Niireke Muhaana Ororomela Etiini Voohimya sa Musurukhu?

Estelaa aari muthiyana ooluttuweliwa aarowa okerexa ni anamwane anceene. Owo onihimya so: “Miyo kaahimuleela muhooleli a ekerexa aka wira kaaphavela omwiixutta Biibiliya”. Masi muhooleli owo khaatonko wiivahererya wira omwiixuttihe Biibiliya. Wookiseryani, muthiyana owo aahihiya weetta okerexa. Owo onnivikaniha iiraka: “Ahooleli a okerexa yaahilepa epaphelo yaahimya wira miyo akhala wira nkaarowa okerexa, kaahaana ovahererya musurukhu paahi. Vano kaahuupuwela so: ‘Awo khanicala akhala wira miyo kinnirowa wala nkinrowa okerexa; masi awo aniphavela musurukhu aka paahi’”.

Angelina, yoowo aamakela orowa okerexa, onihimya so: “Okerexa waka, yaanivirihiwa ephace ikwaha 3 khula muthukumano woomulompa Muluku ovekiwaka musurukhu; nto hiyo naanilipeleliwa ovaha musurukhu okathi owo. Okathi wotheene ahooleli awo yaavekasa musurukhu paahi. Nto miyo kaahuupuwela so: ‘Atthu ala kharina munepa wa Muluku’”.

Niireke itiini sa muttetthe anyu sinniveka wala okhanyererya ovahiwa musurukhu? Nto eyo ennivarihana ni Biibiliya?

EXEENI BIIBILIYA ONIIXUTTIHA AWE?

Yesu, yoowo opacerinhe eKristau, aahimmye so: “Ntoko sivahiwanyu mahala, siso-tho nvaheke mahala”. (Matheyo 10:8) Masu a Biibiliya khanitumihiwa, ni ahaana ovahiwaka atthu otheene aniphavela.

Nto maKristau a eseekulu yoopacerya yaaliverya sai itthu saatthuneya mmulokoni?

Khula mutthu aanivaha ‘ottharihaka murim’awe, khahiyó ni murima omuripalene, nnákhala mwaha w’okhanyereriwa: Tthiri Muluku onsiveliwa n’ule onvaha murima omuttenlene’. (2 aKorinto 9:7) Murummwa Paulo aahihimya so: “Okathi kalaleyaka eriyari anyu Ehapari Yorera ya Muluku, kanìra kivaraka muteko othana n’uhiyu, wira kihokukhumuleni nyuwo, nnákhala mutthu mmosá”. (1 aTesalonika 2:9) Paulo aanitthava iheema wala itenda, wira aikhaliherye mmutekoni woolaleerya.​—Miteko 18:2, 3.

ANAMOONA A YEHOVA ARI SAI MMWAHA OLA?

Anamoona a Yehova annisuweliwa wira annithukumana mmapuro oophwanelela aniitthaniwa Isalau sa Omwene. Nto aniliverya sai sootthuneya sa muloko? Awo khaniviriha ephace avekaka musurukhu; wala orumiha enveloope avekelaka soovaha. Masi, ole onisiveliwa ni mithukumano saya, pooti ovaha musurukhu awe mohooniherya opwehaka mukaaxani wa soovaha Osalau wa Omwene.

Tthiri onitthuneya musurukhu wira erevista ela yimpirimiriwe ni eroihiwe mapuro makina. Masi, nyuwo khamunrowa woona etumihiwaka wala ovekiwaka musurukhu. Etthu enittittimiheriwa ori omwiixuttiha Biibiliya.

Munoona sai? Niireke enamuna ela yoovaha musurukhu ennivarihana ni moolumo a Yesu ni ntakiheryo na maKristau oopacerya?

[Enoota]

[Elatarato epaaxina 4]

[Eponto yuulupale ya epaaxina 4]

Etiini yaarowa okhaliheriwaka sai orweela mwa musurukhu?