Julho

Musuweleke wira okumihiwa mmulokoni, oniirela mpantta mareheryo a Yehova. Vaavo onimuttaruxa awe mutthu moophenta, eyo enamuna yooloka ya omukhaliherya mutthu owo ohiyale omurumeela Yehova ni waakhaliherya atthu akina. Atthu akina mmulokoni, pooti ohimyaka wira axitokweene aavonya mwaha wa omukumiha mutthu owo opanke etampi yuulupale. Masi musuweleke wira atthu awo khaniphavela ohimya itthu soohiloka mutthu owo opanke awe. Nave khanisuwela itthu sootheene siiraneyale. Nto mukupaliki ni murima wotheene wira axitokweene amphukenle mutthu owo aatthara oratteene malakiheryo a Yehova asuwelaka wira amphukenle mwa “nsina n’Apwiya” Yehova. (2 Wah. 19:6) Okhaliherya yoothanla ya axitokweene enoomukhaliherya mutthu ole okumihiwe mmulokoni otthikela wa Yehova. Murokora Elizabeth ohimmye so: “Vaanikixankiha vanceene ohiya olavula ni mwanihu mwaamulopwana muulupale. Masi nuumala ohokolowela wa Yehova, owo ohimmye wira aaniphwanela okumihiwa mmulokoni. Nuuvira okathi owo ohimmye wira okumihiwa mmulokoni woomwiixuttiha itthu sinceene sooloka”. w21.09 28-29 itti. 11-12

Nkahaya mmuupuwele naamukhweli ole. Moohaanyiherya owo aaniphavela onvaha Yehova musurukhu munceene. Masi hata vaari siiso, owo aahivaha ele aawerya awe. Maana aahinvaha Yehova etthu yootepexa oloka aarina awe. Yesu aanisuwela wira Yehova aanivaha efaita yoovaha ya naamukhweli ole. Nto ela enniniixuttiha etthu yuulupale. Etthu ene tiila: Yehova onnihakalala vaavo nninvaha ahu etthu yootepexa oloka nrina ahu, niire so, vaavo nninvarela ahu muteko ni murima ahu wotheene. (Math. 22:37; aKol. 3:23) Nave Yehova onnihakalala vanceene vaavo onniweha awe nivaraka muteko awe mpakha ninwerya ahu. Malakiheryo ala anivarihana ni okathi ni ikuru ninrumeela ahu wira nilaleerye, orowela mithukumano ni opaka itthu sikina wira nimukokhorele Yehova. Munrowa ovarihela sai muteko itthu mwiixuntte anyu yowiiraneya ya naamukhweli? Nkahaya nwuupuwele anna ni arokora munaasuwela anyu. Woonasa wene, akina a yaawo aakhulumuwa mwaha woowi khaniwerya ovara muteko wa Yehova ntoko yaavara aya khalai. w21.04 6 itti. 17, 19-20

Yehova onnisuwela okathi wooreerela onrowa awe opwetexa olumwenku ola wootakhala. Mwaha wa opixa murima wa Yehova, atthu anceene aakhalana eparakha ya omusuwela, omukokhorela ni onvuwiha. Awo annihakalala vanceene osuwela wira Yehova oovilela mwa okathi munceene mpakha awo oyariwa, wiixutta omphenta ni wiivahererya wa yena wira amurumeeleke. Muhoolo, Yehova onimooniherya oratteene wira ovilela wawe ohaakhaliherya atthu anceene vaavo onrowa awe waareeliha atthu imilyau sinceene yaawo anrowa ovilela mpakha wanikisa! Hata Satana okumihenrye ene mixankiho sinceene, Yehova khonihiya okhala “Muluku oohakalala”. (1 Tim. 1:11) Hiyo nave, ninnilipelela nihiku Yehova onrowa awe otteeliha nsina nawe, waakiherya ehakhi awe ya olamulela, omaliha otakhala ni mixankiho sotheene sinikhumelela valaponi. Nto nilipelelaka ophiya nihiku nno, nihihiye ohakalala. Nave nihihiye ovilela nimutakihaka Tiithi ahu a wiirimu yoowo onivilela. w21.07 13 itti. 18-19

Atthu anceene a okathi awe khiyaamwaamini Yesu. Awo yaamuthokorerya Yesu okhala mwaana a masikhini, niire so, kalapintero. Nave Yesu aakhumme oNazarethi, epooma yeeyo atthu anceene yahaavahaaya efaita. Natanayeli yoowo muhoolo mwaya aari mutthareli a Yesu, aahimmye so: “ONazarethi wookhala wookhuma etthu yooreera?” Nave pooti wira Natanayeli uupuwela eprofesia eri Mikeya 5:1, yeeyo yaahimya wira Mesiya aarowa oyariwa oBethelehemu ohiya oNazarethi. Profeta Yesaya aahihimya vahinatthi wira awanani a Yesu khiyaarowa ocala itthu saahimya oratteene nloko Yesu aarowa awe oyariwa. (Yes. 53:8) Nto vaakhanle wira atthu ale yaahitokosa oratteene itthu iyo, yaamoona wira Yesu aarowa oyariwa oBethelehemu ni aarowa okhuma nloko na Mwene Davidi. (Luka 2:4-7) Opuro Yesu aayariwe awe, waanivarihana oratteene ni eprofesia eri Mikeya 5:1. Etthu xeeni yaaxankiha atthu ale? Okhala wira atthu ale yaari ookhummwa murima, yaanaakuva olavula ahinatthi wuupuwela oratteene. Awo khiyaatokosa itthu sotheene sooniherya mwaha ole. Nto mwaha waivaavo awo yaahikhumuwa ni yaahihiya waamini. w21.05 2-3 itti. 4-6

Biibiliya onnaalavula atthu yaatthuveliwe ni Yehova mwaha wooweemya miruku. Nkahaya muthokorerye ntakiheryo na Yobi. Owo aanimphenta vanceene Yehova, ni aaniphavela omusiveliha. Okathi samphwannye aya mixankiho sinceene, aahilavula itthu sikina soohiloka ohuupuwenle saana. Mwaha waivaavo, Yehova ni Elihu yaahinvaha miruku. Nto Yobi oonenle sai? owo aahimmye so: “Miyo kolavula kihisuwelaka . . . Tivó vanùliwaka muru n’itthu sothene sihimyalyaka: kottharuwa, kìyevihaka vantthupini ni vatturwani”. (Yobi 42:3-6, 12-17) Eyo yaahooneya okathi eemerenrye miruku sa Elihu, hata Elihu aari mmiravo onvikana yena. (Yobi 32:6, 7) Wiiyeviha onoonikhaliherya weemererya miruku, hata nuupuwelaka wira khinaaphwanela ovahiwa miruku iyo aahiiso nivahiwe ene ni mutthu orina iyaakha vakhaani onivikana hiyo. Khivanikhweya olokiherya mweettelo ahu, vakhala wira khuuvo mutthu onnivaha miruku. Ekeekhai wira khula mmosa a hiyo ookhalana etthu enreerela awe olokiherya. Ntoko makristau, vannireerela wiimananiha wira nooniheryeke mikhalelo sooreera sinikumiheriwa ni munepa woowaarya. Nave nihaana osuwela olaleerya ni wiixuttiha ihapari sooreera. w22.02 11 etti. 8; 12 etti. 12

Otheene ahu nookhalana muritti wookhaliherya muloko okhala nipuro noophenta ni na murettele wira ohikhale mutthu onoona wira ori mekhawe. Moolumo ahu ni miteko sahu, pooti waakhaliherya atthu akina! Muhaana opaka exeeni wira mwaakhaliherye ale ari mekhaya mwekeekhaini woona wira anniirela mpantta muloko? Mwiimananiheke waapaka opatthani ale yiixuntte ekeekhai niinaano. Nihaana owaakhela ni murima wotheene ale a niinaano mmulokoni. (aRom. 15:7) Masi nihaana opaka itthu sikina, ohiya paahi waakoha wira: ‘Sai ehaali anyu?’ Nuuvira okathi, nihaana okhalana ni olipiha ompatthani ahu ni atthu awo. Mwiimananiheke oweha mixankiho arina aya masi muhaapakeleke makoho ookhulumula. Musuweleke wira atthu akina onnaaxankiha vanceene ohimya moonelo aya. Nto wira ahimye moonelo aya muhaana waapakela makoho a ankhili, ooreerela murima ni waawiriyana moopixa murima vaavo anaakhula aya. Masi muhaakhanyereryeke waakhula wala olavula. Nyuwo pooti waakoha so: ‘Mwiixuntte sai ekeekhai?’ w21.06 11 itti. 13-14

Hiyo ninnihakalala vanceene omukokhorela Yehova ntoko “nikoto nimosa” ni “makampusi mmosa”! Eliivuru Mutthenkeso Onipaka Otthuna wa Yehova epaaxina 165 enihimya wira: “Okhala wira munnittottela mureerelo wiiraana iwo, muritti anyu okhaliherya olipiha wiiraana iwo”. Nto ‘nihaana wiimananiha waathokorerya anna ni arokora ntoko Yehova onaathokorerya awe’. Tthiri Yehova onninivaha efaita otheene ahu. Nto niireke nyuwo munnaavaha efaita anna ni arokora? Musuweleke wira Yehova onniweha ni onnivaha efaita itthu sotheene munipaka anyu wira mwaakhaliherye ni waathokorerya saana anna ni arokora. (Math. 10:42) Hiyo ninnaaphenta vanceene anna ni arokora. Tivonto nilakenle ahu “ohipaka etthu yaarowa ovukula waamini wa munna aahiiso ommoroxa”. (aRom. 14:13) Ninnaathokorerya anna ni arokora okhala aalupale onivikana hiyo ni ninnaalevelela ni murima wotheene. Nto muhikhala-khale mweemereryaka okhumulihiwa ni atthu akina. Ohiya-vo, “niphaveleke itthu sinikumiherya murettele ni itthu sinikhaliherya olipihana mukina ni mukhwaawe”.— aRom. 14:19. w21.06 24 itti. 16-17

Akhala wira nnimwiimananiha omusoma Biibiliya, weettela malakiheryo nniixutta ahu mBiibiliyani ni weettela malakiheryo ninvahiwa ahu ni mutthenkeso wa Yehova, vakhaani-vakhaani nnoowerya otakiha mikhalelo sa Kristu. Nave nnimuncererya omusuwela wahu Muluku. Yesu aahipaka nlikanyiho wira otthokiherye moota muhupi wa Omwene oninnuwa aya vamurimani va atthu ale anisiveliwa itthu sooloka. Owo aahimmye so: “Epyo ennimela, enannuwa. Masi owo [mulipa-oowaala] khonisuwela moota eniiraneya aya. Vakhaani-vakhaani, etthaya enniimiha mihokorokho mekhaya-ru. Enipacerya okhuma mutathi, nuumala-vo nnakhumelela nikala, nto wookiseryani waya, sinnikhumela ipyo vanikalani”. (Mar. 4:27, 28) Yesu aaphavela otthokiherya wira ntoko siisaale mwiri oninnuwa awe vakhaani-vakhaani, nave okela vahoolo wa mutthu oneemererya muhupi wa Omwene oniiraneya vakhaani-vakhaani. Mwa ntakiheryo vaavo naxikola a Biibiliya onipacerya awe omwaattamela Yehova, vakhaani-vakhaani ninniwerya oweha marukunuxo onipaka awe mookumini mwawe. (aEef. 4:22-24) Ekeekhai wira Yehova, toniiriha ipyo iyo wunnuwa. w21.08 8-9 itti. 4-5

Nnoophwanya ohakalala wekeekhai akhala wira ninnaavya opuro wooloka. Mutthu onitteeliwa murima mwaha wa itthu oniweha awe, owo onivaha efaita paahi ele orina awe, niire so, onihakalala paahi mwaha wa makhalelo orina awe niinaano-va. Masi mutthu onaavya soophavela sawe, owo oniimananiha waavya ele ohinwerya awe ophwanya. Nniixutta exeeni? Wira nihakalaleke nihaana owehexexa ele erina ahu ni itthu ninwerya ahu ophwanya. Niireke tthiri vanniweryaneya ohakalala ni itthu nrina ahu? Atthu anceene anoona wira nnaari, mwaha woowi atthu anceene waasivela opaka itthu sikina wala sa niinaano. Masi musuweleke wira vanniweryaneya ohakalala ni itthu nrina ahu. Ntoko niwenhe ahu, nihimakeleke waavya itthu maitho ahu aniweha aya, masi nihakalaleke ni ele nrina ahu. Ninrowa owerya sai opaka eyo? Wira nwehe waakhuliwa wa nikoho nno, muthokorerye nlikanyiho Yesu aapanke awe na italento niri Matheyo 25:14-30. Nnimookhaliheryani wowuncererya ohakalala wanyu moovarihana ni makhalelo anyu a niinaano-va. w21.08 21 itti. 5-6

Yehova onnaavaha efaita yinceene “atthu òpuheriwa ni òwìyeviha”. Otheene ahu, ohiya paahi axitokweene, nihaana waalipiha anna ni arokora a mmulokoni. Enamuna emosa nikhanle ahu oopaka eyo, ori owooniherya wira ninnaavaha efaita. Yehova oniphavela wira naakhaliheryeke anna ni arokora woona wira onnaaphenta ni onnaavaha efaita yinceene. (Mir. 19:17) Ohiya-vo, akhala wira nnimwiiyeviha ni nnimwiisuumaliha, nnimwaakhaliherya vanceene anna ni arokora. Nihikhala-khale niphavelaka wiivuwiha. Maana eyo pooti owiiriha atthu akina okhalana nrima. Ohiya-vo, nihaana orumeela itthu ninsuwela ahu wira naalipihe atthu akina. (1 Ped. 4:10, 11) Enamuna Yesu aathokorerya awe atthareli awe, enooniixuttiha etthu yuulupale ya moota nikhanle ahu oowaathokorerya atthu akina. Owo aari mutthu muulupalexa aakhanle valaponi. Hata vari siiso, Yesu aari “mutthu oomaala ni oowiiyeviha”. (Math. 11:28-30) Ohiya-vo, owo aaniwiixuttiha atthu orumeelaka moolumo ookhweya wiiwa ni aanirumeela malikanyiho yaavara murima atthu oowiiyeviha. — Luka 10:21. w21.07 23 itti. 11-12

Mwiimananiheke ovaanela ni anna ni arokora oowuuluvala. Pooti wira anna ni arokora awo khanoona saana ni kharina ikuru wira alavule wala yeette. Masi murima aya nlelo mmiravo. Anna ni arokora awo aakhalana “nsina nottittimiheya” vamaithoni va Yehova. (Mus. 7:1) Okathi wotheene, muupuweleke etthu enimwiiriha Yehova waavaha efaita anna ni arokora oowuuluvala. Nave muhihiye waattittimiha anna ni arokora awo. Mpakeke etthu emosaru aapanke awe Eliseyo. Owo aahimuleela Eliya wira aarowa okhala hoothe nihiku nne nookiserya. Ikwaha tthaaru Eliseyo aahimuleela Eliya wira: “Miyo nkinohiyani”. (2 Mam. 2:2, 4, 6) Mooniheryeke wira munnaathokorerya anna ni arokora oowuuluvala mwaakohaka makoho ooreerela murima. (Mir. 1:5; 20:5; 1 Tim. 5:1, 2) Nyuwo pooti waakoha so: “Okathi mwaari anyu mmiravo, etthu xeeni yookupalinheni wira mwaahiphwanya ekeekhai? Itthu sookhumelenleni mookumini mwanyu, sookhalihenryeni sai omwaattamela Yehova? Etthu xeeni yookhalihenryeni ohihiya omurumeela Yehova moohakalala?” (1 Tim. 6:6-8) Nuumala-vo, mwaawiriyaneke ni ephoole vaavo anooleelaayani sowiiraneya saya. w21.09 5 etti. 14; 7 etti. 15

Vaavo nyuwo muniimananiha anyu wiiwelela yooruma ya olaleerya ni waapaka awiixutti, munnooniherya wira munnimphenta Muluku. (1 Yoh. 5:3) Nkahaya muupuwele ela: Omphenta wanyu Yehova, ohookhaliheryani olaleerya empa ni empa. Niireke vahookhweelani opaka eyo? Woonasa wene nnaari. Niireke munnuupuwela ekwaha yoopacerya mwaaronwe anyu olaleerya empa ni empa? Woonasa wene, nyuwo mwaahixanka wala mwaanoova! Nyuwo muhiixutta wira Yesu tonirumme orowa olaleerya, nto nyuwo munniiwelela yooruma eyo. Woonasa wene, vaavo okathi waavira aya wanookhweelani olaleerya. Masi ankhi voohimya sa wiiriha soosoma sa Biibiliya? Niireke munnixanka vaavo munuupuwela anyu wiiriha soosoma sa Biibiliya? Akhala wira ti siiso, munvekeleke Yehova wira ookhaliheryeni oxintta oxanka wanyu. Mwiira siiso, Yehova onimoovahani olipa murima ni onimookhaliheryani ophavela waapaka awiixutti. w21.07 3 etti. 7

Khalai ipottha saaniheliwa ekanyeryo vayuuci, yeeyo yooniherya wira epottha eyo yaahikhala ni mwaneene. Mwa enamuna emosaru, atthu anceene olelo-va yaarowa oheliwa ekanyeryo ya nthoonyeryo ntata naya aahiiso vayuuci vaya. Nto enamuna atthu anuupuwela aya ni miteko saya saamooniheryaka wira anniirela mpantta ni annikhaliherya ikuvernu sa apinaatamu. Niireke nnimweemererya oheliwa ekanyeryo ya nthoonyeryo ni okhaliherya ikuvernu sa apinaatamu? Ale anikhootta oheliwa ekanyeryo eyo, sinnaaphwanya mixankiho ni pooti waakhumelela ehasara. Eliivuru ya Wiisuupulula enihimya wira: “Ohikhale mutthu oniwerya othuma aahiiso otumiha etthu, ohikhanle yoole oheliwe ekanyeryo”. (Wiis. 13:17) Masi atthu a Muluku annisuwela etthu Muluku onrowa awe owiiriha atthu otheene aheliwe ekanyeryo, yaawo anilavuliwa Wiisuupulula 14:9, 10. Ohiya weemererya oheliwa ekanyeryo, awo anrowa olempwa ntata naya wira: “Miyo kawaya Apwiya” Yehova. (Yes. 44:5) Ola ti okathi ninreerela ahu olipiha ororomeleya wahu wa Yehova. Niira siiso, Yehova onoohakalala vanceene ni onoohimya wira hiyo naatthu awe! w21.09 18 itti. 15-16

Wira nivare oratteene muteko ahu woolaleerya, nihaana okhaliheriwa ni atthu akina. Murummwa Paulo, aahimwiixuttiha Timootheyo inamuna soolaleerya ni wiixuttiha. Nave aahimutumererya orumeela inamuna iyo wira aakhaliherye atthu akina. (1 aKor. 4:17) Ntoko Timootheyo, anna ni arokora arina sookumanana sinceene a muloko ahu anoowerya oniixuttiha itthu sinceene. Nave munvekeleke Yehova nikhaliheryo. Khula okathi munrowa anyu olaleerya, muhaana onvekela Yehova malakiheryo. Khuuvo mutthu okhanle oolaleerya oratteene ohikhaliheriwaka ni munepa woowaarya wa Muluku. (Esal. 127:1; Luka 11:13) Vaavo munivekela anyu, mulavuleke mooluluwanya. Munvekeleke Yehova wira ookhaliheryeni omphwanya mutthu oniphavela owiriyana itthu munrowa anyu omwiixuttiha. Mphaveleke okathi wira mpake yoosoma anyu. Biibiliya onihimya wira: “Musuweleke oratteene etthu Muluku oniphavela awe, yeeyo eri yooreera, yookhalela ni yoomalela”. (aRom. 12:2) Vaavo nimmusoma ahu Biibiliya, ninnimusuwela oratteene Yehova. Nto vaavo nnaalaleerya ahu atthu akina, awo annoona wira ninnikupali ele ninwiixuttiha ahu. w21.05 18 itti. 14-16

Ankhi akhala wira munniimananiha vanceene ni muninvekelela masi hata vari siiso, naxikola anyu a Biibiliya onahiya okela vahoolo ni onahiya omusoma Biibiliya? Ankhi akhala wira khamutonko omusomiha mutthu mpakha opatisiwa? Niireke muhaana wiivaha nthowa woonasa wene muupuwelaka wira Yehova khonireeliha muteko anyu woolaleerya? Nwehe moota Yehova onoona awe okhumela wahu saana. Yehova onniweha wiimananiha wahu ni ovilela wahu. Owo onnihakalala vanceene vaavo onniweha awe niluttuweliwaka olaleerya mwaha womphenta hata atthu aniwiriyanaka wala ahiniwiriyanaka. Paulo aahimmye so: “Tthiri, Muluku naxariya, owo khonrowa oliyala muteko anyu ni ophenta wanyu nsina nawe, mwaarumeelaka ni muhihiyaka waarumeela ale oororomeleya”. (aHeeb. 6:10) Nikupaliki ni murima wotheene wira Yehova khonliyala wiimananiha wahu ni ophenta wahu hata nihitonko omusomiha mutthu Biibiliya mpakha opatisiwa. Moolumo Paulo aaleelale awe aKorinto pooti wookhaliheryani vanceene, ntoko enooniherya aya yoolepa ya olelo. w21.10 25 itti. 4-6

Oreera murima ni ophenta wa Yesu waanooneya ni moota aathokorerya awe awiixutti awe. Owo aanisuwela wira khula mmosa ookhalana mikhalelo ni itthu onisuwela awe. Nto khahiyo wira ootheene aya yanwerya ovara saana miteko aavaha awe wala ovara mwa enamuna emosaru muteko woolaleerya. Hata vari siiso, Yesu aanivaha efaita yinceene wiimananiha wa khula mutthu. Nlikanyiho aapanke awe na italento, ninnooniherya oratteene wira Yesu onnoona othunku. Nlikanyiho nne, mulopwana ole aahinvaha khula murumeyi awe muteko ‘aawerya awe’. Murumeyi mmosa aahivara muteko munceene ni aahiphwanya musurukhu munceene. Masi hata vaari siiso, mulopwana ole aahaattottopela oowanli aya mwa enamuna emosaru oriki: “Muhiira saana, murumeyi ooloka ni oororomeleya!” (Math. 25:14-23) Yesu oninthokorerya mooreera murima ni moophenta. Owo onniweha itthu ninsuwela ahu ni mikhalelo sahu. Nave onnihakalala vaavo onniweha awe niimananihaka ovara muteko. Otheene ahu, nihaana omutakiha Yesu. w21.07 23 itti. 12-14

Waahikhala okathi Davidi aahiyale awe okhala mutthu oomoriwa ikharari. Mwa ntakiheryo, mulopwana mmosa iihaniwa Nabali aari ootakhala murima ni khaamuttittimihale Davidi. Nave aahikhootta onvaha yoolya Davidi ni atthu awe. Nto Davidi aahinanariwa vanceene ni aaphavela omwiiva Nabali ni atthu otheene a etthoko awe. Masi mwaarawe Nabali iihaniwa Abigayili aari ooreera murima ni oopixa murima. Nto moohipisa aahikuxa yoolya wira anvahe Davidi. Eyo yaahimwiiriha Davidi ohimwiiva Nabali ni atthu otheene a etthoko awe. (1 Sam. 25:9-22, 32-35) Okathi Davidi aahaareere awe onanariwa, aahimmye wira Nabali ni atthu otheene a etthoko awe yaaphwanela wiiviwa. Nave muhoolo mwaya, Davidi aahimmye wira mulopwana ole thaaciri aalavuliwe ni Natani, aaphwanela wiiviwa mwaha wa etthu aapanke awe. Vaavo ninsoma ahu yowiiraneya ela ya nenli, woonasa wene ninniikoha so: “Vaniweryaneya sai mutthu ooreera murima, omphukela mutthu mukina mwa enamuna yoohiloka?” Nkahaya muupuwele itthu siiraneyale. Okathi ole, murima wa Davidi waanimphukela. Musuweleke wira vaavo mutthu onaaphukela awe atthu akina mwa enamuna yoohiloka, waataana wawe ni Yehova kholonke. w21.10 12 itti. 17-18; 13 etti. 20

Moolumo ala a yoolepa ya olelo, annooniherya oratteene wira nnoowerya omutakiha Yehova, yoowo ori ntakiheryo nuulupale na mutthu oowaarya. Nto, mweettelo ahu wotheene ohaana okhala woowaarya. Mwaha wookhala atthu oottheka, hiyo pooti wuupuwelaka wira eyo kheniweryaneya. Ikwaha sikina, murummwa Pedru aanipaka itthu soohiloka. Nto ntakiheryo nawe, ninnooniherya wira hiyo nnoowerya okhala atthu “oowaarya”. Okathi atthu anceene aniiwa aya nuulumo noowi waarya, animuupuwela mutthu ohimpatthaneya, oniwara ikuwo sa etiini ni ohintheya. Masi eyo khenitaphulela okhala oowaarya. Maana Biibiliya onnimuhimya Yehova, yoowo ori oowaarya okhala “Muluku oohakalala”. (1 Tim. 1:11) Nave, atthu animukokhorela Yehova annihimmwa okhala atthu oohakalala. (Esal. 144:15) Yesu aahaapwapwela atthu ale yaawara ikuwo sa etiini ni waasivela opaka itthu sa exariya wira yooniweke ni atthu akina. (Math. 6:1; Mar. 12:38) Makristau eekeekhai annisuwela ele onitaphulela aya okhala oowaarya, mwaha wa itthu yiixuntte aya mBiibiliyani. Hiyo ninnikupali ni murima wotheene wira Muluku ahu oophenta khonikhala-khala onirumaka opaka etthu nihinwerya ahu. w21.12 2 itti. 1, 3

Mwaha wa oreera wawe murima, Yehova ohaavaha itthu sinceene apinaatamu. Etthu yuulupale onivanhe ahu eri eparakha ya omukokhorela. Hiyo ninnooniherya wira ninnimphenta Yehova ‘neettelaka sooruma sawe’. (1 Yoh. 5:3) Yooruma Yehova oniphavela awe wira neetteleke eri yooruma Yesu onivanhe awe ya waapaka awiixutti ni waapatisa. (Math. 28:19) Nave, oonivaha yooruma ya ophentana mukina ni mukhwaawe. (Yoh. 13:35) Atthu otheene oowiiwelela anrowa wiirela mpantta emusi ya Yehova ya olumwenku wotheene mahiku otheene. (Esal. 15:1, 2) Mwaaphenteke atthu otheene. Ophenta mukhalelo muulupale wa Yehova. (1 Yoh. 4:8) Yehova topacenrye oniphenta hata okathi yoole nahaamusuwela ahu. (1 Yoh. 4:9, 10) Nto nnoowerya omutakiha Yehova naaphentaka atthu akina. (aEef. 5:1) Enamuna emosa ya wooniherya wira ninnaaphenta atthu, ori waakhaliherya omusuwela Yehova okathi ohimanle. (Math. 9:36-38) Nto akhala wira nnoopaka eyo, nnimwaavaha eparakha ya wiirela mpantta emusi ya Muluku. w21.08 5-6 itti. 13-14

Mwaha wa omphenta Yehova, Yesu aahileva okumi awe wira onvuwihe Yena ni oniphwanyihe mureerelo. (Yoh. 14:31) Okathi wotheene aanaareerela murima atthu, nave aaniwoonela othunku hata ale yaamulupattha. Anooniherya wira aanaaphenta atthu, owiixuttihaka Omwene wa Muluku. (Luka 4:43, 44) Nave Yesu aahooniherya omphenta wawe Muluku ni atthu, eemyaka ohaaxiwa ni wiiviwa ni anatampi. Eyo ehiiriha oweryaneya khula mmosa a hiyo ophwanya ekumi ehinimala. Hiyo nihiivahererya wa Tiithi ahu a wiirimu, maana ninnimphenta. Moolikanasa ni Yesu, nihaana wooniherya omphenta wahu Yehova, naathokoreryaka saana atthu akina. Murummwa Yohani aalempe so: “Ole ohinimphenta munnawe, onimoona awe, khoniwerya omphenta Muluku, ohinimoona awe”. — 1 Yoh. 4:20. w22.03 10 itti. 8-9

Ekeekhai wira onisivela oviriha okathi niri ene ni Yehova, masi opaka eyo khivanikhweya. Okhala wira olelo-va ninnaatteliwa miteko, nto pooti okhala wooxankiha okhalana okathi woovara miteko sa Muluku. Muteko ahu wa mulaponi ni miritti sikina sa vatthokoni, pooti oniirihaka ohikhalana okathi woovara itthu sikina sinlipiha opatthani ahu ni Yehova. Tivonto hiyo pooti woonaka wira khanireere waatteliwa miteko ni khanirina okathi woovekela, osoma Nuulumo na Muluku aahiiso wupuwelela. Nave yookhala etthu ekina ekhanle ooniiyerya okathi ahu. Mooriipiha murima hiyo pooti oviriha okathi nivaraka miteko sikina sihikhanle sootthekeya, masi nihinakhalana okathi womwaattamela Yehova. Mwa ntakiheryo, nkahaya nuupuwele matthekulelo. Otheene ahu ninniphavela omumula ni otthekula. Masi hata matthekulelo ahu aari ene ooreera, akhala wira nnooviriha okathi munceene nitthekulaka aahiiso othweela, pooti ohikhalanaka okathi woovara miteko sa Muluku. — Mir. 25:27; 1 Tim. 4:8. w22.01 26 itti. 2-3

Okathi Yehova aarumme awe aisarayeli wira yaaphenteke atthu akina, khahiyo wira owo aaphavela ohimya wira yaahaana waaphenta atthu a nikhuli wala a elapo aya paahi. Owo aahaaleela wira yaahaana waaphenta atthu a elapo ekina, niire so, anamurwa. Malakiheryo awo ari Onamukuttho 19:33, 34. Aisarayeli yaahaana omuthokorerya namurwa ‘ntoko mutthu a mulaponi mwaya’. Nave yaahaana ‘omphenta’ namurwa ntoko yiiphenta aya. Mwa ntakiheryo, aisarayeli yaahileeliwa wira yaahaana omweemererya namurwa ni atthu oohaawa ottotta soolya mmatta mwaya. (Onam. 19:9, 10) Olelo-va, makristau ahaana weettela malakiheryo anihimya wira nihaana waaphenta anamurwa. (Luka 10:30-37) Masi ninrowa opaka sai eyo? Olelo-va, aakhala atthu imilyau sinceene olumwenku wotheene athaamenle wala anikhala ilapo sikina, woonasa wene akina mavisiinyu anyu. Nto ti vooloka waattittimiha alopwana, athiyana ni anamwane anamurwa. w21.12 12 etti. 16

Namuroromela Yehova olelo-va, nnootepaka okupali wira muhoolo onoonikhaliherya. Mwa ntakiheryo, nihaana omwaamini ni omuroromela Yehova, okathi ninrowa ahu olavula ni patarau ahu ninvekelaka efolga wira nanwehe asembeleya aahiiso konkresu. Nave wira ninvekele patarau ovukula iwoora ninvara ahu muteko wira niweryeke oweha mithukumano ni orowa olaleerya, nihaana okhalana waamini. Masi ankhi akhala wira khoneemererya yooveka ahu eyo ni onninoomola muteko? Niireke nnoomwaamini Yehova, niroromelaka wira khonikhala-khala oninyanyalaka ni wira okathi wootheene onoonivaha itthu sinnithowa? (aHeeb. 13:5) Anna anceene anivara muteko wa Muluku wa okathi wootheene, anihimya wira Yehova ohaakhapelela ni waakhaliherya okathi yaaphavela aya okhaliheriwa. Yehova ti Muluku oororomeleya. Nikhaliheriwaka ni Yehova, khannoova itthu sinrowa okhumelela muhoolo. Nave akhala wira nnoohela Omwene opuro woopacerya mookumini mwahu, owo khonrowa oninyanyala. w22.01 7 itti. 16-17

Waaroromela wahu axitokweene onrowa weehereriwa sai? Akhala wira mutthu okumihiwe mmulokoni mpatthani ahu. Woonasa wene hiyo pooti wiikohaka vakhala wira axitokweene aavarerya itthu sootheene aahiiso aatthara moonelo wa Yehova. Exeeni enrowa onikhaliherya weemererya yoothanla aya? Nihiliyale wira okumihiwa mmulokoni mareheryo a Yehova. Nave-tho annikhaliherya muloko ni annimukhaliherya ole opanke etampi. Akhala wira mutthu opanke etampi ohinattharuwa khonikumihiwa mmulokoni, mutthu owo pooti owiirihaka atthu akina a mmulokoni opaka etampi emosaru. (aGal. 5:9) Owo pooti wuupuwelaka wira etampi opanke awe etthu yaamukhaani paahi, ni khivanreerela oturuka mweettelo awe ni muupuwelo awe wira otthikele ophentiwa ni Yehova. (Mus. 8:11) Nikupaliki wira okathi axitokweene anithanla aya akhala wira mutthu onnireerela okumihiwa mmulokoni, annivara ni murima aya wootheene muritti avahiwe aya. w22.02 5-6 itti. 13-14

Vannireerela oreera murima ni opixa murima, vanceenexa akhala wira mutthu owo onikhaliheriwa khoneemererya miruku sa mBiibiliyani. Mutokweene ohaana okhalana ephoole wira ohaakuveke oveeheya aahiiso onanariwa, akhala wira ole oninvaha awe miruku woopaceryani khoneemererya. Nto okathi mutokweene oninvekela awe Yehova, woonasa wene pooti onvekela wira omukhaliherye munna owo aahiiso murokora, weemya miruku iyo. Pooti oreerelaka onvaha okathi munna owo wira otthokelele saana miruku iyo ovahiwe awe. Vakhala wira mutokweene onimooniherya opixa murima ni oreera murima, eyo enoomukhaliherya ole ovahiwe miruku weemererya. Ekeekhai wira sihaana okhuma mBiibiliyani. Muhiliyale wira: Yoolukama ahu khahiyo paahi ovaha miruku sooreera, masi nimphavela ‘waatteeliha murima’ axinnihu. — Mir. 27:9. w22.02 18 etti. 17; 19 etti. 19

Okathi mukina, hiyo ninninvekela Yehova wira onivahe ikuru sinrowa onikhaliherya ovilela muxankiho ahu wala sootteettheya sahu. Pooti woonaka wira Yehova onnipisa waakhula mavekelo ahu. Nto hiyo pooti wiikoha so: ‘Xeeni Yehova ohinaakhula awe moowaakuveya mavekelo ahu otheene?’ Mavekelo nimpaka ahu annimooniherya Yehova wira ninnimwaamini. (aHeeb. 11:6) Vaavo ninvekela ahu, Yehova onnivaha ephoole wira owehe akhala wira ninvekenle ni murima wotheene. Akhala wira nnimwiimananiha opaka itthu moovarihana ni nivekelo nahu ni ele eniphavela awe. (1 Yoh. 3:22) Nto vaavo nninvekela ahu Yehova wira onikhaliherye oxintta itthu soohiloka naapaka ahu wala sootteettheya sahu nihaana opixa murima ni wiimananiha opaka marukunuxo. Yesu aahooniherya oratteene wira mavekelo ahu makina khiyaarowa waakhuliwaka ni Yehova moowaakuveya. Nto aahintumererya oriki: “Muthipeleleke oveka, munoovahiwa. Muthipeleleke ophavelasa, munoophwanya. Muthipeleleke omana mukhora, munoohuleliwa. Otheene ale aniveka, anoovahiwa. Nave otheene ale aniphavelasa, anoophwanya, ni otheene ale animana mukhora, anoohuleliwa”. — Math. 7:7, 8. w21.08 8 etti. 1; 10 itti. 9-10

Wira muncererye omwaamini wanyu Mpattuxa, nyuwo muhaana ohihiya osoma Nuulumo na Muluku. (Yox. 1:8) Nvaheke ephoole iprofesia sa mBiibiliyani ni moota Biibiliya otheene onivarihana awe. Akhala wira munoopaka eyo, nyuwo munoolipiha waamini wanyu wira ookhala Mpattuxa a ankhili, oophenta ni omukumihenrye Biibiliya. (2 Tim. 3:14; 2 Ped. 1:21) Vaavo munimusoma anyu Biibiliya, nweheke moota miruku onnivaha awe sinnikhaliherya aya. Mwa ntakiheryo, iyaakha sinceene sivinre Biibiliya aahinilopola wira ophenta musurukhu onnikumiherya itthu soohiloka ni onnikumiherya “maxakha manceene”. (1 Tim. 6:9, 10; Mir. 28:20; Math. 6:24) Tthiri nlopolo na mBiibiliyani noowi nihiphenteke musurukhu, ninninikhaliherya vanceene! Niireke munnuupuwela malakiheryo makina a mBiibiliyani yookhalihenryeni vanceene? Vaavo nnuupuwela ahu miruku sooloka siri mBiibiliyani, ninniweha wira Mpattuxa ahu oophenta onnisuwela oratteene itthu sinniphwanyiha mireerelo. Nto eyo enoonikhaliherya okathi wotheene ororomela malakiheryo awe. (Yak. 1:5) Vaavo nimpaka eyo ninnihakalala vanceene. — Yes. 48:17, 18. w21.08 17-18 itti. 12-13

Akhala wira moopacerya wuuluvala, mukupaliki ni murima wotheene wira Yehova onnuupuwela itthu sotheene mpanke anyu khalai. Nyuwo mookhaliherya vanceene muteko woolaleerya. Nave moovilela mixankiho sinceene sikina sootepa oxankiha, mookhaliherya malamulo a xariya a mBiibiliyani, mwaahikhalana miritti sinceene mmutthenkesoni mwa Yehova ni moowiixuttiha atthu akina. Ohiya-vo, nyuwo muhiimananiha vanceene otthara marukunuxo anipakiwa mmutthenkesoni mwa Yehova. Nave muhaakhaliherya ni waatumererya ale anivara muteko wa Muluku wa okathi wotheene. Vaavo ororomeleya wanyu onincerereya aya, Yehova onnitepa woophentani. Musuweleke wira Yehova ooleiherya wira “khananyanyala apatthani awe”. (Esal. 37:28) Yehova onnaalipiherya atthu oowuuluvala wira: “Kinimokhapelelani-tho mpakha vanùluvalanyu: kinimokuxani-tho mpakha mahiku othene”. (Yes. 46:4) Nto muhuupuweleke wira okhala muhuuluvala khamurina efaita mmutthenkesoni mwa Yehova. Ohiya-vo, musuweleke wira nyuwo mookhalana efaita yinceene! w21.09 3 etti. 4

Yehova toomoriwa ikharari mwaha woowi ookhalana ankhili anceene. Biibiliya onihimya wira “ankhili anikhuma wiirimu . . . toosareya othunku ni miteko sooloka”. (Yak. 3:17) Okhala wira Tiithi oophenta, Yehova onnisuwela wira omoriwa wawe ikharari onnaaphwanyiha mireerelo anaawe otheene. (Yes. 49:15) Tthiri, mwaha wa omoriwa ikharari wa Yehova, arumeyi awe aakhalana nlipelelo nooloka na muhoolo nnaamwi ari ene anatampi. Nave mwaha wookhalana ankhili anceene, Yehova onnisuwela okathi onireerela awe ommorela ikharari mutthu akhala wira vannireerela. Nave-tho onnisuwela okathi onireerela awe ohimmorela ikharari mutthu. Tthiri vannooneya wira Yehova tankhili. Owo onnisuwela ovirikana okhanle eriyari ya omoriwa ikharari ni ohimuhukhumu mutthu opanke etthu yoohiloka. Nkahaya mmuupuwele murumeyi a Yehova onikhalana mweettelo woohiloka mpakha opaka etampi. Nto eyo yiiraneya, etthu xeeni ninreerela ahu opaka? “Muhiye weetta” ni mutthu owo. Ala malakiheryo Yehova aamurumme awe Paulo ovaha miloko sotheene. (1 aKor. 5:11) Nto ale anipaka etampi ahinattharuwa ahaana okumihiwa mmulokoni. Awo ahaana okumihiwa wira anna ni arokora oororomeleya ahihiye okhala oowaarya ntoko Yehova ori awe oowaarya. w21.10 9-10 itti. 7-8

Ninnimukokhorela Yehova, okathi ninkhaliherya ahu miteko sa Omwene, nivahaka musurukhu ahu. Okathi aisarayeli yaarowela aya mithukumano tthaaru sa vamwaakhani, yaahaana okuxa etthu wira yanvahe Yehova. (Otum. 16:16) Khula mutthu aanivaha moovarihana ni ele aawerya awe. Mwa enamuna eyo, aisarayeli yaanooniherya wira yaanixukhurela itthu sootheene Yehova aapakenle awe. Ankhi hiyo, ninrowa wooniherya sai wira ninnimphenta Yehova ni omuxukhurela mwaha wa itthu sootheene onnipakela awe? Enamuna emosa, ovaha musurukhu ahu wira nikhaliherye muloko ahu, ni muteko wa Muluku wa olumwenku wootheene, moovarihana ni makhalelo ahu. Murummwa Paulo aahimmye so: “Muluku onnisiveliwa vanceene naavahaka ni murima wotheene, maana onilipelela wira mutthu ovaheke ele eniwerya awe, ohiya ele ehiniwerya awe”. (2 aKor. 8:4, 12) Yehova onnivaha efaita khula etthu ninvaha ahu ni murima wootheene, hata eryeene vakhaani. — Mar. 12:42-44. w22.03 24 etti. 13

Axitokweene khaniwerya omaliha mixankiho sootheene sinaaphwanya axinnaya. Hata vari siiso, Yehova oniphavela wira axitokweene yiimananiheke olipiha ni okhapelela ipwittipwitthi sawe. Axitokweene oowaatteliwa miteko, anrowa okhalana sai okathi wowaakhaliherya anna ni arokora? Mutthareke ntakiheryo na Paulo. Paulo aanihaavya okathi wooreerela wira aattottopele ni waalipiha axinnawe. Axitokweene annitthara ntakiheryo nawe, yaaphentaka ni waareerela murima anna ootheene ni arokora. (1 aTes. 2:7) Paulo aanaalipiherya makristau ootheene wira aanaaphenta, ni wira Yehova aanaaphenta-tho. (2 aKor. 2:4; aEef. 2:4, 5) Paulo aanaathokorerya atthu awo ntoko apatthani awe, nto aaniviriha okathi ori ene naawo. Aahiwooniherya wira anaaroromela, aaleelaka mixankiho sawe, ni itthu ahaapaka awe saana mwaha wooyariwa ni etampi. (2 aKor. 7:5; 1 Tim. 1:15) Hata vari siiso, Paulo khaawehexexa mixankiho sawe, masi aaniphavela waakhaliherya axinnawe. w22.03 28 itti. 9-10