Makoho Anikhuma Wa Ale Anisoma Irevista Sahu
‘Àna a Muluku’ aromoliwe ni Maphattuwelo 6:2, 4 yaakhala ahinatthi Mutaaseke yaari aani?
▪ Vannisuwanyeya wira masu ala anaahimya aana a Muluku wala malaikha. Masi ninsuwela sai?
Masu oopacerya a eveersu eyo anilavula so: ‘Àna a Muluku, vonalyaya wira athiyana ale àtthu yari òrera sana, yahathanla ale yatthunexaya wira ekhalé axaraya’.—Maph. 6:2.
Nnaamwi aBiibiliya akina ahirumeelaka, moolumo oowi: ‘aana a Muluku ekekhai’ wala ‘aana a Muluku’, khalai moolumo awo yaanirumeeliwa mwa soolepa sa Maphattuwelo 6:2, 4; Yobi 1:6; 2:1; 38:7; ni Esalimo 89:7. Nto moolumo awo anitaphulela exeeni voohimya sa ‘àna a Muluku’?
‘Àna a Muluku’ ntoko saalempwale aya khalai ni Yobi 1:6, ti malaikha, yaathukumana ohoolo wa Muluku. Nto eriyari ya malaikha awo, aahikhala Satana, yoowo ‘aronwe wettakasa valaponi’. (Yobi 1:7; 2:1, 2) Mwa enamuna emosaru eyo, Yobi 38:4-7, aalempe so: ‘àna a Muluku othene yahitteliwa murima ni otthapa’ okathi Muluku ‘athipenle awe malitti’ elapo. Okhala wira apinaatamu yiira ehinatthi opattuxiwa, nto moolumo oowi ‘àna a Muluku’ yaahimmwa malaikha. ‘Àna a Muluku’ ntoko salempwale aya ni Esalimo 89:7 ti soopattuxiwa sa wiirimu sinikhala ni Muluku, ohiya apinaatamu.
Nto tani ari ‘àna a Muluku’ ekeekhai aromoliwe ni Maphattuwelo 6:2, 4? Moovarihana ni sowiiraneya sa mBiibiliyani, vanniweheya wira awosa ti malaikha, wala aana a Muluku yaale yaarwaale valaponi.
Atthu akina vannaavila okupali wira vanniweryaneya malaikha ophavela orupiha. Masu a Yesu ari mMatheyo 22:30, annooniherya wira wiirimu khonithelaniwa ekasamento wala orupihana. Masi, wookhala okathi malaikha yaawara aya erutthu ya opinaatamu enawerya olya ni owurya vamosa ni atthu. (Maph. 18:1-8; 19:1-3) Nto, mwa mukhalelo owo, pooti okupaliki wira yaaniwerya waarupiha athiyana.
Aakhala mathowa manceene ari mBiibiliyani annikupaliha wira malaikha awo aapaka etthu eyo.Yuda 6, 7 onnilikanyiha itampi sa atthu a oSodoma, yaawo yaarupihana moohiloka ntoko ‘malaikha ale yahatteliwe murima n’uwerya wavahiwaya, khuhiya nipuro naya’. Etthu ekina enlikana ni itampi sa malaikha ala ni atthu oSodoma, ‘yahivaherya onamuttompe, khutthara itthu sohirya sinvirikanya makhalelo a mutthu’. Yoolepa ya 1 Pedru 3:19, 20 ennaalavula malaikha ale ohiiwelela a ‘mahiku a Nowe’. (2 Ped. 2:4, 5) Nto, mweettelo woohiiwelela wa malaikha mahiku a Nowe, pooti olikanyihiwa ni itampi sa oSodoma ni oGomora.
Masu ala teekeekhai mwaha wookupali wira ‘àna a Muluku’ aromoliwe ni Maphattuwelo 6:2, 4 yaari malaikha yaawo yaawanre irutthu sa opinaatamu wira yarupeke ni athiyana.
Biibiliya onihimya wira Yesu “ahilalerya minepa satthukeliwe”. (1 Ped. 3:19) Masu ala antaphulelani?
▪ Murummwa Pedru aahilavula wira, minepa iyo ti seiye ‘sahamwiwelenle Muluku okathi wawehererya awe n’uvilela, Nowe atekaka ekalawa’. (1 Ped. 3:20) Pedru aahimya minepa seiye saathanlale otthara ohiiwelela wa Satana. Yuda onilavula sa malaika yaale ‘yahakhapelenle eyulupale aya, khuhiya nipuro naya: Muluku àsuka yawo mwepiphini mowixa, etthukiwene ni mikhoyi sihintaphuliwa-tho, àsukeryaka nihiku nulupale ninrowaya olamuliwa’.—Yuda 6.
Moota xeeni minepa iye sahiiwelenle aya okathi wa Nowe? Ahinatthi mutaaseke, minepa iye saahiwara erutthu yoopinaatamu, etthu yeeyo Muluku ahaatthuniherya awe. (Maph. 6:2, 4) Vanceenexa, mwaha wa malaikha ale waarupiha athiyana, eyo yaari etampi yuulupale. Muluku khaapanke malaikha wira yaarupiheke athiyana. (Maph. 5:2) Nto malaikha ala ootakhaala muhoolo Muluku onrowa opwetexa. Masi mahiku ala, ntoko Yuda olavunle awe, malaikha awo ‘ari mwepiphini mulupale’, niire so, ekhatteya yomunepani.
Nto silini Yesu aalalenrye awe ‘minepa iya satthukeliwe’? Pedru aahilepa masu ala wira eyo yiiranen’ye nuumala Yesu ‘okhalihiwa-tho mukumi [mwa munepa]’. (1 Ped. 3:18, 19) Moone-tho wira Pedru oolavula wira Yesu ‘aahilalerya’. Mwaha wa Pedru orumeela masu anooniherya etthu evinre, eyo entaphulela wira olaleerya iwo wiiriwe vahinatthi Pedru olepa epaphelo awe yoopacerya. Vanikhala wira okathi yoole nuumala ohihimuxiwa, nto Yesu aahilaleya wira minepa iye sootakhala sinrowa waakhela ehukhumu yuulupale. Olaleeriwa iwo khahiyo waari wa ovahiwa nlipelelo. Waari olaleeriwa wa ophukeliwa. (Yona 1:1, 2) Nave-tho Yesu ahooniherya waamini wawe ni ororomeleya mpakha okhwa nuuvira-vo aahihihimuxiwa; nto Yesu ahooniherya wira Diabo kharina owerya ohoolo wa Yesu. Nto Yesu aahikhalana mathowa a olaleya ehukhumu ela.—Yoh. 14:30; 16:8-11.
Muhoolo, Yesu onrowa omutthukwa ni omurihela mulittini moowiixa Satana ni malaikha awe. (Luka 8:30, 31; Wis. 20:1-3) Mpakha okathi owo, minepa iyo soohiiwananeya, siri mweepiphini yomunepani, nto siniwehererya opwetexiwa.—Wis. 20:7-10.
[Elatarato epaaxina 22]
[Elatarato epaaxina 23]