Mphwanye Okhumela Saana Wekeekhai
“Munoreriwa okathi wothene . . . khamunrowa wojela miteko sanyu”.—YOX. 1:8.
MWAAROWA WAAKHULA SAI?
Okhumela saana wa Salomoni waari sai?
Okhumela saana wa Paulo waari wa enamuna xeeni?
Munrowa owerya sai okhala ookhumela saana moohimala?
1, 2. (a) Atthu anceene anihimya exeeni sa okhumela saana? (b) Munrowa ovarerya sai moonelo anyu voohimya sa okhumela saana?
MOOLUMO oowi okhumela saana antaphulelani? Mwaarowa waakoha atthu akina, munrowa woona wira waakhula waya onnivirikana vanceene. Mwa ntakiheryo, atthu anci anihimya wira okhumela saana ontaphulela ophwanya musurukhu munceene, osuwela saana muteko, aahiiso osoma vanceene. Akina anoona wira ontaphulela okhalana emusi yoophenta, apatthani ooloka, wala ohiwana-wana ni apatthani oomutekoni. Ole onimurumeela Muluku, pooti wuupuwelaka wira mutthu ookhumela saana tuule orina miritti sa mmulokoni, wala oniphwanya mireerelo mmuteko wolaleerya.
2 Wira musuwele moonelo anyu, mulepe masina vakhaani mwa atthu aniwoona anyu okhala ookhumela saana, anaavaha anyu efaita ni waattittimiha. Mikhalelo xeeni sootepexa wooneya atthu awo arina aya? Niireke thaaciri wala ootepa osuweliwa? Niireke toovuwa? Moota onrowa anyu waakhula makoho awo, pooti wooniherya etthu eri vamurimani vanyu, nto eyo enoowerya weettiherya soothanla sanyu ni soolakela sirina anyu.—Luka 6:45.
3. (a) Yooxuwa aatthuneya opaka exeeni wira okhumele saana? (b) Vano ninrowa othokorerya exeeni?
3 Masi, moonelo wa Yehova tori etthu yootepexa otthuneya, maana okumi ahu onlipa ni wataana orina ahu ni Yehova. Okathi Yoxuwa aavahiwa awe muritti muulupale woweettiha anaIsarayeli arowaka Elapo Yoolaiheriwa, Yehova aahimuruma Yoxuwa osoma Ikano sa Moise ‘othana n’uhiyu’ ni weettela saana ele yaasoma awe. Nto khuhimya so: “Munoreriwa okathi wothene” nto munrowa opakaka itthu mwa miruku. (Yox. 1:7, 8) Nyuwo munnisuwela wira tthiri Yoxuwa aahikhumela saana. Nto ankhi hiyo? Ninrowa osuwela sai akhala wira moonelo ahu wa okhumela saana onnivarihana ni Yehova? Wira naakhule, nrowe nthokorerye sowiiraneya sa atthu anli alempwale mBiibiliyani.
NIIREKE SALOMONI AARI MUTTHU OOKHUMELA SAANA?
4. Xeeni vakhanle ahu oohimya wira Salomoni aahikhumela saana?
4 Mwa inamuna sinceene Salomoni aahitepa okhumela saana. Mwaha wa xeeni? Owo aahireerihiwa vanceenexa, mwaha wa oviriha iyaakha senci omwiiwelela ni omoova Yehova. Pooti wira munnuupuwela wira nuumala Yehova omwiirela Salomoni oveka etthu eniphavela awe, Salomoni aavenke miruku wira eettiheke saana nloko na Muluku. Okhuma okathi ole Muluku aahinvaha miruku ni mihakhu. (Mmusome 1 Mamwene 3:10-14.) Ankhili awe yaari ‘alupale vowavikana àtthu othene yakhala epantte ya enikhuma nsuwa ni wEjitu’. Ovuwa wa Salomoni waahiphiya wa ‘maloko othene yattamanne awe’. (1 Mam. 5:10, 11) Nto voohimya sa mihakhu sawe, eweero paahi yaakhela awe mwaakha mmosa olemela waya waari wa itoneleda 25! (2 Wah. 9:13) Salomoni aari mwene a miruku saana, aanisuwela saana miteko sa oteka, ni nakoso. Aayo, vaavo aamwiiwelela awe Muluku, Salomoni aanikhumela saana.—2 Wah. 9:22-24.
5. Etthu xeeni Salomoni yoonale awe okhala yekeekhai wa ale anikhumela saana wa Muluku?
5 Masu Salomoni alempe awe eliivuru ya Musuweli anooniherya wira Salomoni khaiwonke uupuwelaka wira ohakalala ni okhalana itthu oniweryaneya paahi wa ale arina muhakhu ni ovuwa. Nnaari. Maana aalempe so: “Kosuwela wira etthu emosaru enimureriha mutthu ti okhala sana n’utteliwa murima okathi onkhalawe vathí-va. Nave-tho olya n’uwurya, n’upuha sorera sothene simphwanyahu ni muteko ahu, sothene ti sohava sa Muluku”. (Mus. 3:12, 13) Aahisuwela-tho wira ohakalala iwo onnikhala wooloka akhala wira mutthu owo onnimuhakalaliha ni wataana saana ni Muluku. Tivonto Salomoni aalempe awe so: ‘Mwa itthu sothene silepiwe-mu, omaliherya waya ti nno: Mmuttittimihe Muluku ni omova, mwìweleleke soruma sawe. Mutthu opattuxeriwe [yeeyo]’.—Musuweli 12:13.
6. Ntakiheryo na Salomoni ninnikhaliherya sai wira nisuwele ele ekhanle okhumela saana wekeekhai?
6 Mwa iyaakha sinceene Salomoni aanimoova Muluku. Soolempwa sinihimya so: ‘anitthara miruku sa Davidi, tithi awe’. (1 Mam. 3:3) Tthiri munnaakhulela wira Salomoni aari mutthu ookhumela saana. Mwaha wootthara malakiheryo a Muluku, Salomoni aahiteka empa ya Muluku yoovuwa mwa okokhorela wekeekhai ni aahilepa iliivuru tthaaru siri mBiibiliyani. Nnaamwi hiyo nihiwehereryaka opaka itthu ntoko iyo, ntakiheryo na Salomoni okathi yoole aarya awe oororomeleya, nihaana onikhaliherya wira nivarerye ni woona ele ekhanle okhumela saana wekeekhai, ni wiimananiha wira hiyo-tho nikhumele saana. Nihaana wuupuwela-tho wira Salomoni aahuupuxeriwa olepa wira itthu ntoko, okumi wooloka, ankhili, ovuwa ni okhalana owerya ti soohiroromeleya, nnaamwi anamunceene yoonaka okhala etthu enimwiiriha mutthu wooniwa okhala ookhumela saana. Tthiri itthu iyo ti seethiru, sinilikana ni “womola epheyo”. Niireke khamunoona wira atthu aniphenta musurukhu annitepa ophavela wuncererya musurukhu aya? Nave ikwaha sinci annixankela itthu sirina aya. Ohiya-vo nihiku nikina mihakhu saya sinirowa wa atthu akina.—Musome Miruku 2:8-11, 17; 5:10-12.
7, 8. Moota xeeni Salomoni oonihenrya awe ohiroromeleya, nto exeeni yaamukhumelenle?
7 Munnisuwela-tho wira Salomoni aahihiya omuroromela Muluku. Ninsoma so, “Salomoni vuluvanlyawe, athiyan’awe yahihapuxa murim’awe wira àrumeleke amuluku a amálapo, siso Salomoni khàrumenle-tho Apwiya Muluku awe ni murim’awe wothene, ntoko sìralyawe Davidi, tithi awe. . . . Salomoni ahira sotakhala va maithoni” va Yehova.—1 Mam. 11:4-6.
8 Mwaha wophweeleya, Yehova aahimuleela Salomoni wira: “Okhala wira mohonona murim’anyu, muhittharaka watàna wapakalyaka ni nyuwo, muhìwelelaka soruma saka, miyo kinowakhani omwene, kinvahe mmosa àrumeyi anyu”. (1 Mam. 11:11) Eyo yaari yootakhala! Nnaamwi Salomoni aakhumenle saana mwa itthu sikina, nuuvira okathi owo aahimutthekela Yehova. Aahihiya opaka etthu yootepexa otthuneya mookumini, eyo piiyo, okhala oororomeleya wa Muluku. Tivonto khuta mutthu aikoheke so: ‘kiireke kinniimananiha wira mweettelo a Salomoni okikhaliherye okhala mutthu ookhumela saana tthiri?’
MUTTHU YOOWO AAKHUMENLE SAANA TTHIRI
9. Moovarihana ni moonelo wa atthu a mulaponi, niireke aari mutthu ookhumela saana? Mutthokiherye.
9 Okumi wa Paulo waanivirikana saana ni wa Solomoni. Maana Paulo khaarina ehice yaapakiwe ni maino a itthepo aahiiso ifesta sa mamwene. Paulo aanivoliwa etala, ntthona, oriiriwa ni othoiwa soowara. (2 aKor. 11:24-27) Nuumala weemya wira Yesu ti Mesiya, Paulo khaarina-tho ovuwa mwa etiini ya aYuda. Tivonto, ahooleli a etiini ya aYuda yaanimunyokha. Paulo aahitthukweliwa, omaniwa, owasuliwa, ni onyoholiwa, Paulo onihimya so: “Hiyo nnolikana ni ikokhola s’elapo ni ntthupi na vathí, mpakha olelo va”.—1 aKor. 4:11-13.
10. Xeeni vooniwa aya wira Paulo aahikhootta eparakha ya okhumela saana?
10 Oryeene mmiravo osuweliwaka okhala Saulo, murummwa Paulo aanilipelela ophwanya itthu sinceene. Mwaha wooyariwa emusi yoottittimiheya, owo aasomihiwe ni Gamaliyeli mwiixuttihi oovuwa, muhoolo mwaya Paulo alempe so: “Miyo kanikelela oholo mw’edini y’aYuda vowavikana amusi aka anjene”. (aGal. 1:14) Saulo aanisuwela olavula saana eHeeberi ni eGriki, aahikhalana-tho ele ehimyale awe okhala eparakha ni edireitu ya mutthu ooRoma. Vakhanle wira aathanlale otthara moonelo wa mulaponi, woonasa wene Saulo amphwanya ovuwa ni mihakhu sinceene. Moovirikana ni eyo, Paulo aathanlale mweettelo yoole atthu akina wala amusi yoona aya okhala ololo wuulupale. Exeeni yaamwiirinhe opaka eyo?
11. Itthu xeeni Paulo saatepa awe avaha efaita, mwaha wa xeeni?
11 Paulo animphenta Yehova ni aaniphavela omuhakalaliha vanceene ovikana ophwanya mihakhu ni ottittimihiwa eriyari ya apinaatamu. Mwaha woosuwela saana ekekhai, Paulo aanivaha efaita woopola wa Yesu, muteko weeKristau, yoolipelela ya okumi wiirimu, itthu seiyo atthu a mulaponi sihinivaha aya efaita. Paulo aanisuwela wira waahikhala mwaha muulupale waatthuneya olokiheriwa. Maana Satana aahimyale wira anwerya waahapuxa apinaatamu wira ahimurumeeleke Muluku. (Yobi 1:9-11; 2:3-5) Nto, hata aakumana mixankiho sinceene, Paulo aahilakela olipiherya okokhorela wekeekhai ni okhala oororomeleya wa Muluku. Eyo ti etthu atthu a mulaponi yahuupuwela aya voohimya sa okhumela saana.
12. Xeeni nyuwo muthanlaka omuroromela Muluku?
12 Munniphavela okhala ntoko Paulo? Ekeekhai wira khivanikhweya mutthu ororomeleya wa Muluku, masi ninnisuwela wira ororomeleya onniphwanyiha mareeliho ni omuhakalaliha Yehova, nto eyo ti etthu enimwiiriha mutthu okhala tthiri ookhumela saana. (Mir. 10:22) Ninniphwanya mireerelo vano ni owehererya mareeliho a muhoolo. (Mmusome Marko 10:29, 30.) Tivonto, nookhalana mathowa anniiriha ‘ohiroromela mihakhu sihinlekela, masi [nimmuroromela] Muluku yoowo onnivaha sorera sothene vowatta wira niphwanye’ ohakalala. Wira siiso ‘nnimwiithukumanyerya muhakhu ohimpweteya wira niphwanye ekumi ehinimala’. (1 Tim. 6:17-19) Nihaana okupali-tu wira okhuma vano mpakha ovira iyaakha sinceenexa, nnooweryaka oweha ottuli nto khiyahimya so: “Tthiri mweettelo aathanlale aka wokiiriha okhumela saana!”
MIHAKHU SANYU SIRI WOOWI?
13. Miruku xeeni saavahiwe ni Yesu voohimya sa osuka mihakhu?
13 Yesu aahilavula sa mihakhu oriki: ‘Muhìthukumanyerye mihakhu vathí-va, vava owexe ni mukwitha vanihononaya, anawiye vanipwexaya mukhora, khukuxa muhakh’uwo. Mwithukumanyeryeke mihakhu wirimu, weiwo ohikhanle mukwitha walá owexe, nnákhala owexe wala mukwitha ohinlyaya, ohikhanle-wo anawiye ankuxa muhakh’uwo. Tthiri, vavo vari muhakhu anyu, vavo t’uri murim’anyu’.—Math. 6:19-21.
14. Xeeni varya aya voohiloka waavyaka mihakhu sa vathi-va?
14 Mihakhu sa mutthu valaponi pooti okhala itthu sinci ohiya musurukhu paahi. Woonasa wene, pooti ohela mpuwa khuta etthu yeele yaalempwe ni Salomoni seiye siniwiiriha apinaatamu onoonaka okhala ookhumela saana, itthu ntoko, ottittimihiwa, ovuwa aahiiso okhalana owerya. Yesu aahittittimiherya eponto eyo yaahimmwale ni Salomoni mwa eliivuru ya Musuweli, oriki: muhakhu wa mulaponi khonikhala wa mahiku otheene. Pooti wira mulaponi munikhala anyu muhoona wira mihakhu iyo sotheene waakuva omala. Prusoore oniitthaniwa Frederick Dale Bruner, oolepa sa mihakhu oriki: “Atthu annisuwela saana wira ovuwa wa mutthu waakuva omala. Maana mutthu aavunwe eSaabadu evinre pooti ohitthikela-tho okhala oovuwa. Mutthu ori thaaciri mwaakha ola, pooti opwata mwaakha onirwa . . . . [Yesu] onnaaphenta apinaatamu. Tivonto ohaatumererya okhootta soowereya sinikhumelela nuumala omala ovuwa wawe. Tthiri ovuwa khonikhala wa mahiku otheene. Nto Yesu khoniphavela wira awiixutti [awe ekhaleke] ooriipiwa murima. ‘khuta nihiku olumwenku onnimurukunuwela mutthu yoole aakhala ntoko teettiha olumwenku’”. Nnaamwi anamunceene yaakhulelaka masu awo, atthu vakhaani paahi tanirukunuxa moonelo aya voohimya sa ovuwa ni mihakhu. Ankhi nyuwo?
15. Muthinto xeeni wa okhumela saana oniimananiha ahu wira niphwanye?
15 Amahoolela akina a itiini aniixuttiha wira okhalawene ti vootthekeya mutthu ophavela okhumela saana, nto mutthu ohaana okhootta wiimananiha wotheene wira okhumele saana. Muhaana woona wira Yesu kakhoottihale wiimananiha wooreerela wira mutthu okhumele saana. Masi Yesu aatumererya awiixutti awe wira wiimananiha waya okhaleke woophavela ‘othukumanya mihakhu sihinimala wirimu’. Etthu yuulupale eniphavela ahu ehaana okhala wiimananiha okhala ookhumela saana nittharihelaka otthuna wa Yehova. Tthiri masu a Yesu annuupuxerya wira nihaana othanla moota woweettiha ekumi ahu. Nto ekeekhai tiila: ninnimananiha ophwanya etthu eniphavela murima ahu, etthu enoona ahu okhala ya efaita.
16. Etthu xeeni enitthuneya ahu otepa okupaliki?
16 Akhala wira murima ahu onniphavela tthiri omuhakalaliha Yehova, nikupaliki wira owo onnoona eyo, ni onrowa onivaha itthu sikina sinitthuneya. Mwa okathi vakhaani Yehova pooti weemererya wira hiyo nivoliwe etala, ni ntthona. ntoko siiren’ya aya ni murummwa Paulo. (1 aKor. 4:11) Hata eyo yiireyaka, hiyo niroromeleke miruku sooloka sa Yesu: “Muhithanane mwiraka: ‘Nilye exeni? Niwurye exeni? Niware exeni?’ Ahinimusuwela Muluku t’anetta ephavelaka itthu iya sothene. Masi nyuwo, Atith’inyu ari wirimu annisuwela wira sothene iya sinnohalelani. Mpajeryeke ophavela omwene wa Muluku, ni wiwelela otthuna wawe. Vano sikina sothene, Muluku onimophwanyihani”.—Math. 6:31-33.
MPHWANYE OKHUMELA SAANA ONIVARIHANA NI MULUKU
17, 18. (a) Okhumela saana wekeekhai onlipa ni exeeni? (b) Nto itthu xeeni sihinitthuneya wira mutthu okhale ookhumela saana?
17 Etthu yuulupale enireerela osuwela tiila: Okhumela wahu saana khonlipa ni itthu siniphwanya ahu wala okhulupale wa mulaponi. Ohiya-vo, okhumela saana wekeekhai khoniphimmwa ni miritti mutthu sinivahiwa awe mmuloko wa eKristau. Mareeliho awo ahaana ovarihanaka ni ele eri tthiri mathipelo a okhumela saana wa mutthu, eyo piiyo, omwiiwelela ni omuroromela wahu Muluku yoowo onnilipiha oriki: “Etthu enikhanyereriwawe murumeyi t’ila: okhala àroromeleya mmutekoni mwawe”. (1 aKor. 4:2) Tivonto nihaana wiimananiha okhala oororomeleya. Yesu aahimyale so: “Ole onrowa ovilela mpakha omaliherya, onimòpowa”. (Math. 10:22) Niireke khamuneemya wira woopowa teri etthu enooniherya wira mutthu owo ookhumela saana?
18 Wuupuwela saana masu amanle ahu ohimya, munimoona wira okhala oororomeleya wa Muluku khonivarihana ni ovuwa, osomexa, okhalana musurukhu munci, aahiiso okhulupale; ohiya vo, ororomeleya khonilipa ni waakuva osuwela itthu, opaka saana itthu, wala wooniwa ophwanelela. Khuta mutthu hata mikhalelo sawe sivirikanaka, onoowerya okhala oororomeleya wa Muluku. Eriyari ya atthu a Muluku wa eseekulu yoopacerya, akina yaari oraala, akina yaari amasikhini. Tivonto sarya aya sooreerela miruku iye saavahiwe ni murummwa Paulo soowi: “ewireleke sorera akhw’aya, ni wira ekhaleke athajiri ni miteko saya sorera, yavaheke òthoiwa ni murima woleva, yakaweleke akhw’aya itthu sirinaya”. Otheene aya oothaaciri ni ale yaari ohaawa yanwerya ‘ophwanya ekumi yekeekhai’. (1 Tim. 6:17-19) Etthu emosaru eyo enniiraneya-tho olelo-va. Otheene ahu nihaana eparakha ni miritti simosaru: Ovikaniha ororomeleya ni ‘okhala athajiri a miteko sorera’. Akhala wira nnoopaka eyo, ninrowa okhala ookhumela saana wa Yehova yoowo onipattuxale, ni ohakalala mwaha woosuwela wira noohakalaliha murima awe.—Mir. 27:11.
19. Voohimya sa okhumela saana tiivi eri yoolakela anyu?
19 Nyuwo pooti ohiwerya othanlela itthu siniwiiraneelani, masi etthu eniwerya anyu ori moota woweettiherya itthu iyo. Mwiimananihe okhala oororomeleya wa khula etthu enookhumelelani. Wiimananiha wanyu onookumiherya mireerelo. Mukupaliki wira Yehova onrowa woreelihani vanceene, vano ni muhoolo okathi woohimala. Nto muhiliyaleke masu Yesu aahimyale awe wa maKristau oothanliwa oriki: “Mukhaleke òroromeleya mpakha okhwa, miyo kinimotthuvelani, kovahakani ekumi”. (Wis. 2:10) Tthiri ophwanya ekumi tori okhumela saana wekeekhai!
[Elatarato epaaxina 14]
Mmoonelo wa apinaatamu Paulo aari mutthu aarowa okhala oovuwa
[Elatarato epaaxina 15]
Paulo aahiphwanya okhumela saana wa ekeekhai