Niireke Ohaavo Oniwiriyana Mavekelo Ahu?

“Nkaasuwela saana akhala wira Muluku ookhala tthiri. Masi, ikwaha sikina kaanivekela. Hata kahaasuwela saana wira Muluku ookhala, masi kaanikupali wira ookhala aiwa kaavekelaka. Kaamukhala paahi ni oriipiwa murima. Vaanikoopiha omwaamini Muluku, maana koona wira atthu oohilipa paahi tanimwaamini Muluku”.—PATRICIA,a IRLANDA.

YOOTOKO owiiraneelani etthu ela yaamwiiranenle Patricia? Niireke munnivekela nnaamwi muhoveryaka wira Muluku ookhala? Akhala wira munuupuwela siiso muhooneke wira muri mekhinyu. Nkawehani ela:

◼ Yootokosa emosa yaapakiwe, ehooniherya wira eriyari ya atthu 2.200 oGra-Bretanha, paahi 22 pursento tanikupali wira Muluku ookhala, yoowo opattunxe elapo ni oniiwa mavekelo. Hata ahikupaliki, atthu oowiiraka 55 pursento ikwaha sikina annivekela.

◼ Ilapo xexe akohiwa aya atthu oowiiraka 10.000, eriyari ya atthu yaale ahinikupali wira Muluku ookhala, 30 pursento annipaka mavekelo.

Exeeni Eniwiiriha Atthu Awo Ohoverya?

Allan a wInglaterra onihimya so: “Kaamakela ohimya wira nkimmukupali Muluku maana koona wira etiini ennaaruma atthu moohiloka ephavelaka ophwanya musurukhu paahi. Kanuupuwela-tho so: vaakhanle wira Muluku ookhala tthiri, khuuvo aarowa opuheriwaka. Masi, okathi mukina kaanikilaathi khiyavekela nnaamwi kahaamusuwela mutthu ene kanvekela aka. Nto kaaniikoha-tho: ‘kikhumelenle sai valaponi-va?’”

Khula mutthu ookhalana mathowa animwiiriha ohoverya akhala wira Muluku onnaakhula mavekelo. Ohoverya iwo ikwaha sinceene onikhumela mwaha wa makoho awo anittharelana, anamunceene ahinwerya ya waakhula:

◼ Niireke ookhala Mpattuxa a olumwenku?

◼ Xeeni ikwaha sinceene itiini sinikumiherya aya itthu soohiloka?

◼ Xeeni Muluku onihiya awe ohaawa okhumelelaka?

Niireke osuwela waakhuliwa wa makoho ala, onowiirihani okupali wira ookhala tthiri onaakhula mavekelo?

[Enoota]