YOWIIRANEYA YA MOOKUMINI

Maitho a Jairo Annimukhaliherya Omurumeela Muluku

Elavuliwe ni munna awe Samuel Ruiz-león Arroyo

Mwarowa woonela sai vaakhanle wira erutthu anyu khenwerya opaka etthu, masi munirumeela maitho anyu paahi? Munna aka Jairo ori ni muxankiho yoowo. Masi, owo mutthu oohakalala. Kihinatthi ohimya nthowa naya onihakalala awe siiso, mukihiye kitthokiherye yowiiraneya awe.

Jairo oyariwe ni eretta eniiriha ottoopare wala oramattha ohivara muteko. Eretta eyo eniitthaniwa quadriplegia espástica.a Eyo enniiriha erutthu awe ohiweryaka opaka etthu. Ottoopare awe khoniwerya okhaliherya mitika sawe, nto miyoono ni metto sawe ti sookhoropana. Ikwaha sikina, oretta wa Jairo onnimwiiriha omora ni ovulalasa. Atthu animwaattamela pooti ovulala yaahikhalane ephoole. Mooriipiha murima, miyoono ni metto sawe sintthukweleliwa vakarinyuni wira ehimukhumelele ehasara.

JAIRO ONINNUWA OONAKA OWEREYA

Vaavo Jairo annuwa awe, aanitepa woona owereya. Orina ene myeeri 3 aahipacerya omora-mora; nto eyo yaanimwiiriha osirikha. Ikwaha sinceene amaama yaanimukuxa enamutthimakiherya oxipitali yuupuwelaka wira aarimookhwa.

Mwaha wa omakela omora vamosa ni mixankiho sa mitika, nuuvira okathi makhuva awe yaahintakaseya. Orina ene iyaakha 16, makhuva awe yaahihiyana nto vanatthuneya opakiwa operasau muulupale a iparari, etara ni muthana. Kinnimuupuwela Jairo anlaka ohiyu mwaha wa woona owereya okathi aapacerya okhala saana.

Eretta awe ennimwiiriha otthuneyaka okhaliheriwa mwa itthu sotheene, ntoko olya, owara ikuwo ni orowa vakhaamani. Amaama ni apaapa tanimakela ovara miteko iyo. Nnaamwi Jairo atthuneyaka okhaliheriwa ikwaha sinci, anamuyari ahu annimuupuxerya wira okumi awe khahiyo onlipa ni atthu paahi, masi onlipa ni Muluku.

ENNIKHUMELA ENAMUNA ESYA YA OVAANELA

Anamuyari ahu Anamoona Yehova, nto annimusomela Jairo myaha sa mBiibiliyani okhuma onamwane awe. Awo annisuwela wira okumi onnihakalaliha vaavo mutthu onikhala awe mpatthani a Muluku. Jairo aakhala ootteettheya ni aamakela omora, masi aahikhalana nlipelelo nooloka ni noohakalaliha na muhoolo. Hata vari siiso awo yaaniikoha akhala wira Jairo aaniiwexexa sowiixuttiha sa Biibiliya.

Nihiku nimosa, Jairo oryeene mwaana, apaapa yaahinvekela wira: “Xontte Jairo, mulavule ni miyo. Akhala wira munnikiphenta, munoolavula tthiri!” Okathi ene yoowo, Jairo aahipacerya omoroxa maithori. Nnaamwi aamananiha ohimya etthu, owo aamwaathamasa paahi. Apaapa yaahiriipiwa murima mwaha woomwiiriha Jairo wunla. Masi wunla iwo waahooniherya wira Jairo aaniiwexexa ele apaapa yaahimya aya. Muxankiho aarina awe okhala wira owo khaawerya olavula.

Nto apaapa ni amaama yaahoona wira okathi mukina Jairo aanitannya maitho awe mowaakuveya ophavelaka ohimya ele yuupuwela awe. Jairo aanixankiheya vaavo oona awe wira khaavo aawerya omwiiwexexa. Masi, okathi apaapa ni amaama yaaxuttale aya ithoonyeryo sa maitho awe, nto ananvaha ele aaphavela awe, owo aanooniherya ethoi yoohakalala. Eyo yaari enamuna awe yooxukhurela.

Meedika mmosa aahinleela wira akhala wira naaphavela olavula ni Jairo naahaana oteexerya matata oomanli ohoolo wawe okathi nanvekela ahu wira aakhule etthu. Ntata noolopwana naataphulela wira “aayo”, ntata noothiyana “nnaari”. Nto wira Jairo ohimye ele aaphavela awe, aahaana owehexexa ntata noolopwana wala noothiyana.

MARUKUNUXO MOOKUMINI MWA JAIRO

Ikwaha 3 vamwaakhani, Anamoona annipaka mithukumano suulupale sinlavuliwa myaha sa mBiibiliyani. Jairo aanihakalala okathi waalavuliwa aya mwaha wa atthu yaarowa obatiziwa. Nihiku nimosa, Jairo orina ene iyaakha 16, apaapa yaahimukoha so: “Jairo munniphavela obatiziwa?” Okathi ene yoowo, Jairo aahiwehexexa ntata noolopwana na apaapa ooniheryaka wira aaniphavela. Awo yaahimukoha-tho so: “Niireke moomuleiherya Muluku nnivekelo wira muniphavela omurumeela mahiku otheene?” Jairo aahiweha-tho ntata noolopwana na apaapa. Eyo yaahooniherya wira aahivahererya okumi awe wa Yehova.

Nuumala ovaanela voohimya Biibiliya ikwaha sinci, vaahooneya wira Jairo aanisuwela yootaphulela ya ebatismo ya eKristau. Nto eyaakha ya 2004, aahaakhula nikoho nootepa otthuneya nenlo naahimya so: “Muhiivahererya wa Yehova Muluku wira mpakeke yootthuna awe?” Jairo aahaakhula nikoho nlo orweela wa ovenxa maitho awe owehaka musulu. Eyo yaari enamuna awe yoohimya wira: “Aayo”. Nto orina ene iyaakha 17, aahibatiziwa khukhala Namoona a Yehova.

OWO ONNITHOKORERYA ITTHU SA MULUKU

Mwaakha wa 2011, yaahikhumelela enamuna esya ya ovaanela yeeyo enimukhaliherya, eyo piiyo, komputadore oneettihiwa ni maitho awe. Aparelyo owo onnittharihela weeteteya wa maitho awe wira owerye otthitta itthu sinikhumela vakomputadoreni. Waaphila wa maitho awe onlikanasa ni omutthitta mouse a komputadore. Itthu sinikhumela vateelani a komputadore sinnimukhaliherya olavula. Vaavo onaaphila awe owehaka itthu iyo, komputadore owo onnilepa ele eniphavela awe ohimya, nuumala-vo khiyaiwanyeya nsu mwaparelyoni mmo.

Omwiiwexexa wawe Biibiliya waanincerereya vaavo Jairo akhalana awe yoolakela ya waakhaliherya atthu akina momunepani. Okathi nimpaka ahu yoosoma ya emusi, owo onnikiweha miyo ni komputadore awe. Eyo ti enamuna awe yookivekela wira kilepe moolumo awe onrowa awe waakhula epantte ya makoho ni waakhuliwa okathi wa mithukumano sahu sa eKristau.

Mmuthukumanoni, moopixa murima onnikilikari elatarato oniphavela awe eri va komputadoreni, nto atthu otheene anniiwa nsu nawe na mukomputadoreni. Owo onnitheya moohakalala khula okathi onaalipiha awe anna a mmulokoni mwa enamuna eyo. Alex, yoowo ori mpatthani awe, onihimya so: “Okathi wotheene kinnihakalala vaavo kiniwiriyana aka ikomentaario sawe sa mBiibiliyani”.

Jairo onnirumeela maitho awe wira aalaleerye atthu akina. Owo onnikilikari elatarato enooniherya ejardim, inama ni atthu akhalaka hoothe ni murettele. Vaavo onikilikari awe, ninniiwanyeya nsu nawe na mukomputadoreni nihimyaka so: “Biibiliya ooleiherya wira elapo enrowa okhala eparayiisu weiwo sihinrowa aya okhala iretta ni okhwa, Wisupulula 21:4”. Akhala wira mutthu owo onniphavela osuwela itthu sikina, Jairo onnikilikari-tho ekomputadore awe nnaiwanyeya nsu nihimyaka so: “Munniphavela omusoma Biibiliya ni miyo?” Moohakalaliha, ataata aheemya nlattulo nlo. Vaari vookuxa murima onweha Jairo okhaliheriwaka ni Anamoona akina owerya owiixuttiha Biibiliya ataata. Moohakalaliha ataata aabatiziwa okongresuni, oMadri, Agosto a 2014.

Wiivahererya wawe wa Muluku onnooniwa ni ale animwiixuttiha olavula. Rosario, meediko mukina a Jairo ohimmye so: “Vaakhanle wira kaaniphavela weettela etiini, kaarowa okhala Namoona a Yehova. Kinnoona moota waamini wa Jairo onimwiiriha aya ohakalala nnaamwi owereiwaka”.

Maitho a Jairo annaarya, vaavo kimmusomelaka yooleiherya ya Biibiliya eni: “Alipa-òtuthunya anotupha ntoko nahe: alipa-òhilavula anokhuwela n’utteliwa murima”. (Yesaya 35:6) Nnaamwi okathi mukina oriipiwaka murima, owo onnihakalala. Eyo enniweryaneya mwaha woowi okumi awe onlipa ni Muluku vamosa ni apatthani awe a eKristau. Ohakalala ni waamini wawe wuulupale, onnooniherya wira omurumeela Muluku onnimwiiriha mutthu ophavela okhala mukumi nnaamwi okumanaka mixankiho.

[Enoota]

[Ekaaxa epaaxina 10]

Ele Enihimya Aya Apatthani a Jairo

Rosa, orina iyaakha 63, oni: “Jairo mutthu oohakalala. Nto ophavela wawe vanci omurumeela Yehova onnaalipiha akina”.

Antonio, orina iyaakha 32, oni: “Khula okathi kinimoona aka Jairo olaleeryaka kinnitteeliwa murima”.

Andrés, orina iyaakha 67, oni: “Kinoona wira Jairo onniiwexexa saana sowiixuttiha sa Biibiliya okivikana miyo”.