Owo Anaaphenta Atthu
Waanikisivela “okhala vamosá n’atthu”.—MIR. 8:31.
MUNOOWERYA OTTHOKIHERYA?
Exeeni enooniherya wira Yesu aanaaphenta vanceene apinaatamu?
Enamuna Yesu aarumeelale awe owerya wawe onnivaha nroromelo xeeni voohimya sa elapo esya?
Mwiiriirya xeeni wa Yesu oniwehererya anyu?
1, 2. Exeeni ennikupaliha wira Yesu onnaaphenta vanceene apinaatamu?
MWAANA oopaceriwa opattuxiwa a Muluku ti mapacereryo a ophenta ni ankhili aalupalexa a Yehova. Owo aari miruku sirina ikhalelo sa omutthu ni funti a “miteko” aavara vamosa ni Tiithi awe. Nto nnoowerya omoona moota aatteeliwe awe murima okathi waamoona awe Tiithi awe “àtalaka erimu” ni ‘otikitherya elapo’. Masi, ohiya itthu iye saapattuxiwe sahaakhanle sikumi, Mwaana oopacerya opattuxiwa a Muluku aahitepa osiveliwa ni “okhala vamosá n’atthu”. (Mir. 8:22-31) Tthiri Yesu aahitepa osiveliwa wala waaphenta apinaatamu okhuma okathi aaryaawe wiirimu.
2 Muhoolo mwaya, mwaha woomuroromela ni omphenta Tiithi awe, vamosa ni waaphenta wawe wuulupale “atthu”, Mwaana Oopacerya Opattuxiwa a Muluku vootthuna vawe “ahirula omuluk’uwo” nto onalikana ni apinaatamu. Owo aahipaka itthu iyo sotheene “n’uleva ekumi awe, wira awopole atthu othene”. (aFil. 2:5-8; Math. 20:28) Tthiri owo aanaaphenta apinaatamu! Okathi Yesu aaryaawe valaponi, Muluku aahinvaha ikuru saaweryana awe opaka miiriirya wira ooniherye waaphenta wawe apinaatamu. Nto Yesu aahooniherya makhalelo a itthu soovara murima sinirowa okhumelela muhoolo voohipisa elapo yotheene.
3. Vano ninrowa othokorerya exeeni?
3 Yesu orwa wawe valaponi waahimweemererya “olaleya ehapari yorera y’omwene wa Muluku”. (Luka 4:43) Owo aanisuwela wira Omwene waarowa otteeliha nsina na Tiithi awe ni waarowa omala-maliha mixankiho sotheene sirina aya apinaatamu. Moohaaniherya, olaleerya wa Yesu waahooniherya wira yena aanaaphenta apinaatamu. Xeeni eyo eryaaya yootthuneya? Mwaha woowi ele enniixuttiha aya enrowa oniphwanyiha nroromelo ni nlipelelo voohimya sa itthu sa muhoolo. Vano nrowe nithokorerye miiriirya mixexe sa Yesu.
“OWERYA W’APWIYA WARI NI YESU, WIRA ÀVONIHE ARETTA”
4. Muhimye moota Yesu aakumaanale awe namakuttula ole?
4 Muteko woolaleerya wa Yesu waanikhumela saana, nto mahiku ale aavara muttetthe wa oGalileya. Yookhala epooma emosa Yesu amphwannye awe mutthu oomoriha ikharari. (Mar. 1:39, 40) Owo aahimphwanya mulopwana aarina oretta wowoopiha, eyo piiyo, makuttula. Olavulaka sa munnuwelo wa oretta wa mulopwana ole, meedico Luka onihimya wira owo aari “namakuttula”. (Luka 5:12) Namakuttula ole “vamonalyawe Yesu, ahikokhora oholo wawe, ùramaka mpakha vathí, khunvekela, ìraka: ‘Pwiya, mwatthunaka, munowerya okireriha!’”. Mulopwana ole aanisuwela wira Yesu aahikhalana ikuru sa onvoniha yena, masi aanitthuneya osuwela vakhala wira Yesu aanitthuna opaka eyo. Yesu aarowa waakhula sai yoovekela ele? Owo uupuwela exeeni okathi waamoonale awe mulopwana ole, woonasa wene aari oorakalasa? Niireke Yesu aarowa opaka etthu emosaru yaapakiwa ni aFarisi, yaawo yaanyokha ni waathanya atthu yaarina makuttula? Nyuwo mwaarowa opaka exeeni?
5. Exeeni yaamwiirinhe Yesu olavula wira “Kinnitthuna!” okathi wanpenunxe awe namakuttula ole?
5 Woonasa wene, namakuttula ole aahiliyalela okhuwela oriki “Ka namwikho! Ka namakuttula!” ntoko saalakiherya aya Nlamulo na Moise. Yesu khaathokorenrye eyo. Ohiya-vo owo aamuthokorenrye mulopwana ole ni muxankiho awe. (Onam. 13:43-46) Hiyo khannisuwela ele yaari mmuupuweloni wa Yesu, masi ninnisuwela ele yaari vamurimani vawe. Mwaha wa othunku, Yesu aahipaka mutikiniho. Owo aahookola ntata nawe, khimukwannya namakuttula ole, nto olavulaka ni nsu noolipiherya masi mooreera murima aahimyale so: “Kinnitthuna; murerihiwe! Nananoru, makuttul’awe khummalela”. (Luka 5:13) Tthiri owerya wa Yehova waari vaavale, ohiya paahi omukhaliherya Kristu opaka mwiiriirya ole, masi wira Yesu ooniherye waaphenta wawe apinaatamu.—Luka 5:17.
6. Etthu xeeni yootthuneya yaakumihenrye aya miiriirya saapakiwe ni Yesu, ni sinooniherya exeeni?
6 Owerya wa Muluku waahimukhaliherya Yesu Kristu opaka miiriirya sinceene sookuxa murima. Owo khampenunxe namakuttula ole paahi, masi aahaapenuxa aretta anceene ni khula enamuna ya orakala. Masu a Muluku annihimeerya so: “Atthu awo yahithamala, ewonaka ale yahalavula elavulaka, alipa-òrakala evonihiwaka, ale yatuthunya yettaka orattene, ale yahona yònaka”. (Math. 15:31) Okathi Yesu aapenunxa awe atthu ale, khaavekenle wira atthu avaheke itthu sa mwerutthuni mwaya wira aahelele ale yaavoniha awe. Owo aavoniha ipantte seiye sa mutthu owo saarina oretta! Owo aanaapenuxa atthu awo naananoru, okathi mukina aanaapenuxa aryeene ottaiwene. (Yoh. 4:46-54) Exeeni ennooniherya aya matakiheryo ala oowuumiha owanoni? Nenna-va Yesu oryaawe Mwene wiirimu, ookhalana owerya ni onnitthuna omala-maliha mixankiho sotheene sa apinaatamu. Enamuna Yesu aathokorenrye awe atthu enninikhaliherya okupali moota onrowa awe waakhwaniherya eprofesia ela ya mBiibiliyani eni: “onowòpola atthu òhawa ni òwiyeviha.” (Esal. 72:13) Tthiri, Yesu onniphavela waakhaliherya atthu otheene oohaawa ni murima awe wotheene.
“VENYANI, MUKUXE NREPA NANYU, MWETTEKE!”
7, 8. Muhimye itthu Yesu saapanke awe okathi amphwannye awe mulopwana oowereyasiwa waattamela ntthiya na oBezathá?
7 Nuuvira myeeri vakhaani nuumala Yesu okumana namakuttula ole. Aaheetta mukwaha okhuma oGalileya orowaka olaleerya ihapari sooreera sa Omwene wa Muluku muttetthe wa oYudeya. Okathi ole, atthu Yesu aavanre awe murina ni itthu aixuttiha awe ni saapanke awe yaahiphiya imilyau sinceene. Owo waanimusivela waalaleerya ihapari sooreera alipa-oothoiwa, olaleya otaphuliwa wa ale yaatthukiwe, ni waakurunuxa murima alipa-oohaaxiwa.—Yes. 61:1, 2; Luka 4:18-21.
8 Nto waahiphiya mweeri wa Nisani. Ottharihelaka malakiheryo a Tiithi awe, Yesu aahirowa oYerusalemu wira iirele mpantta niira na Paasikha. Muttetthe ole atthu yiira avaraka miteko saya ni akina yaanirwa wiirela mpantta niira nle nootthuneya. Mpantta onikhuma epheyo wa etemplo naahikhala ntthiya niireliwa Bezathá, weiwo Yesu amphwannye awe mulopwana aawereiwa.
9, 10. (a) Exeeni yaawiiriha atthu orowa oBezathá? (b) Exeeni Yesu aapanke awe waattamela vatthiyani, nto eyo enniixuttiha exeeni? (Nwehe elatarato yoopacerya.)
9 Muttitthi muulupale wa aretta waanithukumana oBezathá. Exeeni yaawiiriha atthu awo orowa nipuro nle? Mwaha wa nthowa nihinihimmwa, atthu ale yaanikupali wira muretta onnikela vatthiyani vale okathi maasi ale yeeteteya aya, ampenuwa mwa mwiiriirya. Nto mmananihe oweha makhalelo aya atthu ale. Awo yaari oothanana, ooxanka ni khiyaarina nlipelelo nooloka. Masi exeeni yaamwiirinhe Yesu yoowo aari mutthu oomalela orowa nipuro nle naakhala aretta? Mwaha wa othunku, Yesu aahimwaattamela mulopwana mmosa aawereiwa okhuma khalai, owo ohinatthi oyariwa valaponi.—Mmusome Yohani 5:5-9.
10 Munniwerya woona otteeliwa murima wa mulopwana ole aawereiwa okathi Yesu aamukonhe awe vakhala wira aaniphavela ovonihiwa? Owo aahaakhula voohipisa. Mulopwana ole aaniphavela ovonihiwa masi khaasuwela moota woowiira, okhala wira khaarina mutthu aarowa omukhaliherya okela vatthiyani vale. Nto Yesu aahimuruma mulopwana ole opaka etthu yootikiniha oriki, venyani, mukuxe nrepa nanyu, mweetteke. Ottharihelaka masu a Yesu mulopwana ole aahikuxa nrepa nawe onapacerya weetta. Tthiri vaari voohakalaliha oweha ele enrowa awe opaka Yesu muhoolo elapo esya! Mwiiriirya ola onninooniherya oreera murima wa Yesu. Owo ahoona ovelavela wa mulopwana ole. Ntakiheryo na Yesu ninninikhaliherya ovikaniha waaphavela atthu ooriipiwa murima, mwaha wa itthu sinikhumelela olumwenku ola, anikhala mmuttettheni mwahu.
“T’ANI OKHWANNYALE NLAYA NAKA?”
11. Moota xeeni yoolepa ya Marko 5:25-34 enittittimiherya aya moota Yesu aamorela awe ikharari aretta?
11 Mmusome Marko 5:25-34. Mwa iyaakha 12, muthiyana ole aakhala wuuliwaka muru. Oretta waarina awe waanimuhasula mwa inamuna sotheene mweekumini mwawe, ohela muhina okokhorela wawe. Ohiya-vo “Owo ahaphwanya akulukhana anjene, ahononaka muhakhu wothene warinawe. Akulukhana yahimuhaxa vanjene; vano, khaphwanyale okumi, masi anvira atepaka”. Masi nihiku nimosa, muthiyana ole aahimpaka palano mukina wira openuwe. Owo aahipaka sotheene saawerya awe wira ophiye vakhiviru va mulopwana iireliwa Yesu. Owo aahikela mpuuryani mwa muttitthi ole nto khivara nlaya na Yesu. (Onam. 15:19, 25) Yesu aahisuwela wira waahikhuma owerya mwa yoowo, nto aahikoha oriki, ti pani okikwannyale. “Muthiyan’owo anthukumela ni wova, okhala wira ansuwela samukhumelenle. Vano, ahirwa, ahìrihela vamettoni va Yesu”. Nuumala woona wira Tiithi awe, Yehova aahimpenuxa muthiyana ole, Yesu aahimukhapelela mooreera murima oriki: “Mwan’aka, wamini wanyu wowopolani. Muroke ni murettele, mukhaleke mukumi!”
12. (a) Muupuwelelaka itthu sithokorenrya ahu, munimoonela sai Yesu? (b) Ntakiheryo xeeni onivanhe awe Yesu?
12 Tthiri Yesu aari ooreera murima! Ninnoona wira owo aaniwoonela othunku atthu otheene yaawereiwa. Satana oniphavela wira hiyo nooneke wira khanniphentiwa ni khanirina efaita. Orumeelaka miiriirya, Yesu ohooniherya oratteene wira owo onninoonela othunku hiyo mwaha wa mixankiho sahu. Tthiri owo Mwene ni Namukuttho Muulupale ooreera murima! (aHéb. 4:15) Khivaniweryaneya osuwela moota sinoona aya ale arina oretta ohinivoniwa, vanceenexa vakhala wira oretta owo khonaniwereye. Hiyo nihaana osuwelaka wira, Yesu aahiwoonela othunku atthu yaawereiwa nnaamwi owo ahaatonko owereiwa. Ntakiheryo na Yesu ninninikhaliherya hiyo opaka eyo, ni owerya wahu wotheene.—1 Ped. 3:8.
“OKATHI UWO YESU AHINLA”
13. Moota xeeni ohihimuxiwa wa Laazaro onnooniherya aya omutthu wa Yesu?
13 Yesu waaninwereya murima mwaha wa owoonela othunku atthu. Owoonelaka othunku atthu yaamunlela mpatthani awe Laazaro, Yesu “ahiripiwa murima” ni “winiwa”. Owo ahiira siiso nnaamwi aasuwela wira voohipisa aarowa omuttikiherya ekumi Laazaro. (Mmusome Yohani 11:33-36.) Yesu khiwaamuuliha muru wooniherya oriipiwa wawe murima. Atthu ale yaari vaavale yaaniwerya woona moota Yesu amphenta awe Laazaro ni amusi awe. Tthiri aahooniherya othunku munceene vaavo aarumeelale awe ikuru saavahiwe awe ni Muluku wira omuhihimuxe mpatthani awe ole!—Yoh. 11:43, 44.
14, 15. (a) Exeeni enooniherya wira Yehova onniphavela omala-maliha ohaawa wa apinaatamu? (b) Exeeni nuulumo noowi “mmahiye” nryaaya nootthuneya?
14 Biibiliya onnimuhimya Yesu okhala “warya w’ovuwa wa Muluku n’ikuru ya makhalelo awe”. (aHéb. 1:3) Mwekeekhai, miiriirya sa Yesu sihooniherya wira owo ni Tiithi awe anniphavela omala-maliha iretta sotheene ni okhwa. Yoolakela eyo ennaaphwanyiha mureerelo atthu anceene ovikana ale yaahihimuxiwe khalai alempwale mBiibiliyani. Yesu aahimmye so: “onophiya okathi onìraya atthu othene ale ari mmahiye, . . . ekhume mmahiye”—Yoh. 5:28, 29.
15 Nuulumo nirumeelale awe Yesu noowi “mmahiye” ti nooreerela okhala wira onniheliwa muhina muupuwelelo wa Muluku. Nanwerya Sotheene, yoowo opattunxe olumwenku wotheene, onoowerya wuupuwelela makhalelo a khula mutthu amphenta ahu okhwiiye, ohela muhina itthu sooyaraniwa ni iye saaxuntte awe. (Yes. 40:26) Eyo khentaphulela wira Muluku oniwerya wuupuwelela paahi, masi owo ni Mwanawe anniphavela opaka eyo. Ohihimuxiwa wa Laazaro ni wa atthu akina alempwale mBiibiliyani onithoonyerya ele enrowa wiiraneya olumwenku wotheene elapo yakhala esya.
MIIRIIRYA SA YESU NI NYUWO
16. Eparakha xeeni enrowa aya ophwanya maKristau ale anrowa okhala oororomeleya mpakha wanikisa?
16 Vakhala wira nnoovikaniha okhala maKristau oororomeleya, nnimoona mwiiriirya muulupalexa ohinakhumelele, eyo piiyo, woopoliwa maxakha maalupale. Voohipisa, nuumala ekhotto ya Harmagedoni, sinrowa okhumelela miiriirya sikina, eyo piiyo, apinaatamu ottikiheriwa ekumi yoomalela oloka. (Yes. 33:24; 35:5, 6; Wis. 21:4) Mmananihe wuupuwelela okathi onirowa anyu waawehaka atthu yaarihaka ookulu aya, attootto aya, ikarinyu saya sa maroota, itthu saawara aya wira aweryeke wiiwa, ni itthu sikina! Tthiri Yehova onimwaavaha ekumi yoomalela oloka atthu otheene anrowa woopowa ekhotto ya Harmagedoni. Ale anrowa woopowa aakhalana muteko munceene woovara. Awo anrowa ovaraka muteko mooluttuweliwa wira akhalihe eParayiisu elapo ela, evahiwe ahu ni Muluku.—Esal. 115:16.
17, 18. (a) Yoolakela xeeni yuulupale yaarina aya miiriirya saapakiwe ni Yesu? (b) Xeeni vanitthuneya anyu wiimananiha wira mukele elapo esya ya Muluku?
17 Atthu yaapenunxe awe Yesu khalai annaalipiha mmakhuvani atthu a “muttitthi mulupalexa” olelo-va, okhala wira annisuwela wira iretta saya sotheene sinrowa ovonihiwa. (Wis. 7:9) Atthu ale Yesu yaapenunxe awe yaari yowooniherya wira Mwaana oopacerya opattuxiwa a Muluku onnaaphenta apinaatamu. (Yoh. 10:11; 15:12, 13) Othunku wa Yesu onninooniherya makhalelo ooloka a moota Yehova onimukhapelela awe khula mmosa a arumeyi awe.—Yoh. 5:19.
18 Apinaatamu olelo-va annuupulela, owereiwa ni okhwa. (aRom. 8:22) Tthiri hiyo ninniphavela vanceene elapo esya ya Muluku, yeeyo enirowa aya ovonihiwa atthu otheene aniwereiwa ntoko sileiheriwe ahu. Eliivuru ya Malakhiya 3:20, enninivaha mathowa a waamini wira ale anrowa ovonihiwa anrowa okhala ‘òwìtaphula, anotthapa, ntoko sintuphatuphaya inama sinkhuma munsisini’, ohakalala nno orowa okhumelela mwaha wa otaphuliwa ohimalela waarina aya. Nto oxukhurela wahu ni murima wotheene vamosa ni waamini wahu sooleiherya sa Muluku sinooniiriha ophavela opaka khula etthu wira niphwanelele okela elapo esya. Tthiri ti vootteeliha murima osuwela wira miiriirya saapakiwe ni Yesu okathi aaryaawe valaponi saari yowooniherya sa woopoliwa woohimala wa apinaatamu onirowa okhumelela voohipisa okathi Mesiya onrowa awe olamulelaka elapo!