“Okhala Wira Kingsley Oowerya, Ni Miyo Kinoowerya!”

NUUMALA omukwannya mmakhatani mwawe, Kingsley onipacerya omusoma Biibiliya, nto ole waari mukwaha woopacerya iirela awe mpantta Exikola ya Orummwa wa Muluku mmulokoni. Owo onnisoma khula nuulumo voohitupha etthu. Masi muhaakuve! Xeeni owo onisoma awe ohinwehaka Biibiliya awe?

Kingsley, yoowo onikhala oSri Lanka, khonoona. Nave owo khoniiwa saana ni oneetta ni ekarinyu ya maroota. Moota xeeni mulopwana moota owo omusuwenle awe Yehova mpakha ophwanelela wiilepiha Exikola ya Orummwa wa Muluku? Mukeemererye kootthokiheryeni.

Nihiku naamphwannye aka Kingsley, aahikivara murima mwaha wa osiveliwa wawe ekeekhai ya mBiibiliyani. Owo aahitoko omusoma Biibiliya ni Anamoona anceene, nto eliivuru awe Conhecimento Que Conduz à Vida Eterna, ya eBrail yaari yoowuusuwa.a Owo aheemererya otthikela omusoma Biibiliya, masi naahikhalana mixankiho miili.

Yoopacerya, Kingsley aakhala ni atthu anceene nipuro naakhapeleliwa atthu oowuuluvala ni oorakala. Mwaha wa onyakuliwa wa mapuro ale ni okhala wira Kingsley khoniiwa saana, kahaana olavula moorunya ni moowiiwanyeya. Tthiri khula mutthu aaniwerya wiiwa yoosoma ahu ya khula esumana!

Yanenli, Kingsley aawerya osoma vakhaani ni khaawerya wiiwexexa itthu sinceene khula nihiku naasoma ahu. Wira yoosoma ahu ekhumeleke saana, Kingsley ahaana wiilokiherya saana. Owo ahaana osoma ni otthikela osoma ele yaarowa ahu wiixutta, oweha soolepa mBiibiliyani mwawe, ni olokiherya ele yaarowa awe ohimya akohiwa makoho. Enamuna eyo yaanivareleya muteko. Okathi waasoma ahu, owo aanikilaathi okhunaka metto vantthattoni, annimana vathi okathi waakhula awe makoho olavulaka moorunya aanihimya ele aixuntte awe. Moohipisa, naahipacerya osoma ikwaha piili vasumanani, khula yoosoma yaviriha iwoora piili!

OWIRIYANA NI WIIRELA MPANTTA MITHUKUMANO

Kingsley aaniphavela orowa owiriyana mithukumano Empa ya Omwene, masi khivaarowa okhweya opaka eyo. Owo aatthuneya omukhaliherya owela ni okhuruwa ekarinyu awe, mukaaroni ni okela Empa ya Omwene. Masi atthu anceene a mmulokoni yaaniranttelana wira amukhaliherye, ni awo yaanoona eyo okhala eparakha yuulupale. Okathi wa mithukumano, Kingsley aanireya naaru nawe mpantta waari mulipa oolavula mwaha, aniwiriyana oratteene ni aanivaha ikomentaario!

Nuumala osoma okathi vakhaani, Kingsley aahiphavela wiilepiha Exikola ya Orummwa wa Muluku. Sihalaka isumana piili wira amusome Biibiliya ekwaha yoopacerya, kaahimukoha vakhala wira aahilokiherya yoosoma ele. Owo aahilavula moororomela oriki, “aayo Munna, koolokiherya ikwaha 30”. Kaahimuttottopela mwaha wa wiimananiha wawe ni kaahinvekela wira kaaphavela owiriyana moota aasoma awe. Owo aahimutthukula Biibiliya awe a eBraile, aahipweha ikatha sawe, nto aahipacerya osoma. Masi, kaahoona wira ikatha sawe khiseetta vapapheloni ntoko siniiriwa aya mutthu aasomaka eBraile. Owo aahihela mmuruni masu a nipuro nle notheene na mBiibiliyani naarowa awe osoma!

Akimoraka maithori owiitho, miyo kaaninwehexexa kihaaminiki. Nto kaahimukoha wira aawerya sai wuupuwela oratteene variki aalokihenrye ikwaha 30 paahi. Owo aakhunle so: “Nnaari, miyo kinilokiherya ikwaha 30 khula nihiku”. Muhina mwa mweeri ntero, Kingsley aanikilaathi vantthattoni vawe khiyasoma mpakha ohela mmuruni masu otheene.

Nto naahiphiya nihiku na orowa opaka mpantta awe Empa ya Omwene. Nuumala osoma, muloko wotheene waahoopa makuphi mootteeliwa murima, nto atthu anceene yaahimoroxa maithori mwaha wa wiilipiha wa naxikola ole musya. Namalaleerya mmosa, yoowo aahiiye olavula myaha sa exikola mwaha wa woova, aahivekela wira otthikele olempwa exikola. Mwaha wa xeeni? Murokora owo aalavunle so, “Okhala wira Kingsley oowerya, ni miyo kinoowerya!”

Nihiku na 6 a Setembro, 2008, nuumala omusoma Biibiliya iyaakha tthaaru, Kingsley aahivahererya ekumi awe wa Yehova nto khubatiziwa mmaasini. Owo aarina Namoona oororomeleya mpakha nihiku okhwiiye awe 13 a Maio 2014, Kingsley aaniroromela wira elapo yakhala eParayiisu, owo onrowa otthikela omurumeela Yehova orineene ekumi yooloka ni yoomalela. (Yes. 35:5, 6)​—Elavuliwe ni Paul McManus

[Enoota]