Okumiheriwa Wa Eliivuru Esya Ojapão
Muthukumano wa vameekhaaya waapakiwe muttetthe wa oNagoya, oJapão, nihiku na 28 a Abril 2013, munna Anthony Morris a Nikhuuru Noolamulela ahaatutuxerya atthu otheene yanwiriyana okathi waahimmye awe okumiheriwa wa eliivuru emosa esya yaalempwale ni nttaava na oJapão erina muru oni The Bible—The Gospel According to Matthew (Biibiliya—Ihapari Sooreera Silempwale ni Matheyo). Atthu yaavikana 210.000, ale yaari vaavale ni ale yaawiriyana mwaha ole arumeelaka Interneti yaahoopa makuphi okathi munceene.
Eliivuru eyo ti otthikeliwa wimpirimiriwa wa Tradução do Novo Mundo, a nttaava na oJapão, eyo erina ipaaxina 128 enilavula sa Evangelho ya Matheyo ni khiivo ekina enilikana aya. Munna Morris aahitthokiherya wira eliivuru eyo epakeliwe “waakhaliherya atthu anikhala oJapão”. Nto eliivuru eyo ya mBiibiliyani eri sai? Exeeni yiirinhe opakiwa? Ni yaakheleliwe sai?
NTO ELIIVURU EYO ERI SAI?
Enamuna elempwale aya eliivuru ya Matheyo yaahaavara murima atthu yaawiriyana mwaha ole. Nttaava na oJapão pooti olempwa okhuma osulu orowaka vathi wala okhuma moono woothiyana orowaka moono woolopwana, ni iliivuru vakhaani, ohela muhina iliivuru sahu sikumiheriwe niinano, silempwale mwa enamuna sinilempwa aya mattaava makina oolimaleliwa. Masi eliivuru ela esya elempwale erumeeliwaka enamuna ya olepa enikhuma osulu erowaka vathi, nto eyo enirumeela enamuna yoolimaleliwa oJapão, yeeyo enirumeeliwa wira silempwe ijornale ni iliivuru sikina sa elapo ele. Atthu anceene a oJapão annoona enamuna ela okhala yookhweya osoma. Ohiya-vo, iponto suulupale sa khula epaaxina sipwehiwe okerekhere ntoko miru saamukhaani wira saakhweiheryeke alipa oosoma woona iponto iyo.
Moohipisa anna ni arokora a oJapão yaahittottela mureerelo mapakeliwo awo masya a eliivuru ya Matheyo. Murokora mmosa orina iyaakha 80 onihimya so: “Miyo koosoma ikwaha sinceene eliivuru ya Matheyo, masi ilepeliwo iya sinikhuma osulu orowaka vathi ni miru saamukhaani siheliwe okerekhere, sookikhaliherya wiiwexexa oratteene Mwaha Waalavuliwe ni Yesu Omwaako”. Murokora mukina orina iyaakha 30 aalempe so: “Kaahiwerya osoma eliivuru yotheene nihiku nimosa paahi. Ekeekhai wira koolimalela osoma elepeliwo ekina, masi atthu anceene a oJapão enaasivela elepeliwo enikhuma osulu erowaka vathi”.
EPAKELIWE ATTHU A OJAPÃO
Moota xeeni eliivuru emosa paahi ya mBiibiliyani ekhanle aya oowaavara murima atthu otheene anikhala oJapão? Nnaamwi atthu anceene a oJapão ahimulimalenle Biibiliya, awo anneemererya omusoma. Nto eversau ela ya Evangelho ya Matheyo enrowa waakhweiherya atthu yaale ahitonko omoona Biibiliya okhalana eparakha ya waakhelela masu ahavuliwe eliivuru eyo yowaarya ni owerya osoma.
Nto xeeni ehalaka othanliwa eliivuru ya Matheyo? Atthu anceene a oJapão yaiwaka nuulumo noowi “Biibiliya” etthu enipacerya aya wuupuwela ti Yesu Kristu. Tivonto vathanliwe aya eliivuru ya Matheyo okhala wira eyo yookhalana soohimmwa sinceene sa emusi ni iyareliwo sa Yesu, Mwaha Waalavunle awe Vamwaako, ni eprofesia awe yuulupale voohimya sa mahiku ookiserya, nto woonasa wene itthu iyo sinrowa waasivela atthu a oJapão.
Moohipisa anamalaleerya a nthiti a oJapão yaahipacerya okawa eliivuru ele empa ti empa ni okathi yaatthikela aya waaxekurya atthu. Murokora mmosa onihimya so: “Vano kinniwerya waakawela atthu anceene Nuulumo na Muluku mmuttettheni mwaka. Tthiri kaahiwerya ovaha eliivuru emosa emakaaripi yeele nuumala muthukumano ole wa vameekhaaya!”.
YAAKHELIWE SAI ELIIVURU EYO?
Masu xeeni anamalaleerya anirumeela aya wira akawe eliivuru ya Matheyo? Anamunceene anikhala elapo ele, annisuwela masu ntoko ala “mukhora wophunyeya”, ‘orihela ikuluwe maluku òwarya’ ni ‘ohukhuwela nihiku n’omelo’. (Math. 6:34; 7:6, 13) Awo annikhala ootteeliwa murima vaavo vanileeliwa aya wira masu awo alavuliwe ni Yesu Kristu. Okathi atthu anceene anoona aya masu awo aryeene Evangelho ya Matheyo, anihimya so: “Okhuma khalai kaaninlela omusoma Biibiliya”.
Okathi anamaleerya anitthikela aya waaxekurya atthu yaale yaakhelenle eliivuru ya Matheyo, anaaphwanya anammawaani anceene amalinhe ene osoma eliivuru eyo. Mulopwana mmosa yoowo orina iyaakha 60, aahimuhimeerya namalaleerya mmosa wira: “Miyo koosoma eliivuru ela ikwaha sinceene ni yookiphwanyiha ohakalala. Xontte mukiixuttihe itthu sikina sa mBiibiliyani”.
Eliivuru ya Matheyo ennirumeeliwa vanceene okathi woolaleerya. Murokora mmosa okathi waalaleerya awe, aahinvaha e-mail awe muthiyana mmosa aakhelenle eliivuru ya Matheyo. Nuuvira ewoora emosa paahi, owo aahimulepela e-mail murokora ole, ohimyaka wira aahisoma epantte yinceene ya eliivuru ele ya mBiibiliyani ni aaphavela osuwela itthu sikina. Nuuvira esumana emosa, muthiyana ole aahipacerya osomihiwa Biibiliya, ni moohipisa aahipacerya orowa omuthukumanoni.
Iliivuru sinivikana 1.600.000 sa The Bible—The Gospel According to Matthew (Biibiliya—Ihapari Sooreera Silempwale ni Matheyo) sooroihiwa mmilokoni sa oJapão, ni khula mweeri anamalaleerya annikawa ikonto miloko sinceene sa eliivuru eyo. Masu oopacerya annooniherya moonelo wa ale akumihenrye eliivuru ela vaavo vaniira aya: “Hiyo ninniwehererya ni murima ahu wotheene wira osoma eliivuru ela onimuncererya osiveliwa wanyu Biibiliya”.