Moota Wookhalana Etthoko Yoohakalala—Mpantta 1

Ale athelanne niinaano, aniphavela wira ohakalala anikhalana aya nihiku na ekasamento aya okhaleke wa mahiku otheene. Eyo pooti wiiraneya. Maana makristau athenle aahiiso atheliwe khalai aniimananiha weettela miruku sa mBiibiliyani, annisuwela wira vanniweryaneya ohakalala mahiku otheene.

1. Miruku xeeni Biibiliya onaavaha awe alopwana oothela?

Yehova, oomuthanla mulopwana oothela wira okhale muhooleli a etthoko awe. (Mmusome aEefeso 5:23.) Yehova oniphavela wira soothanla mulopwana onipaka awe saaphwanyiheke mireerelo ni waakhaliherya atthu ootheene a etthoko awe. Tivonto Biibiliya onaaleela awe alopwana oothela wira: “Muhihiye omphenta mwaarinyu”. (aEefeso 5:25) Moolumo ala anitaphulela exeeni? Mulopwana oothela oophenta, onnimuthokorerya saana mwaarawe okhale owaani ni ohoolo wa atthu akina. Owo onnimukhapelela ni onnipaka sootheene oniwerya awe wira onvaheke itthu sinimuthowa ni omukhaliherya mmuupuweloni. (1 Timootheyo 5:8) Nave etthu yootepexa oloka, owo onnimukhaliherya mwaarawe okhalana waataana wooloka ni Yehova. (Matheyo 4:4) Mwa ntakiheryo, owo onnivekela ni onnimusoma Biibiliya oryeene ni mwaarawe. Mulopwana onimukhapelela oratteene mwaarawe, onnilipiha waataana wawe ni Yehova.—Mmusome 1 Pedru 3:7.

2. Miruku xeeni Biibiliya onaavaha awe athiyana ootheliwa?

Nuulumo na Muluku Biibiliya ninhimya wira “muthiyana ootheliwa ohaana omuttittimiha vanceene iyawe”. (aEefeso 5:33) Moolumo ala anitaphulela exeeni? Muthiyana ootheliwa, ohaana ovaha efaita mikhalelo sooloka sa iyawe ni wiimananiha onipaka awe wira omukhapelele yena ni anaawe. Nave, muthiyana ootheliwa, ohaana omuttittimiha ni okhaliherya soothanla iyawe onipaka awe, omulavulanaka mooreerela murima ni ohimulavulaka moohiloka hata ohimukokhorelaka Yehova.

3. Anamathelana anrowa olipiha sai ekasamento aya?

Aahimyaka anamathelana, Biibiliya onihimya so: “Oowanli aya anrowa okhala erutthu emosa”. (Matheyo 19:5) Moolumo ala anitaphulela exeeni? Anitaphulela wira anamathelana ahaana wiimananiha wira ophentana waya ohivukuwe. Nto awo ahaana oviriha okathi munceene aryeene hoothe, avaanelaka mootaphuwa, moophenta ni oleelana miyuupuwelo ni moonelo aya. Yehova ookhalana efaita mukasamentoni. Nto omuhiya paahi Yehova, awo khaneemererya etthu aahiiso mutthu mukina okhalanaka efaita yinceene onvikana ole athelanne aya. Nave awo ahaana okhalana ephoole wira ahisiveliweke ni mutthu mukina ahithelanne aya.

MWIIXUTTE ITTHU SIKINA

4. Mulopwana oothela ohaana omphenta ni omukhapelela oratteene mwaarawe

EVIIDIYU: Alopwana Oothela Mwaaphenteke Axaarinyu Ntoko Siniiphenta Anyu (9:53)

• Mulopwana oothela onooniherya sai wira onnimphenta mwaarawe ni onnimukhapelela oratteene?

Mmusome aKolosi 3:12, nuumala-vo mwaakhule nikoho ninttharelana:

• Mulopwana oothela onrowa wooniherya sai mikhalelo sinilavuliwa eversiikulu ela?

5. Muthiyana ootheliwa ohaana omphenta ni omuttittimiha iyawe

Biibiliya onnimutumererya muthiyana ootheliwa omuttittimiha iyawe hata iyawe ohimukokhorelaka Yehova. Mmusome 1 Pedru 3:1, 2, nuumala-vo mwaakhule makoho anittharelana:

• Akhala wira iyanyu khonimukokhorela Yehova, nyuwo munniphavela wira aapacenrye omukokhorela. Nyuwo munoonela sai, etthu xeeni eri yooloka, omakela omulaleerya iyawe okathi wootheene aahiiso omphenta, omureerela murima ni omuttittimiha? Mwaha wa xeeni?

Mulopwana ni mwaarawe anoowerya opaka soothanla sooloka. Masi okathi mukina pooti wira muthiyana khoneemererya yoothanla ya iyawe. Ekeekhai wira owo ohaana ohimya moonelo awe, masi ohaana opaka eyo mwa nttittimiho osuwelaka wira Yehova onvaha mulopwana muritti woopaka soothanla onoona awe wira ti sooloka vatthokoni vawe. Nto muthiyana ootheliwa ohaana wiimananiha okhaliherya yoothanla ya iyawe. Akhala wira onoopaka eyo, muthiyana ootheliwa onookhaliherya ohakalala wa etthoko awe. Mmusome 1 Pedru 3:3-5, nuumala-vo mwaakhule nikoho ninttharelana:

• Yehova onoonela sai okathi muthiyana onimuttittimiha awe iyawe?

6. Vanniweryaneya oxintta mixankiho sa mukasamentoni

EVIIDIYU: Moota Woolipiha Ekasamento Anyu (5:44)

• Eviidiyu niwenhe ahu, etthu xeeni enooniherya wira anamathelana ale yaanivalaana mukina ni mukhwaawe?

• Yaapanke exeeni wira alipihe ekasamento aya?

Mmusome 1 aKorinto 10:24 ni aKolosi 3:13. Nuumala osoma khula yoolepa, mwaakhule nikoho ninttharelana:

• Miruku iya, sinrowa olipiha sai ekasamento?

Biibiliya onihimya wira nihaana ottittimihana mukina ni mukhwaawe. Nto omuttittimiha mutthu onihela muhina omureerela murima ni omuthokorerya saana. Mmusome aRoma 12:10, nuumala-vo mwaakhule makoho anittharelana:

• Niireke anamathelana anrowa ottittimihanaka akhala wira mukina onoopacerya omuttittimiha mukhwaawe? Etthu xeeni eniwiirihani ohimya siiso?

IPONTO SUULUPALE

Mulopwana oothela ni muthiyana ootheliwa, anoowerya ohakalala mukasamentoni mwaya akhala wira anniphentana, annittittimihana ni anneettela malakiheryo a mBiibiliyani.

Wuuluula

• Mulopwana oothela, ohaana opaka exeeni wira okhalane ekasamento yoohakalaliha?

• Muthiyana ootheliwa, ohaana opaka exeeni wira okhalane ekasamento yoohakalaliha?

• Akhala wira moothela aahiiso mootheliwa, malakiheryo xeeni a mBiibiliyani anrowa olipiha ekasamento anyu?

NWEHE ITTHU SIKINA

Nwehe malakiheryo anrowa wookhaliheryani okhalana ekasamento yoohakalaliha.

Etthoko Anyu Enoowerya Okhala Yoohakalala (ebroxura)

Nwehe eviidiyu ya isipo enttittimiherya mareeliho anamathelana aniphwanya aya okathi aneettela aya malakiheryo a Muluku mukasamentoni mwaya.

Um Amor Verdadeiro (4:26)

Nwehe ele onitaphulela aya ottittimiha okhulupale wa iyanyu.

“Athiyana Ootheliwa, Xeeni Vari Aya Vooloka Weemererya Okhulupale?” (Owehaweha, 15 a Maio, 2010)

Nwehe moota malakiheryo a Biibiliya anrowa aya waakhaliherya anamathelana oxintta mixankiho saya.

Biibiliya Ohoopola Ekasamento Ahu (7:12)