Moota Ophenta wa Muluku Onoophwanyihayani Mureerelo
Muluku opattunxe erutthu ahu mwa enamuna yootikiniha wira yiipenuxeke wala wiivoniha mmansaya. Universidade Johns Hopkins ehimmye wira okathi ninvulala ahu, osurupuwa, aahiiso ohommwa, erutthu ahu ennipacerya “ovara muteko mmansaya wira evolihe nikhwatta nlo, hata nikhalaka nuulupale waala naamukhaani”. Moohipisa erutthu ennipaka etthu wira ephome emaale okhuma, enniwala mitika sa ephome, ni olipiha murala.
MUTHOKORERYE ELA: Okhala wira Mpattuxa ahu opanke erutthu ahu wira eweryeke wiivoliha nuumala ovulala, niireke eyo khenniroromeliha wira owo onninikhaliherya ovilela okathi nintthekeliwa ahu? Nasalimo aalavunle so: “Muluku onimwahakalaliha aripiwe murima: onovoniha makhwatt’aya”. (Esalimo 147:3) Vakhala wira munniriipiwa murima vanceene mwaha wa itthu sookhumelenleni khalai munrowa okupali sai wira Yehova onoomaliha oriipiwa wanyu murima, vano ni muhoolo?
ELE BIIBILIYA ONIIXUTTIHA AWE VOOHIMYA SA OPHENTA WA MULUKU
Muluku onileiherya wira: “Muhové! Miyo kiri ni nyuwo. Muhivelavelé! Miyo ki Muluku anyu. Miyo kinnolipihani: kinnokhaliheryani”. (Yesaya 41:10) Mutthu onisuwela wira onnithokoreriwa ni Muluku onnikhalana murettele mmuupuweloni ni onniwerya ovilela mixankiho sinimukhumelela. Murummwa Paulo onnihimya murettele owo okhala “murettele wa Muluku, onvikana osuwela wa mutthu”. Paulo aahimmye-tho so: “Kinniwerya sothene mwaha wa Kristu onkivaha ikuru”.—aFilipi 4:4-7, 9, 13.
Nuulumo na Muluku ninninikhaliherya olipiha waamini wahu itthu Muluku aaleihenrye awe apinaatamu. Mwa ntakiheryo, Wisupulula 21:4, 5 (oniromoliwa epaaxina enittharelana), oninleela itthu Muluku onrowa awe opaka ni nthowa naya nintthuneya ahu ororomelaka sooleiherya iyo:
“Owo [Muluku] onopuputtha maithori aya othene”. Yehova onoomaliha ohaawa ni ovela-vela wahu wotheene, nnaamwi atthu akina ahoonelaka vatthu.
“Muluku akilanthe vehijeni” moovuwani wa wiirimu, yoowo ori Mwene Oowerya opattunxe itthu sotheene, onoorumeela owerya wawe ni okhulupale awe wira omalihe ohaawa ni onoonikhaliherya mwa inamuna sotheene.
Yehova onninlipiherya wira sooleiherya sawe ti ‘sòroromeleya ni ti sekekhai’. Orumeelaka nsina nawe ni ororomeleya wawe, Yehova onninlipiherya wira onimwaakhwaniherya moolumo awe.
“Owo onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira. Vano, Muluku akilanthe vehijeni ahira: Mone: itthu sothene miyo kokhaliha isyá! Siso-tho ahikihimerya wira: Mulepe etthu ila, okhala wira molumo aka t’òroromeleya ni t’èkekhai”.—Wisupulula 21:4, 5.
Makhalelo a erimu ni elapo vamosa ni Biibiliya, annooniherya mikhalelo sa Tiithi ahu a wiirimu. Nnaamwi itthu sipattuxiwe sooniheryaka wira vannireerela omusuwela Muluku ni okhala Mpatthani awe, nave Biibiliya onnoolattulani mowiiwanyeya ohimyaka so: “Mmwattameleke Muluku: Muluku onowattamelani”. (Yakobo 4:8) Miteko 17:27 onihimya so: “Tthiri Muluku khankhala ottaiwene ni hiyo”.
Vakhala wira munimwiivaha okathi wira mmusuwele Muluku, munooweha mmansinyu wira owo “onnokhapelelani”. (1 Pedru 5:7) Mireerelo xeeni nimphwanya ahu mwaha woomuroromela Yehova?
Muthokorerye etthu yaamukhumelenle Toru, a oJapão. Owo aahuuwale ni amamawe yaawo yaari muKristau. Masi hata vari siiso aahikela egrupu ya anakirime ootakhala a oJapão yaitthaniwa yakuza. Owo onihimya so: “Miyo kaakupali wira Muluku aanikinyokha ni aaniwiiva amusi ni apatthani aka wira okihukhumu mwaha wa mweettelo aka wootakhala”. Toru onihimya wira mwaha wa winnuwa ni makhalelo oohiloka, ‘aari mutthu oowaakuva otthekeleya, ni khaamoriwa ikharari’. Nave ohimmye so: “Kinnuupuwela wira kiri ene mmiravo nkaaphavela okhwa kihimwiivale mutthu oovuwa vanceene, kaaphavela wira kakhwa-vale nsina naka nihaleke nilavuliwaka”.
Masi, vaavo Toru ni mwaarawe, Hannah, yaamusomme aya Biibiliya, Toru aahipaka marukunuxo manceene mookumini mwawe. Hannah onihimya wira: “Kaaniwoona aiyaka apakaka marukunuxo”. Vano, Toru onihimya so: “Tthiri Muluku onnimuthokorerya khula mutthu. Owo khoniphavela omoona mutthu okhwaaka, nave owo onnimulevelela ni murima wotheene mutthu yoole onittharuwa mwekeekhai soottheka sawe. Owo onniweha ni onnisuwela itthu sihinooniwa ni sihinisuweliwa ni atthu akina. Muhoolo, Yehova onoomaliha mixankiho, ohaawa, ni oriipiwa murima. Vano, owo onninikhaliherya mwa inamuna nahaalipelela ahu. Owo onniniphenta ni onninikhaliherya okathi oniriipiwa ahu murima”.—Esalimo 136:23
Sintoko enooniherya aya yowiiraneya ya Toru, osuwela wira moohipisa Muluku onoomala-maliha ihasara ni onoopuputtha maithori ahu, onninivaha nlipelelo na muhoolo nave-tho onninikhaliherya okhalana ekumi yooloka vano. Tthiri, nnaamwi olelo-va ohaawa wuulanne ene molumwenkuni, nyuwo pooti ottottela mureerelo ophenta wa Muluku.