowoottihiwa anisoma aya moolumo ala, annisuwela tthiri wira Tiithi aya a wiirimu onilavula naawo. w16.01 3:11, 12