Maio

Yehova oonivaha itthu sinnikhaliherya omusuwela oratteene Yesu, itthu sene tiiya: Ivangelyo xexe siri mBiibiliyani. Iliivuru iyo xexe siri mBiibiliyani sinnitthokiherya oratteene okumi ni muteko woolaleerya wa Yesu. Nave ivangelyo iyo ninniphwanya itthu Yesu aahimmye awe, aapanke awe ni sinninooniherya moonelo wa Yesu. Nikhaliheriwaka ni Ivangelyo iyo xexe sa mBiibiliyani, nnoowerya ‘wuupuwela saana’ ntakiheryo na Yesu. Maana Ivangelyo iyo sinnooniherya mavalo Yesu ohiyale awe wira nitthareke. Nto naaphavelaka omusuwela oratteene Yesu, nihaana osoma Ivangelyo iyo. Niira siiso, nnoowerya otthara oratteene mavalo awe. Wira nittottele mureerelo Ivangelyo xexe sa mBiibiliyani, nihaana opaka etthu ekina ohiya paahi osoma. Nihaana waavya okathi wira nisome ni wuupuwelela oratteene ele nisomme ahu. (Mulikanyihe ni Yoxuwa 1:8.) Nto murumeeleke iliivuru ni itthu sikina ninvahiwa ahu ni mutthenkeso wa Yehova. w21.04 4-5 itti. 11-13

Iyaakha sinceeneYesu ohinatthi orwa valaponi, Yehova aahooniherya mBiibiliyani wira Mesiya aarowa otumihiwa ni musurukhu 30 wa eparatha. (Zak. 11:12, 13) Mutthu aarowa onvariha aarowa okhala mpatthani awe. (Esal. 41:9) Profeta Zakariya, aalempe so: “Mmwive makampusi uwo, ipwittipwitthi simwareye”. (Zak. 13:7) Atthu otheene yaarina murima wooloka khiyaakhumunwe mwaha wa itthu iye saakhumelenle. Ohiya-vo, awo yaahilipiha vanceene waamini waya vaavo yaawenhe aya iprofesia iye siiraneyaka mookumini mwa Yesu. Niireke muxankiho owo olelo-va wookhala? Aayo. Mahiku ahu ala, Anamoona a Yehova akina oosuweliwa vanceene aahiya ekeekhai nto aapakeya anammwareya ni aniphavela waahapuxa atthu akina. Awo annirumeela iliivuru, interneti wira amwara-mwarye itthu sowoothiwa ni itthu sikina sinikhala ntoko wira ti seekeekhai masi siri ene itthu sowoothiwa voohimya sa Anamoona a Yehova. Masi atthu ale arina murima wooloka khanikhumuwa mwaha wa itthu iyo soohiloka sinihimmwa. Ohiya-vo, awo annisuwela wira Biibiliya aahihimya wira mahiku ala yaamukhala anammwareya.— Math. 24:24; 2 Ped. 2:18-22. w21.05 11 etti. 12; 12-13 itti. 18-19

Biibiliya onnooniherya oratteene wira naarowa wiiwexexaka oratteene ekeekhai, vaavo okathi waarowa aya oviraka. (aKol. 1:9, 10) Nave Yehova onninikhaliherya wiiwexexa ekeekhai vakhaani-vakhaani, nto nihaana opixa murima nilipelelaka okathi ekeekhai enrowa aya otepaka waarya. Vaavo ale annihoolela anoona aya wira wiiwexexa wahu ekeekhai ohaana olokiheriwa, awo khanoovelela opaka marukunuxo. Ahooleli anceene a itiini sowootha annipaka marukunuxo wira yaasiveliheke atthu aneetta etiini aya wala avarihaneke ni muupuwelo wa atthu a mulaponi. Masi marukunuxo anipakiwa mmutthenkesoni mwa Yehova, anipakiwa wira anikhaliheryeke omwaattamela Muluku ni avarihaneke ni enamuna ya okokhorela yaakumiheriwe ni Yesu. (Yak. 4:4) Hiyo ninnipaka marukunuxo ohiya mwaha wa oturukeya muupuwelo wa atthu, masi mwaha woowi ninnimwiiwexexa Biibiliya. Tthiri hiyo ninnisiveliwa vanceene ekeekhai! — 1 aTes. 2:3, 4. w21.10 22 etti. 12

Muhaana opaka exeeni woophwanyani omeekha? Muupuweleke moota Yehova onookhaliheryaaweni. (Esal. 55:23) Akhala wira munoopaka eyo, enimookhaliheryani okhalana moonelo wooloka voohimya sa muxankiho anyu. Muupuweleke moota Yehova onaakhaliherya awe anna ni arokora aniwanana omeekha. (1 Ped. 5:9, 10) Munna oniihaniwa Hiroshi yoowo ori mwekeekhaini mekhawe okhuma khalai, onihimya so: “Osuwela wira otheene ahu ninniimananiha wira nimukokhoreleke Yehova ennaalipiha atthu akina ari mekhaya mwekeekhaini ntoko miyo”. Nave mwiimananiheke ovekela, omusoma Biibiliya ni orowela mithukumano. Ti vooloka osoma Nuulumo na Muluku khula nihiku ni muupuweleleke sowiiraneya sinooniherya wira Yehova onnoophentani. Anna ni arokora akina, annihela mmuru soolepa soomaaliha ntoko Esalimo 27:10 ni Yesaya 41:10. Akina, anoona wira waawiriyana audio a Biibiliya ookravariwa ni iliivuru sikina ninrumeela ahu okathi wa mithukumano, onnaakhaliherya ovilela omeekha. w21.06 9-10 itti. 5-8

Niireke mooriipiwa murima mwaha wa okhweliwa mutthu mwamphenta anyu? Akhala wira ti siiso, mulipihe waamini wanyu nlipelelo na ohihimuxiwa musomaka sowiiraneya sa mBiibiliyani sa atthu yaahihimuxiwe. Niireke nyuwo muriipiwe murima mwaha woowi mmusi anyu orookumihiwa mmulokoni? Akhala wira ti siiso, muhihiye okupali ni murima wotheene wira ottaruxa wa Muluku ti wootepexa oloka. Moohicikha enamuna ya muxankiho muniwanana anyu, murumeeleke okathi owo wa mixankiho wira mulipihe waamini wanyu. Munvekeleke Yehova ikwaha sinceene. Muhiivalaanyeke, ohiya-vo mukhaleke hoothe ni anna ni arokora. (Mir. 18:1) Nave muhihiye ovara miteko sinrowa wookhaliheryani ovilela hata nvaraka miteko iyo munlaka mwaha wa wuupuwela itthu sookhumelenleni. (Esal. 126:5, 6) Nave-tho muhihiye orowela mithukumano, olaleerya ni omusoma Biibiliya. Etthu ekina munireerela anyu opaka ori ohihiya wuupuwela itthu soovara murima Yehova ooleihenryaaweni muhoolo. Nto okathi munrowa anyu owehaka moota Yehova onookhaliheryaaweni, munootepaka olipiha waamini wanyu ni omuroromela wanyu Yehova. w21.11 23 etti. 11; 24 etti. 17

Mwa enamuna xeeni ekina awiixutti a Yesu ari aya ntoko “acikhaani”? Atthu xeeni olumwenku ola onaathokorerya awe okhala a faita yinceene? Olumwenku ola onnaavaha efaita yinceene, atthu oothaaciri, oovuwa ni arina okhulupale. Awiixutti a Yesu kharina itthu iyo. Nto atthu a olumwenku ola, aniwoona okhala “acikhaani” ni khanaavaha efaita. (1 aKor. 1:26-29) Masi Yehova khonaathokorerya mwa enamuna eyo.Etthu xeeni yaamwiirinhe Yesu waalavula acikhaani ala? Etthu yaamwiirinhe, okhala wira awiixutti awe yaahimukoha wira: “Ti pani ori muulupalexa Moomweneni wa wiirimu?” (Math. 18:1) AYuda anceene a okathi ole, yaanivaha efaita yinceene okhala muulupale wala okhalana okhulupale mmuttettheni. Olavulaka sa mwaha awo, musomi mmosa ohimmye so: “Alopwana yaakhala okathi ole, yaaniimananiha mpakha okhwa aphavelaka ottittimihiwa, okhalana mweettelo wooloka, ovuwa, weemereriwa ni atthu akina ni ottittimihiwa vanceene”. Yesu aanisuwela wira awiixutti awe yaahaana wiimananiha vanceene wira ahixinttaneke, mweettelo yoowo waavahiwa efaita yinceene ni soolema sa aYuda. w21.06 20 etti. 2; 21 etti. 6, 8; 22 etti. 9

Murummwa Paulo ohaavaha ntakiheryo nooloka axitokweene. Okathi anna a oTesalonika yaareerela aya ovahiwa miruku, Paulo aahaavaha. Masi hata vari siiso, ikarta aalepenle awe, ohinatthi waavaha miruku, aahiromola mikhalelo sooreera yaarina aya ntoko waamini, ororomeleya ni ovilela. Nave-tho aahaattottopela anna ale, mwaha woovara miteko moophenta. Aahivarerya makhalelo aya, ni aahiweha wira okumi aya khahiyo waari wookhweya, maana yaanilupatthiwa vanceene. (1 aTes. 1:3; 2 aTes. 1:4) Murummwa Paulo aahihimya-tho wira anna ale, yaanaavaha ntakiheryo nooloka makristau makina. (1 aTes. 1:8, 9) Tthiri makristau a oTesalonika yaahihakalala nuumala omwiiwa murummwa Paulo aattottopelaka! Yaanikupali wira Paulo aanaaphenta vanceene axinna awe. Ti maana aya miruku aavanhe awe, saalipinhe aya vanceene. — 1 aTes. 4:1, 3-5, 11; 2 aTes. 3:11, 12. w22.02 15 etti. 6

Satana onnaarumeela ahooleli a etiini yoowootha wira amootheryeke Yehova wira tonikumiherya ohaawa wotheene wa apinaatamu. Mwa ntakiheryo, vaavo mwaana onikhwa awe, ahooleli akina a itiini anihimya wira Yehova tomukunxe wira akhale nlaikha wiirimu. Tthiri awo anninveeha Muluku! Hiyo ninnisuwela oratteene wira Yehova, Muluku oophenta. Vaavo ninwereiwa ahu wala onikhwa awe mutthu namphenta ahu, hiyo khanninvaha nthowa Muluku. Ohiya-vo, hiyo ninnikupali ni murima wotheene wira nnoophiya nihiku onrowa awe omaliha iretta ni okhwa. Nto nihaana waaleela atthu otheene aniphavela oniwiriyana wira Yehova Muluku oophenta. Niira siiso, nnoomukhaliherya Yehova omwaakhula ole oninveeha. (Mir. 27:11) Yehova onniwoonela othunku arumeyi awe. Nto onninyokha ni onniriipiwa murima vaavo onaaweha awe arumeyi awe ahaawaka, alupatthiwaka awereiwaka ni awananaka mixankiho sinikumeheriwa mwaha wa ohimalela. (Esal. 22:24, 25) Yehova onnoona mixankiho sahu ni onniphavela omaliha. Tthiri owo onrowa omaliha mixankiho iyo. —  Mulikanyihe ni Okhuma 3:7, 8; Yesaya 63:9. w21.07 9-10 itti. 9-10

Apinaatamu oowiiwelela anookhalana eparakha yuulupale ya omphenta ni omukokhorela Yehova mahiku otheene. Nave Yesu onoomaliha mixankiho sotheene sikhumelenle nuumala Adamu ni Eva ohiya wiirela mpantta emusi ya Muluku. Ohiya-vo, Yehova onimwaahihimuxa atthu imilyau sinceene akhwiiye ni onimwaavaha eparakha ya okhala mahiku otheene arina ene okumi wooloka ni elapo eri ene eparayiisu. (Luka 23:42, 43) Vaavo apinaatamu oowiiwelela anrowa aya okhalaka oomalela, awo anookhalana “ovuwa ni nttittimiho” ntoko Davidi olempe awe. Akhala wira nyuwo muniirela mpantta “muttitthi muulupale” mookhalana nlipelelo noohakalaliha. (Wiis. 7:9) Muluku onnoophentani vanceene ni oniphavela wira mwiirele mpantta emusi awe. Nto mpakeke sotheene muniwerya anyu wira mmuhakalaliheke Muluku. Khula nihiku muupuweleke ni muhele vamurimani vanyu sooleiherya sa Muluku. Muxukhureleke eparakha murina anyu ya omukokhorela Tiithi ihu oophenta a wiirimu. Nave nvaheke efaita nlipelelo murina anyu na onvuwiha Yehova mahiku otheene! w21.08 7 itti. 18-19

Profeta Yeremiya, aahiviriha iyaakha 40 olaleeryaka nnaamwi atthu anceene yahanwiriyana ni yaamulupattha. Owo aahikhulumuwa vanceene mwaha woowi awanani awe ‘yanimuruwana ni yaninveha’. Owo aanuupuwela ohiya muteko ole aarummwale awe. (Yer. 20:8, 9) Masi niireke Yeremiya aahikhulumuwa? Exeeni yaamukhalihenrye oxintta muupuwelo awe woohiloka ni ohakalala vaavo aalaleerya awe? Owo aaniwehexexa itthu piili sa efaita yinceene. Etthu yoopacerya, muhupi wa Muluku Yeremiya aalaleerya awe atthu waanaavaha nlipelelo ni ‘oholo wororomeleya’. (Yer. 29:11) Ya nenli, Yehova aahimuthanla Yeremiya ni aahimuruma olaleya muhupi awe. (Yer. 15:16) Hiyo nave ninnilaleya muhupi onaavaha atthu nlipelelo olumwenku ola wootakhala. Nave ninnikuxa nsina na Yehova ntoko Anamoona awe. Vaavo hiyo ninwehexexa ahu itthu iyo, ninnihakalala hata atthu akina aniwiriyanaka wala ahiniwiriyanaka. Khanikhanle ookhulumuwa akhala wira anaxikola ahu a Biibiliya khanlipiha waamini waya moowaakuveya ntoko hiyo nimphavela ahu. Nihaana opixa murima okathi nnaapaka ahu awiixutti. — Yak. 5:7, 8. w21.10 27 itti. 12-13

Hata nivirinhe ene okathi munceene nimurumeelaka Yehova, nihaana ohihiya olipiha waamini wahu. Mwaha wa xeeni? Mwaha woowi akhala wira khanniivaha ephoole, waamini wahu pooti ovukuwa. Muhiliyale wira waamini onihela muhina okupali ikeekhai sihinooneya. Nto vannikhweya oliyala itthu nihinwerya ahu woona. Eyo ti etthu yaamwiirinhe Paulo ohimya wira ohikhalana waamini “etampi enaakuva onihopha”. Nihaana opaka exeeni wira nihimorele muraakho owo? (2 aTes. 1:3) Yoopacerya, okathi wotheene mmuxontteleke Yehova wira oovaheeni munepa awe woowaarya. Mwaha wa xeeni? Mwaha woowi waamini oniirela mpantta mikhalelo sinikumiheriwa ni munepa woowaarya. (aGal. 5:22, 23) Nto nihikhaliheriwaka ni munepa woowaarya, khaninrowa owerya olipiha omwaamini wahu Mpattuxa. Musuweleke wira akhala wira nnonvekela Yehova munepa awe woowaarya, owo onoonivaha. (Luka 11:13) Okathi mukina hiyo pooti ovekela mooluluwanya nihimyaka wira: “Muncererye waamini wahu”. (Luka 17:5) Ya nenli, okathi wotheene musomeke Nuulumo na Muluku. — Esal. 1:2, 3. w21.08 18-19 itti. 16-18

Anna ni arokora oowuuluvala anoowerya okhaliherya mutthenkeso wa Yehova mwa inamuna soovirikana. Ekeekhai wira awo kharina ikuru ntoko yaarina aya khalai, masi okathi wotheene avirinhe aya amurumeelaka Yehova, awo aakhalana sookumanana sinceene. Nto anoowerya okhaliherya mutthenkeso wa Yehova mwa inamuna soovirikana. Tthiri anna ni arokora oowuuluvala aakhalana efaita yinceene. Biibiliya ookhalana matakiheryo ooloka a arumeyi a Yehova oororomeleya yahaahiyale ovara muteko awe hata yuuluvanle ene. Mwa ntakiheryo, Moise aapacenrye orumeela ntoko profeta a Yehova orina ene iyaakha 80 ni aari namitthaka a nloko na aIsarayeli. Okathi Daniyeli aarina awe iyaakha saavikana 90, Yehova khaahiyale omurumeela ntoko profeta. Nave vanikhala ntoko wira murummwa Yohani aarina iyaakha sinivikana 90 vaavo aarummwale awe olepa eliivuru ya Wiisuupulula. Biibiliya onnimulavula mulopwana iihaniwa Simeyoni, yoowo ‘aari naxariya ni aamoova Muluku’. Masi Yehova aanimusuwela oratteene Simeyoni ni aahinvaha eparakha ya onweha Yesu ni opaka iprofesia voohimya sa Yesu ni maama awe. — Luka 2:22, 25-35. w21.09 3-4 itti. 5-7

Anamuyari, ahaana okhalana ephoole wira ahaalikanyiheke anaaya ni anamwane akina ni ahaavekeleke opaka itthu ahiniwerya aya. Maana eyo pooti okumiherya mixankiho. Mwaana owo pooti onyoonyiheya vanceene. (aEef. 6:4) Murokora oniitthaniwa Sachiko onihimya so: “Maama aka, aaphavela wira iprova kimphanyeke 20, etthu yeeyo koona aka wira khiyaaweryaneya. Nnaamwi sivinre ene iyaakha sinceene okhuma vaavale miyo kimalinhe aka oxikola, mpakha olelo-va miyo kinniikoha akhala wira konvarela Yehova muteko wooloka”. Mwene Davidi ohimmye wira murima awe ‘khaphavela itthu sulupale’, seiyo ahaawerya awe ophwanya. Mwaha wa wiiyeviha ni wiisuumaaliha, Davidi ‘ahimaliha ni witthyaliha murima awe’. (Esal. 131:2) Moolumo ala a Mwene Davidi aniwiixuttiha exeeni anamuyari? Anamuyari ahaana wiiyeviha ni wiisumaaliha. Ohiya paahi ele akhanle aya oopaka, masi-tho ele anlipelela aya wira anaaya apakeke. Musuweleke wira sookhala itthu aniinyu anwerya aya ni ahinwerya aya opaka ni mwaakhaliheryeke okhalana soolukama anrowa aya owerya ophwanya. Akhala wira munoopaka eyo, aniinyu animoonaka wira aakhalana efaita yinceene. w21.07 21-22 itti. 5-6

Othene ahu nisuweleke wira Yehova oonivaha eparakha ya othanla mootaphuwa. Eyo enitaphulela wira nihaana othanla omwiiwelela wala nnaari. Anamwane akina khiyaavahiwe ntakiheryo nooloka ni anamuyari aya masi hata vari siiso, awo yaahithanla omurumeela Yehova ni olipiha omwaamini waya ni ovara muteko awe. Anamwane akina, anamuyari aya yaahiimananiha owiixuttiha omphenta Yehova. Masi nuumala wunnuwa awo yaahihiya omurumeela Yehova. Nto vannooneya oratteene wira otheene ahu nihaana othanla omurumeela Yehova. (Yox. 24:15) Masi anamuyari ale ariipiwe murima mwaha woowi anaaya aahiya omurumeela Yehova, awo pooti wuupuwelaka wira khawenrye omwiixuttiha oratteene mwanaya! Okathi mukina paapa wala maama onnihiya omurumeela Yehova ni etthoko awe. (Esal. 27:10) Eyo ennaaxankiha vanceene anamwane, mwaha woowi awo anlipa ni anamuyari aya ni aniphavela otthara ntakiheryo naya. Anamwane, musuweleke wira vaavo maama anyu wala paapa anyu onikumihiwa awe mmulokoni, murima onniniwereya vanceene! Nave musuweleke wira Yehova onnisuwela muxankiho anyu. Owo onnihakalala vanceene vaavo muhinihiya anyu ororomeleya. Nave musuweleke wira nyuwo khamurina nthowa mwaha wa soothanla sa anamuyari anyu. w21.09 27 itti. 5-7

Vaavo mukristau onikumihiwa awe mmulokoni, ori ntoko epwittipwitthi eniwereiwa ni pooti oraviha eretta eyo ipwittipwitthi sikina. Masi eretta awe ti yomunepani. (Yak. 5:14) Ntoko iretta sikina hiyo ninsuwela ahu, iretta sikina sa omunepani sinniravihaniwa. Nto okathi mukina vannireerela ovalaanyiwa epwittipwitthi eyo eniwereiwa mmulokoni. Ottaruxiwa iwo onooniherya wira Yehova onniphenta ipwittipwitthi soororomeleya ni oniphavela omukhaliherya ottharuwa mutthu ole okumihiwe mmulokoni. Mutthu okumihiwe mmulokoni pooti opaka itthu sikina. Mwa ntakiheryo, owo pooti orowela mithukumano sa mmulokoni okhanle awe oovahiwa malakiheryo anikhuma mBiibiliyani wira olipihe waamini wawe. Nave pooti ovahiwa iliivuru sinimutthokiherya Biibiliya wira osomeke ni oweha iprokrama sa JW Broadcasting^®. Okathi axitokweene anoona aya wira mutthu owo onnipaka marukunuxo, awo anninvaha malakiheryo anrowa omukhaliherya otthikela okhalana waataana wooloka ni Yehova. Nto, malakiheryo awo woonasa wene pooti omukhaliherya otthikela mmulokoni wira okhale Namoona a Yehova. w21.10 10 itti. 9, 11

Olelo-va sookhala inamuna nintthara ahu voohimya sa enamuna ya okokhorela yaatthariwa ni makristau a okathi wa arummwa. Mwa ntakiheryo, mutthenkeso ahu otthokihiwe ntoko waatthokihiwe aya muloko wa makristau a okathi wa arummwa. Hiyo nookhalana axitokweene a esirkwiitu, axitokweene a mmulokoni ni arumeyi ookhaliherya. (aFil. 1:1; Tito 1:5) Nave naatakihaka makristau a okathi wa arummwa, hiyo ninnittittimiha malamulo a Yehova voohimya sa orupihana, ekasamento, ephome ni ninnikhapelela muloko wira ohihapuxiwe ni atthu ale anipaka itampi ahinattharuwa. (Mit. 15:28, 29; 1 aKor. 5:11-13; 6:9, 10; aHeeb. 13:4) Biibiliya onihimya wira ori “waamini . . . omosa-ru” paahi Muluku oneemererya awe. (aEef. 4:4-6) Tthiri eparakha yuulupale okhala atthu a Yehova, osuwela ekeekhai ni ele Yehova oniphavela awe! Nto nihihiye ovarexexa ekeekhai ni murima wotheene. w21.10 22-23 itti. 15-17

Mwene Yosafati aahikhalana mixankiho sikina suulupale. Anakhotto ootupa a wAmoni, oMowabi ni a mittetthe sa omiyaakoni wa oSeyiri yaahirwa omutuphela Yosafati ni atthu awe. (2 Wah. 20:1, 2) Yosafati aapanke exeeni? Owo aahinvekela Yehova wira omukhaliherye ni onvaha ikuru. Moowiiyeviha, Yosafati aahipaka nivekelo niri 2 Wahala 20:5-12, nenno nnooniherya wira aanimuroromela Tiithi awe a wiirimu, Yehova. Omurumaka mulevi iihaniwa Yahaziyeli, Yehova aahimuleela Yosafati moolumo a yoolepa ya olelo. Omuroromelaka Yehova ni murima wotheene, Yosafati aahitthara malakiheryo aavahiwe awe. Okathi Yosafati ni atthu awe yaaronwe aya okumana ni awanani aya, Yosafati aahaahela ohoolo ohiya anakhotto ootupexa, masi alipa-oowiipa. Yehova aahipaka ele aamuleihenrye awe Yosafati. Maana owo aahaaxintta awanani awe oowerya. — 2 Wah. 20:18-23. w21.11 15-16 itti. 6-7

Hata nikhalanaka mixankiho nikupaliki wira Yehova onoonikhaliherya wira nihihiye okhalana waataana wooloka ni yena. (2 aKor. 4:7-9) Nto nikupaliki ni murima wotheene wira Yehova khonrowa ohiya onooniherya ophenta wawe wekeekhai mwaha woowi Biibiliya onihimya wira “Apwiya t’anasuka ale aniwova: ale anroromela orera waya murima”. (Esal. 33:18-22) Nihinatthi opacerya omurumeela Yehova, owo anniniphenta ntoko onaaphenta awe apinaatamu otheene. Masi nuumala opacerya omurumeela ninnittottela mureerelo ophenta wawe wekeekhai. Okhala wira onniniphenta, Yehova onninikhupaarela ni onninikhapelela. Owo khonikhala-khala oninyanyalaka ni onoomaliherya itthu sotheene onileihenrye awe, maana owo oniphavela wira nikhale apatthani awe mahiku otheene. (Esal. 46:2, 3, 8) Nto hata nikhalanaka mixankiho, Yehova khonrowa ohiya onivaha ikuru wira nihihiye ororomeleya. w21.11 7 itti. 17-18

Woonasa wene, nyuwo munnaasuwela atthu aniviriha okathi munceene ananariwe ene ni mutthu anivarana aya muteko, anisomana aya oxikola, mmusi aya wala mutthu mukina. Muupuweleke wira, axinnawe Yosefe 10, yaanimunlela ikuhu Yosefe. Nto mwaha waivaavo, awo yaahimwiiriha Yosefe etthu yootakhala. (Maph. 37:2-8, 25-28) Masi Yosefe khaathokorerya axinnawe mwa enamuna yoohiloka! Okathi Yosefe aarina awe okhulupale, owo anwerya owunlela ikuhu axinnawe, masi owo kaapanke eyo. Maana owo aahaamorela ikharari. Tthiri vannooneya oratteene wira Yosefe khaawunlenle ikuhu. Tthiri Yosefe aahitthara oratteene miruku siri Onamukuttho 19:18. (Maph. 50:19-21) Mukristau oniphavela omusiveliha Muluku, ohaana omutakiha Yosefe, yoowo aalevelenle axinnawe ohiya owunlela ikuhu. Yesu onitumerenrye awe opaka nivekelo na nlikanyiho. Maana, owo aahimmye wira nihaana waalevelela ale annitthekela. (Math. 6:9, 12) Nave murummwa Paulo, ohaatumererya makristau wira: “Axinnaka, muhinleke ikuhu”. — aRom. 12:19. w21.12 11 itti. 13-14

Ohiyu wa 24 a Nisani mwaakha wa 33 Nuumala Kristu Orwa, Yesu aahirowa ojardim ya oXeseemani. Nuumala ophiya, aahimutthukulela murima awe Yehova. (Luka 22:39-44) Okathi ole wooxankiha Yesu “aahimuxonttela ni onvekela Muluku . . . okhuwelaka vanceene ni inlaka”. (aHeeb. 5:7) Itthu xeeni aahimmye awe okathi aavekela awe ohiyu ole wookiserya ohinatthi wiiviwa? Aavekenle ikuru wira ohihiye ororomeleya wa Yehova ni owerye omusiveliha. Yehova aahiiwa nivekelo nne nooxonttela na Yesu ni aahiruma nlaikha wira namulipihe. Yesu aanisuwela wira aahikhalana muritti muulupale, eyo piiyo, okhala oororomeleya ni okhaliherya ediretu ya Tiithi awe ya olamulela. Yehova aahiiwa itthu Yesu aavenke awe. Mwaha wa xeeni? Mwaha woowi etthu yuulupale Yesu aaphavela awe, waari ohihiya ororomeleya wa Tiithi awe ni waakiherya nsina Nawe. Akhala wira hiyo nnooxankiheya Yehova onoonakhula okathi ninrowa ahu onvekelaka wira onikhaliherye. — Esal. 145:18. w22.01 18 itti. 15-17

Atthu anceene olelo-va, annikhumuwa mwaha woowi khaninkhaliherya myaha sa epoliitika. Awo anuupuwela wira naahaana okhaliherya epoliitika ni ovotari okathi wa mwaathanle. Masi hiyo ninnisuwela oratteene wira omuthanla pinaatamu wira okhale muhooleli ahu waarowa okhala omukhootta Yehova. (1 Sam. 8:4-7) Atthu akina anuupuwela wira naahaana oteka ixikola, ixiripitaali ni itthu sikina sinikhaliherya mmuttettheni. Awo annikhumuwa mwaha woowi nniimananiha olaleya ihapari sooreera ohiya omananiha ophuka mixankiho sa moolumwenkuni. Nihaana opaka exeeni wira nihikhumuwe? (Math. 7:21-23) Etthu nintepa ahu ovaha efaita ori ovara muteko Yesu onrumme awe. Nto nihikhala-khale nihapuxiwaka ni epoliitika ni mixankiho sa moolumwenkuni. Hiyo ninnaaphenta vanceene atthu ni ninniriipiwa murima mwaha wa mixankiho sinaaphwanya. Masi ninnisuwela wira enamuna yuulupale ya waakhaliherya atthu akina, ori owiixuttiha voohimya sa Omwene wa Muluku ni waakhaliherya okhalana waataana wooloka ni Yehova. w21.05 7 itti. 19-20

Nnaamwi olelo-va, anamalamulela anceene ahimyaka wira annimukokhorela Muluku, awo khaniphavela ohiya okhulupale aya. Ntoko anamalamulela a okathi wa Yesu, anamalamulela a olelo-va khanimphavela ole othanliwe ni Yehova, mwaha woowi annaalupattha atthareli awe. (Mit. 4:25-28) Yehova onoonela sai? Esalimo 2:10-12 enaakhula so: “Vano, nyuwo mamwene, mukhalé atthu a miruku: nyuwo makhulupale a mulaponi, mulakeyeke. Murumeleni Muluku ni wova: mwattittimihe Apwiya n’uthukumela. Mwahiré siso, awo anonanariwa, nyuwo munimokhwa: owali aya onovarela nananoru. Òreriwa t’ale antthyawela wa Muluku!” Mooreerela murima, Yehova onnaavaha okathi awanani awe wira arukunuxe murima. Nto awo pooti orukunuxa muupuwelo aya ni weemererya Omwene wa Yehova. Masi okathi ohanle ori vakhaani. (Yes. 61:2) Olelo-va, ti vootepexa otthuneya atthu otheene osuwela ekeekhai ela ni othanla omurumeela Yehova. w21.09 15-16 itti. 8-9

Paulo aaphavela ohimya wira nihaana otteeliwa murima hata nirina ene itthu soowaatta aahiiso vakhaani. (aFil. 4:12) Etthu yuulupalexa nirina ahu, ompatthani ahu ni Yehova, ohiya itthu nrina ahu. (Hab. 3:17, 18) Nuumala aisarayeli omaliha iyaakha 40 yeettaka moothakoni, Moise aahaaleela so: “Mùpuwele wira Apwiya Muluku anyu ahorerihelani miteko sanyu sothene. Iyakha sivinre miloko mixexe (40), Apwiya Muluku anyu ekhalaka ni nyuwo, khivo yohalenleni”. (Otum. 2:7) Iyaakha iye 40, Yehova aahaavaha aisarayeli eyoolya ya emana. Ohiya-vo, ikuwo yaawanre aya iyaakha iye 40, saari seiye yaakhumanne aya wExiitu. (Otum. 8:3, 4) Nihaana omutakiha Moise, nitteeliwaka murima ni itthu nirina ahu. Akhala wira nnoovaha efaita itthu saamukhaani Yehova onnivaha awe, nnaweha itthu iyo ntoko mareeliho, nnoomuhakalaliha Muluku ahu. w22.01 5 itti. 10-11

Alopwana oothela, ntakiheryo na Yosafati nnoowiixuttihani itthu sinceene. Nyuwo mookhalana muritti wookhapelela etthoko anyu, tivonto muniimananiha anyu vanceene okhaliherya. Okathi munikumana anyu mixankiho, pooti wuupuwelaka wira munoowerya ophuka mixankiho iyo mekhinyu. Masi muhikhala-khale muroromelaka ikuru sanyu, ohiya-vo muri ene mekhinyu muhaana onvekela Yehova wira ookhaliheryeni. Nuumala-vo, nvekeleke muri ene ni mwaarinyu. Mutthareke malakiheryo a Yehova mmusomaka Biibiliya, iliivuru sinimutthokiherya Biibiliya sinikumiheriwa ni mutthenkeso ahu ni weettela malakiheryo muniphwanya anyu. Atthu akina pooti oheemererya soothanla munipaka anyu sinivarihana ni Biibiliya. Ohiya-vo, atthu akina pooti ohimyaka wira musurukhu ni othuma itthu sinceene onimookhaliheryani okhapelela etthoko anyu. Masi muhiliyale ntakiheryo na mwene Yosafati. (2 Wah. 20:1-30) Owo aahimuroromela Yehova ni aahooniherya eyo ni miteko sawe. Yehova khaamunya-nyanle mulopwana ole oororomeleya ni khonikhala-khala oonyanyalakani. — Esal. 37:28; aHeeb. 13:5. w21.11 15 etti. 6; 16 etti. 8

Muluku onipattunxe wira niweryeke wooniherya mikhalelo sawe. Tivonto vannireerela waathokoreryaka atthu ootheene mwa xariya. (Maph. 1:26) Masi mwaha wooyariwa nitthenke ene, hata nuupuwelaka wira ninnisuwela itthu sootheene siiraneyale, hiyo pooti ophukaka moohixariya. Mwa ntakiheryo, nkahaya nuupuwele moota Yona aariipiwe awe murima, okathi Yehova aawoonenle awe othunku atthu a oNiinive. (Yona 3:10–4:1) Masi nkahaya muupuwele etthu yaakhumelenle mwaha wa Yehova opaka eyo. Atthu a oNiinive yaawo yaavikana 120.000, yaahittharuwa mweettelo aya wootakhala, ni khiyaiviwe. Wanikisa waya, vaahooneya wira Yona, taareerela ottaruxiwa, ohiya Yehova. Yehova khonkhanyereriwa waaleela apinaatamu mathowa animwiiriha opaka soothanla. Ekeekhai wira khalai, Yehova aahiweemererya arumeyi awe ohimya moota yoonela aya soothanla aapanke awe, aahiiso aarowa awe opaka. (Maph. 18:25; Yona 4:2, 3) Nave, okathi mukina, Yehova aahitthokiherya nthowa naya aapanke awe soothanla iyo. (Yona 4:10, 11) Masi hata vari siiso, Yehova ohinatthi opaka etthu aahiiso nuumala opaka, khonlipelela weemereriwa ni apinaatamu. — Yes. 40:13, 14; 55:9. w22.02 3-4 itti. 5-6

Vaavo nnaathokorerya ahu atthu akina okhala aalupale ‘wiivikana mmansihu’ hiyo ninniixoona okhala “mwaamukhaani”. (aFil. 2:3) Nto vaavo nniithokorerya ahu mwa enamuna eyo, ninnisyaka waakhumuliha atthu akina. Anna ni arokora otheene taalupale onivikana hiyo mwa inamuna soovirikana. Nto vannikhweya oweha eyo akhala wira ninniweha mikhalelo sooloka arina aya. Nihaana ovarexexa miruku murummwa Paulo aavanhe awe anna ni arokora a muloko wa oKorinto oriki: “Exeeni erina anyu enookupalihani wira mwa mukhulupale waavikana akina? Kiira itthu sotheene murina anyu nvahiwe ni Muluku? Akhala wira Muluku toovanheni itthu sotheene, xeeni muniittottopa anyu okhalaka ntoko mphwannye ni ikuru sanyu?” (1 aKor. 4:7) Akhala wira nnoona wira nimphavela ohimmwa wala nniixoona okhalana efaita yinceene waavikana atthu akina, nihaana wiivaha ephoole. Nto akhala wira munna onnisuwela olavula oratteene myaha wala murokora onnisuwela opaceriha soosoma sa Biibiliya, okathi wotheene owo ohaana onvuwiha Yehova. w21.06 22 itti. 9-10

Anamoona a Yehova akina vannaavila waaphwanya atthu owaani okathi anilaleerya aya. Anamalaleerya akina anikhala mittetthe ipa sirina muuru soorakama, ipreedio ni akaamera wala makwaarta. Pooti wira awo annimukhoottiha okela mutthu oheemereriwe wala ohilattuliwe ni mwaneene etthoko. Anamalaleerya akina vannivila waaphwanya axineene etthoko, akina anilaleerya mittetthe anikhala aya atthu vakhaani paahi. Nto awo anneetta mikwaha soorakama wira amphwanye nnakhala mutthu mmosa paahi, masi ikwaha sinceene khanimphwanya mutthu ori ene owaani! Akhala wira nyuwo mookhalana mixankiho iyo, muhikhulumuwe. Mwiimananiheke waalaleerya atthu okathi woovirikana. Nnoowerya waaphwanya atthu anceene akhala wira ninnaalaleerya okathi woovirikana. Okathi yoowo nnoona ahu wira nnimwaaphwanya ari ene owaani. Maana onnikhala okathi atthu anceene antthikela aya owaani! Anamalaleerya anceene annaaphwanya atthu ari ene owaani makaaripi wala ohalaka wiila. Ohiya-vo, okathi owo axineene etthoko khanaatteliwa miteko ni anniphavela ovaanela. w21.05 15 itti. 5, 7

Niireke muxankiho owo olelo-va wookhala? Aayo. Atthu anceene anninyoonyiheya mwaha woowi Anamoona a Yehova khaniirela mpantta soolema, iferiado, Natali ni ifesta sikina sihinivarihana ni Biibiliya. Nave atthu akina anninanariwa vanceene vaavo Anamoona a Yehova ahiniirela aya mpantta ifesta sinivuwiha elapo ni enamuna ya omusikha wala onvitha mutthu ehinivarihana ni Biibiliya. Atthu awo anuupuwela wira Muluku onneemererya enamuna animukokhorela aya. Masi musuweleke wira khula mutthu onithanla otthara soolema sa apinaatamu ohiya ele Biibiliya oniixuttiha awe, khonimusiveliha Yehova. (Mar. 7:8, 9) Nihaana opaka exeeni wira nihikhumuwe? Nihaana osiveliwa vanceene malamulo ni malakiheryo a Yehova. (Esal. 119:97, 113, 163-165) Akhala wira ninnimphenta vanceene Yehova, nnookhoottaka wiirela mpantta khula yoolema enimunanara. Nave khaninrowa weemererya nnakhala etthu emosa ekhalaka ya faita yinceene ovikana omphenta wahu Yehova. w21.05 6 itti. 15-16

Ninrowa weettela sai miruku murummwa Paulo onivanhe awe? Nihaana olipiha vanceene waamini wahu. Wira nipake eyo, nihaana omusoma Biibiliya khula nihiku, ohihiya ovekela ni oluttuweliwa ovara muteko Yehova onivanhe awe. (2 Tim. 4:4) Akhala wira nnoolipiha waamini wahu, khaninrowa woova nnakhala oxanka vaavo sinrowa aya olaleiwaka itthu sowoothiwa voohimya sa Anamoona a Yehova. (Yes. 28:16) Omphenta wahu Yehova, Nuulumo nawe ni anna ni arokora onoonikhaliherya ohikhumuwa akhala wira atthu akina anoohiya weettela ekeekhai. Eseekulu yoopacerya atthu anceene yaahikhumuwa ni yaahimukhootta Yesu. Hata vaari siiso, atthu anceene yaanimukupali Yesu. Eriyari ya atthu awo, yaamuhela muhina mukhulupale a oSineedrio ya aYuda ni “anamukuttho anceene”. (Mit. 6:7; Math. 27:57-60; Mar. 15:43) Etthu emosaru enniiraneya olelo-va. Imilyau sinceene sa atthu, khaneemererya nnakhala etthu emosa yaakhumulihaka. Mwaha wa xeeni? Mwaha woowi annisuwela ni annisiveliwa ekeekhai eri mBiibiliyani. Nuulumo na Muluku ninhimya so: “Ale amphenta ikano sanyu àkhalana murettele mulupale: khivo etthu enakwattuliha”. — Esal. 119:165. w21.05 13 itti. 20-21

Murummwa Paulo aanisuwela wira itthu sotheene aapaka awe mmutekoni mwa Yehova, khahiyo aapaka ni ikuru sawe, masi aavara okhaliheriwaka ni ikuru sa Muluku. Tthiri Yehova aahirumeela munepa awe woowaarya wira onvahe ikuru Paulo. Nto Paulo aahiwerya olaleerya moomalela nnaamwi aalupatthiwa, otthukweliwa mukhatteya ni aarina mixankiho sikina. Nnaamwi Timootheyo aari mmiravo namulikanyiha ni Paulo, owo ahaana ororomela ikuru sa Muluku wira ovare muteko awe woolaleerya. Maana Timootheyo aahimuhoola Paulo mikwaha soolaleerya, niire so, mikwaha sa omisionaario. Ohiya-vo, Paulo aahinvekela Timootheyo orowa oxukurya ni olipiha miloko. (1 aKor. 4:17) Woonasa wene, Timootheyo uupuwela wira khaaphwanelela ovara muteko ole. Pooti wira eyo ti etthu yaamwiirinhe Paulo omutumererya Timootheyo wira: “Muhimuhiye mutthu oothanyakani mwaha wookhala mmiravo”. (1 Tim. 4:12) Nave waahikhala okathi Timootheyo aarina awe mixankiho sinceene mookumini, owo ‘aaniwereiwa ikwaha sinceene’. (1 Tim. 5:23) Masi Timootheyo aanikupali ni murima wotheene wira Yehova aamunvaha munepa awe woowaarya. Nto okhaliheriwaka ni munepa woowaarya, aamukhalana ikuru wira olaleye ihapari sooreera ni waarumeela anna ni arokora. — 2 Tim. 1:7. w21.05 21 itti. 6-7

Malakiheryo ari Yakobo 1:19, annaakhaliherya vanceene ale anivaha miruku. Yakobo olempe so: “Khula mutthu ohaana waakuva wiiwa, opisa olavula, ni opisa onanariwa”. Woonasa wene mutokweene pooti wuupuwelaka wira onnisuwela itthu sootheene sinimuxankiha munna. Masi niireke tthiri onnisuwela? Miruku 18:13 onnuupuxerya so: “Onakhula ahinatthi wiwa, muloló: onimùliwa muru vamaithoni v’atthu othene”. Vannireerela onvekela mutthu owo wira otthokiherye mmensawe itthu sinimuxankiha. Tivonto, mutokweene ohaana owiriyana toko ohinatthi opacerya ovaha miruku. Mutokweene pooti omukoha so: ‘Murokora, itthu siri sai? Exeeni kikhanle aka oopaka wira kookhaliheryeni?’ Akhala wira axitokweene animwiimananiha osuwela itthu sinaaxankiha anna ni arokora, eyo enimwaakhweiherya waalipiha ni waakhaliherya. Wira nivahe miruku sooreerela, khoniphiyerya paahi osoma soolepa ni omuleela mutthu owo etthu ekhanle awe oopaka. Anna ahaana oweha wira ninnaathokorerya, ni wira ninnisuwela itthu sinaaxankiha nave nimphavela waakhaliherya. w22.02 17 itti. 14-15