Niireke Munoona Wira Muluku Ohookhulumulani?

“XEENI KINIHAAWA AKA? Xeeni Muluku ohiyale awe etthu ela ekiiraneelaka?” Makoho awo yaanimuxankiha Sidnei oBrasil, okathi aarina awe iyaakha 24. Ehasara ya osareya wa maasi yaakhumelenle yoomwiiriha weettaka ni ekarinyu okumi awe wotheene.

Ohaawaonikumiheriwaniehasara,iretta,okhweliwa mmusi onimphenta ahu, ehasara ya ephattu ni ikhotto pooti omwiiriha mutthu onyoonyiheya ni Muluku. Masi eyo khahiyo etthu ya niinano. Muhavinre Yobi, saahimphwanya mixankiho sinceene. Nto aahinvaha nthowa Muluku, oriki: “Miyo kinnokhuwelelani: nyuwo khuhinakakhula; kinnovarelani metto, muhinakikhapelela. Nyuwo munnikihaxa n’uwali: munnikilupattha n’ikuru sa matat’anyu”.​—Yobi 30:20, 21.

Yobi khaamusuwela ole aakumiherya mixankiho sawe ni nthowa naya saamukhumelela aya mixankiho iye. Moohakalaliha, Biibiliya onninleela nthowa naya sinikhumelela aya mixankiho ni moota nikhanle ahu ooxintta.

NIIREKE MULUKU AAPHAVELA WIRA ATTHU EHAAWEKE?

Voohimya sa Muluku, Biibiliya oni: “Owo t’ikuru sahu: miteko sawe ti soloka, iphiro sawe sothene ti sa xariya. Muluku ahu t’òroromeleya: owo khannòtotha. Owo t’àxariya ni t’owòkololowa”. (Otumererya 32:4) Nto vakhala wira ti siiso, niireke Muluku yoowo ori “axariya ni owòkololowa” oniphavela wira atthu ehaaweke? Niireke onnirumeela ihasara sa ephattu wira aahukhumu atthu wala waareeriha?

Nnaari. Biibiliya oni: “Mwehereriwaka, muhihimyé wira: ‘Muluku t’onkehererya’. Tthiri Muluku khanwerya wehereriwa ni sotakhala: yowo mwanene khanimutthekiha mutthu”. (Yakobo 1:13) Biibiliya onooniherya wira woopaceryani Muluku aapattunxe atthu oomalela. Owo aahaavaha Adamu ni Eva opuro wooreera, itthu sootthuneya mookumini, ni muteko wooreera. Muluku aalenle so: “Mwayareke an’inyu, munjerereyeke: musareyeke mulaponi mothene. Mwettiheke elapo yothene”. Adamu ni Eva khiyaarina mathowa oowoona wira Muluku aahaakhulumula.​—Maphattuwelo 1:28.

Masi, olelo-va okumi ahu ti woohimalela. Atthu annihaawa vanci. Tthiri anniireya masu ani: “Sopattuxiwa sothene nlelo sinnìpulela, sinnihawa ntoko muthiyana ayaraka”. (aRoma 8:22) Exeeni ekhumelenle?

XEENI ATTHU ANIHAAWA AYA?

Wira nisuwele mathowa aya, nihaana wuupuwelela okathi itthu sipacenrye aya. Awokiwaka ni Satana Diabo, Adamu ni Eva yaahikhootta malamulo a Muluku a othanla yooreera ni yootakhala vaavo yaalyiye aya ‘muhokorokho wa mwirí wasuweliha oreriwa n’utakhaliwa’. Diabo aahaaleela Eva wira khiyaarowa okhwa akhala wira yaamukhootta omwiiwelela Muluku; nto aahimootherya Muluku okhala nawoothe. Satana aahihimya wira Muluku onaakhoottiherya atthu ehakhi ya othanla mmansaya yooreera ni yootakhala. (Maphattuwelo 2:17; 3:1-6) Satana aahimya wira atthu yaamukhala saana ahilamuleliwaka ni Muluku. Nto nookhumela nikoho nootthuneya nni: Niireke Muluku aahikhalana ehakhi yoolamulela?

Satana aahikumiherya mwaha mukina. Owo aahiwootherya apinaatamu wira animurumeela Muluku aphavelaka waakhela etthu. Voohimya sa naxariya Yobi, Satana aamulenle Muluku wira: “Nyuwo munnimwakiherya sotakhala sothene vamosá n’itthoko awe ni mihakhu sawe sothene .  . . Masi mmwehererye yowo: mpwetexe mihakhu sawe sothene. Munimona wira owo onrowa wovehani”. (Yobi 1:10, 11) Nnaamwi masu awo yaamuhimya Yobi, Satana aahimya wira atthu otheene animurumeela Muluku aphavelaka waakhela etthu.

MOOTA MULUKU OPHUNKE AWE MYAHA IYO

Nto saarowa ophukiwa sai myaha iyo mwa ekwaha emosa paahi? Muluku, yoowo onisuwela itthu sotheene, aanisuwela moota woophuka mwaha owo mwa enamuna yaarowa oniphwanyiha mureerelo. (aRoma 11:33) Owo aahilakela waahiya apinaatamu elamulelanaka yaaworu wira ooniherye okhulupale awe.

Itthu sootakhala siniireya olelo-va valaponi, sinooniherya wira olamulelo wa apinaatamu khokhumenle saana. Tthiri anamalamulela a olumwenku khaniwerya oruuha murettele ni ohakalala valaponi, ni annihonona elapo. Eyo ennivarihana ni ekeekhai ya Biibiliya eni: “[Mutthu] khanwerya wettiha mavalo awe”. (Yeremiya 10:23) Olamulelo wa Muluku paahi tokhanle ooruuha murettele wekeekhai, ohakalala, ni waaphwanyiha mureerelo atthu, maana eyo ti etthu Muluku eniphavela awe.​—Yesaya 45:18.

Muluku onrowa omaliherya sai yoolakela awe? Muupuwele wira Yesu aahiwiixuttiha atthareli awe ovekela wira: ‘Omwene anyu orwe; otthuna wanyu wireye ntoko wirimu siso vathí-va’. (Mattheyo 6:10) Tthiri mwa okathi wooreerela, Omwene wa Muluku onoomaliha itthu sotheene sinikumiherya ohaawa. (Daniyeli 2:44) Ohaawa, iretta, ni okhwa onoomala. Alavulaka sa ohaawa, Biibiliya oni: “[Muluku] onowòpola alipa-òhawa animukhuwelela”. (Esalimo 72:12-14) Voohimya sa iretta, Biibiliya oni: “Khavo-tho onkela ohimya wira: ‘Miyo ki muretta’”. (Yesaya 33:24) Alavulaka sa alipa ookhwa yaawo anuupuweliwa ni Muluku, Yesu aahimmye so: “Onophiya okathi onìraya atthu othene ari mmahiye, yiwe nsu na Mwana a Mutthu, ekhume mmahiye”. (Yohani 5:28, 29) Tthiri yooleiherya eyo ti yoovara murima!

MOOTA WOOMALIHA OKHULUMUWA

Soovira iyaakha 17 okhuma okathi emukhumelenle aya ehasara Sidnei yoowo oromoliwe wanipacerya. Owo onihimya so: “Miyo nkininvaha nthowa Yehova Muluku mwaha wa ehasara ele, masi wanipacerya kaahinyoonyiheya ni yena. Ikwaha sikina kinniriipiwa murima ni wunla vaavo kinuupuwela aka oretta aka. Masi Biibiliya ookiixuttiha wira ehasara khahiyo ehukhumu ya Muluku. Biibiliya onihimya wira ‘oreriwa n’utakhaliwa khunimuthanla mutthu’. Nto onvekela Yehova ni omusoma Biibiliya, onnilipiha waamini waka ni okihakalaliha”.​—Musuweli 9:11; Esalimo 145:18; 2 aKorinto 4:8, 9, 16.

Wuupuwelela mathowa aya Muluku oneemererya awe wira ohaawa ovikaniheke ni moota mixankiho iyo sinirowa aya omalihiwa moohipisa, onninikhaliherya ohoona wira Muluku ookikhulumula. Ninnikupali wira Muluku “onnatthuvela ale animphavela”. Nto, atthu otheene animwaamini Muluku ni Mwanawe, khanrowa okhulumuwa.​—aHéberi 11:6; aRoma 10:11.