Noophwanya “Maluku Òwarya Òrerexa”

Winston, xontte munleele, mpacenrye sai ophavela ekeekhai.

Anamuyari aka khiyaarina etiini ni naakhala empa yarakamenle vakhaani epooma ya oQueensland, wAustrália. Okhala wira naakhala nipuro noorakamela, atthu kaatanne aka yaari amusi aka paahi. Vano okathi kaarina aka iyaakha 12, kaahipacerya ophavelasa osuwela ekeekhai voohimya sa Muluku. Kaahipaka nivekelo kinvekelaka Muluku wira kisuwele ekeekhai awe. Nuuvira okathi, kaahikhuma etthoko ya anamuyari aka, kiphwanya muteko epooma ya wAdelaide, mpantta wa okuusini wa wAustrália. Okathi kaarina aka iyaakha 21, kaahirowa oviriha ifeeriya saka oSydney, epooma ele kaahimusuwela Pam, owo aahikileela voohimya sa israelismo-britânico, egrupu emosa ya etiini yaawo anikupali wira mabritânico osuulu wa “maloko muloko oorimeela a wIsarayeli”. Moovarihana ni yoohimmwa eyo, maloko muloko yaarimenle antaphulela maloko muloko a Isarayeli yaakhala mpantta onikela epheyo, yaawo yaaroihiwe weepotthani iyaakha 800 ni 700 Kristu ohinatthi orwa. Vaavo kaatthikenle aka elapo ya wAdelaide, kaahimukoha itthu saakixankiha mulopwana kaavarana aka muteko, yoowo aapacenrye omusoma Biibiliya ni Anamoona a Yehova. Nuumala ovaanela iwoora vakhaani voohimya sa sookupali sa Anamoona kaahoona wira nivekelo kaapanke aka kiri ene mwaana naahaakhuliwa. Kaahipacerya wiixutta ekeekhai voohimya sa Mpattuxa ni Omwene awe! Nto kaahoona wira kaahiphwanya “maluku òwarya òrerexa”.​—Math. 13:45, 46.

Noosuwela wira nyuwo Pam mpacenrye ophavelasa maluku oowaarexa muri ene mwali. Mphwannye sai?

Anamuyari aka yaahikhalana etiini, naakhala epooma ya oCoffs Harbour, epooma enikhala oNova Gales do Sul. Anamuyari aka ni anamuyari aya yaanikupali soowiixuttiha sa israelismo-britânico. Miyo, murokoraka ni muulupale aka ni axirokoraka ni axihima aka ayariwe ni amaama akhaani, yaahiixuttihiwa wira Muluku onnaavaha efaita vanceene atthu a nloko Britânico. Masi miyo nkaakupali yowiixuttiha eyo ni kaanoona wira kaahaana omusuwela Muluku. Nto okathi kaarina aka iyaakha 14, kaahixukurya ikerexa sinceene sa muttetthe aka ntoko ekerexa Anglicana, ekerexa Baptista, ekerexa adventista do sétimo dia ni ikerexa sikina. Masi ikerexa iyo khisaakikhalihenrye omusuwela Muluku.

Nuuvira okathi emusi aka yaahithaamela oSydney, weiwo kaamusuwenle aka Winston okathi ari awe ifeeriya. Ntoko ohimmye awe, naamakela ovaanela voohimya sa etiini, nto eyo yaahikiiriha opacerya omusoma Biibiliya ni Anamoona a Yehova. Okathi naanamorari ahu, naanilepelana iwarakha, soosareya soolepa sa mBiibiliyani. Ohimya ekeekhai, wanipacerya kaahixanka vanceene ni okathi mukina kaaninanariwa. Masi nuuvira okathi, vakhaani-vakhaani kaahipacerya woona waarya wa ekeekhai.

Mwaakha wa 1962, kaahithaamela wAdelaide wira kimwaattamele Winston. Owo aahiphavelasa opuro wira kikhaleke etthoko ya anamathelana Anamoona a Yehova Thomas ni Janice Sloman, yaawo yaari mamisionaario oPapua Nova Guiné. Awo khiyaareere okireerela murima. Okathi owo kaarina iyaakha 18, nto yaanikikhaliherya vanceene wunnuwa momunepani ni omusuwela vanceene Yehova. Miyo nave, kaahipacerya omusoma vanceene Biibiliya, nto moohipisa kaahikupali tthiri wira koophwanya ekeekhai. Nuumala miyo ni Winston othelana, moohipisa naahipacerya ophwanya mareeliho manceene mmutekoni mwa Yehova. Hata naarina mixankiho sinceene, naahikhalana eparakha ya wooniherya moota naavaha ahu efaita maluku oowaarexa naaphwannye ahu.

Winston ni Pam, xontte mookhala oonileela moota saari aya iyaakha mpacenrye anyu muteko wa Yehova?

Tthiri moohipisa nuumala othelana, Yehova aahihula mikhora onivahaka “ovara muteko muulupale” ni soothanleliwa soohakalaliha wira nincererye muteko nanvarela ahu. (1 aKor. 16:9, Biibiliya Solempwa sa Muluku) Mukhora woopacerya nooniheriwe ni Munna Jack Porter, yoowo aarumeela muloko ahu mwaamukhaani ntoko mutokweene a esirkwiitu, (olelo-va, ninrumeela vamosa ntoko Nikhuuru na Ekomisau ya Efiliyaali ya wAustralásia.) Jack ni mwaarawe oniihaniwa Rslyn yaahintumererya okhala mapioneero a vameekhaaya. Muteko yoowo nivanre ahu mwa iyaakha 5. Okathi kaarina aka iyaakha 29, miyo ni Pam naahivekeliwa ovara muteko wa esirkwiitu Isisiro sa oSul do Pacífico, weiwo waakhapeleliwa ni eBetheli ya oFiji. Muteko ahu wa esirkwiitu waakhuma oSamoa ya wAmérica, oSamoa, oKiribati, oNauru, oNiue, oTokelau, oTonga, oTuvalu ni oVanuatu.

Mahiku ale, atthu akina yakhala mapuro oorakamela a isisiro iye, yaaniwoova Anamoona a Yehova, nto naahaana wiipasoopa ni okhala atthu oomaala. (Math. 10:16) Okhala wira miloko saari saamukhaani, okathi mukina anna akina khiyaakhalana opuro wira nimake. Tivonto naahaakoha atthu a muttetthe ole akhala wira yaamunivaha opuro woorupa, nto okhala wira yaari atthu ooreera murima okathi wotheene yaaninthokorerya saana.

Winston, nihoona wira muteko wootaphulela onnoosivelani vanceene. Exeeni eniwiirihani woosivelani?

Okathi ole, anna yaakhala esisiro ya oTonga yaarina itratato ni ilivirinyu vakhaani paahi sa nttaava na eTonga nenno ninlavuliwa elapo ya oPolinésia. Vaavo yaalaleerya aya yaarumela eliivuru A Verdade Que Conduz à Vida Eterna ya Enkelexi. Vano naahikhalana exikola ya axitokweene yaavirinhe isumana xexe. Axitokweene araru yaasuwela olavula vakhaani Enkelexi yaahiivahererya otaphulela eliivuru A Verdade nttaava na eTonga. Pam aahivekeliwa olepa eliivuru yotheene yootaphuleliwa, nuumala-vo naahiroiha eBetheli ya wEstados Unidos wira yimpirimiriwe. Muteko owo wotheene waavirinhe isumana 8. Nnaamwi yahaataphuleliwe oratteenexa, eliivuru ele ehaakhaliherya atthu anceene anilavula eTonga wiixutta ekeekhai. Miyo ni Pam khanihiyo anamataphulela, masi sookumanana iyo soonikhaliherya osiveliwa muteko wootaphulela.

Pam, makhalelo yaari sai musisironi nalikanyiha ni makhalelo a wAustrália?

Tthiri makhalelo yaari oovirikana! Khula muttetthe waahikhalana mixankiho ntoko apwilimwithi, oviha ni oriirya, makhule, iretta ni okathi mukina yaaninthowa yoolya. Wira nihitepe oxanka mwaha wa itthu iyo, makaaripi wa khula nihiku, naaniphumurya okathi vakhaani niwehaka soopattuxiwa ophareya nri ene empa ahu eniihaniwa fale, nsina na ipa sintthunyeliwa ni mikhutta ni soohixiriwa, nto fale nuulumo na nttaava na eSamoa ninlavuliwa oPolinésia. Ohiyu vaavo mweeri waarya awe, naaniwerya owoona akorooro ni waarya wa mweeri mphareya. Makhalelo awo ooreera yaaninikhaliherya wuupuwelela ni ovekela, nto mwaha woopaka eyo naanikhalana muupuwelelo wooloka.

Naanaaphenta anamwane, awo yaanisiveliwa ni ohakalala vanceene vaavo yaaniweha aya hiyo akunya. Vaavo naaxukurya ahu oNiue, mmiravo mmosa aahivara moono wa Winston onahimya wira: “Okisivela manri a moono anyu”. Kinoona wira mmiravo ole khaatonko oweha moono orina manri ni khaasuwela nsina naya!

Etthu ekina yaaniriipiha murima waari woona wira makhalelo a atthu ale yaari oohiloka maana khiyaareere ohaawa. Nnaamwi yaakhala mapuro ooreera, awo khiyaarina okumi wooloka ni khiyaarina maasi anreerela owurya. Hata vaari siiso vanikhala wira anna ni arokora khiyaaxanka vanceene. Maana yaahilimalela makhalelo awo. Nave yaanihakalala okhala vamosa ni imusi saya, okhalana mapuro ookokhorela ni okhalana eparakha ya omurumeela Yehova vamosa. Ntakiheryo naya noonikhaliherya owehexexa itthu sootepa otthuneya ni okhweiherya okumi ahu.

Okathi mukina mwaha wa ovila makhalelo, vaanivila ophwanya maasi oowaapeela. Pam, mwaawerya sai ophwanya?

Miyo kinnimuxukhurela vanceene paapa aka. Owo ookiixuttiha itthu sinceene, ntoko moota woopattiha mooro vaikho, moota woorumeela wira naapeye ni moota woovikaniha okhala ni mireerelo vakhaani. Okathi omosa naaxukurya ahu oKiribati, naamanke empa yaamukhaani yaatthunyeliwe ni mikhutta ni yaaxiriwe ni mithala. Wira naapeye yoolya yookhweya, naahaana othipa nlitti ni opattiha mooro munlittini mmo, nuumala-vo kaahaana orihela ikafulu wira mooro owo ovikaniheke opatta. Wira kirike maasi kaahaana orowa weehimeni ni athiyana akina a mapuro ale. Athiyana ale yaarumeela mukopo waalikana ni mukopo ommiseryaniwa, yoowo waakhalana imeeturu 2 ni mukhoi mwaamukhaani waatthukweleliwa oponta wa ekopo eyo. Masi ohiya omuhele coolo waaponta waya, awo yaahela ekoopho yuulupale. Nto muthiyana mmosa aanirihela mukhoi ni ekoopho mmaasini onapwiniha. Nuumala-vo, ekoopho eyo yaanisareya maasi. Miyo koona wira yaari etthu yookhweya, masi vano waahiphiya okathi aka. Kaahirihela mmaasini ekoopho aka masi ikwaha sotheene kaarihela aka nkaawerya orika maasi, maana yamphempa! Nuumala athiyana otheene omaala okitheya, mmosa aahikireerela murima khukikhaliherya. Atthu ale tooreera murima ni tookhaliherya.

Otheene anyu mwaanisiveliwa vanceene yoothanleliwa anyu musisironi. Mookhala oonileela itthu siwiiranenleni muhinliyala anyu?

Winston: Waahivira okathi wira nlimalele makhalelo makina. Mwa ntakiheryo, vaavo anna yaanivaha aya yoolya yoowaapeiwa, awo yaaninivaha yotheene yaarina aya. Masi khinaasuwela wira naahaana waahiyerya mpantta mukina wira ahaleke alyaaka. Nto itthu sotheene yaanivaha aya hiyo naamoolya iphu! Tthiri nuumala osuwela wira naahaana waahiyerya mpantta mukina, naahipacerya opaka eyo. Nnaamwi naavonya, anna yaaninivilela ni onipixerya murima. Vaavo naahokolowa ahu nuuvira myeeri 6, otepexa wene muteko wa esirkwiitu, anna yaanihakalala vanceene. Anamoona yaasuwela aya naari hiyo paahi, mwaha woowi anna ale khiyaathukumana ni Anamoona a miloko sikina.

Oxukurya wahu waanivaha onamoona mmuttettheni. Atthu akina a mmuttettheni yuupuwela wira Anamoona a Yehova yaari etiini yaapakeleliwe ni anna a mmulokoni. Nto vaavo yaaweha aya arumeyi a okathi wotheene a ilapo sikina ni axaaraya axukuryaka muloko, atthu a mittetthe iye yaanisuwela wira Anamoona a Yehova khahiyo etiini yoopakeleliwa masi mutthenkeso wa olumwenku wotheene.

Pam: Etthu kihinliyala aka yiiraneyale oKiribati, muloko yoowo yaari anna ni arokora vakhaani paahi. Muloko ole waarina mutokweene mmosa iitthaniwa Itinikai Matera, nto aaniimananiha vanceene onikhapelela. Nihiku nimosa aahirwa owannyihu omukunxe ene kaaphiyaka khunivaha nooce nimosa. Owo aahimmye so: “Kirimoovahani, mukuxeke”. Muttetthe ole, waanivila ophwanya nooce na mwalyakhu. Yoovaha ele yaamukhaani, masi enooniherya othokorerya, yookivara murima vanceene.

Iyaakha vakhaani muhoolo mwaya, Pam mookhweliwa mwaninyu mmurupanle ene. Exeeni yookhalihenryeni ovilela?

Kaarupanle mwaakha wa 1973 nlelo miyo ni Winston nri ene oPacífico do Sul. Vano naahuupuwela otthikela wAustrália, nuuvira myeeri mixexe mwanihu aahikhwa. Miyo ni Winston naahixanka ni oriipiwa murima vanceene. Nuuvira okathi, woona waka owerya waahipacerya ovukuwa, masi waamanle nuumala okumiheriwa mwaha erevista A Sentinela 15 de Abril de 2009. Mwaha ole waarina muru waahimya so: “Existe esperança de ressurreição para um bebê que morre no ventre da mãe?” mpantta wa makoho anikohiwa ni ale anisoma irevista sahu. Mwaha ole waahinuupuxerya wira naahaana omuhiyerya Yehova, maana okathi wotheene owo onipaka itthu sooloka. Yehova onrowa omaliha mixankiho sotheene sikumiheriwe mwaha wookhala olumwenku wootakhala ni onrowa omurumeela Mwanawe wira “apwetexe miteko sa Satana”. (1 Yoh. 3:8) Mwaha ole woonikhaliherya ovikaniha ovaha efaita “maluku òwarya” yaawo Yehova onaavaha awe atthu awe. Tthiri naamutepaka oxanka nahaakhalanne nlipelelo Omwene onnivaha aya.

Nuumala mwanihu okhwa naahitthikela ovara muteko wa Muluku wa okathi wotheene. Noorumeela myeeri vakhaani eBetheli ya wAustrália, nuumala-vo naahitthikela muteko wa osirkwiitu. Mwaakha wa 1981, nuumala orumeela myaakha mixexe oNova Gales do Sul, oSydney naahilattuliwa orowa orumeela-tho eBetheli ya wAustrália, opuro yoowo ninrumeela ahu mpakha va.

Winston, niireke sookumanana sanyu okathi mwaarumeela anyu Isisiro sa oPacífico do Sul sihookhaliheryani ovara muteko ntoko membro a Nikhuuru na Ekomisau ya eFilial ya wAustralásia?

Aayo, mwa inamuna sinceene. Wanipacerya, eBetheli ya wAustrália yaanikhapelela muteko woolaleerya elapo ya oSamoa Americana ni oSamoa. Nuuvira okathi eBetheli ya wAustrália ni oNova Zelândia saahitakaahiwa. Vano, eFiliyaali ya wAustralásia ennikhapelela muteko woolaleerya wa wAustrália, oSamoa Americana, oSamoa, Isisiro sa Cook, oNova Zelândia, oNiue, oTimor-Leste, oTokelau ni oTonga, miyo kaahikhalana eparakha yooxukurya ilapo iyo sotheene ntoko munna orummwale ni efiliyaali. Sookumanana kiphwannye aka okathi kaavara aka vamosa ni anna ni arokora awo oororomeleya sookikhaliherya vanceene. Vano kinniwerya waarumeela anna awo kiri ene oBetheli.

Wira kimalihe, kimphavela ohimya wira mwa iyaakha sinceene miyo ni Pam nihoona wira atthu aalupale ni anamwane anniphavela omusuwela Muluku. Nihiixutta eyo ni yookumanana ahu. Amiravo anniphavelasa “maluku òwarya òrerexa” hata amusi aya ahiphavelaka ekeekhai. (2 Mam. 5:2, 3; 2 Wah. 34:1-3) Tthiri, Yehova Muluku oophenta ni oniphavela wira atthu othene amiravo ni atthu oowuuluvala aphwanye ekumi ehinimala!

Vaavo miyo ni Pam naapacenrye ahu ophavelasa ekeekhai ni omusuwela Muluku iyaakha sinivikana 50 sivinre, khinaasuwela ophavelasa iwo opuro waarowa aya oniroiha. Tthiri ekeekhai ya Omwene yookhalana efaita yuulupale! Tivonto nimphavela ovarexexa nluku nna noowaarexa niphwannye ahu!