MYAHA SA ARKIVO AHU

Owo Ahoona Wira Yoolya Yaakaiwa Moophenta

OLYA yoolya ya omunepani ti etthu yuulupalexa enipakiwa omithukumanoni sa atthu a Yehova. Okathi atthu a Muluku anithukumanela aya yoolya ya omunepani, olya yoolya ya werutthuni vamosa, onnincererya ohakalala waya.

Mweeri wa Setembro 1919, Alipa-oomusoma Biibiliya, yaahipaka muthukumano wa mahiku 8 oCedar Point, Ohio, wEstados Unidos. Yaahipakiwa marehereryo wira anna yamake ni olya oWateelo, masi yaahirwa atthu ikonto sinceene ovikana ale yaawehereriwa. Mwaha wa waatta wa atthu ale, alipa yaavara muteko wa okawa yoolya owateelo, alopwana ni athiyana, yaahihiya muteko. Xerenti a nipuro naakaiwa yoolya aahaavekela anna vakhala wira yanwerya okhaliherya muteko owo, nto awo yaaheemererya mootteeliwa murima ni atthu anceene yaahiivahererya. Mmosa a atthu awo ti Sadie Green. Owo wuupuwelaka okathi ole, onnihimya so: “Ole waari mukwaha woopacerya kaavaraka muteko wa okawa yoolya owateelo, masi vaahikisivela oviriha okathi ole”.

Myaakha soottharelana, nipuro na muthukumano naanikhalana marehereryo a okaiwa yoolya, nto eyo yahaaphwanyiha ohakalala anna ni arokora anceene yaivaherenrye okhaliherya muteko owo. Ovara muteko ni anna oovirikana, waahaakhaliherya amiravo anceene okhalana soolukama somunepani sooloka. Bolton aahirumeela nipuro naakaiwa yoolya muthukumano waapakiwe mwaakha wa 1937. Owo onihimya so: “Kahaasuwela anna anceene yaakhuma mapuro oovirikana, nto kaahiiwa moota awo yaaxinttale aya mixankiho. Okhuma vaavale, kaahipacerya waamini wira kanwerya okhala pioneera”.

Beulah Covey, yoowo aaronwe okongresuni onihimya so: “Atthu ale yaanivara muteko mowiiraana ntoko ineneele”. Masi muteko ole waahikhalana mixankiho saya. Nuumala ophiya oDodger Stadium Los Angeles, oCalifornia, 1969, munna Angelo Manera, taasuwenle awe wira aahithanliwa orowa okhaliherya muteko wookawa yoolya. Owo onihimya so: “Miyo kaahituthuwa vanceene!” Olokiherya muthukumano ole waahela muhina othipa mukoti wa ikiloomo 4 waarowa ovira mpompe wa gás aarowa waapeeliwaka!

Elapo ya oSerra Leoa mwaakha wa 1982, atthu owiivahererya a nthiti yaahaana wiikittha miri wira apake nlaka nto arumeelaka miri seiyo yaikhintthe aya yaahiteka nipuro naakaiwa yoolya. Mwaakha wa 1951, oFrankfurt, wAlemanha, anna ale yaarina musurukhu yahaalugari maakina yaakumiherya oviha waawerya waapeiwa ikhalako 40 okathi omosa. Nto vaaniweryaneya waapeya yoolya yaarowa olyiwa ni atthu 30.000 muhina mwa ewoora emosa paahi. Wira yaavukule muteko wa orapiha iparatho atthu ale 576 yaavara nipuro nle, anna yaaniruuha miyaalo ni ikarifu saya. Muttetthe wa oYangon, oMyanmar, alipa-oowaapeya yaaninvukula lookho aamuhela aya muyoolyani mwaha wa atthu a ilapo sikina yaarwiiye.

“AWO YAALYA YEEMENLE ENE”

Weemela vansuwani ottharaka eliinya yoorakama yaarowa nipuro naakaiwa yoolya wEstados Unidos mwaakha wa 1950, waahimphwanyiha mareeliho Annie Poggensee. Owo onihimya wira: “Miyo kaahiviriha okathi ole kivaanelaka ni arokora anli yaattamanne aka yaawo yaakhumme wEuropa ni pakiti”. Khula murokora aanihimya moota aawenrye awe orwa muthukumano ole. Annie onimaliherya so: “Khuuvo-tho mutthu mukina aari oohakalala waavikana arokora ale anli. Okathi ole waawehererya ahu, nnaamwi naari vansuwani khaareere waakuva omala”.

Mapuro yaale yaapakiwa mithukumano, saaneemexiwa iheema suulupale ni saaniheliwa iliinya sinceene sa meesa yaawo yaatumererya atthu ale waakuvaka olya wira yaavaheke opuro akhwaaya. Etthu xeeni ekina yaapakiwa wira vaweryaneyeke okaweliwa yoolya ikonto sinceene sa atthu mwa okathi vakhaani? Mutthu mmosa yoowo ahaakhanle Namoona onihimya so: “Nkinawehe etiini moota yoola. Awo anilya yeemenle ene”.

Mitthenkeso sa atthu pure ni sa anakhotto saahitikinihiwa woona moota atthu ale yaaryaaya ootthokiheya ni oowiiraana. Nuumala oweha nipuro naakaiwa yoolya oYankee Stadium oNova York City, Mukhulupale a Anakhotto a wEstados Unidos, aahimutumererya Muhooleli a Anakhotto a eDepartamento ya Ekhotto ya wInglaterra wira oxukurye opuro ole ni opake etthu emosaru. Ti maana aya, owo ni amwaarawe yaahirwa owiriyana muthukumano wa 1956, “Reino Triunfante” yoowo waapakiwe oTwickenham, wInglaterra. Nto owo aahihimya wira yoolya yaakaiwa moophenta.

Mwa iyaakha sinceene, anamuteko owiivahererya vootthuna vaya yaahikawa yoolya yooloka ni yoopunttheya mmureerelo wa atthu yaarowa omithukumanoni suulupale. Masi muteko ole waari muulupale okhala wira yaatthuneya anna anceene owiivahererya wira avare muteko owo, amalihaka iwoora sinceene ni okathi mukina yaaniyeleela eprograma. Mapuro manceene yoohiiwa okaiwa yoolya omuthukumanoni okhuma wuukiseryani wa myaakha sa 1970. Okhuma mwaakha wa 1995, atthu anirwa mithukumano iyo annihimeeriwa wira aruuheke yoolya aya omuthukumanoni. Eyo ehaakhweiherya anamunceene yaale yaapeya ni okawaya yoolya ottottela mureerelo eprograma ni ovaanela ni annihu a eKristau.a

Tthiri Yehova onnaaxukhurela atthu otheene yaale avanre muteko munceene wira yaakhaliherye anna aya! Woonasa wene anamunceene onniwunkhela okathi ole yaavara aya muteko wookawa yoolya. Masi yookhala etthu yuulupale ehanle nlelo: Niphento ti etthu yuulupale eniirela mpantta mithukumano iyo.​—Yoh. 13:34, 35.

[Enoota]