Nyuwo Mwaanisuwela?

Niireke munnisuwela ele yaataphulela aya khalai mutthu okhera ikuwo sawe moolakelela?

BIIBILIYA onnooniherya sowiiraneya sinceene seiyo atthu yaakhera aya ikuwo saya. Nnaamwi olelo-va mutthu okhera ikuwo sawe eryeene etthu yoothanyeya, okathi wa khalai aYuda yaanoona okhala etthu yooniherya oriipiwa waya murima, oxanka, wunla, oramuseya wala otikinihiwa.

Mwa ntakiheryo Rubeni “ahahula sowara sawe” vaavo ooceelale awe omutaphula muhima awe Yosefe, okhala wira aahitumihiwa oroohiwa wepotthani. Yakobe tiithi ayasa, “ahikhera ikuwo sawe” okathi aaleelinwe awe wira Yosefe aarookhuriwa ni mwaamunama. (Maph. 37:18-35) Yobi “ahikhera ikuwo sawe” okathi vaiwale awe wira anaawe otheene yaahikhwa. (Yobi 1:18-20) Mulipa a muhupi aarwaale olavula ni Eli Muulupale Aanamukuthto, ‘ahikhera ikuwo sawe’ vaavo aahimmye awe wira aIsarayeli yaahixinttiwa okhottoni, nave anaawe anli yaahiiviwa ni wira nivuku na wataana naahiteexiwa. (1 Sam. 4:12-17) Okathi Yosiya aiwale awe itthu silempwe muliivuruni mwa Ikano ni okupali itampi saavanre aya atthu awe, “ahikhera sowara sawe”.​—2 Mam. 22:8-13.

Okathi aaphukeliwa awe Yesu, Muulupale Aanamukuttho “ahikhera sowara sawe “ mwaha wa wuupuwela wira Yesu aahinveeha Muluku vaalupale. (Math. 26:59-66) Marabino a mmuttettheni yaahikumiherya nlamulo noowi otheene yoole aarowa wiiwa nlavuliwaka nsina na Muluku mooveeha, nto aahaana okhera ikuwo sawe. Murabino mukina aahilavula moonelo awe voohimya sa onyaanyiwa wa empa ya Muluku oYerusalemu, masi aahihimya wira “olelo-va ole oniiwa niveehiwaka nsina na Muluku khonitthuneya okhera ikuwo sawe, maana ikuwo sawe saarowa okhala mattapwatta”.

Masi moota marabino awo yaakhera aya ikuwo saya khiwaarina efaita vamaithoni va Yehova okhala wira awo khiyaapaka eyo ni murima aya wotheene. Tthiri Yehova aahaaleela atthu awe wira: ‘muhikhereké ikuwo sanyu, mukhereke mirima sanyu’.​—Yow. 2:13.