YOWIIRANEYA YA MWEEKUMINI

Wuupuwelela Ophenta Waka Woopacerya Wookikhaliherya Ovilela

Elavuliwe Ni Anthony Morris III

WAARI wanipacerya wa elimwe ya 1970. Kaarimummathi vakhaamani vaka oxipitali ya Valley Forge General Hospital, oPhoenixville, oPennsylvania, wEstados Unidos. Nfirimeero mmosa aaniphima wuupa wa ephome aka khula minutu 30. Okathi ole kaarina iyaakha 20, kaari toropa ni nkaareere owereiwa. Nfirimeero ole aari muulupale okivikana miyo, aanooniherya wira aahixankiheya. Okathi wuupa wa ephome aka waatepa aya ovukuwa, miyo kaahimukoha wira: “Mootoko omoona mutthu okhwaaka”? Owiitho waahimuriipa, nto khaakhula iiraka, “Nnaari nkinamoone”.

Okathi ole, koona wira kaamookhwa. Exeeni yaakiirinhe orowa oxipitali iwe? Vano mukeemererye koohimeeryeni sowiiraneya sa mweekumini mwaka.

ENAMUNA KAAKENLE AKA MUKHOTTONI

Oretta ole kaaphwannye okathi waavara aka muteko nipuro yooperariwa atthu yaavulalihiwa ni ekhotto oVietinami. Waanikisivela waakhapelela aretta ni atthu oovulala, nto yoolakela aka yaari wiixutta muteko wa owooperari atthu. Miyo kaaphiiye oVietnami mweeri wa Junyo a 1969. Ntoko siniirihiwa awe khula mutthu onamphiyaru, kaahivahiwa esumana emosa wira kaakhele malakiheryo ni kilimalele ovirikana wa iwoora ni makhalelo a muttetthe ole wooviha vanceene.

Nuumala wiivahererya nipuro kaarowaka ovaraka muteko, exipitali yooperariwa atthu, oMekong Delta, Dong Tam yaaniphiya elikopeturu anceene yaaruuha aretta oovirikana. Miyo kaari mutthu oosiveliwa ni elapo aka ni waanikisivela ovara muteko, nto naananoru kaahipacerya ovara muteko. Atthu ale oovulala yaanilokiheriwa nto khiyatthimakiheriwa ipa saamukhaani sa eyuuma saarina ikaruma sa wooperariwa. Mpaani mme, nnaamwi wahaakhanle opuro, mulipa-oniwooperari atthu ni anamakhaliherya awe araru, yaanipaka sotheene yaawerya aya wira yoopole ikumi sa atthu. Masi kaahoona wira saahikhala mirupa sooriipa suulupale nlelo saahanle mwelikopeturuni. Kaahihimeeriwa wira mirupa iye saari itathela sa anakhotto yaanyanyiwe okhottoni. Ela ti enamuna kaakenle aka okhottoni.

OMPHAVELASA WAKA MULUKU

Okathi kaaryaaka mmiravo kaahitoko wiiwa ekeekhai yaalaleeiwa ni Anamoona a Yehova. Maama aka oophentiwa annimusoma Biibiliya ni Anamoona, masi khihiyererya ohibatiziwe. Miyo waanikisivela vanceene okilaathi khiyawiriyana ele yaasomihiwa awe maama aka. Okathi ole naahivira vakhiviru va Empa ya Omwene ni apaapa oohikiyara. Miyo kaahaakoha wira, “Exeen’ila”? Awo yaakhunle so: “Phoole muhiwaattamele atthu awo”! Mwaha wa omphenta ni omuroromela paapa aka ole, kaahiiwelela miruku sawe. Nto okhuma vaavale nkaavaanenle-tho ni Anamoona a Yehova.

Nuumala ohokolowa oVietnami, miyo kaanoona otthuneya wa Muluku mweekumini mwaka. Itthu iye soomoriha ikharari saawenhe aka okhottoni saanikixankiha mmuupuweloni. Vaakhala ntoko khuuvo aawerya woona itthu saakhumelela oVietinami. Kinnuupuwela okathi waarwiiye awe muttitthi wa atthu oonanariwa nto khiwiirelaka atoropa a US, alipa aniwiivakasa anamwane, okhala wira saaniiwanyeya soohimya soowi yaaniiviwa anamwane ahitthenke etthu okhottoni.

Wira kimalihe etala aka ya omunepani, kaahipacerya orowa khula ekerexa. Okhuma khalai kaanimphenta Muluku, masi khiivo ekerexa yaalavunle etthu yaakivara murima. Wanikisa waya, kaahirowa Empa ya Omwene ya Anamoona a Yehova oDelray Beach, oFlorida. Yaari Ettiminku ya Feverero 1971.

Kaaphiiye ohalaka omala mwaha wa atthu otheene, nto kaahiwehererya yoosoma ya Owehaweha. Miyo nkinuupuwela muru waasommwa esumana ele, masi nlelo kinnimuupuwela mmiravo mmosa mwaamukhaani yoowo aawerya omukhunula Biibiliya awe ni ophwanya soolepa sotheene. Eyo yaahikivara murima! Miyo kanwiriyana ni owehexexa paahi. Okathi waarowa aka okhuma Empa ya Omwene, munna mmosa oopatthaneya, yoowo woonasa wene aarina iyaakha 80 aahikaattamela. Nsina nawe ti Jim Gardner. Owo aahikumiha eliivuru eni A Verdade Que Conduz à Vida Eterna, nto khukikoha so: “Xontte mwanwerya waakhelela eliivuru ela”? Nto naahiiwanana wira Namaxexe vaasiisu nipacerye omusoma Biibiliya.

Ettiminku yeele ohiyu kaarowa omutekoni. Miyo kaavara muteko exipitaali yoohikhala ya guvernu muttetthe wa Boca Raton, oFlorida, nto kaavara esaala enaakheliwa iretta sootutuxerya. Miyo kaarowa ovara muteko okhuma 11:00 ya ohiyu mpakha 7:00, mmeeloni mwaya. Okhala wira ohiyu ole khiwaattale aretta, kaahiphwanya okathi wa osoma eliivuru Verdade. Nfirimeera mmosa owunnuwela aahirwa, khikaakhaka eliivuru ele, khuwehaka ekaapa aya ntoko khipwapwaka oriki, “Nyuwo muniphavela okhala mmosa a atthu awo, ti vaavo?” Kaahimwaakha eliivuru ele, nto khimuhimeerya wira “Nlelo kineetta eriyari ya eliivuru eyo, masi kinoona wira eyo enihimya anyu enimwiiraneya!” Owo aahivenya vale, nto miyo kaahimaliha osoma eliivuru ele ohiyu yoole.

Miyo kaapacenrye yoosoma ahu ya Biibiliya kimukohaka Munna Gardner so: “Vano ninrowa osomaka exeeni”? Owo aakhunle so “Eliivuru yeele yaakhenle anyu”. Nto miyo khwiira “Koosoma yotheene”. Munna Gardner, mooreera murima aakhunle so: “Vaareera, masi nrowe nithokorerye muru ola woopacerya paahi”. Miyo kaahitikinihiwa mwaha wa itthu sinceene sahaawenrye aka wiiwexexa. Owo aahikooniherya soolepa sinceene mBiibiliyani mwaka. Nto kaahipacerya wiixutta voohimya sa Muluku a ekeekhai, Yehova. Munna Gardner, yoowo aamwiirela aka Jim, aahikisomiha miru miraru sa eliivuru Verdade, vaasiisu yoole. Nto khula namaxexe okhuma vaavale naanisoma miru miraru sa eliivuru ele. Miyo waanikisivela omusoma Biibiliya. Tthiri ele yaari eparakha yuulupale yaarina aka ya osomihiwa ni munna oowoottihiwa, yoowo aamusuwenle Charles T. Russell mwaneene ene!

Nuuvira isumana vakhaani, kaaheemereriwa okhala namalaleerya a ihapari sooreera. Jim aahikikhaliherya oxintta mixankiho saka, ohela muhina ole wa orowa olaleerya empa ti empa. (Mit. 20:20) Vaavo Jim aalaleerya awe ni miyo, muteko woolaleerya waahipacerya okisivela. Nto kaahipacerya woona wira muteko woolaleerya ti eparakha yuulupale yaarina aka. Tthiri ti vootteeliha murima ovara muteko vamosa ni Muluku!​—1 aKor. 3:9.

OMPHENTA WAKA YEHOVA WOOPACERYA

Vano mukeemererye koohimeeryeni esiiri aka emosa, eyo piiyo, opacerya waka omphenta Yehova. (Wis. 2:4) Omphenta waka Yehova waahikikhaliherya oxintta mixankiho ni itthu soowereya sinceene okathi wa ekhotto ni soweeha soovirikana.​—Yes. 65:17.

Kinnuupuwela nihiku nimosa na vameekhaaya, elimwe ya 1971. Kiira koomoliwe ene niinano nipuro naakhala aka, noolihiwe aka ni anamuyari aka. Paapa aka ole oohikiyara khaaphavela omooliha empa awe Namoona a Yehova! Okathi ole nkaarina musurukhu! Oxipitali waavara aka muteko kaaniliviwa musurukhu khula isumana piili, masi kaahimaliha musurukhu ole okhala wira kaathumme ikuwo wira kiwareke okathi woorowa olaleerya maana kaari Namoona a Yehova. Kaahikhalana musurukhu mukina, masi owo waari obanko oMichigan elapo yeele kinnuwenle aka. Nto kaahaana okhala mukaaroni mwaka mahiku vakhaani. Miyo kaarapa ni omettha ereru ixovoro sa mapuro aatumihiwa diisele.

Nihiku nimosa okathi yoole kaakhala aka mukaaroni mwaka, kaahiphiya Empa ya Omwene sihalaka iwoora piili wira opakiwe muthukumano wa orowa olaleerya. Kiira kikhumme ene niinano omutekoni. Nto okathi waakilaathale aka ophiro wa Empa ya Omwene, nipuro kahooniwa aka, kaahipacerya wuupuwelela itthu saawehale aka oVietinami, kaanoona wunkha erutthu ya atthu oopahiwa ni ephome emwareyaka, nto eyo yaahikixankiha vanceene. Mmuruni mwaka kaaniwerya owiiwa ni owoona amiravo ale yaakixonttela, nto miyo kaanaahimeerya wira “Muhixanke”! “Kinimookhaliheryani”! Miyo kaanisuwela wira awo yaarowa okhwa, masi kaaneererya ohiwooniherya eyo ni omananiha wakurunuxa murima wira ahikoone wira kaamunla muhinahina. Opuro ole waakilaathale aka kaahixanka vanceene.

Nto kaahipaka nivekelo ni yaanikhuma maithori manceene yaanaaninhe owiitho waka. (Esal. 56:9) Kaahipacerya wuupuwelela nlipelelo na ohihimuxiwa wa alipa ookhwa. Nto eyo yaahikikurunuxa murima: Okhala wira Yehova onrowa waahihimuxa atthu ootheene yaawehale aka ookhwa ni wira atthu anceene annixankiheya ni etthu emosaru yaakixankiha. Muluku onrowa wattikiherya ekumi amiravo ale otheene, ni wira awo anrowa okhalana eparakha ya wiixutta ekeekhai voohimya sa yena. (Mit. 24:15) Okathi ole murima aka waahipacerya osareya omphenta Yehova, nto eyo yaahikivara murima vanceene. Nihiku nle nlelo ti navameekhaaya mweekumini mwaka. Okhuma vaavale, kinnipaka sotheene siniwerya aka, vanceenexa okathi wa mixankiho, wira kihiyeleele omphenta waka woopacerya Yehova.

YEHOVA ONNIKIREERELA MURIMA KHULA OKATHI

Okhottoni, atthu annipaka itthu sinceene sootakhala. Ni miyo kaahipaka itthu iyo. Masi wuupuwelela soolepa piili sookisivela wookikhaliherya okhala ootaphuwa. Yoopacerya ti Wisupulula 12:10, 11, yeeyo eni Diabo ooxinttiwa ohiya paahi mwaha wa olaleerya wahu masi ni ephome ya Mwaapwittipwitthi. Yanenli ti aGalasia 2:20. Eversu eyo, ennihimya wira Krsitu Yesu okikhwenle ‘yomi’. Yehova orumeelaka ephome ya Yesu, ookilevelela itthu sotheene sipakale aka. Osuwela eyo onnikikhaliherya okhalana yowuupuxerya ya murima yooloka ni yookikhaliherya opaka khula etthu eniwerya aka wira kaakhaliherye atthu akina osuwela ekeekhai voohimya sa Muluku ahu oomoriwa ikharari, Yehova!​—aHéb. 9:14.

Vano kaawehaka ottuli, kinnoona wira okhuma khalai Yehova onnikikhapelela khula okathi. Mwa ntakiheryo, nihiku nenne, Jim aahisuwela wira kaakhala mukaaroni mwaka, nto owo aahikikhaliherya olavulana murokora aarina empa yaalugariwa. Miyo kinnaamini wira Yehova aahimuruma Jim ni murokora ole wira okiphwanyihe nipuro nooreerela okhala. Tthiri Yehova tooreera murima! Owo onnaakhapelela arumeyi awe oororomeleya.

KAHAANA WIIXUTA ORUMEELA ORATTEENE NTHITI NI OREERA MURIMA

Mweeri wa Maio 1971, kaahoona oreerela orowa oMichigani orowa olokiherya myaha sikina. Masi kihinatthi okhuma muloko wa Delray Beach, oFlorida, kaahisariha iliivuru nipuro naapwehiwa miritti na ekaaro aka nto kineetta kirowaka mpantta onikela epheyo. Nto keettaka eriyari ya mukwaha ole iliivuru iye saahimala, mmukanoni mwa oGeorgia. Miyo kaanilaleerya mwa nthiti ihapari sa Omwene khula nipuro naavira aka. Kaaheemela ekhatteya emosa nto kaahinvaha itratato mulopwana kaaphwannye aka oxovoro wa nipuro naaphumuriwa. Nihiku nle, miyo kaanuupuwela vakhala wira ipyo iye saalale aka sammela.​—1 aKor. 3:6, 7.

Kihaana wuupulula esiiri ekina, nuumala wiixutta ekeekhai, nkaalavuliha mooreerela atthu, vanceenexa okathi waalavulana aka amusi. Mwaha woowi niphento naka noopacerya na Yehova naanvarela mmurimani mwaka, kanaaleela ekeekhai moolipa murima ni mooluluwanya amusi aka. Okhala wira miyo kaanamphenta axuulupale aka, John ni Ron, nto kaanaakhanyererya wira awiriyane ekeekhai yaalaleya aka. Muhoolo mwaya kaahaana waavekela musammaha mwaha wa ohaareerela waka murima. Masi, miyo nkinihiya waavekelela wira yeemye ekeekhai. Okhuma vaavale, Yehova onnikiixuttiha, nto kihiixutta inamuna sooreerela sa olaleerya ni wiixuttiha.​—aKol. 4:6.

ITTHU SIKINA SINIPHENTA AKA

Nnaamwi kihiliyalaka omphenta waka Yehova, nlelo sookhala itthu sikina siniphenta aka mweekumini mwaka. Etthu ekina yookisivela ti mwaaraka onimphentexa aka Susan. Kaahoona wira kaanitthuneya okhalana mutthu aarowa owerya okikhaliherya ovara oratteene miteko sa Omwene. Susan, muthiyana mmosa oolipa omunepani. Kinnuupuwela nihiku naamuxukunrye aka nlelo nihinatthi othelana. Kamphwannye Susan okilaathale ene mphiro ohoolo wa empa ya anamuyari awe oCranston, Rhode Island. Owo aasoma erevista Owehaweha ni Biibiliya awe. Etthu yaakivanre murima okhala wira owo aasoma miru iye okhala wene sihinisommwa mmulokoni, aaniweha soolepa sotheene mBiibiliya mwawe. Nto kaahoona wira ‘Muthiyana ola sinnimusivela itthu sa Muluku!’ Nto naahithelana mweeri wa Dezembro mwaakha wa 1971, vano kinnitteliwa murima okhala wira okhuma vaavale mwaaraka onikhala vakhiviru ni miyo okikhaliheryaka khula etthu. Etthu eniisa awe okisiveliha okhala wira nnaamwi okiphentaka miyo, owo onniphenta vanceenexa Yehova.

Susan ni miyo nooreelihiwa nivahiwa aniihu anli, Jesse ni Paul. Okathi wannuwa aya Yehova aari ni yaawo. (1 Sam. 3:19) Okhala wira awo aathanla ovarexexa ekeekhai, nto aakiiriha miyo ni Susan okhala ootteeliwa murima. Awo annimurumeela Yehova mwaha woowi annivikaniha wuupuwela omphenta waya woopacerya. Oowanli aya annirumeela mmuteko wa orummwa wa okathi wotheene mwa iyaakha 20. Nto kinnitteeliwa murima ni axaara aya aniihu awo Stephanie ni Racquel, yaawo aniwoona aka okhala aniihu oowaayara nave. Anaaka oowanli yaathenle athiyana anisiveliwa itthu sa Muluku ni animphenta Yehova ni murima ni ekumi aya yotheene.​—aÉf. 6:6.

Nuumala obatiziwa, kaahiviriha iyaakha 16 muttetthe wa Rhode Island, weiwo waarina ahu apatthani anceene ooloka. Kinniwuupuwela moohakalala axitokweene anceene yaavaranaaka muteko. Ohiya-vo, kinnaaxukhurela axitokweene ooweetteetta anceene ahiniwerya aka waaromola otheene, yaawo akikhalihenrye. Tthiri eparakha yuulupale ovara muteko ni anna okhuma khalai ahiniliyala omphenta waya Yehova! Mwaakha wa 1987 naahithaamela mpantta onikela epheyo wa oCarolina, wira nakhaliherye nipuro noothowa anamalaleerya, nto naahikhalana apatthani anceene ooloka.a

Mweeri wa Akosto 2002, Susan ni miyo naaheemererya nlattulo na orowa orumeela vamosa ni emusi ya oBetheli oPatterson wEstados Unidos. Miyo kaavara eDepartamento ya Muteko, nto Susan aavara nipuro ninkatthiwa ikuwo. Susan waanimusivela ovara muteko ole! Nto Akosto 2005, kaahivahiwa eparakha ya wiirela mpantta Nikhuuru Noolamulela. Miyo koona wira eparakha ele yaahikinnuwela vanceene. Mwaaraka onimphenta aka aahixanka mwaha wa miritti, miteko, ni mikwaha saarina ahu. Okhala wene Susan omoopiha owela ntteeke, masi ninniwela nirowaka mapuro manceene! Susan onihimya wira olipihiwe ni axaaraya anna akina a Nikhuuru Noolamulela, yaawo animulakiherya mooreera murima, nto eyo yoomukhaliherya owo weemererya opaka khula etthu wira okikhweiherye muteko aka. Nto owo oowerya opaka khula etthu enivekeliwa ahu, miyo kinnimuxukhurela vanceene.

Oskritoorio waka sookhala ifootu sowaatta sinikuupuxerya itthu sinceene! Iyo sinnikuupuxerya ekumi yoohakalaliha epunhe aka. Nnaamwi kaakheenle ene mareeliho manceene mpakha-va, nlelo kinniimananiha wira kuupuweleleke omphenta waka Yehova woopacerya!

[Enoota]

[Eponto yuulupale epaaxina 4]

Omphenta waka Yehova wookikhaliherya oxintta mixankiho ni itthu soohiloka kuupuwela aka sa okathi wa ekhotto ni soweeha sikina

[Eponto yuulupale epaaxina 6]

Miyo koopaka sotheene kaawerya aka, vanceenexa okathi wa mixankiho ni sooweha wira kihiyeleele omphenta waka Yehova waarina aka wanipacerya