WAAKHULIWA WA MAKOHO A MBIIBILIYANI
Niireke nnookhalana eguvernu ya olumwenku wotheene?
Nkahaya muupuwele moota vaarowa aya oreera vaakhanle wira ehaavo eguvernu emosa ya atthu otheene. Olelo-va, anamunceene annihaawa mwaha wookhala amasikhini, masi akina toothaaciri vanceene. Masi eguvernu ya olumwenku yeeyo erina othunku, yaarowa waakhaliheryaka atthu wira akhalaneke itthu sinaathowa. Munoonela sai, niireke apinaatamu anoowerya okumiherya eguvernu ntoko eyo?—Mmusome Yeremiya 10:23.
Okhuma khalai, iguvernu khasinwerya waakhaliherya saana atthu oohaawa. Iguvernu sikina ti sootakhala. (Musuweli 4:1; 8:9) Masi Muluku Oowerya Sotheene ooleiherya wira onookumiherya eguvernu yeeyo enirowa oranttela iguvernu sotheene. Namalamulela aya onrowa waakhapelelaka saana atthu otheene.—Mmusome Yesaya 11:4; Daniyeli 2:44.
Omwene wa Muluku onrowa opaka exeeni?
Yehova Muluku oomuthanla namalamulela ooloka a olumwenku, eyo piiyo Mwanawe, Yesu. (Luka 1:31-33) Okathi aary’awe valaponi, Yesu aanaakhaliherya atthu. Ntoko Mwene, onirowa owiiraaniha atthu a maloko otheene ni onoomaliha ohaawa waya.—Musome Esalimo 72:8, 12-14.
Niireke atthu otheene anneemya wira Yesu okhale Namalamulela aya? Nnaari. Masi Yehova toopixa murima. (2 Pedru 3:9) Owo onnaavaha atthu eparakha wira emweemererye Yesu ntoko Namalamulela aya. Moohipisa, Yesu onirowa waamalamaliha atthu ootakhala ni onookumiherya murettele ni omaaleleya olumwenku wotheene.—Mmusome Mikeya 4:3, 4.
Wira musuwele soohimmwa sikina, muwehe muru 8 wa eliivuru ela, yoolaleiwa ni Anamoona a Yehova
Enniphwanyaneya-tho va www.jw.org/vmw