MYAHA SA MWARKIVUNI MWAHU
Yowiireya Erina Iyaakha 100
Ennilipiha Nroromelo Atthu yaamoonale ‘Fotodrama da Criação’, mwaakha wa 1914 yaahimmye so: “Onikhala mwa Munna Russell mwaneene”.
Mwaakha ola tonimalela aya iyaakha 100, nuumala woonihiwa woopacerya wa ‘Fotodrama da Criação’. Yaari etthu ya vameekha aya yoonihiwa ntoko eviidiyu yaapakiwe wira yaakhaliheryeke atthu omwaamini Biibiliya ntoko Nuulumo na Muluku. Okhala wira okathi ole atthu yaanikuxeya ni sowiixuttiha sa othatuwa, ovaanyihiwa wa Biibiya ni alipa-oosoma, vamosa ni ohikupaleeliwa Muluku, ‘Fotodrama da Criação’, yaanimuhimya Yehova okhala Mpattuxa a itthu sotheene.
Charles T. Russell, yoowo aari tahoolela ekrupu ya Alipa-oomusoma Biibiliya, khula okathi aanaavya enamuna yookhalela ni yowaakuveya omwarya-mwaarya ikeekhai sa Biibiliya. Alipa-oomusoma Biibiliya yiira arumeelaka iliivuru etthu yoowiiraka iyaakha 30. Nto yahoona wira yaahikhala enamuna ekina esya, eyo piiyo, wooniherya ilatarato.
OMWARYA-MWARYA EVANGELYU SIRUMEELIWAKA ILATARATO
Okhala wene, atthu yaapacenrye iyaakha sa 1890 woona ifilme sooniherya ilatarato paahi voohikhala masu. Nto wanipacerya wa 1903, ifilme sa Biibiliya sanooniheriwa okerexa wa esidade ya oNova York. Tthiri mwaakha wa 1912, vaavo Russell mowiilipiha aapacenrya awe olokiherya efilme ya “Fotodrama”, yoolema ya oweha ifilme yiira ehulaanale. Russell ahoona wira efilme yanwerya omwarya-mwarya ikeekhai sa mBiibiliyani mowaakuveya ovikana iliivuru sarumeeliwa.
Efilme ya “Fotodrama” yeeyo olekela waya yaarina iwoora 8, yaahikawanyiwa khukhala ipantte xexe; moohipisa yanithokorerya myaha sa Biibiliya sowiiraka 96, salavuliwa ni mutthu aasuwelexiwe okhala oosuwela olavula saana myaha, yoowo atthu anceene aasivela omwiiwa alavulaka. Okathi woonihiwa aya, ipantte sinceene saakhumela ni muusika woreera. Ale yaaxuntte moota woorumeela, yaahitakaaha moolumo ni muusika oogravariwa, kukhala efonografo; nto okathi waakhumela ilatarato yaaniiweya masu, yaalikanela ni myaha sa Biibiliya salavuliwa.
Itthu sinceene sarumeeliwa wira epakiwe efilme ya fotodrama saarothummwa. Alipa-oosuwela odesenyari yaakhuma oFiladelfia, oNova York, oParis, ni oLondres yahidesenyari ilatarato vasilaideni saarowa orumeeliwa ntoko ifilme. Anna yaavara muteko woodesenyari oBeteli, yaahidesenyari-tho ilatarato sinceene, ikwaha sinceene yaarantteliha isilaide sophweeya. Wira yincererye ifilme sathummwale, anna oBetheli yaanifilmariwa mittetthe sa oYonkers, oNova York. Anna awo yaanifilmariwa wira akhumeleleke ntoko Abrahamu, Isaki, ni nlaikha nenle namukhottihenrye Abarahamu wira ohinvahe mwanawe ntoko mukuttho.—Maph. 22:9-12.
Munna mmosa aavara muteko ni munna Russell aahihimya wa majornalista wira “efotodrama yaarowa owiiriha atthu anceene osiveliwa myaha sa Biibiliya, ovikana itthu sotheene saatonko opakiwa wira silaleiwe myaha sa itiini”. Nto niireke ahooleli a mukerexa yaamoona oreera enamuna ela ya ninaano ya waasuweliha atthu yaale yahaaxuttihiwa saana masu a Muluku? Nnaari, anamunceene mwa amahoolela a ikerexa khiyalavula mooloka sa efilme ya “fotodrama”, akina yanirumela inamuna soowoka ni sootakhala wira yaakhoottiherye atthu oweha efilme ya fotodrama. Muttetthe mmosa amahoolela akina yaahitumererya ottipihiwa energia.
Hata vaari siiso, opuro wawehiwa iteatro atthu yaamutepa osarya wira awehe voohiliwa etthu. Mwa ntakiheryo, wEstados Unidos, khula nihiku isidade sowiiraka 80 saninweha “fotodrama”. Anamunceene wa ale yaaweha yampacerya woona ‘efilme enilavuliwa’. Erumeeliwaka enamuna ya wooniherya khuta efootu mowaakuveya, atthu yaaniwerya omoona mwaxaana a mwaapalame okhumaka munooceni mwawe ni ophuwa wa makukhu ooreera woona. Myaha sa siensia sooniheriwa seiyo saasuweliwa mahiku yaale, sanooniherya osuwela wuulupale wa Yehova. Ntoko sihimmwale aya wanipacerya, omoona munna Russell olavulaka vafilmeni moolumo oopacerya a “Fotodrama”, wahimwiiriha mulipa-ooweha mmosa ohimya wira: “onikhala mwa Munna Russell mwaneene!”.
ETTHU EHINILIYALEYA MMUTEKO WOMUSOMIHA BIIBILIYA
Mulipa olepa sowiiraneya mmyaha sa ifilme oniitthaniwa Tim Dirks onnihimya efilme ya “Fotodrama” okhala “efilme yoopacerya yooniwa ni owiriyaniwa masu (oogravariwa), ni isilaide sirina ilatarato sa ikoore sootepa oreera”. Ifilme saapakiwa waakelela mahiku sanrumeela inamuna sarumeeliwe ni efilme ya “Fotodrama”, masi ipakeliwo saya khisaalikana ni “Fotodrama”, mmyaha sa omwiixuttiha Biibiliya. Ohiya-vo, khiivo efilme ekina mmoota owo yooniwe ni atthu oophiyeryaka imilyau 9, wa América do Norte, Europa, Australia ni Nova Zelandia, mwaakha woopacerya paahi!
11 a Janero 1914, ti nihiku atthu yaapacenrye aya woona efilme ya “Fotodrama” esidade ya Nova York. Nto nuuvira myeeri 7, yaahikhumelela Ekhotto Yoopacerya ya Olumwenku. Nnaamwi yaakhumenle ekhotto, mittitthi sa atthu olumwenku wotheene saanivikaniha othukumana wira siwehe efilme ya “Fotodrama”, khiyawiiriha atthu ophwanya yoomaaliha, okathi waweha aya ilatarato sooniherya mareeliho a Omwene wa muhoolo. Tivonto vanihimmwa aya wira mwaakha wa 1914, efilme ya “Fotodrama” yaari etthue ehiniliyaleya.
[Ekaaxa epaaxina 32]
Okathi waattamela aya mwaakha wa 1914, Alipa-oomusoma Biibiliya, yaahipaka marehereryo wira alaleerye olumwenku wotheene. Tivonto yaapanke aya etthu yaalikana ni efilme yiitthaniwa “Fotodrama da Criacão”. Awosa yaahirumeela okathi, ikuru saya ni musurukhu munceene wira apake.
[Eponto yuulupale epaaxina 32]
“Ilatarato sotheene saahela mpuwa myaha sa opattuxiwa wa ittheneri mpakha Olamulelo wa Kristu wa Iyaakha Ekonto Emosa”. —Francis Stuart Barnes, aarina iyaakha 14, 1914