Moolumo Oopacerya

Eliivuru ela Iversiikulu Sinaakhaliherya Makristau enimookhaliheryani ophwanya iversiikulu ni soowiiraneya sa atthu aniromoliwa mbiibiliyani sinrowa wookhaliheryani ovilela mixankiho sa khula nihiku. Nave, eliivuru ela munoophwanya soolepa sa mbiibiliyani sinrowa wookhaliheryani waalipiha atthu akina ni opaka soothanla sininvuwiha Yehova. Muthanle mwaha muniphavela anyu. Khula mwaha wookhalana makoho ni otthokiheriwa wa soowiiraneya sa atthu aniromoliwa mbiibiliyani, nto makoho ni soowiiraneya iyo sinimookhaliheryani vanceene. (Nwehe ekaaxa eni: mpantta oni: “Moota Woorumeela Eliivuru Ela”.) Moowaakuveya munoophwanya soolepa ni malakiheryo a mbiibiliyani anrowa woovahani miruku ni woomaalihani. Nave munoophwanya itthu sa efaita yinceene mukhanle anyu oowaaleela atthu akina, ntoko iversiikulu sa mbiibiliyani sinrowa woomaalihani, wookhaliheryani ophuka mixankiho sanyu, woovahani miruku ni woolipihani.

Eliivuru ela, khenihimya iversiikulu sootheene sa mbiibiliyani sa khula mwaha. Hata vari siiso, enimookhaliheryani vanceene otokosa mwaha muniphavela anyu. (Mir 2:1-6) Wiira mwiixutte itthu sikina, murumeeleke inoota sa estudo sa Tradução do Novo Mundo da Bíblia Sagrada. Eliivuru Enaakhaliherya Anamoona a Yehova Otokosa Myaha Sikumiheriwe ni Índice das Publicações da Torre de Vigia wiira nwehe etthu eversiikulu eyo enitaphulela aya ni moota woweettela. Musomeke myaha sikumiheriwe niinaano wiira nwehe wiiwexexa wahu wa niinaano wa ikeekhai sa mbiibiliyani.

Ninnikupali wiira eliivuru ela Iversiikulu Sinaakhaliherya Makristau, enimookhaliheryani okhalana ankhili, osuwela ni wiiwexexa ikeekhai siri Soolempwa Soowaarya. Okathi munrowa anyu orumeelaka eliivuru ela, munrowa otepaka okupali wiira “nuulumo na Muluku nikumi, ni nookhalana owerya wuulupale”. — aHeeb. 4:12.