Niireke Munnivaha Efaita Okhapeleliwa Wahu ni Yehova?

‘Maitho a Yehova anniweha sothene, annona miteko sahu sorera ni sotakhala’.​—MIR. 15:3.

IPONTO SUULUPALE SINIREERELA WUUPUWELA

Xeeni Yehova vanoowehaaweni?

Mwa inamuna xeeni Yehova onirowa awe woolopolani, woolakiheryani ni woohoolelani?

Exeeni enimwiiriha Yehova okathi mukina opisaka onikhaliherya noonaka wira nnoohaawa?

1, 2. Moota xeeni oniweha wawe Yehova onivirikana aya ni maakina ale anipwehiwa munivira atthu?

ILAPO sinceene, aathomeiwa maakina anilatha ifootu wira akumiheke ifootu sa ikaaro sinivira ni iye sinikumiherya ehasara. Akhala wira maakina awo annimulatha mutthu onikumiherya ehasara nto khiyatthyawa onnivariwa ni guvernu khiyatthukiwa. Tthiri ti voovila mutthu wiipithiha etthu opanke awe mwaha wa maakina awo anilatha ifootu sa itthu siniiraneya mphironi.

² Niireke wuulaana wa maakina awo onoolikana ni owerya wawe woona Tiithi ahu oophenta Yehova? Biibiliya onihimya wira maitho awe “anniweha sothene”. (Mir. 15:3) Masi niireke owo khula okathi onimakela oniwehexexa wira oone ele enipaka ahu? Wala niireke Muluku onniniweha ophavelaka onihukhumu pahai? (Yer. 16:17; aHéb. 4:13) Nnaari, khoniira eyo! Yehova onninweha khula mmosa a hiyo mwaha woniphenta ni ophavela onikhaliherya.​—1 Ped. 3:12.

3. Inamuna xeeni thanu sinooniherya ophenta wa Muluku sinirowa ahu othokorerya?

³ Exeeni enrowa onikhaliherya ovaha efaita oniweha wawe Yehova mwaha wooniphenta? Nrowe nthokorerye moota owo onipaka awe eyo. Owo onipaka eyo (1) wira onilopole okathi onikhalana ahu muupuwelelo woohiloka, (2)  wira onilakiherye vaavo vanipaka ahu etthu yoohiloka, (3) wira onikhaliherye weettela miruku siri Munuulumoni mwawe, (4) wira onikhaliherye okathi onnikhumelela mixankiho ni (5) wira onitthuvele vaavo vanipaka ahu etthu yooloka.

MULUKU ONIWEHA ONNINLOPOLA

4. Yehova aaphavela exeeni okathi aamulopola awe Kayini wira etampi “erowipithelani”?

⁴ Wanipacerya, nrowe nthokorerye moota Muluku onnilopola awe okathi onikhalana ahu muupuwelelo woohiloka. (1 Wah. 28:9) Wira nivahe efaita owerya wawe Muluku onoona, nrowe niwehe moota owo aathokorenrye awe mwaha wa Kayini yoowo ‘ananariwe vajene’ mwaha wa oheemereriwa ni Muluku. (Musome Maphattuwelo 4:3-7.) Yehova aahimulopola Kayini wira “mwiraru sorera” munookhumela saana. Masi akhala wira owo khaarowa wiiwelela, Yehova aahimulopola oriki, etampi “erowipithelani”. Nto Muluku aahimukoha wira ‘Nyuwo munnowerya oxintta’? Yehova aaphavela wira Kayini eemererye miruku iye nto “ovikanihe ophentiwa ni owo”. Nto ophentiwa ni Muluku wammwiiriha Kayini okhalana wataana wooloka ni Muluku owo.

5. Inamuna xeeni Yehova onnilopola awe okathi onikhalana ahu muupuwelelo woohiloka?

⁵ Nto hiyo olelo-va nri sai? Maitho a Yehova annikela muhina mwa murima ahu, nto khanniwerya onvitherya etthu eri vamurimani vahu. Tiithi ahu oophenta oniphavela wira hiyo nitthareke ephiro ya exariya, masi khonnikhanyererya ohiya mweettelo woohiloka orina ahu. Ovarihelaka muteko osuwela wawe ori mBiibiliyani, owo onninlopola vaavo vaneetta ahu nrowaka vari etthu yoohiloka. Moota xeeni? Okathi onimusoma ahu Biibiliya khula nihiku, ikwaha sinceene ninniphwanya soohimmwa sikhanle oonikhaliherya oxintta makhalelo ni muupuwelelo oohiloka. Ohiya-vo, iliivuru sahu sa eKristau pooti onimwaleela wira nooneke enamuna ya owanana ni oxintta muxankiho orina ahu okhuma khalai. Nave omuthukumanoni sa mmulokoni, otheene ahu ninnaakhela miruku seiyo ikwaha sinceene sinlavula etthu yeelexa ennixankiha!

6, 7. (a) Moota xeeni vaniweryaneya aya ohimmwa wira iliivuru seiye sinilepeliwa imilyau sa atthu sinnooniherya oniphenta wawe Muluku? (b) Moota xeeni nyuwo munirowa anyu ottottela mureerelo okhapeleliwa wahu ni Yehova?

⁶ Soolopola iyo sotheene tthiri sinooniherya wira Yehova onniniweha mooniphenta khula mmosa a hiyo. Tthiri, masu a mBiibiliyani aaviriha iseekulu okhuma vaavale valempwale aya, iliivuru sinilempwa ni mulokiheryo wa Yehova sinilepeliwa imilyau sinceene sa atthu, miruku sinivahiwa mmithukumanoni anivahiwa atthu otheene. Nlelo vannitthuneya mwaneene Yehova onitumererya wira niweheke Nuulumo nawe wira nixintte makhalelo ahu ootakhala. Mwekeekhai eyo pooti ohimmwa okhala yoowooniheya ya oniphenta wawe Yehova.

⁷ Wira nittottele mureerelo soolopola sa Muluku, hiyo nihaana opaceryaka osuwela wira owo onninisuwela saana. Eyo enoonikhaliherya wiiwelela Masu awe, ni omananiha omala-maliha khula muupuwelelo onimunanara Muluku. (Mmusome Yesaya 55:6, 7.) Akhala wira hiyo nnimwiiwelela soolopola sinivahiwa ahu, nnoosyaka mixankiho sinceene. Muupuwele ele yaarowa okhumelela akhala wira ninneemererya muupuwelo woohiloka onihapuxaka. Nto niikoheke so: ‘Nikhaliheryo xeeni Tiithi ahu oophenta onnivaha awe’?

TIITHI AHU OOPHENTA ONNINLAKIHERYA

8, 9. Moota xeeni miruku sinivahiwa ahu ni Yehova aarumaka atthu awe sinooniherya aya oniphenta wawe? Nvahe ntakiheryo.

⁸ Hiyo nihaana woonaka okhala ophenta wa Yehova okathi onilakiwa ahu. (Mmusome aHéberi 12:5, 6.) Ekeekhai wira khuuvo mutthu onimusivela ottharuxiwa wala ovahiwa miruku. (aHéb. 12:11) Hata vari siiso, mmananihe othokorerya ele emwiirinhe woovahani miruku. Owo orosuwela etthu enipaka ahu ekhanle oohonona wataana wahu ni Yehova Muluku, wala onnixankiheya ni moonelo ahu, ni onniimananiha waavya malakiheryo wira onooniherye mBiibiliyani moota sikhanle ahu oolokiherya mweettelo ahu wira omuhakalalihe Muluku. Tthiri miruku iyo sinikhuma wa Yehova, maana tokhanle Mathipelo a miruku.

⁹ Nrowe nithokorerye ntakiheryo nimosa na mutthu onivaha miruku mwa enamuna enimusivela Muluku. Munna mmosa ohinatthi wiixutta ekeekhai aamakela oweha epornografia nto khuxintta muxankiho owo. Nlelo owo aahihalana osiveliwa oweha epornografia vamurimani vawe. Noomala omuthuma selulaari mukina musya, aahipacerya oweha-tho. (Yak. 1:14, 15) Owo aamurumeela selulaari wira oweheke isite sa epornografia mwInternetini. Nihiku nimosa, oryeene muteko woolaleerya, aahooleliwa selulaari ole ni mutokweene yoowo aaphavela oweha endereso. Vaavo mutokweene ole aapacenrye awe omurumeela selulaari ole, saahipacerya okhumelela isite soohiloka. Nto eyo yahooniherya okhala mareeliho wa munna ole ahaarina makhalelo ooloka a omunepani. Owo aahivahiwa miruku okathi wooreerela, khuttottela mureerelo olakiwa wawe ni khuvikana makhalelo ale oohiloka. Nto nihaana omuxukhurela vanceene Tiithi ahu a wiirimu yoowo oniwerya oweha hata itthu soowiipithihiwa ni khinamuttharuxa mutthu ohinatthi orowa ottaiwene!

HIYO NNOOKHUMELA SAANA NATTHARIHELA MIRUKU SA BIIBILIYA

10, 11. (a) Itthu xeeni sikhanle ahu oovekela miruku sa Yehova? (b) Moota xeeni yoowiraneya ya emusi emosa enooniherya aya wira ti vooloka otthara malakiheryo a Yehova?

¹⁰ NaSaalimo mmosa aamwiipenle Yehova so: “Nyuwo munnikettiha ni miruku sanyu”. (Esal. 73:24) Khula okathi oniphavela ahu miruku hiyo nihaana “omwaavyaka” Yehova nisomaka Nuulumo nawe ni oweha moonelo awe wa khula mwaha. Ottharihela malakiheryo a Biibiliya khonnikhaliherya paahi momunepani masi okathi mukina pooti onikhaliherya werutthuni.​—Mir. 3:6.

¹¹ Ntakiheryo nimosa na moota Yehova sinaalakiherya awe atthu nimphwanyaneya mwa yoowiiraneya ya emusi emosa yeeyo yaakhala opuro wowaalugariwa mmuttettheni wa Masbate oFilipina. Oowanli aya yaavara muteko wa opioneero ni yaahikhalana anamwane anceene. Nihiku nimosa yaahakhela epaphelo yooriipiha murima, yaahimya wira awo yaahaana othaama mapuro ale. Mwaha wa exeeni? Awo yaarimootheriwa wira yaarina makhalelo oohiloka. Nnaamwi munna ole ahaasuwela nipuro aarowa awe othaamela ni emusi awe owo aahimmye so: “Yehova onooniphwanyiha opuro wookhala. Okhuma khalai owo onninikhapelela wa khula etthu enikhumelela”. Nto nroromelo na munna ole naari nooloka. Nuuvira mahiku vakhaani munna ole aahileeliwa wira khaatthuneya othaama mapuro ale. Nto exeeni yaakhumelenle? Mwaneene mapuro ale aahoona wira emusi ele ya Anamoona yeettihiwa ni malamulo a Biibiliya tivonto yaari yoomaaleleya ni ya murettele. Eyo yaahimusivela mwaneene mapuro ale, nto ohiya oweemererya okhala paahi, aahiweemererya-tho olima ematta yuulupale yaari vaavo. (Mmusome 1 Pedru 2:12.) Aayo Yehova onooneettiha mpakha ophiya elapo esya ni oxintta mixankiho sahu.

MPATTHANI AHU ONNIKHALIHERYA OVILELA MIXANKIHO

12, 13. Makhalelo xeeni akhanle oowiirihaka atthu akina wiikohaka akhala wira Muluku onniwoonela othunku?

¹² Okathi mukina pooti okhumelela muxankiho woopisa omala. Waaniheryasa nyuwo pooti wiiraka murina eretta yuulupale wala olupatthiwa ni amusi wala ni elapo. Sai akhala wira aakhumelela manyaku-nyaku ni mutthu a mmulokoni?

¹³ Mwa ntakiheryo, nyuwo pooti onyoonyiwaka ni etthu eniweha anyu yoohiloka enikhumelela mmulokoni khiyahimya so ‘etthu ela khiyaareerela okhumelelaka mmulokoni!’ Nlelo munna yoowo onipaka etthu eyo enoonyonyihani khiyavahiwa miritti sinceene mmulokoni ni anna anceene khiyasiveliwa ni yoowo. Nto munapacerya wiikoha so: ‘Vaniweryaneya sai? Niireke Yehova khonoona itthu iya? Nto khoniwerya opaka etthu’?​—Esal. 13:2, 3; Hab. 1:2, 3.

14. Etthu xeeni enimwiiriha Muluku ohiphukaka khuta muxankiho sahu?

¹⁴ Yehova pooti wira ookhalana mathowa animwiiriha ohaakuvela olokiherya etthu yoohiloka. Mwa ntakiheryo, okathi mukina nyuwo pooti woonaka wira yookhala etthu yoohiloka enipakiwa masi Muluku ohoonelaka siiso. Etthu yoohimmwa yeeyo nyuwo munoona anyu okhala yowoveehani, pooti okhalaka miruku sooloka siniphwanela wiiwelela oratteene. Mu sookumanana sawe, Munna Karl Klein yoowo arumeela ni Nikhuuru Noolamulela onnihimya wira okathi mmosa aahivanyihiwa mooluluwanya ni Munna . J. F. Rutherford. Nuuvira okathi vakhaani Munna Rutherford aahimulavuliha Munna Klein mooreerela murima oriki: “Ehaali, Karl!”. Masi munna Klein, nlelo aari oonanariwa ene kaamwaakhunle ni murima awe wotheene. Nuumala woona eyo Munna Rutherford aahimulopola Klein wira oheemererye oxinttiwa ni Diabo. Nuuvira okathi Munna Klein aalempe so: “Vaavo vaninyonyiwa ahu ni etthu ehimmwale ni munna orina ehakhi ya ohimya etthu eyo, nto nninvaha opuro Diabo”.a

15. Nlikanyiho xeeni nikhanle oonikhaliherya opixa murima ninwehereryaka Yehova onikhaliherya ophuka mixankiho sahu?

¹⁵ Okathi mukina ti voovila okhala oopixa murima akhala wira muxankiho ahu khonivukuwa. Nto ninrowa opaka exeeni? Nkahaya muupuwele, mwaakhanle wira nyuwo muneettiha ekaaro nto khuphwanya ephiro esaren’ye ene ikaaro kihinavireya. Nyuwo khamunisuwela okathi onirowa anyu oviriha wira nvikane opuro ole. Nto mwananariwa khiyeererya ovira ephiro ekina, nyuwo pooti orimeela nto khiyamaliha okathi munceene mphavelasaka orowa opuro yoole waarowa wookhweyeryani ophiya mwaapinxe murima vakhaani paahi. Moolikana ni eyo mwatthara ephiro enithoonyeriwa anyu ni Muluku vanapisaru, nyuwo munoophiya onirowa anyu.

16. Etthu xeeni ekina enimwiiriha Yehova okathi mukina opisa onaakiherya mixankiho?

¹⁶ Yehova okathi mukina pooti opisaka orwa onaakiha okathi wa mixankiho wira niixutte etthu. (Mmusome 1 Pedru 5:6-10.) Muluku khonikumiherya mixankiho. (Yak. 1:13) “Nwanani anyu Diabo” tonikumiherya mixankiho sinceene sinikhumelela. Masi Muluku onnirumeela mixankiho wira hiyo nikhoomale momunepani. Tthiri owo onnoona ohaawa wahu okhala wira “owo onninakiha” ni owo pooti weemereryaka iyo ovikaniha “okathi vakhaani”, onrowa omaliha. Niireke nyuwo munnivaha efaita onikhapelela wawe Yehova okathi onihaawa ahu, niroromelaka wira Yehova onoonoopola?​—2 aKor. 4:7-9.

MPHWANYE MAREELIHO NI WEEMERERIWA NI MULUKU

17. Yehova oniphavela oweha exeeni aaniwehaka, nto xeeni?

¹⁷ Wuukiseryani waya, Muluku onniniweha wira oniphwanyihe mireerelo. Orweela mwa Hanani mulipa a mihupi Yehova aahimuhimeerya Mwene Àsa wira: “Tthiri Apwiya anniweha ilapo sothene wira yakhaliherye ale anaroromela ni murim’aya wothene”. (2 Wah. 16:9) Nnaamwi Muluku aawenhe wira Àsa khaamuroromela ni murima awe wotheene, owo onirowa “woolipihani” vakhala wira munoovikaniha opaka itthu sa exariya.

18. Vaavo nyuwo vanoona anyu wira khuuvo onivaha efaita ele enipaka anyu, exeeni enireerela wuupuwela voohimya sa Yehova? (Nwehe elatarato yoopacerya.)

¹⁸ Muluku oniphavela wira hiyo “niphaveleke itthu sooloka” “niphenteke itthu sooloka” ni “opaka itthu sooloka” wira owo “onikhaliherye”. (Am. 5:14, 15; 1 Ped. 3:11, 12) Yehova onnaakhapelela ni waareeliha anaxariya. (Esal. 34:15) Muupuwele ntakiheryo na athiyana anli anamayariha aHeberi yiitthaniwa Xifra ni Puwa. Vaavale aIsarayeli yiiraaya ari ipottha wEjiitu, athiyana ala anli yaahimoova Muluku ovikana Farawo, yoowo aarumme owiivakasa anamwane axilopwana aHeberi okathi waayariwa aya. Owehasa wene, omoova waya Muluku ti waawiirinhe ohiwiivakasa anamwane ale. Nuuvira okathi Muluku ‘ahireliha itthoko’ sa Xifra ni Puwa. (Okhum. 1:15-17, 20, 21) Miteko saya iye sooloka saanooniwa ni maitho owoona a Muluku. Okathi mukina hiyo pooti woonaka wira miteko sooloka sinipaka ahu khasinooniwa ni mutthu mukina. Masi Yehova onnoona. Owo onnoona khula etthu yooloka nimpaka ahu, nto okathi aya onoonitthuvela.​—Math. 6:4, 6; 1 Tim. 5:25; aHéb. 6:10.

19. Moota xeeni murokora mmosa wiixuntte awe wira Yehova onnoona wiimananiha wahu?

¹⁹ Murokora mmosa wAustria aahoona wira tthiri khula etthu yaapaka awe yaanooniwa ni maitho owoona a Muluku. Okhala wira owo aayariwe ni atthu a elapo ya Hungria, nto aahithoonyeriwa etthoko ya mutthu aalavula nttaava nawe wira amulaleerye. Aahirowa empa ele, masi khamphwannye mutthu. Aaheetta ikwaha sinceene masi ohimphwanyaka mutthu. Nihiku nimosa ahoona wira aakhala atthu masi khuuvo aakhula. Owo aahihiya iliivuru ni epaphelo yaahimya nipuro onikhala awe ni itthu sikina. Nuuvira iyaakha sinceene omakelaka oxekurya empa ele nihiku nimosa mukhora waahihuliwa! Nto murokora ole aahaakheliwa ni muthiyana oopatthaneya yoowo amwiirenle so: “Xontte mukeleke. Koosoma itthu sotheene mwaahiye anyu nto kanwaalittani”. Mwaneene etthoko ele weera olyaaka murette ahaamweemererya olavula ni atthu. Nto yaahipacerihiwa yoosoma ya Biibiliya. Aayo Yehova ooreeliha wiimananiha wa murokora ole!

20. Nyuwo munoonela sai owehiwa ni maitho owoona a Yehova?

²⁰ Yehova onniwerya woona khula etthu enipaka anyu ni onirowa wootthuvelani tthiri. Vaavo vanisuwela anyu wira maitho a Yehova anniwoonani muhikhale owoova ntoko atthu ale anilathiwa ni maakina anipwehiwa mphironi. Ohiya-vo nyuwo muhaana woonaka wira muniwehiwa ni Muluku oniphavela wookhapelelani!

[Enoota]