Awosa Yaahiivahererya Ni Murima Aya Wotheene​—Orowa oNova York

IYAAKHA vakhaani sivinre, Cesar ni Rocio, mulopwana ni mwaarawe, yaakhala vatthokoni vaya oCalifornia voohixanka. Cesar aavara muteko wa oreherya maakina anikumiherya oviha wala oriirya ohela muhina ar-condicionado, nto Rocio mahiku makina aavara muteko oxiripitaali. Awo yaahikhalana enupa aya ni khiyaarina anamwane. Masi yaahikhumelela etthu yaaturunke ekumi aya. Etthu xeeni?

Mweeri wa Outubro 2009, efiliyaali ya wEstados Unidos, yaahiroiha epaphelo miloko sotheene sa elapo ele, yaalattulaka anna yaasuwela ovara khula muteko wira yiivahererye orowa okhaliherya muteko mwa okathi vakhaani oBetheli, wa wunnuuheriwa efiliyaali, ya oWallkill, oNova York. Hata atthu ale yaarina munnuwelo wowaavikana atthu okhala wene aneemereriwa orowa orumeela oBetheli, yaanilattuliwa. Cesar ni Rocio anihimya so: “Mwaha wa iyaakha sahu hiyo naanisuwela wira ele yaari eparakha ya vameekhaaya ya owerya orumeela oBetheli. Hiyo khinaaphavela oyeleela eparakha eyo”! Anamathelana ale moohipisa, yaahimaleliha olepa epaphelo enivekela orowa oBetheli.

Masi yaahivira eyaakha ntero Cesar ni Rocio ahinatthi wiitthaniwa oBetheli. Hata vari siiso, awo yaahikhweiherya okumi aya wira awerye waakhwaniherya yoolakela aya. Cesar onihimya-tho so: “Nahireeriha egarage ahu khukhala empa, nto empa ahu yuulupale, khimwaalugariha mutthu mukina. Naahithaama empa ahu yoonisivela yaarina 200 m², naakhanle-mo iyaakha piili paahi nuumala otekiwa, nto khurowa okhala enupa yaarina 25 m² paahi. Opaka murukunuxo owo waahiniiriha okhala oolikanela orowa oBetheli, akhala wira naamulattuliwa”. Exeeni yaakhumelenle muhoolo mwaya? Rocio onihimya so: “Ovirakaru mweeri mmosa nuumala othaamela empa ele yaamukhaani, naahaakhela epaphelo yaanilattula orowa orumeela okathi vakhaani oWallkill. Nto hiyo naahoona wira mwaha wa okhweiherya okumi ahu, naahinvaha etthu Yehova, yaamwiirinhe onireeliha”.

MUNEPA AYA WOWIIVAHERERYA ONNIREELIHIWA

Moolikana ni Cesar ni Rocio, imiya sinceene sa anna ni arokora, aapaka marukunuxo mookumini mwaya, wira awerye orowa okhaliherya muteko wa oteka onivariwa muttetthe wa oNova York. Anamunceene mwa anna awo, anikhaliherya muteko wowunnuuherya ipa sa oWallkill, akina aavahiwa eparakha ya okhaliherya oteka eseedi eri oWarwick.a Anamathelana anceene, aahiya inupa saya sooreera, miteko saya sooloka, amusi aya, inama saya saahuwa aya wira arowe yamurumeele Yehova. Nto niireke Yehova ooreeliha tthiri munepa aya wowiivahererya? Aayo, ohaareeliha!

Mwa ntakiheryo, Way, yoowo onivara muteko wowaahela maluuxu, ni Debra, oowanli aya, arina iyaakha 50, yaahitumiha empa aya oKansas ni mireerelo saya sinci, khuthaamela oWallkill, orowa ovara muteko oBetheli, masi akhalaka vapuwani waya.b Nnaamwi opaka mirukunuxo iyo vahaakhwenye, awo annoona wira ele epanke aya, ti yooloka. Alavulaka sa muteko aya oBetheli, Debra onihimya so: “Okathi mukina kinoona wira kiniirela mpantta omuteka Parayiisu yoole oniromoliwa mmaliivuruni mwahu”!

Melvin ni Sharon yaahitumiha empa aya ni mireerelo saya oCarolina do Sul wira awerye okhaliherya muteko onivariwa oWarwick. Nnaamwi opaka mirukunuxo iyo vaari woovila, anamathelana awo, annoona okhala eparakha yuulupale wiirela mpantta muteko ole muulupale. Awo anihimya so: “Ohakalala oniphwanya ahu mwaha woosuwela wira muteko onivara ahu onnikumiherya mureerelo wa anna a olumwenku wotheene, ti wuulupale”.

Kenneth, mutthu ooreformari, khalai aateka inupa, mwaarawe ti Maureen, nto arinasa iyaakha sinivikana 50; yaahithaama oCalifornia wira yakhaliherye muteko oWarwick. Wiira awerye othaama, awo aapaka marehereryo ni murokora mmosa a mmulokoni mwaya, wira okhapeleleke enupa aya, ni ahaavekela amusi aya wira akhaliheryaneke omukhapelela tiithi awe Kenneth yoowo ori oowunnuwela. Niireke awo anniikhupanyerya mwaha woopaka mirukunuxo iyo arowaka orumeela oBetheli? Nnaari! Kenneth onihimya so: “Hiyo ninniphwanya mireerelo sihinikontareya”. Niireke eyo enitaphulela wira awo kharina muxankiho? Awo anaakhula so: “Ekeekhai wira nookhalana mixankiho, masi ekumi enikuxa ahu, ti yootteeliha murima ni ninnaatumererya atthu akina okela muteko ola”.

OXINTTA MIXANKIHO

Anamunceene yiivaherenrye ovara muteko ola, yaahaana oxintta mixankiho siceene toko. Mwa ntakiheryo, William ni Sandra, yaawo anihala vakhaani ophiyeriha iyaakha 60, yaakhala vatthokoni vaya vohixanka oPennsylvania. Awo yaahikhalana empresa aya yaapaka ipesa sa maakina oovirikana ni yaahikhalana anamuteko 17. Awo nlelo yaarumeela muloko yoole yaakhala aya okhuma enamwane aya ni amusi ni apatthani aya anceene yaakhala muttetthe yoole. Vano okathi waakhumelenle aya eparakha ya orowa orumeela wa okathi vakhaani oWallkill, awo yaanisuwela wira yaahaana waahiya amusi aya, ni mireerelo saya. William onihimya so: “Moohaaniherya etthu yoopacerya onixankiha, waari ohiya muttetthe waalimalenle ahu okhala”. Masi nuumala opaka mavekelo manceene, anamathelana ale yaahilakela othaama ni khiyaatthikenle ottuli. William onihimya so: “Ohakalala waarowa ahu ophwanya, mwaha wa ovara muteko vamosa ni emusi ya oBetheli, khiivo enilikana aya. Miyo ni Sandra, vano nootepa otteeliwa murima ovikana khalai”!

Ricky, yoowo aari gerenti a muteko wooteka inupa oHawaii, aahilattuliwa orowa orumeela oBetheli mwa okathi vakhaani okhaliheryaka muteko onivariwa oWarwick. Amwaarawe Kendra, yaahimweemererya wira owo oroweke. Masi, yaahikhalanasa muxankiho mmosa: khiyaasuwela enamuna yomuthokorerya mwanaya Jacob, aarina iyaakha 11. Awo yaanuupuwela vakhala wira vaamureerela othaama ni emusi aya yotheene arowaka muttetthe wa oNova York, ni khiyaasuwelexa vakhala wira mwanaya ole anwerya olimalela mapuro ale yaari oovirikana ni elapo awe.

Ricky onihimya so: “Etthu yoopacerya yaaphavela ahu, waari ophwanya muloko mmosa waarina amiravo anceene oolipa omunepani. Hiyo naaphavela wira Jacob okhalane apatthani anceene ooloka”. Masi nuumala ophiya elapo ele, yaathanleliwe orowa muloko mmosa wahaakhanle anamwane anceene, masi yaahikhala maBethelita manceene. Ricky onihimya so: “Nuumala muthukumano woopacerya, miyo kaahimukoha Jacob, voohimya sa muloko ole musya, okhala wira khiyaakhanle anamwane yaarina munnuwelo awe. Owo aakaakhunle so: ‘Muhixanke paapa. Apatthani aka anrowa okhala maBethelita yaala’”.

Tthiri maBethelita ale, yaahimpaka Jacob okhala mpatthani aya. Nto exeeni yaakhumelenle? Ricky onihimya so: “Ohiyu omosa, kaahivira waattamela ekwartu ya mwanaka, nto koona wira nlelo aluuxu khiyaattiphale. Nto miyo kuupuwela wira kaarowa omphwanya oweettaka axooku mukomputadoreni, masi kamphwannye omusomaka Biibiliya! Nuumala omukoha etthu xeeni yaapaka awe Jacob aakhunle so: ‘Kiniphavela okhala ntoko amiravo ari oBetheli, vano kimphavela omusoma Biibiliya otheene muhina mwa eyaakha emosa’”. Nto khivanitthuneya ohimya wira Ricky ni Kendra, aatteeliwa murima vanceene, ohiya paahi mwaha wa Ricky okhaliheryaka muteko onivariwa oWarwick, masi mwaha woowi othaama waya womphwanyiha mureerelo mwanaya wira annuwe omunepani.​—Mir. 22:6.

AWO KHANIXANKIHEYA NI ELE ENIROWA OKHUMELELA MUHOOLO

Muteko wa oteka onivariwa oWallkill ni oWarwick moohipisa onrowa omala, nto ale alattuliwe okhaliherya miteko iyo annisuwela wira orumeela waya oBetheli ti wa mahiku vakhaani paahi. Nto niireke anna ni arokora awo annixankiheya vanceene mwaha wa ohisuwela nipuro aniroihiwa aya wala ele enirowa aya ovaraka muteko owo wamala? Nnaari! Anamunceene annaakhulela masu alavuliwe ni anamathelana anikhuma oFlorida. John, yoowo onisuwela saana miteko sooteka, ni amwaarawe Carmen, anirumeela mwa okathi vakhaani oWarwick; anihimya so: “Hiyo nihoona moota Yehova sinikhapelenle awe ni oniphwanyiha itthu sinnithowa mpakha-va. Hiyo ninnisuwela wira khivaniweryaneya Yehova oniruuha nipuro nla wira muhoolo mwaya oninyanyaleke”. (Esal. 119:116) Luis, yoowo onilokiherya isistema sa ottipiha mooro mpaani, ni amwaarawe Quenia, anirumeela oWallkill. Awo anihimya so: “Hiyo ninnoona moota Yehova onikhapelenle awe mwa enamuna yooloka onivahaka khula etthu ennithowa. Nnaamwi hiyo nihisuwelaka moota xeeni, silini, ni nipuro xeeni, hiyo ninniroromela wira Yehova onrowa ovikaniha onikhaliherya ni onikhapelela”.​—Esal. 34:10; 37:25.

“WATTA WA SORERA SA KHULA ENAMUNA”

Anamunceene yaale atonko okhaliherya muteko wa oteka oNova York yanwerya okhalana etthu yowoothererya wira ahirowe okhaliherya muteko ole. Masi awo yaahimweehererya Yehova ntoko owo sinnilattula awe otheene ahu opaka eyo oriki: “Mukehererye, . . . munimona wira miyo kinrowa otthukula mikhora sa wirimu, wira komoriheleni watta wa [itthu] sorera sa khula enamuna”.​—Mal. 3:10.

Niireke nyuwo munoowerya omweehererya Yehova wira mulawihe mareeliho manceene anivaha awe? Mmananihe woona etthu eniwerya anyu ovara wira mukhaliherye muteko ola wookuxa murima onivariwa, nvekeleke wira moone vaaweryaneyaka okhaliherya oNova York wala nipuro nikina sinitekiwa Ipa sa Muluku ni nwehe moota Yehova sinirowa awe wooreelihani.​—Mar. 10:29, 30.

Dale, yoowo ori nginyero a muteko wooteka inupa, ni Cathy, a wAlabama, awo annittittimiherya muteko ola, yaalattulaka atthu akina wira akele muteko ola. Voohimya sa wiivahererya waya oWallkill, awo anihimya so: “Vakhala wira nyuwo munoolipa murima wira nwerye okhuma muttetthe olimalenle anyu, munimoona munepa wa Yehova wookhaliheryakani”. Nto exeeni enitthuneya wira nyuwano mwiivahererye? Dale onihimya so: “Mukhweiherye ekumi anyu, mukhweiherye-tho, nuumala-vo, mutepeke okhweiherya. Tthiri nyuwo khamunrowa wiikhupanyerya muhoolo!” Gary, onikhuma oCarolina do Norte, ooviriha iyaakha 30 ovaraka muteko wooteka inupa. Owo ni amwaarawe Maureen, anihimya wira mareeliho maalupale aphwannye aya oWarwick, ti “waasuwela ni ovara muteko ni anna ni arokora ooreera murima yaawo avirinhe iyaakha sinceene amurumeelaka Yehova oBetheli”. Gary onihimya so: “Wira nwerye orumeela oBetheli, nyuwo muhaana okhweiherya okumi anyu, okhala wira eyo tekhanle enamuna yooloka ya okhala olumwenku ola wootakhala”. Jason, yoowo aavara emperesa enaakawa maluuxu, ni Jennifer, a Illinois, anihimya wira ovara muteko wa oBetheli oWallkill, ti “enamuna ya woona moota sinrowa aya okhaliwaka elapo esya”. Jennifer onihimya so: “Etthu yookuxa murima, osuwela wira khula etthu enivara ahu, ennimuhakalaliha Yehova, ni wira owo onoonilokiherya mwaha wa miteko sintthuna okhumelela muhoolo. Muteko onivara ahu, wookhalana efaita ehinimala, vamaithoni va Yehova”.

[Inoota]

[Ekaaxa epaaxina 7]

NIIREKE NYUWO MUNOOWERYA WIIVAHERERYA?

Murima wa Mwene Davidi, ‘waniphavelexa’ omutekela empa Yehova. (1 Wah. 22:7) Davidi aaniphavela okhaliherya muteko wa etemplo yaarowa ovuwiha nsina na Muluku. Vaakhanle wira Davidi mukumi olelo-va, aarowa woonela sai muteko muulupale wa oteka ipa sa Muluku onivariwa?

Vaavo mwaattelo wa anamalaleerya oninnuwa awe, ni vaavo vanaattamela ahu omala wa olumwenku ola, nto vannitthuneya otekiwa mowaakuveya inupa sinceene. (Yes. 60:22; Hab. 2:3) Eyo enihela muhina otekiwa wa ifiliyaali, Inupa sa Asembeleya, Ipa sa Omwene, mapuro anivariwa Muteko Wootaphulela, ni otekiwa mapuro siniiriwa ixikola sa Muluku ilapo sinci. Wira vaweryaneye otekiwa ipa iyo sotheene, vanitthuneya atthu anceene oowiivahererya anisuwela ovara muteko wira miteko iyo sikhumele saana. Muteko owo wotheene, onitthuneya mapuro, manginyero, alipa oopaka idesenyo, alipa a ikontha, alipa a idukumento, anamaweherya, alipa ootokosa mapuro, alipa ooteka, alipa anttopaanyerya ituupu sa maasi, masaralyero, alipa oomweetheya kokotto, atthu animontari ikaruma, alipa anaahela maluuxu, makalapintero, alipa ooweettiha maakina oolemela, alipa oolokiha ikaruma, alipa anipaka ijardim ni miteko sa ophwaneliha ipa.

Hata mmuttettheni mwanyu, annitthuneya atthu wira akhaliherye miteko sooteka. Ohiya-vo, anniphaveliwa atthu aniwerya orowa okhaliherya elapo ekina. Niireke nyuwo mwaamweemererya wiivahererya? Akhala ti siiso, mulavule ni axitokweene a mmulokoni. Mwaakohe ele enivekeliwa wira nyuwo mukele muteko owo.

Amiravo ni ale ari oowunnuwela, annitteeliwa murima mwaha wa okhaliherya waya muteko wooteka onivariwa. Munvekeleke Yehova. Woonasa wene nyuwo munookhalana “murima wophavelexa” okhaliherya muteko wooteka ipa sinivuwiha nsina na Yehova. Tthiri nyuwo khamunrowa wiikhupanyerya mwakela muteko ola!