Makoho Anikohiwa ni Ale Anisoma Irevista Sahu
Tani ari “malaikha oothanliwa” aniromoliwa 1 Timootheyo 5:21?
Murummwa Paulo, aahimulepela epaphelo mpatthani awe Timootheyo yoowo aari mutokweene, ohimyaka so: “Kinnootumereryani oratteene, ohoolo wa Muluku ni wa Kristu Yesu ni wa malaikha oothanliwa, wira mutthareke malakiheryo ala muhaathanyaka nnakhala muhaathanlaka atthu”. — 1 Tim. 5:21.
Wiira niwerye osuwela malaikha anihimmwa, nrowe nthokorerye malaikha yaawo ahiniirela mpantta ekrupu ya malaikha oothanliwa. Awo khahiyo makristau oothanliwa ari 144.000. Nave okathi Murummwa Paulo aamulepela awe Timootheyo, yiira ohinatthi opacerya ohihimuxiwa wa makristau oothanliwa wiira yakhaleke wiirimu. Arummwa ni makristau makina oothanliwa, yiira ahinatthi okhwa ni ohihimuxiwa mookhwaani wiira arowe wiirimu, tivonto, khivaarowa oweryaneya awo okhala “malaikha oothanliwa”. — 1 aKor. 15:50-54; 1 aTes. 4:13-17; 1 Yoh. 3:2.
Nave “malaikha oothanliwa” khahiyo yaale yaamurukunuwenle Muluku okathi wa mutaaseke. Okhala wiira malaikha awo, yaamukhaliherya Satana ni yaahikhala minepa sootakhala ni awanani a Yesu. (Maph. 6:2; Luka 8:30, 31; 2 Ped. 2:4) Muhoolo, malaikha awo ootakhala anrowa otthukiwa ni oriheliwa munlittini noowiixa mwa iyaakha soowiiraka 1.000, nuumala-vo, anoopwetexiwa vamosa ni Satana. — Yuda 6; Wiis. 20:1-3, 10.
Tivonto, “malaikha oothanliwa” yaawo murummwa Paulo aahimya awe eversiikulu ela, ti yaale anivara ni ‘Muluku vamosa ni Yesu Kristu’.
Aakhala malaikha manceene oororomeleya. (aHeeb. 12:22, 23) Yoowiiraneya ela, enooniherya wiira Yehova onnivaha khula nlaikha muteko aya. (Wiis. 14:17, 18) Mwa ntakiheryo, Yehova aahiruma nlaikha nimosa waapwetexa anakhotto 185.000 a wAsiria. (2 Mam. 19:35) Nave malaikha, makina aavahiwa muteko wa ‘waakumiha Moomweneni wa [Yesu] atthu ootheene anaatthekiha akhwaaya, ni anipaka itthu sootakhala’. (Math. 13:39-41) Malaikha makina, aavahiwa muteko wa ‘waathukumanya atthu athanliwe’ wiira yakhaleke wiirimu. (Math. 24:31) Nave malaikha makina aavahiwa muteko wa ‘onikhapelela khula opuro ninrowa ahu’. — Esal. 91:11; Math. 18:10; Mulikanyihe ni Matheyo 4:11; Luka 22:43.
“Malaikha oothanliwa” anihimmwa 1 Timootheyo 5:21, moohaanyiherya ti yaawo athanliwe wiira akhaliheryeke miloko. Eversiikulu ela, murummwa Paulo, ahaavaha miruku axitokweene moota wookhapelela muloko nave anna ni arokora yaahaana waattittimiha. Nave axitokweene ahaana okhalana ephoole okathi anikhapelela aya miritti saya wiira ‘ehaathanyeke nnakhala waathanla atthu’ ni ehipakeke soothanla mookhummwa murima. Etthu yuulupale eniwiiriha axitokweene otthara miruku sa murummwa Paulo, okhala wiira awo anvara muteko “ohoolo wa Muluku ni wa Kristu Yesu ni wa malaikha oothanliwa”. Vannooneya wiira malaikha makina aavahiwa muteko wa okhapelelaka miloko. Miteko iyo, sinihela muhina waakhapelela arumeyi a Yehova, oweherya muteko woolaleerya ni omuleela Yehova itthu aniweha aya. — Math. 18:10; Wiis. 14:6.